San Mateo 25
25
Tuꞌun ndíchi xaꞌa uxi ná kuâán vali
1Saa ndi̱kaꞌan Jesús, káchi ra saa:
―Ná ndituꞌun i xiꞌin ndo ndá kuꞌva koo tá ná kaꞌnda chiñu Ndioxi ñuu ivi yóꞌó. Saa ndo̱ꞌo uxi ná kuâán vali ná kuaꞌan nuu viko tíndaꞌa. Uxi saa ná níꞌi ñu̱ꞌu̱ túun ná kuaꞌan ná ndikiꞌin ná ra tíndaꞌa. 2Ta uꞌun ná ikán ta xa íyo ndúvi ná, ta inka uꞌun ná ikán ta ni köo íyo ndúvi ná. 3Ta uꞌun saa ná köo íyo ndúvi ikán, vani níꞌi ná ñu̱ꞌu̱ túun ná kuaꞌan ná, ta köo ndíso tuꞌva ka ná ceite kuaꞌan xiꞌin ná ya sikuiso ná lámpara ná. 4Ta ná xa íyo ndúvi ikán ta ndíso síin ka ná ceite kuaꞌan xiꞌin ná. 5Saa ndóo ná ndátun ni ná mií ra tíndaꞌa ikán, ta köo ndi̱xaa kama ra, ñaa ndi̱naa ini ná ndi̱kixi ná. 6Sava ñuu xi̱ni soꞌo uxi saa ná síso ní naꞌa, káꞌan na: “¡Xa vaxi ra tíndaꞌa! ¡Kana koo ndo ndikiꞌin ndo ra!”, káchi na. 7Saa ndi̱koo uxi saa ná, xa̱á ná xáa súvi ná ñu̱ꞌu̱ ná, ya ndikiꞌin ná ra. 8Saa ndi̱kaꞌan uꞌun saa ná köo íyo ndúvi ikán xiꞌin inka uꞌun ná xa íyo ndúvi ikán, káchi ná saa: “Taxi loꞌo ndo ceite ndo ndaꞌa nde, saa chi xa kúni ndaꞌva va ñu̱ꞌu̱ nde”, káchi ná ikán. 9Ñaa ndi̱kuiin ná xa íyo ndúvi ikán káꞌan ná: “Küvi taxi nde rá ndaꞌa ndo, saa chi näni rá kuniñuꞌu ndo xiꞌin nde, vaꞌa ka kuáꞌan ndo nuu xíko na rá, ta sata ndo rá kuniñuꞌu ndo”, káchi ná xiꞌin taꞌan ná. 10Saa ka̱na koo uꞌun saa ná ikán kuaꞌan ná sata ná ceite ná. Tá ka̱na koo ná kuaꞌan ná, ta xa̱a va mií ra tíndaꞌa ikán. Saa ndi̱kiꞌvi uꞌun saa ná xa íyo ndúvi ikán xiꞌin ra ini veꞌe nuu íyo viko tíndaꞌa. Ñaa ndikun nda̱si tuun mií yeꞌe ikán. 11Saa ndi̱ko koo ná köo íyo ndúvi ikán xiꞌin ceite ná. Ta xa nda̱si va yeꞌe nuu ná. Saa xaá ná ndáꞌi koꞌo ná, káchi ná saa: “¡Tata, tata, ndaꞌvi ni nde, kuna loꞌo un yeꞌe nuu nde, ná kiꞌvi nde viko!”, káchi ná xiꞌin ra. 12Saa ndi̱kuiin ra tíndaꞌa ikán, káꞌan ra xiꞌin ná, káchi ra saa: “Ya ndaa káꞌan i xiꞌin ndo, köo xíni i ndóꞌo̱”, káchi ra xiꞌin ná. Saa ndi̱ꞌi tuꞌun ndíchi loꞌo yóꞌó ―káchi Jesús.
13Saa ndi̱kaꞌan ka ra xiꞌin nda, káchi ra:
―Saa ndóꞌo̱, kundoo tuꞌva ndo chi köo xíni ndo ndá kivi kua, ni ndá hora kua ndiko koo yeꞌe Taa ra xa̱a ñuu ivi yóꞌó ―káchi ra xiꞌin nda.
Tuꞌun ndíchi ya ndítuꞌun xaꞌa xuꞌun ya ta̱xi iin taa ndaꞌa uni nda xáa chiñu nuu ra
14Saa ndi̱kaꞌan ka Jesús, káchi ra saa:
―Ná ndituꞌun i inka tuꞌun ndíchi xiꞌin ndo, ya kundaa ini ndo ndá kuꞌva koo kaꞌnda chiñu Ndioxi ñuu ivi yóꞌó. Saa ndo̱ꞌo iin ra, ndi̱kani ini ra kuꞌun xíka ra. Ñaa ka̱na ra nda xáa chiñu nuu ra, si̱kuiso chiñu ra nda xiꞌin ndiꞌi ñaꞌa kuika veꞌe ra.
15’Ta̱xi ra iin bolsa chee nuu ñúꞌu uꞌun xuꞌun talento#25:15 Iin xuꞌun talento vee ni ya, nda oko uxi án nda uvi xiko kilo, saa vee iin iin ya. ndaꞌa iin ra, saa ta̱xi ra inka bolsa nuu ñúꞌu uvi xuꞌun talento ndaꞌa inka ra ikán, ta inka bolsa ta̱xi ra ndaꞌa inka ra nuu ndíkaa iin xuꞌun talento ini ya. Saa chi xíni vaꞌa ra nda, ta tá kuꞌva kúchiñu nda xáa chiñu nda, kuꞌva saa xuꞌun ta̱xi ra ndaꞌac iin iin nda ikán. Ta ndi̱kiꞌin ra kuaꞌan xíka ra. 16Taa ra ndi̱kuiso uꞌun xuꞌun talento, ta xa̱a chiñu ra xiꞌin ya, saa ndi̱niꞌi ra inka tuku uꞌun siki ya. 17Saa i̱kan tu inka ra uvi ikán va xiꞌin ya, xa̱a chiñu ra xiꞌin uvi saa ya, ta ndi̱niꞌi ra inka uvi siki ya. 18Ta ra ndi̱kiꞌin iin talento, ta ndi̱xaꞌan ra xa̱ta kunu ra iin yavi tixin ñuꞌú, ta ikán ti̱seꞌe ra xuꞌun xitoꞌo ra.
19’Saa ndi̱yaꞌa kuaꞌa ni kivi, ndi̱ko koo ra xitoꞌo ra, ta xa̱á ra ndása ra kuenta xiꞌin nda ikán. 20Saa ndi̱xaa xiꞌna ra ndi̱kiꞌin uꞌun talento ndi̱kaꞌan ra xiꞌin xitoꞌo ra, káchi ra saa: “Tata, uꞌun ku xuꞌun talento ta̱xi un ndaꞌa i, ta xa̱a chiñu i xiꞌin ya ta ndi̱niꞌi ka i inka uꞌun siki ya”, káchi ra xiꞌin xitoꞌo ra. 21Saa ndi̱kaꞌan xitoꞌo ra káchi ra saa: “Vaꞌa ni i̱kan un, vaꞌa ni moso kuu mií un, vaꞌa ni kundaa ini i kuni i yóꞌo̱. Sikuiso chiñu i yóꞌo̱ nuu kuaꞌa ni ka ñaꞌa i, saa chi vaꞌa ni xa̱a súvi un chiñu loꞌo yóꞌó. Ta vitin naꞌa kiꞌvi un veꞌe i, ta kusini ni un xiꞌin i”, káchi patrón ra xiꞌin ra. 22Saa ndi̱xaa inka ra ndi̱kiꞌin uvi talento nuu xitoꞌo ra ta ndi̱kaꞌan ra xiꞌin ra, káchi ra saa: “Tata, uvi xuꞌun talento ta̱xi un ndaꞌa i, ta xa̱a chiñu i xiꞌin ya ta ndi̱niꞌi ka i uvi siki ya ka̱na xa̱a chiñu i xiꞌin ya”, káchi ra. 23Saa ndi̱kaꞌan ra xitoꞌo ra, káchi ra saa: “Vaꞌa ni xa̱a súvi un chiñu, vaꞌa ni moso ku mií un. Vaꞌa ni kundaa ini i kuni i yóꞌo̱. Sikuiso chiñu i yóꞌo̱ xiꞌin kuaꞌa ni ka chiñu i, chi vaꞌa ni xa̱a súvi un chiñu loꞌo yóꞌó. Ta vitin naꞌa kiꞌvi un veꞌe i, nuu kusini ni un xiꞌin i”, káchi xitoꞌo ra xiꞌin ra. 24Saa ndi̱xaa inka ra ndi̱kiꞌin iin talento, ta ndi̱kaꞌan ra xiꞌin xitoꞌo ra, káchi ra saa: “Tata, xíni vaꞌa i yóꞌo̱, ta ndaku ni ini un, chi ndíkaya un ñaꞌa nuu köo chíꞌi un, saa ndíkuiso un ñaꞌa nuu köo xáa chiñu un, káchi ra xiꞌin xitoꞌo ra. 25Xaꞌa ya ikán kua ndi̱ndiꞌvi i nuu un, ta ndi̱xaꞌan i ti̱seꞌe i xuꞌun un yavi kunu tixin ñuꞌú. Ta vitin ndikiꞌin un ya ta̱xi un ndaꞌa i, tá íyo ya ta̱xi un ndaꞌa i, saa íyo ya ndikiꞌin un”, káchi ra xiꞌin xitoꞌo ra. 26Saa ndi̱kuiin xitoꞌo ra, káchi ra saa: “¡Süvi moso vaꞌa ku yóꞌo̱, moso xúxan va ku un! Tá xa xíni un ya ndíkaya i ñaꞌa nuu köo chíꞌi i, ta ndíkuiso i ya vaꞌa nuu köo xáa chiñu i, 27ta án ndi̱chikaa un xuꞌun i banco ta xa xa̱a chiñu ya, saa ndiko koo i ndi̱kiꞌin i ya xiꞌin siki ya, ndikuu”, káchi xitoꞌo ra xiꞌin ra. 28Saa ndi̱kaꞌan ra xiꞌin na xáa chiñu nuu ra, káchi ra saa: “Kindaa ndo xuꞌun ñaa ndaꞌa ra, ta taxi ndo ya ndaꞌa ra kúu mií uxi xuꞌun. 29Chi ndiꞌi na xíni kundaa vaꞌa ñaꞌa, ta niꞌi kuaꞌa na ya vaꞌa. Ta na köo xíni kundaa vaꞌa ya, ta nda ya loꞌo kúu mií na ndundaa ndiꞌi ya ndaꞌa na. 30Ta ra moso väꞌa xáa chiñu, ta tava ndo ra keꞌe nuu naá ni, nuu kuaku ni ra ndakua ndikaxi nuꞌu ra”, káchi ra xitoꞌo ra ikán. Soꞌva káchi tuꞌun ndíchi yóꞌó ―káchi Jesús xiꞌin nda.
Ya kuu kivi tá ná ndiko koo Jesús ñuu ivi yóꞌó
31Saa ndi̱kaꞌan ka Jesús xiꞌin na, káchi ra saa:
―Kivi tá ná ndiko koo yeꞌe, Taa ra xa̱a ñuu ivi yóꞌó, ta ndiko koo i xiꞌin ndiꞌi na tatun Ndioxi, tá káa rey ra ndee ni ndee saa koo i tá ná ndiko koo i xiꞌin ndiꞌi ñaꞌa ya ndee ni luvi yéꞌe̱. Ta saa ndikunduꞌu i nuu tai toꞌo kaꞌnda chiñu i. 32Ta ndiꞌi na kixi ndiꞌi ni kúu xaꞌa ñuu ivi xaa ndiꞌi na ndikitaꞌan na nuu i. Saa tava síin i na vaꞌa tañu na väꞌa. Tá kuꞌva táva síin iin ra paxto levo sana ra tañu kiti tixuꞌu sana ra, saa tava síin i na vaꞌa tañu na väꞌa. 33Tava i ri chindoo i ri ñaꞌñu kuáꞌá i, ta tixuꞌu ta chindoo i ri ñaꞌñu ítín i. 34Ta yeꞌe, ra kúu rey kaꞌan i xiꞌin na ndóo ñaꞌñu kuáꞌá i, kachi i saa: “Naꞌa ndo, ndóꞌo̱ ku ndo niꞌi ya vaꞌa nuu Iva i Ndioxi. Naꞌa ndo kiꞌvi ndo nuu xáꞌnda chiñu ra, ya xa íyo ndúvi xaꞌa ndo nda tá täꞌan xikoo xaꞌa ñuu ivi yóꞌó. 35Saa chi kivi tá ndi̱kaꞌun ini i, ta ta̱xi ndo xi̱xi i, kivi tá ndi̱ndichi i tikuii, ta ta̱xi ndo tikuii xi̱ꞌi i, saa ni kivi ke̱e i ñuu i ta ndi̱xika i inka ñuu, ta ta̱xi ndo veꞌe ndo ndi̱kixi i. 36Kivi tá köo toto i ndi̱xiyo, ta ta̱xi ndo toto xi̱ndixi i, tá ku̱ꞌvi i ta ndi̱xaa ndo xi̱to ndo yeꞌe, saa tá xi̱ndikaa i veꞌe kàà ta ndi̱xaa ndo xi̱to ndo yeꞌe”, kachi i xiꞌin na. 37Saa kaꞌan naꞌa, na vaꞌa ikán xiꞌin i, kachi na saa: “Tata, xaa kaꞌnu ni ini un xaꞌa nde ¿maa kua xi̱ni nde káꞌun ini un, ta ta̱xi nde xi̱xi un? ¿Ta maa kua xi̱ni nde íchi un tikuii ta ta̱xi nde tikuii xi̱ꞌi un? 38¿Ta maa xi̱ni nde yóꞌo̱ ndi̱xiyo xika un inka ñuu ta ndi̱kiꞌin nde yóꞌo̱ ndi̱kixi un veꞌe nde? ¿Ta maa xi̱ni nde köo tikoto kundixi un, ta ta̱xi nde tikoto xi̱ndixi un? 39¿Maa xi̱ni nde kúꞌvi un, ta ndi̱xaꞌan nde xi̱to nde yóꞌo̱? Án ¿maa xi̱ni nde ndíkaa un veꞌe kàà ta ndi̱xaꞌan nde xi̱to nde yóꞌo̱”? kachi na xiꞌin i. 40Saa ndikuiin yeꞌe, rey, kaꞌan i xiꞌin na, kachi i saa: “Ya ndaa káꞌan i xiꞌin ndo, kivi i̱kan ndo ya vaꞌa xiꞌin na ndíkun yeꞌe, vani ndaꞌvi ni na, ta süvi xiꞌin na ikán ndi̱xaa ndo ya vaꞌa, sundi xiꞌin yeꞌe i̱kan ndo ya vaꞌa”, kachi i xiꞌin na ―káchi Jesús.
41Sindiꞌi saa kaꞌan i xiꞌin naꞌa, na väꞌa, na ndóo ñaꞌñu ítín i, kachi i saa: “¡Kuátaꞌa ndo nuu i, ndóꞌo̱ ndi̱tavi chiꞌña ku ndo! Kuáꞌan ndo ndaya, nuu xíxi ñu̱ꞌu̱ ndiꞌi saa kivi ta köo ndáꞌva ya. Chi ikán ku nuu ndi̱kuaꞌa kuꞌun kiti nǎꞌa xiꞌin ndiꞌi tachi nduvaꞌa ndikun ñaꞌa. 42Saa chi kivi tá ndi̱kaꞌun ini i, ta köo ndi̱taxi ndo kuxi i, ni kivi tá ndi̱ndichi i tikuii ta köo ndi̱taxi ndo tikuii koꞌo i. 43Ni kivi tá ndi̱xaa i ñuu ndo ta köo ndi̱taxi ndo veꞌe nuu kusun i, ni toto kundixi i köo ndi̱taxi ndo ndaꞌa i kundixi i. Ni tá ku̱ꞌvi i ta köo ndi̱xaꞌan ndo koto ndo yeꞌe, saa tu tá xi̱ndikaa i veꞌe kàà, ta köo ndi̱xaꞌan ndo koto ndo yeꞌe”, kachi i xiꞌin na. 44Ta naꞌa na väꞌa i̱kan ta kaꞌan na xiꞌin i, kachi na saa: “Tata, ¿maa xi̱ni nde yóꞌo̱ káꞌun ini un? Ta ¿maa xi̱ni nde yóꞌo̱ íchi un tikuii? Ta ¿maa xi̱ni nde yóꞌo̱ ndi̱xiyo un inka ñuu ta köo ndi̱taxi nde nuu kusun un? Ta ¿maa xi̱ni nde yóꞌo̱ ya köo tikoto kundixi un? Án ¿maa xi̱ni nde kúꞌvi un? Án ¿maa xi̱ni nde ndíkaa un veꞌe kàà, ta köo ndi̱chindee nde yóꞌo̱?”, kachi na xiꞌin i. 45Saa ndi̱kuiin i kaꞌan i xiꞌin na: “Ya ndaa káꞌan i xiꞌin ndo, ndiꞌi saa kivi ya köo ndi̱chindee ndo naꞌa, na ndíkun yeꞌe, vani ndaꞌvi ni na, ta yeꞌe ku i köo ndi̱chindee ndo”, kachi i xiꞌin na väꞌa ikán. 46Ta saa kuꞌun na nuu tixuꞌvi ni na ndiꞌi saa kivi ya vaxi, ta na vaꞌa, na xáa súvi ya kúni Ndioxi ta kuꞌun na nuu kutaku na xiꞌin Ndioxi ndiꞌi saa kivi ya vaxi ―káchi Jesús xiꞌin na.
Aktuálne označené:
San Mateo 25: xta
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Active: ©Wycliffe Bible Translators, Inc. All rights reserved.
