Nuk 21
21
Nɛkɛ ni maŋka yɔ nom akpɔ asighɛ akɛ
1Ɛsika Jisɛs ataba amár abri, ayɛ afɨŋa anɛ ka akɨgha ɛbembem nɛkɛ ka nɛkun ka njo Ɛsɔwɔ. 2Atɨma yɛɛ abra ɛkpugha biba ya maŋka ɛwi yɔ nom akpɔ asighɛ ama akak. 3Jisɛs arag si “Ntɔ war ka ɛdidighɛ, mkpak nyi yɔ nom ami kpɔ asighɛ akɛɛ aga anɛ baga kprɔb. 4Atubsi, anɛ baga kpakpa akɛ ma njaa ka abembem nɛbɛnɛ abɔɔ; ka yɛ ka ɛkpak ɛbɛ akɛ kpakpa ji akpe ji ka akɔ afene ɛnɛ.”
Jisɛs arag atub njoa njɔm ya árɔbɔ ka nsɔnɔ ndeŋe yi ɛruu ka ɛsi
5Asɔgba Jisɛs bantiŋi ára kar anɔbɔ atan ya akɔ anebe njoa njɔm Ɛsɔwɔ kpɛnɛ ka nsɔn yi amikɛ Ɛsɔwɔ. Ka Jisɛs atɔ abɔɔ si, 6“Nsɔn yi ɛrɛ yɛ na mfa kpakpa, nden arɨgha bɨgha yi nɛtan niku mfa ɛkomom ka ntɛm; ágbɔghɔ kprɔb asama ka nse.” 7“Nkpikpɨne,” abɔɔ abɔmɛ, “Nsɔn nyi ɛ́ruu ka bɨgha nden? Ka ɛkɔghɔ naŋ ɛgbɛrɛ si ɛkpi ruu?”
8Yɛ akpɛ abɔɔ: “Ba ba ba kasɔŋ áre war dere. Atubsi abembem abɨgha ka mbiŋ ɛyɨŋa, adere anɛ, ‘Mmɛ yɔ nde ninagha,’ ka ‘Nden ami kpere.’ Krɛ tɔɔŋɔ abɔɔ. 9Ɛmina yɔk atub nntá ka ɛjibɛ ka ɛburuu, mfom ariakub. Nsɔn nyi ɛgbɔghɔmba ɛruu, ka nkɨnɛsi áwaŋam atɔɔŋɔ.”
10Ka atɔ abɔɔ: “Ɛjibɛ ka ɛjibɛ anɔghɔ ka atɛm, ɛton ka ɛton anɔghɔ ka atɛm. 11Nsise agbugu ka ɛbibi arɔbɔ nsɔn, ɛgba ɛjɔjɔn ka afom ka nsɔn yi ɛkubumfom ɛruru ka bɛsɔ.
12“Kasɔŋ nsɔn nyi ɛruu, atɨghɔ war bɔb, ane war nɛyiri si nnaŋ ka ɛtɔɔŋɔ Ɛsɔwɔ. Ánɛ abɔɔbɔ war ama akɛ ka akɔnɔ ba Jus ka atono war akak ka mgbakɔbɔ, ka asɔnɔ war amu ka ɛsiamar aton ka ba Aton Ɛyiŋ, kpakpa nji atubsi ɛyimi ka mbiŋ ɛyiŋa. 13Ka ɛkɛ war ɛyigha titi ji ɛrɨgha nsɔn ɛtubum. 14Ka ba krɛ feghe ɛnɨrɛ ayɔ ɛsika ɛjɛnɛ ɛfɔr ka nsɔn yi ɛruu. 15Si nkɛ war ntɔrɔ ka ɛwak bi nnɛjiŋ yɔku arɛghɛ ma afaba. 16Ba nsɔjirɛ ka ba nnajirɛ, akɨno ayirɛ bannom ka abakaa, anɛ ba ɛbannab ka atɛm ɛbrɛ agoro war, ayon bantiŋi yon. 17Ɛsɨgha anɛ kprɔb ka ɛsi ɛjɨŋa. 18Ka nɛnu niku ɛtanam ka ɛsi nnɛ yɔku. 19Yimi ɛkoro ka ɛsi jɨŋa, kasɔŋ wɔ ga ka nekpen.
20“Ɛmina yɛɛ asɔja ka agbaá asibi Jɛrusanɛm, ɔgbɛrɛ gbɛrɛ si ndena nɛrɔbɔ ɛnɛ ami kpere kɛtiŋi tiŋi. 21Ka nɔŋɔ anɛ ba áre ka Judiya abɛ abibi ka bɛgon, nɔŋɔ ba áre ka nna ɛjibɛ aruu ka ba áre jɔn ka atakpa bɛjibɛ árɛ nam. 22Ndena nɛyiri yi na yi nsɔn kprɔb ɛruu ɛsika ayɛnɛ ka nwɛr Ɛsɔwɔ. 23Njɛna nɛyiri ɛjɔnɔ akɛ abakaa ba akpe ana ka ba akpe abɔnsɛ ka afo nya! Nekpen ɛyoŋoyoŋo ka ɛjibɛ ka ɛsɨgha netem Ɛsɔwɔ ɛjɔnɔ ɛkɛɛ anɛ ba ɛyiŋ. 24Áyono bantiŋi ka akparija akak baga ka mgbakɔbɔ, ka bɛjibɛ kpakpa. Bɛjibɛ biga bi ɛrɛ gbɛrɛ nɛwɛmɛ Ɛsɔwɔ ɛkpeé Jɛsusanɛm ka ajaa tɛtɛ nden abɔɔ akan.
25“Ndeŋe ajɔjɔn ka njon, mmɛɛ ka adruandu. Bɛ ɛjibɛ ɛjɔnɔ ka ɛfegheayɔ ka ɛkub ka ɛburu atub nɛgana ntakpa ɛbuk ji ɛjɔnɔ ka aya. 26Abembem anɛ ajɔnɔ ka ɛkub nna wusi akpi kpɔ, ka atere ka netem ji ɛkpi ru ka ɛyiŋ, atubsi ɛyiŋ ji bɛsɔ ɛgbugugbugu. 27Nden nyi yi abɔɔ ayɛ Mɔanɛ yɔ Ɛsɔwɔ akɨno ka abɨgha ka nɛbo ka nɛyɔ ka njɛna nɛgam. 28Nsɔn nnyi ɛkpɨna ru, toŋo yimi ka mbaa Ɛsɔwɔ ka ɛkɨnoamar si nɛnagha ɛna ɛmikpere.”
29Átub nɛgana akɛ abɔɔ si: “Bri ɛte fig ka kpakpa nte yiga. 30Nden yi nte ɛmɨna dɔrɔ akpab, wɔ mfɔnɔ ɔgbɛrɛ gbɛrɛ si nden ɛnom akpi sii. 31Ɛtɨmɛ rena si, ɔmina yɛɛ ka nsɔn nyi ɛwɛmɛ, gbɛrɛ si ɛton Ɛsɔwɔ ɛmikpere.
32“Ntɔ war ɛdidɨghɛ, ɛyiŋ ji ɛkpɔghɔm ɛkan ka nsɔn nyi kprɔb ɛwɛmɛ. 33Nɛbo ka nsise ɛbɛnɛ nkɨnɛsi, ka ntɔrɔ ɛyɨŋa asa ka nkankan.
34“Ba baba beji ɛbrɛ kasɔŋ ɛrɛkɔ ntem ɛyire ɛkɨno ka nsɔn ɛyiŋ nna ka ɛyighi, ɛbumu amɔm ka ɛfegheayɔ si nne naŋ, ɛmɛ jɔn si ɛfo bi ɛrɛ kɔgha nkɨbɛnkɨbɛ na wusi ɔgbɔ ka ɛkpɨghɔ. 35Ka ɛjɔnɔ na ɛkɛ anɛ kpakpa ba áre ka ɛyiŋ. 36Ba kɨno ámar ka nden nden yiku, ɛrɛ kak njɔm kasɔŋ Ɛsɔwɔ akɛ war nɛyɔ ɛyimi ka ɛrɨghɛ gbɔ ka nsɔn yi ɛkpi wɛme kasɔŋ ɛfɔm ka ɛsi amara Mmɔanɛ.”
37Jisɛs ára kpine anɛ ɛfo biku biku ka ɛfen ka njoa njɔm Ɛsɔwɔ, ka nɛgo niku niku ára mu ka ɛgon ji abɨŋi si Onifs ama kak njɔm ka ɛnokon, 38ɛfrusu ɛmɨna kpara anɛ kpakpa afo amu ka njoa njɔm ama yɔghɛ.
Aktuálne označené:
Nuk 21: NDD-011
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
©️2024 Luke Initiative for Scripture Translation
