Lukas 21
21
A tori fu a pôti uma
Mrk 12:41-44
1Di Yesus opo En ede luku, A si den guduman e poti moni ini a kisi pe yu e poti moni gi a tempel. 2A si tu wan pôti uma di en masra dede kba, poti tu kopromoni ini a kisi. 3Dan Yesus taki: “Fu tru Mi e taigi un taki: A pôti uma disi poti moro furu moni ini a kisi moro ala den tra sma. 4Bika ala den tra sma poti pikinso fu a furu moni san den abi, ma a uma disi poti ala fu a pikinso san a ben abi fu sorgu gi ensrefi.”
Den bigi tesi di o kon na grontapu
Mat 24:1-21; Mrk 13:1-19
5Wantu sma ben taki fa a tempel ben meki nanga moi ston èn fa sma ben gi ala sortu sani fu moimoi a tempel. Dan Yesus taigi den taki: 6“Wan ten o kon tak' ala den sani san un e si dya, o broko te na gron. No wan ston o tan na tapu wan trawan.” 7Dan den sma aksi En taki: “Meister, oten dati o psa? San o de a marki di o sori taki den sani disi de fu psa?” 8Yesus piki den taki: “Un mus luku bun taki un no meki sma kori unu! Bika furu sma o du leki den na Mi. Den o taki tak' den na a Mesias, èn tak' a ten de krosbei. Ma un no mus waka na den baka! 9Te un sa yere taki kondre e feti èn tak' dyugudyugu de, un no mus frede, bika den sani disi mus fu psa fosi. Ma dati no wani taki tak' na a kba doro.” 10Dan Yesus taki moro fara: “A wan folku o feti nanga a tra folku, èn a wan kondre o feti nanga a trawan. 11A gron o seki bun hebi, èn ini difrenti presi ala sortu takru siki nanga angriten o de. Frede sani nanga bigi ferwondru marki o de fu si na heimel. 12Ma fosi den sani disi psa, den sma o grabu unu. Den o de na un baka nomonomo fu du un ogri. Den o krutu unu na ini den kerki fu den èn den o poti unu na ini straf'oso. Den o srepi unu go te na fesi kownu nanga granman fu Mi ede. 13Ma dati o de wan okasi gi unu fu ferteri den fu Mi. 14So un no abi fu seti unsrefi na fesi, fu prakseri san un mus taki fu yepi unsrefi. #Luk 12:11-12 15Bika Mi o gi un koni nanga den wortu fu taki, èn no wan fu den sma di e feti unu, o man piki na tapu san un taki, noso taki tak' a no de so. 16Un eigi m'ma nanga p'pa, un brada nanga den tra famiri fu unu, nanga un mati, o gi un abra, dan den o kiri sonwan fu unu. 17Fu Mi ede no wan sma no o man si un na ai. 18Ma no wan edewiwiri fu yu srefi no o lasi. 19Hori doro! Bika sowan fasi un o kibri un libi.”
20“Te un si taki srudati lontu Yerusalem, dan un mus sabi taki a yuru fu a foto broko te na gron de krosbei. 21Dan den sma di de ini Yudea, mus lon go na den bergi. Den sma di de ini a foto, mus lowe kmopo na ini, èn den sma di de ini den gron, no mus drai go ini a foto. 22Bika ini den dei dati Gado o puru En atibron na tapu den sma, meki ala sani san den profeiti skrifi kon psa. #Hos 9:7 23Den uma di de nanga bere, nanga den di abi pikin na bobi a pisten dati, o de fu sari. Bika bigi nowtu o de ini a kondre èn Gado o puru En atibron tapu a folku disi. 24Den o kiri den nanga deigri, èn den o kisi den tyari gwe na den kondre fu ala den tra folku. Dan sma di no de Dyu o du san den wani na ini Yerusalem, te leki a yuru doro fu den srefi kisi strafu.”
A fasi fa Yesus o kon baka
Mat 24:29-35; Mrk 13:24-31
25“Marki o de fu si na a son, a munkenki, nanga den stari. A fasi fa den hei skwala fu a se o bari, o meki den sma fu grontapu frede sote taki den no sabi san fu du. #Yes 13:10; Ese 32:7; Yow 2:31; Kon na krin 6:12-13 26Soso frede fu den sani san o psa na grontapu, o meki den sma lasi ati. Bika ala den makti di de na loktu o seki. 27Dan den sma o si a Manpikin fu Libisma e kon na tapu wan wolku nanga krakti nanga glori. #Dan 7:13; Kon na krin 1:7 28Te den sani disi bigin fu psa, dan un mus opo tnapu èn opo un ede luku go na loktu. Bika a ten fu Gado ferlusu unu de krosbei.”
29Dan Yesus gi den wan agersitori. A taki: “Un mus luku den figabon nanga ala den tra bon. 30Te un e si taki den bon e bigin gi nyun wiwiri, dan un sabi taki a dreiten de fu kon. 31Na so un mus sabi tu tak' te den sani san Mi taigi unu e bigin fu psa, dan a yuru fu Gado tiri libisma de krosbei. 32Fu tru Mi e taigi un taki: Ala den sani disi o psa te den sma fu a ten disi de na libi ete. 33Wan dei heimel nanga grontapu no o de moro, ma den sani san Mi taki, o tan fu têgo.” 34“Un mus de na ai. No furu un prakseri nanga fesa nanga sopi. No broko un ede nanga fa un o sorgu gi unsrefi. Un mus de na ai, fu a dei te Mi o kon baka, no tapu unu leki wan krafana. 35Bika a dei dati o kon gi ala sma na heri grontapu. 36Dat' meki un mus de na ai ala ten. Un mus begi fu un kan kmopo na ini den sani san o psa, èn fu un man tnapu na fesi a Manpikin fu Libisma.”
37Deiten Yesus ben e gi leri na ini a tempel. Ma te neti A ben e go na tapu a Oleifbergi, dorosei fu a foto. #Luk 19:47 38Fruku mamanten a heri folku ben e kon na Yesus na ini a tempel fu arki san A e leri.
Aktuálne označené:
Lukas 21: SB16
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Tekst © Surinaams Bijbelgenootschap 2016
