Yuhunna 12
12
Betaniyat Isare dami ator ḍoli diye
(Moti 26:6–13; Mark 14:3–9)
1Uddar idor só din age Isa Betaniyat aišše, heṛe he Lazarus aššil, zare hibaye morattu tuille. 2Heṛe hiballa ek hánar entezam gora oiye, ar Martáye hána bari dil, ar Lazarus o hibar fũwati hánar ṭebilot boiššilde hitarar maze. 3Hen šomot Moriyame ada liṭar beši dami, haṭi ator aniyore Isar ṭengot ḍoli diye edde hibar sul loi hibar ṭeng fũsi diye. Ar he atoror kušboye gór bori giyegoi.
4Iskariyoti Ehudah, hibar sahabi okkolor ekzon, ze hiba loi beimani goribo, hite endilla hodde, 5"Ei ator in tin šot denar di besiyore kiyolla gorib okkolore diya no or?"
6Hitattu goribolla dorod asede hiyan bafiyore hite ei hota hoiyede no, kintu hite aššilde ek sur, ar ṭiyar beg hitar hatot takitode hisabe, zin heṛe raka oito hite hentu loifelaito.
7Isaye hodde,"Hiba loi hen no goijjo! Hibaye hin ãr hoboror dinolla raikkede. 8Gorib okkol to hamiša tũwarar fũwati ase, kintu ãre hamiša tũwara no faiba."
9Isa Betaniyat ase zani fariyore Ihudi okkolor ek ḍõr dol heṛe aišše, hitara šude Isare saito nu aiye, bolke Lazarus, zare hibaye morattu tuille, hitare o saito aišše. 10Ar ḍõr imam okkole felain goijje zene hitara Lazarusore o marifelai fare, 11kiyollahoile hitalla buli Ihudi okkolor boute heṛe zat aššil edde Isare biššaš gorat aššil.
Isaye Zeruzalem goler
(Moti 21:1–11; Mark 11:1–11; Luk 19:28–38)
12Tarforor din idot falon goitto aiššede ek dõr mainšor dole Isa Zeruzalem aiyer funiyore, 13hitara hazu fatar ḍeila okkol loiye edde dola oibolla niyoli giye, ar guzori hoiye,
"Hosanna!"
"Rahamoti hiba ze mabudor name aiyer, Israilor badša!"
14Ar Isaye ugguwa gadar so faiye edde hibar uwore boišše, iyan zendilla leka ase:
15"O Sion hoinna, no ḍorais,
sa, tor badša aiyer,
gadar sor fiṛot boiyore."
16Hibar sahabi okkole in okkol foila buzi no fare, kintu Isa zehon mohimawala oiye, hẽtte hitarattu monot foijjil ze in okkol hibar babute leka aššil, edde manuš okkole hibare in okkol goijje.
17Isa Lazarusore hoborottu aibolla ḍaikkede edde morattu tuillede šomot ze manuš okkol hibar fũwati aššil, hitara he babute goba diyat aššil. 18Ar hetolla bout manuš okkole zaiyore hiba loi dola oiye, kiyollahoile hibaye ei sinnor ham goijjede hitara fuinnil. 19Toi Foroši okkol ekzone ar ekzonore hodde, "Tũwara dekor, tũwarar hono kissu lab no or; so, duniyai udda hitar fisa loiye."
Isaye nizor moronor babute hor
20Idot ebadot goitto aiššede hitarar maze ho ekzon Girikiyo aššil. 21Hitara Galilor Betsaidar Filipor hãse aišše, edde hibare foriyad goijje, "Ustad, ãra Isare saito sai." 22Filipe aiyore Anderiyazore hoiye, toi Anderiyaz edde Filipe Isare hoiye.
23Isaye zuwabe hodde, "Adomor Futore mohimaola gora oibar ṭaim aišše. 24Ãi tũwarare soiyi soiyi hoir, gĩyur biz zodi meṛit foriyore zodi no more, toile hiba ugguwa dana take; kintu zodi more, toile hibaye beši gula dora. 25Hite ze nizor foranore beši ador gore, hite hiyan haraibo; ar hite ze nizor zibonore ei duniyait hingša gore, hite hiyan akeri zibonolla basaibo. 26Hite ze ãr šeba goribo, hite ãr fisa lok, ar ãi zeṛe, heṛe ãr šeba goroya o oibo; ar hite ze ãr šeba gore, ãr Bafe hitare šorman dibo.
27 "Ehon ãr dil ferešani oiye; iyanot ki ãi ki en hoiyum ne? 'Baf, ei ṭaimottu ãre basao'? no, bolke ai aiššilamde to ei ṭaimolla. 28Baf, tũwar nam mohimawala goro!"
Hetunot asmanottu ek abaz aišše, "Ãi hiyan mohimawala goijji, ar ãi abar hiyan mohimawala goriyum." 29Heṛe tiyat aššilde manušor dole iyan fuinne edde hodde, "Ḍeba mater;" ar kiye hor, "Hono ek firistaye hibar loi hota hor."
30Isaye zuwabe hodde,"Ei abaz ãlla oiyede no, kintu tũwaralla. 31Ehon oilde ei duniyair bisar; ehon ei duniyair šašon goroyare baire felai diya oibo. 32Ar ãi, ãre zẽtte zobinottu tula oibo, hár manušore ãi ãr mikka ṭaniyum." 33Ar hibaye ei hotar duwara sin diye ze ki moron hibaye moribo.
34Mainšor dole hodde, "Ãra Torar ainottu fuinni ze Messiyah sirohal takibo; toile tũi kene hoi faror, 'Adomor Futore uwore tula owa foribo'? Toile iba hon 'Adomor Fut'?"
35Isaye hitarare hodde, "Aro olfo ṭaimolla šude he nur tũwarar fũwati ase; he nur tũwarar fũwati takite ãṛo, zene andar aiyore tũwarar uwore no fore; ar hite ze andarot sole, hoṛe zar hiyan hite no zane. 36Nur tũwarar hãse takite nuror uwore biššaš ano, zene tũwara nuror fũwain oi faro." Ei hota hoiya oi bade Isaye hitarar hãsottu giyegoi edde hitarattu gufon oigiyegoi.
Biššaš gora edde obiššašilla šaza
37Zodi o Isaye hitarar sarme eduggun keramoti ham okkol goijje, tarfore o hitara hibar uwore biššaš no ane. 38Iyan oiye zendilla Esaiya nobiye hoilde hota furon o:
"Malik, ãrar diya hóbor hone biššaš goijje,
Har hãse Malikor ḍũwa forhaš oiye?"
39Etolla hitara biššaš no gore, kiyollahoile, zendilla Esaiyaye aro hor:
40"Hibaye hitarar suk anda gori diye,
ar hitarar dilore doro gori diye,
zene hitara suk diyore no deke,
ar hitarar dile o no buze,
ar uwafes no fire, ar ãi hitarare aram goritam."
41Esaiyaye in okkol hoiye, kiyollahoile hibaye Isar mohima dekkil edde hibar babute hoil.
42Tarfore o neta okkolor butore boute hibar uwore biššaš ainne, kintu Foroši okkolor ḍore šikar no gore, ze hitarare sinagogottu niyolai dibo; 43kiyollahoile hitara Allattu tarifottuwaro mainšottu tarifore beši muhabbot gorito.
44Bade Isaye guzori uiṭṭe, "Hite ze ãr uwore biššaš ane, hite ãr uwore no, kintu ze ãre defeṛaiye, hibar uwore biššaš ane. 45Ze ãre deke, hite hibare deke, ze ãre defeṛaiye. 46Ãi ei duniyait nur hisabe aišši, zene ze kiye ãr uwore biššaš ane, hite andarot no take.
47 "Hite ze ãr kalam fune edde hin falon no gore, ãi nize hitar bisar no gori, kiyollahoile ãi duniyair bisar goribolla no, bolke duniyaire uddar goribolla, aišši. 48Ze ãre hela gore edde ãr hota no gose, hitalla ek bisarhar ase; ãi ze kalam hoiyi, šeš dinot hiyane hitar bisar goribo. 49Kiyollahoile ãi to nizottu hono kissu no hoi, kintu ki howa foribo edde kengori howa foribo, hin Baf ze ãre defeṛaiye, hibaye ãre hokum diye. 50Ar ãi zani ze, hibar hokum oilde akeri zibon; hetolla ãi zin hoi, Bafe ãre zendilla hoiye, hendilla hoi."
Aktuálne označené:
Yuhunna 12: rhgB
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Wycliffe Norway
