Nuk 18
18
Nɛgana atub nɛkɨgha njɔm kpakpa nden
1Ka Jisɛs atub nɛgana akɛ ɛkan ji ɛrɛ tɔŋɛ ni ɛru si abɔɔ ára kak njɔm kpakpa nden, árɛ nɨŋɔ nɛyiri ɛnem abɔɔ arɛɛ bɛji. 2Átɔ abɔɔ si, “Ɛjɔnɔ mkpegha bɛnam ɛwii ka ɛjɨbɛ ɛjii yɔ arɛ jɔn abɨghɛ Ɛsɔwɔ ka ama fɛn nden akɛɛ ji anɛ atére. 3Ka maŋka ɛwii ka ɛjibɛ ji yɔ nnom akpɔ asighɛ ára mu ama gɔrɛ si ‘Nagham ka ɛfegheayɔ ji mkpe ka nnɛjiŋ ɛwɨŋa.’
4“Ntaa nyɔ atɨghɔ tɛn ka ɛgbɔghamba; ka ama ter si ‘Ɛjɔnga si ndɨma bɨghɛ Ɛsɔwɔ ka mma mbɛ nnɛ, 5ka ká ɛfegheayɔ ji maŋka nnyɔ ára kɛm, nŋɔ nnaghɛ kasɔŋ arɛ kpɛba ama feghem ayɔ.’ ” 6Ka Ntaa ajibi átɔ abɔɔ si, “Ba yɔk ji mbiba nɛwɛmɛ mkpegha bɛnaam arɨgha. 7Kafaŋa Ɛsɔwɔ yɔ arɛghɛ nagha anɛ ɛba ba abere ka ɛfen ka ɛnokon akɛɛ? Arɔbɔ rɔbɔ nden ka anágha abɔɔ? 8Nntɔ war si, ɛjɔɔn, ára kpeghe bɛnaam bi frifri kasɔŋ anagha abɔɔ. Ka ɛjɔn gána ɛkɨno amar ɛjɔ́jɔn ka nden yi Mɔanɛ yɔ akɨno abɨgha ka ɛyiŋ?”
Nɛgana atub nɛkɨgha njɔm ka ɛsinɛ bɛji.
9Jisɛs akpɛ tub nɛgana nintiŋi atɔ anɛ ba ára tere si abɔɔ afɔfɔm ka amar Ɛsɔwɔ abri baga ka ɛsara amar: 10“Anɛ abaa amu ka njoa Ɛsɔwɔ si ama kak njɔm, ɛwii are nnɛa Farasi, yɔga ntaba ntab ɛjibɛ. 11Nnɛa Farasi ayimi akára ɛnɛ ɛsika akɨgha njɔm si, ‘Ɛsɔwɔ, mmia kag sam atubsi mmɛ ndem ka anɛ baga, ba ára yughu nsɔn anɛ, ba ára ne abibia nsɔn, ba anyɔ aká anɛ, ka mfan jɔn nna ka ntaba ntab ɛjibɛ nnyɔ. 12Nda njɔnɔ njan kpɛnɛ ɛba ka asɛ yaku yaku; mfɛnɛ nkɛ ɛjom ɛji ka ɛbɔŋɔ wobo ka jiku jiku ji mkpe.’
13“Ka Ntaba ntab ɛjibɛ ayimi ga dɨghadɨgha, árɛ sab atab ámar abri ka bɛsɔ, ára fuu abɔɔ ka ngaŋ arɨgha ‘Ɛsɔwɔ brim mmɛ nnɛ abibia nsɔn ɛkpɔghɔsi!’ 14Ndɨgha na, ntaba ntab ɛjibɛ nnyɔ akru ka njo ka ɛyɛbɛ netem atubsi ami fɔm ka ámar Ɛsɔwɔ aga nɛa Farasi, atubsi nnɛ yɔku yɔ ataba bɛji asinɛ sinɛ, ka nnɛ yɔ asinɛna bɛji afɛnɛ nɛkɨgha.”
Jisɛs ka ɛsinɛ beji abɔnsɛ
15Anɛ ára ba ka abɔɔa abɔ si Jisɛs akono abɔɔ ɛbɔ kasɔŋ anara abɔɔ. Anɛ ba ɛkan ɛjɛ ayɛ abɔɔ nna, agbaŋa abɔɔ. 16Ka Jisɛs abiŋ atitɔŋa abɔnsɛ ba akperɛ ka arag, “Ba nɔŋɔ atitɔŋ abɔnsɛ aba, ba krɛ gbaŋa abɔɔ, atubsi ɛton Ɛsɔwɔ ɛre ɛkɛ anɛ nna ka mba. 17Ntɔɔ war ɛdidɨghɛ, nnɛ yɔku yɔ árɛghɛ sinɛ beji atama akɛ ɛton Ɛsɔwɔ nna ka mɔnsɛ amam anam ka ɛtik Ɛsɔwɔ.”
Ɛfɨŋa nnɛ ka ɛton Ɛsɔwɔ
18Nton ɛwi abɔmɛ si “Ɛtiŋi nkpikpɨne, nne naŋ kasɔŋ mbɛn nekpen ka nɛwɛmɛ nɛwɛmɛ?”
19“Ɛgbɔnaŋ ka ɔbiŋim si ɛtiŋi?” Jisɛs abɔmɛ. “Nnɛ yɔku yɔ áre ɛtiŋi árem, Ɛsɔwɔ kantiŋ yɔ áre ɛtiŋi. 20War ɛnyi ájighi Ɛsɔwɔ: ‘Krɛ kaa ka nnom anɛ si nkaa nnɛ, krɛ yon nnɛ, krɛ yu ɛju, krɛ bib atɔrɔ ɔnɨgha nnɛ, kag nsɔja ka nnaja.’ ”
21Mannom nyɔ akpɛɛ “Ndɨgha nɨŋɔ ajighi nya kprɔb jam ka nden yi nde nsɔbanɛ.” 22Ɛsika Jisɛs áyɨghɔ ji yɛ árɨgha, atɔɛ si “Ɛsa ɛjom ɛjii ji ɔkɨgha nem. Goro nsɔn kpakpa yi ɔkpe wɔ ɔkɔ akpugha ɔkɛ akpak, kasɔŋ ɔfɛn afaŋ ka ɛtik Ɛsɔwɔ. Ɔmɨna nem ka ɔba ɔmatɔŋɔm.”
23Ka ɛsika Mɔannom nyɔ ayɔghɔ na, bɛji ɛrɨɛ atubsi ajɔnɔ ntakpa ɛfɨŋa nnɛ. 24Jisɛs ayɛ ka bɛji ɛmiɛ rɛɛ ka atɔɛ si, “Ɛyoŋoyoŋo ka ɛfɨŋa nnɛ ɛnam ka ɛton Ɛsɔwɔ! 25Ka ɛdidɨghɛ, ɛre ndɛɛndɛ si ntakpa nyam yi afɨŋa afɨna afɔŋɔ ɛgbodobiya ka atá anɛ si asiŋ ka ɛbɨŋa aga, ɛga si ɛfɨŋa nnɛ anam ka ɛton Ɛsɔwɔ.”
26Anɛ ba ayɨghɔ ji Jisɛs arɨgha abɔmɔ atɛm si ɛrena na, “Yɛnnɛ áfɔrɔ?”
27Jisɛs akpɛ si “Jiku ji nnɛ arɨghɛ ma anem si anagha ninɛ, Ɛsɔwɔ amaama anem.”
28Pita áterɛ si, “Ɛmi tam ɛsik nsɔn kprɔb yi ɛkpe ɛtɔŋa!”
29Jisɛs atɔ abɔɔ, “Ka ɛdidɨghɛ nnɛ yɔku yɔ atɨmɛ ɛtik ɛjɛ, si nka ɛwɛ si akɨno ayɛ banom ka baŋka si nsɛ ka nnyɛ si abɔɔ ka ɛsi ɛton Ɛsɔwɔ 30yɔ asaa nɛbɛnɛ mbaŋa ɛyɛ ka ɛyiŋ ka ká nekpen ni nkankan.”
Jisɛs akpɛ rag ka ɛnumu mkpɛn ɛsaa atub nɛku ɛnɛ
31Jisɛs abiŋi asɔgba wobo ka abaa ka nkɔ ka atɔɔ abɔɔ si “Ɛkpi mu ka Jɛrusanɛm, ka kpakpa ji Asɔgba Ɛsɔwɔ ayɛnɛ atub Mɔanɛ ɛwɛmɛ wɛmɛ. 32Ásɨghɛ abɔɔ akɛ anɛ ba Rom ba árɛ gbɛrɛ Ɛsɔwɔ ayon. Ányiɛ nyɛ afɨna aso atɛn awurɛ; 33amɨbɛ mɔb tɛtɛ akpɔ. Ká afɨnɛ anyimi ka ɛnumu afo asaa.”
34Ka nsɔn yi yɛ arɨgha ɛrɛ jibi asɔgba abɛ atubsi abɔɔ árɛ kɨnokpo ka afɨna agbɛrɛ ji yɛ arɨgha na.
Jisɛs anem mbɔa mbibɔ yɔ anaga amar ayɛ mfom
35Ɛsika Jisɛs akpere Jɛriko, ayɛ nnagamar ka ajik ka nkɔa mbaa abɔɔ mbibɔ. 36Nden yi nnɛ nnyɔ ayɨghɔ ka ɛbɨŋɔ ji ɛrɛ siŋi, abɔmɔ ji ɛrɛru. 37Atɔɛ si “Nnɛ yɔ anɛ si Jisɛs yɔ aru Nasarɛt yɔ ára siŋi.”
38Yɛ abeŋe, “Jisɛs, mɔa Defid, brim ɛkpɔghɔsi!”
39Ba agbɔghamba ka ɛbɔŋɔ ji atɔɛ si abɨno nnyɔ, ka ára beŋɛ gbogbo si, “Mmɔa Defid, brim ka ɛkpɔghɔsi!”
40Jisɛs ayimi arag si aba ka nɛ. Nden yi ajɛnɛ akpere, Jisɛs abɔmɛ! 41“Ɔsɛbɛ si nem jɛ nkɛa?”
Yɛ akpɛ, “Ntaa, nsɛbɛ si mmɛ nyɛɛ mfom.”
42Jisɛs atɔɛ, “Yɛɛ mfom si; ɛkɨnoamar ɛja ɛmia kɛɛ ɛkoro bɛji.” 43Fifa fifa ayɛ mfom, atɔŋɔ Jisɛs ka ákara Ɛsɔwɔ. Ɛsika anɛ kpakpa ayɛɛ ji ɛwɛmɛ, atɨma ákara Ɛsɔwɔ.
Aktuálne označené:
Nuk 18: NDD-011
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
©️2024 Luke Initiative for Scripture Translation
