U̱r-Taku̱n 16
16
Hajaratu ne̱ e̱ Ismaru
1Sera ne̱ta Ibram, wa mak-tu̱ wa yaag da, se̱di wa o̱tte̱ to̱k-u̱ ne̱ta wu̱ o̱o̱ge̱ ne̱tu̱ dak-u̱ Masar wu̱ na zu̱ye̱ Hajara. 2Sera zu̱ Ibram, <<Yawe hooste̱ me̱ u̱r-mat, cwa bo̱ roog u̱ to̱k-u̱ ri ne̱, jiya me̱ u̱t-kwu̱m yaag du̱gu̱-du̱ wa.>>
Ibram ees u̱ no̱mu̱ Sera waru̱ wa ne̱. 3Da-u̱ Ibram no̱me̱ u̱s-hak u̱s-o̱p u̱ shu̱'u̱t dak-u̱ Kan'ana, Sera, ne̱ta wa, ku̱b Hajara wu̱ Masar wa yasu̱ Ibram u̱ wa shu̱'u̱t ne̱ta wa. 4Ibram roog u̱ Hajara ne̱, wa nom me̱n-tu̱ ub.
Da-u̱ Hajara hyane̱ u̱zu̱ wa u̱t-me̱n ne̱, wa hu̱ u̱ ju̱rmu̱ ino-u̱ u-bu wa. 5Sera zu̱ Ibram, <<Bo̱ wa wa-e̱ uno̱ no̱m o̱ u-be̱e̱t. U̱m ya'aste̱ bo̱ Hajara, da-u̱ wa hyane̱ wa kwu̱mu̱g me̱n-tu̱ ub wa hu̱ u̱ ju̱rmu̱ me̱. Yage̱ Yawe no̱mu̱ in kwu̱b-du̱ u̱s-rem u̱ no̱m-u uno̱ u̱ bo̱ no̱mu̱ me̱.>>
6Ibram shasu̱ Sera, <<To̱k-u̱ ró wa, no̱mu̱ wu̱n u̱ka cittu̱ bo̱.>> Se̱ Sera hu̱ ko̱su̱ wu̱n m-to̱k, se̱ Hajara som du̱gu̱-du̱ wa.
7Wa-to̱m-u̱ Yawe#16:7 Wa-to̱m-u̱ Yawe unwa wu̱ haane̱ Ru̱-o̱ ko̱se̱ hi-u̱r wa u̱-me wa-u̱ ne̱. hyen Hajara u̱ kit-u̱ pe̱r-mu̱ m-bu̱ u̱r-do̱g, u̱ dapu̱s fu̱n-yu̱ ha-mu̱ bo̱-u̱ Shur. 8Wa zu̱, <<Hajara to̱k-u̱ Sera ¿du̱gu̱ he̱ne̱ o̱ bo̱ o̱o̱ne̱, tu̱msu̱ he̱ bo̱ o̱tte̱ m-ha?>>
Wa zu̱, <<U̱m so̱mgo̱n du̱gu̱-du̱ ino-u̱ u-bu ri Sera.>>
9Wa-to̱m Yawe zu̱ wu̱n, <<Barme̱ u̱du̱ ino-u̱ u-bu ró, bo̱ yase̱ hi-u̱r ró u̱du̱ wa.>> 10Wa-to̱m Yawe sur m-zu̱ wu̱n, <<Me̱ u̱t-wa ya'ag-u̱ ró no̱m u-tát, na za ke̱rru̱ ogru̱ e̱ da.>>
11Wa-to̱m Yawe zu̱ wu̱n,
<<Bo̱ ya me̱n-tu̱ ub ne̱,
bo̱ do̱'e̱ u̱ mat-du̱ ya-du̱ u̱r-campa.
Bo̱ te̱'e̱ wa'-u̱ wa u̱r-dim Ismaru,#16:11 no̱mu̱ na zu̱ye̱ Ru̱-u̱ hokos.
remu̱ zu̱ Yawe ho̱k kan-u̱s rò
su̱ swadu̱ u̱r-ko̱b ro ne̱.
12Wa do̱'e̱ u̱t-shu̱'u̱t u̱ka
janka-yu̱ u̱r-do̱g#16:12 No̱m-u̱ na o̱ u̱t-war wa de̱ no̱m-du̱ u̱r-yu̱ du̱ waku̱n zaar wu̱ do̱'e̱ dor-tu̱ wa da. yu̱ ne̱t,
Tu̱msu̱ wa do̱'e̱ u̱ no̱m-du̱
shu̱'u̱t-u̱r yo̱-de̱ u̱ ko̱wan ne̱,
ko̱wan do̱'e̱ u̱ no̱m-du̱ shu̱'u̱t-u̱r
yo̱-de̱ u̱ wu̱n ne̱.
Wa do̱'e̱ u̱t-shu̱'u̱t
m-ra u̱ o̱r-u̱t wa ne̱.>>
13Du̱gu̱ ku̱n, Hajara fog Yawe u̱ de̱ku̱n dimde̱, wu̱ no̱me̱ u̱s-rem u̱ wane̱, wa zu̱, <<Bo̱ wa u-Ru̱ u̱ hyene̱ me̱.>> Wa sur m-zu̱, <<¿Nip-to̱ u̱zu̱ u̱m hyanu̱g wu̱ hyene̱ me̱?>> 14Remu̱ iya-o̱ wu̱te̱ na fog-u̱t du-u̱r re̱ Beer-Rahai Roi, wata <<Ru̱-u̱ u̱r-fat wu̱ hyene̱ me̱.>> De̱ o̱ u̱ku̱n u̱ te̱k-u̱ bo̱-tu̱ Kades u̱ Bered ne̱.
15Hajara matu̱ Ibram ya-du̱ u̱r-campa, Ibram te̱'e̱ wa u̱r-dim Ismaru. 16Ibram o̱o̱g u̱s-hak u̱t-shik u̱t-nas u̱s-shishin [86] da-u̱ Hajara matu̱ wa Ismaru.
Aktuálne označené:
U̱r-Taku̱n 16: UtMain
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© 2024 Wycliffe Bible Translators in cooperation with
Ut-Ma'in Language and Translation Committee