CAWA'TA TUNITA 28
28
Yakub pir hay Mesopotamiya
1Isaak yi Yakub, gum bolo, ka dum ala: Naŋ ma sli ca jar guro-boy sa hay Kanaanɗi. 2Fokaŋ kulo'o, tuɗaŋ hay Padan-Aram, hay ziyna vi Betuwel ma bum suŋŋa, naŋ ma sli cat jar gurona vi Laban ɓasum suŋŋa. 3Lawn ma Gaŋeraŋ-Petna ma gaŋ bolo, nam ma hinaŋ vuɗ gurona, biyaŋ ŋolo kaw, kay a naŋ ma muɗ mi bum jaf-sumun ŋolo. 4Bolda ta nam ga' mi Abrahamta nam ma vulaŋga ta', vula' mi jafna vaŋ lay, kay a nagat ta Lawn vula'ays mi Abraham, ta naŋ musi haya' wulin ki rogoy nala damni, na' ma muɗ goy vaŋu. 5Isaak gi ir Yakub, nan kalay hay Padan-Aram, goy vi Laban goora vi Betuwel ma Arameena, namu mi ɓasun Rebekka, sum Yakub hiɗi Esaw.
6Wulini Esaw wi ala Isaak gi bolawa kay Yakub, nam gum iramawa hay Padan-Aram kay sli cata, hay li ma nam gum bol kaw nam dum ala nam ma sli cat jar gurona vi Kanaanɗi. 7Nam wiyawa kaw ala Yakub humi kuɗ vun bulumu hiɗi sulumu, nam kalay hay Padan-Aram kaw. 8Nala Esaw wi ala gurona vi Kanaan may kir bulum Isaak ŋaaɗi. 9Esaw tun iram kat Ismayel. Nam sli cat tara' ay tam segena. Nam sla' kayni ti Mahalat ɓasum Nebayotta. Na' ti goota vi Ismayel goora vi Abraham.
Yakub wi gu-ma-jikŋa
10Yakub fokis hay Ber-Seba pa kalay hay Karan. 11Nam co hay liyn mara'a, nam bur gaa haya, kay fatta ay ɗigiya, nam sli hiɗiyna, tunum gaa kuɗ yalam ɗigali, nam bur hay liy namna. 12Duwayt ka dum ala: Gu-ma-jikŋa vunam piys gaa kay nagat pa, sinem coy ta-ta kulo dukalawna. Nam ɗuw kayni sunda-wuralawna ka jik talamu. Jik misi kulo'o, hotay misi gaa'a. 13Ma-Vatɗina ka coli kulo sin gu-ma-jikŋa, nam ka di'e: Nanu mi Ma-Vatɗina, Lawna vi buŋu Abraham, Lawna vi Isaak kaw. Nagat ta naŋ buri ka'ta waŋŋi, nan min vula' maŋ naŋu hiɗi jafna vaŋu. 14Jafna vaŋu ma li ŋolo ki ŋesl ma gaa kay nagata nala; vun-liyna vaŋ ma kal ta-ta hay gal ma vulatina hiɗi gal ma kuɗuwna, gal ma gaana hiɗi ma kayamna, jaf-sum sa hay nagat noŋ kaf ma fi bolda ɗawn kuɗaŋ naŋu. 15Humaŋu, nan ka hiɗi naŋu, nan ma ŋomaŋu hay liyn kaf ma naŋ tuɗ haya, nan ma hotaŋay hay nagat tani, nan as hinaŋ goyɗi ta-ta va ma nan daŋ kalamna ma li goyo.
16Yakub zliy kulo'o hay semda, nam di'e: Dolay nan kiranɗi kayn Ma-Vatɗin ka hay liyn tan gasiya. 17Nam li nari, nam di'e: Liyn tan sa liwimɗi, ziyna vi Lawn ka tani, vun-galana vi wuralawn ka tani. 18Yakub fok kulo graw culum culum; nam sli hiɗiy ma nam tunum kuɗ yalam ɗigalla, nam molom kulo ɗiŋiriŋi, nam ɦok mul hay yalam ma kulona. 19Liyn namna nam tunum selem ala Betel, may hoyok-ziyn yum jew ala Luz. 20Yakub yi va kalamu nam di'e: La Lawn ka hiɗi nanu, la nam ŋoman hay rogoy ta nan la'ta kayni, la nam vulan fu ma ti'e, vulan sligar ma cuk tanu kaw, 21la nan hotawa hiɗi sle'ta hay ziyna vi bunu, hay na'ta Ma-Vatɗin ma muɗ mi Lawna vanu. 22Hiɗiy namna na nan jakam kulo ɗiŋiriŋ zawni ma muɗ mi ziyna vi Lawna, nan ma vulum gal-ma-doogona vi sle ma nam vulanti kafna.
Aktuálne označené:
CAWA'TA TUNITA 28: Massana
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
BIBALDA TA PELDETTA © L'Alliance Biblique du Cameroun, 2001