Matta 3
3
Yohana Nǝ Yʊtǝm Mwɛ Sagsagɔ A Fɛka Golagɔ
(Mar 1:1-8; Luk 3:1-18; Yoh 1:19-28)
1Nǝn joltɨn nɨ a shui, Yohana nǝ Yʊtǝm mwɛ Sagsagɔ a jel kiyo kɛl Kwaamaɨ lɛ a mʊgɔ kuul Yahudiya, 2sʊwa lɛ gɔ, “Jǝ́ yǝla jǝ́ bǝla bwɨlangkɛltɨn jenɔ, jʊ a bwɨɨ fɔlɔn lɔ Kwaamaɨ a dwama.”
3N nʊ nɨ Ishaya nǝkuwotǝmkǝgagɔ a sʊwa kɛl gǝnɔ gɔ,
“Diilɔ jo jangajǝng lɛ
a mʊgɔ kuul.
Sʊwa lɛ gɔ,
‘Jǝ́ fɛka gola Tɛlalɔɨ,
jǝ́ fɛka gǝm golantɨnɔ sɨn.’ ”
4Yohana gǝ dʊʊ dwang nɨ ja sʊʊl nǝn yitʌn namtenʌmi. A bwa kʊng gǝnɔ nǝn tɛ. Jǝjalǝn gǝnɔ n kʊgɨ jǝbɔ tɛlɨ. 5Nǝbɔ a Urushalimaɨ jǝbɔ nǝbɔ Yahudiyaɨ gwam, jǝbɔ tǝm nɨ gwam a kʌng tiyo Urduni ja bɛ a daa gǝ woi. 6Jǝ sʊwa bwɨlangkɛl jinɔ lɛ. Yʊ ji mwɛ sagsagɔ lɛ a tiyo Urdun.
7Nǝn kwama a kuwo nǝbɔ Farisaɨ jǝbɔ nǝbɔ Sadukiyaɨ a lada nyɔ bɛ lɛ a daa gǝ woi, sǝ ga yʊ ji mwɛ sagsagɨɨ, nǝngɔ a sʊwa ji gɔ, “Jǝ́ bɛlɨ faatɨn! Nuwo a gʊ lɔl jenɔ gɔ jǝ́ mwal nabwɨl Kwaamaɨ nɨ bɛ lɛɨ? 8Jǝ́ maa maajɨ nɨ nʊng lɛ gɔ jǝ́ yǝla jǝ́ bǝla bwɨlangkɛl jeni. 9Bɛ ka jǝ́ sʊwa lɛ jengɔ, ‘Ibrahim nǝn gɔ nǝn tɛtɛ bǝnɨ.’ Mǝ sʊwa jen nɛ, Kwaama a mʊgɔ kwaan gǝn gung gung Ibrahim gǝm bɛtɔ dwalǝn a mʊgɔ tatǝn nɨ. 10Ja kwɛl ja swa swaɨ twanɔ a jʌng tɨyantɨnɔ gǝm. Tɨya nɨ gwam a tʊʊ bɔ tʊʊl nyaɨ, jǝ mwatɨ gǝn ja mal a mʊgɔ kǝla.
11“Mǝ yʊ jen mwɛ sagsagɔ nǝn mwɛ sǝ a nʊng jǝ́ yǝla jǝ́ bǝla bwɨlangkɛl jenɔ. Kaa nǝl bɛ lɛ a gul mɨ, a laa ɨ dʊʊn. Twam gǝnɔ mǝ la bɔ n do. Yʊ jen yʊ mwɛ sagsagɔ nǝn Yʊwa Kwaamaɨ jǝbɔ kǝla. 12Nǝngǝn nǝn jǝ yutʌm gǝnɔ a kang, wʊnɨ yum bum fǝtɨgɔ lɛɨ, sǝ a mʊr nu jaam gǝnɔ a tal a bʌni. Twɨm twɨm fǝtɨgɔ nǝn kǝla nɨ mɨsɔ dumo lɛ woi.”
Yohana A Yʊ Yesu Mwɛ Sagsagɔ
(Mar 1:9-11; Luk 3:21,22)
13Kwamagɔ Yesu a jel a mʊgɔ Galilii, nǝngɔ a bɛ a tiyo Urdun a daa Yohana woi, sǝ Yohana a yʊ gǝn mwɛ sagsag. 14Yohana swɨ lɛ a kɔ, nǝngɔ a sʊwa gɔ, “Mǝ swɨ lɛ ń yʊ ɨ mwɛ sagsag. Maa nyǝn mʊ bɛ lɛ a daa mǝ woi?”
15Nǝngɔ Yesu a jǝla gǝn gɔ, “Bɛ a yǝlam nyɔ kǝngkɔ. A bʊm nyɔ bǝ maa nyɔ sǝ bǝ yii kanjǝl dǝngdǝngɔ gwam Kwaama swɨ lɛɨ.” Nǝngɔ Yohana a jǝlaɨ.
16Kwama Yohana a yʊm Yesu mwɛ sagsagɨɨ, kanga gǝ jel lɛ a mʊgɔ mwɛmɔ gǝmɨ, nǝngɔ dʌbʌl kwamagɔ a wumoi, nǝngɔ a kuwo Yʊwa Kwaamaɨ gǝla lɛ a dul gǝn na kumfiyoi, a gǝla a yɨ a dul gǝnɨ. 17Nǝngɔ kaa diil a jel a dʌbʌl kwama sʊwa lɛ gɔ, “Bwɛ nɨ nǝn Bʊla mɨ, wʊnɨ mǝ swɨ gǝn nɛɨ. Nǝl mǝndɨ nyʊwa lǝma gǝnɔ lɛ dangǝn.”
Aktuálne označené:
Matta 3: DBD
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
©️2024 Luke Initiative for Scripture Translation
