मत्ती 3
3
जल संस्कार दैनै बारे यहून्ना को उपदेस
(मरकुस 1:1–8; लूका 3:1–18; यहून्ना 1:19–28)
1उनई दिनौ यहून्ना जल संस्कार दैनै बारो यहूदिया के बियाबान मै उपदेस दैनै आओ। 2#मत्ती 4:17; मरकु 1:15और बोलो “पापौं सै मन फिराऔ, कैसेकै सुरग को राज धौंरे आ गओ है।” 3जौ यहून्ना बौई है जिसके बारे मै नबी यसाया नै कैई ही, बियाबान मै एक पुकारनै बारे की अबाज है, “परभु के आनै के ताँई रस्ता तईयार करौ और बाके ताँई सड़कौं कै सीदी करौ।” 4यहून्ना के लत्ता ऊँट के बार की ऊन सै बने हे और बौ कमर मै चमड़ा को पट्टा बांधै हो। टिड्डी और जंगली सैंत बाको खानो हो। 5तब ऐरूसलेम के और सैरे यहूदिया के, और यरदन के आस पास के सैरे देस के लोग यहून्ना के धौंरे इखट्टे भए। 6और अपने अपने पापौं कै मानकै यरदन नद्दी मै बासै जल संस्कार लओ।
7 #
मत्ती 12:34; 23:33 जब यहून्ना नै देखो कै भौत से फरीसी और सदूकी उसके धौंरे जल संस्कार लैनै आ रए हैं तौ बौ उनसै बोलो “ओ, साँप की औलादौं! तुमकै किसनै जता दओ, कै परभु के आनै बारे घुस्सा सै भाजौ? 8और मन फिरानै के लायक फल लाऔ। 9#यहून 8:33और अपने अपने मन मै जौ ना सोचौ, कै हमरो अब्बा इब्राहिम है, कैसेकै मैं तुमसै कैरओ हौं, कै परमेसर इन पत्थरौं सै बी इब्राहिम के ताँई औलाद पैदा कर सकै है। 10#मत्ती 7:19अब पेड़ौ की जड़ौं मै कुहाड़ी लग चुकी है। जो पेड़ अच्छो फल ना लागो, बौ काटो और आग मै झौंक दओ जागो। 11मैं तौ पानी सै तुमकै मन फिरानै को जल संस्कार देवौ हौं, पर जो मेरे बाद आनै बारो है, बौ मैंसै महान है, मैं तौ उसके जूता के फीता खोलनै के लायक बी ना हौं, बौ तुमकै पबित्तर आत्मा और आग सै जल संस्कार देगो। 12उसको सूपो उसके हात मै है, और बौ अपनो खलियान अच्छी तरै सै साप करैगो, और अपने गैहूं कै फटक कै कुठिया मै इखट्टो करैगो, पर भुसा कै उस आग मै जरागो जो बुतनै की ना है।”
ईसु को यहून्ना सै जल संस्कार लेनो
(मरकुस 1:9–11; लूका 3:21,22)
13उस टैम ईसु मसी यहून्ना सै जल संस्कार लैनै के ताँई गलील सै यरदन नद्दी के किनार मै पौंचो। 14पर यहून्ना जौ कैह कै उसकै रोकल लगो कै, “मैंकै तेरे हात सै जल संस्कार लैनै की जरूरत है, और तू मेरे धौंरे आओ है?” 15ईसु नै बाकै जौ जबाब दओ, “कै अब तौ ऐंसोई होन दे, कैसेकै हमकै इसई रीती सै परमेसर की इच्छा को पूरो कन्नो ठीक है।” तब यहून्ना नै ईसु की बात मान लई। 16और तब ईसु नै जल संस्कार ले लओ, जैसेई बौ जल सै बाहार लिकरो, तबई आसमान खुल गओ, और परमेसर को आत्मा कबूतर के जैसे ईसु के ऊपर नीचे उतरते भओ देखो। 17#मत्ती 12:18; 17:5; मरकु 1:11; लूका 9:35और जौ आकासवानी भई, “जौ मेरो पियारो लौंड़ा है, जिस्सै मैं भौत खुस हौं।”
Aktuálne označené:
मत्ती 3: TKB
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
New Life Compute Institute [NLCI] - CC BY-NC-ND 4.0
