Ruti 4
4
Kapo Boazi Ruti
1Sage Boazi pa sasada ta tauni beti totu aia ie. Gogoton mai hola tinon ia guni Boazi ia aia ke vamomosi Ruti, gu Boazi, <<Hola mai hai, qu baere, beti totgore,>>Qi hola lago aia beti totgore.
2Teku Boazi manoputa koimata pa tauni, beti nabe, <<Totu hai,>>Beti totu ria. 3Qi nabe lago Boazi tasina, <<Naomi, ia mulemai kokon Moabi, vavagini aia bokumelaka ta tasida, Elimeleki. 4Oru rai ginugua pia kate pogoso mai rai pa kenumu beti oru rai vagi goi ia, pa kenudi ria malata ia totu hai. Beti pa kenundi ria malata ta qu tinoni. Koni hiva vagi goi ia, tavetia. Ba koni da hiva vagi goi, pitoni rai, gumi ke gigile rai. Na daksamu keka ke boka tavetia, goi hodo, beti rai vinkori pa tokel ia,>> <<Rai ke vagia.>> Qu aia.
5Qi nabe Boazi, <<Pa rane vagi goi bokumelaka ia pan Naomi beti pan Ruti Mohabaiti, Kate teku goi nabok ta tinon ia mate, gumi kolgosagi isongon ta tinon ia puto mate turangi no tinagtago.>>
6Nabe turangan, Boazi, <<Dakat boka rai vagia, na pu igua tekol rai qu tinagtago pa pinatiaga. Goi vagi mekamu, da kate taveti rai.>>
7(Pa kenu, pa Izreli, koni hiva tekkarovi ria tinagtago pa kek tinoni, ke tekkakahi keka hububan no sadol beti ke telago aia pan keka. Igu hanan ta vangaburun tinagtago pa Izreli.)
8Qi nabe turangan Boazi, <<Vagi mekamu,>> beti varizu aia no sadolo.
9Qi pitoni Boazi ria malata beti dogur tinoni, <<Kopirina gamu ome ia rai vagi pan Naomi dogur tinagtago ta Elimeleki, Kilioni beti Maloni. 10Ke teku naho rai, Ruti Mohabaiti, nabok ta Maloni gumi qu rekmagota. Gumi kopuni isongondi ia mate turangi no tingatago. Gumi ke dana naho muhal isongon aia pa korapan no tatmana, babi pa sau ia suveri aia. Ranenipo gamu omea!>>
11Qi ria malata beti dogur tinon ia turu pa sasada nabe, <<Gami var'ome pa matama. Zihova ke manani rekmagot ia kate luge pa mu gugusu, gu Reseli beti Lia, rikori ia podo kobur vani Izreli. Goi kate tatago pa korapan Iparat, bet goi kate vagigala pa korapan Betlihema. 12Kobur ia kate nanani Zihova pa mu rekmagota koregan. Tatmana ta goi kate guguputa naho ta Perezi, kobur malea ta Ziuda beti Tama.>>
Tututi ta Devita
13Qi teku Boazi Ruti gumi no rekmagota. Puta turangi aia Ruti, beti elu Zihova aia gumi molu. Beti podo aia kek malea. 14Nabe rekmagota pan Naomi, <<Ke tavalavat Zihova! Nanavani aia goi ranenipo hoa, keka koburu malea tuna tumu aia kat' kopuni goi. Aia ke vagigala pa korapan Izreli. 15Aia kate vakorega mule mu tinoa beti kate kopuni aia goi pa totos qoele goi. Mu magororoto aia sevi hole go, tode podo koburu. Aia koburu ta goi ke lean holani, bi tago goi vitu kobur malea.>>
16Qi teku Naomi koburu ia, beti vakole aia kobur ia pa avana, bet' kopuni aia kobur ia. 17Nabe rekmagota suver ie, <<Naomi kole no koburu.>> Beti vaisongoni ria aia Opeti. Aia taman Zese, Zese taman Devita.
18Tututi ia gore mai pan Perezi. Perezi taman Hezroni.
19Hezroni taman Ram, Ram taman Amminadab,
20Amminadab taman Nasoni, Nasoni taman Salmone,
21Salmone taman Boazi, Boazi taman Opeti
22Opeti taman Zese beti Zese taman Devita.
Aktuálne označené:
Ruti 4: NKE
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© 2024, Islands Bible Ministries. All rights reserved.