Yohana 7
7
Kɛtǝlam Yesui A Nǝ Bɔ Bɨlǝngkɛl A Daa Gǝ Woi
1A gulɔ gǝm Yesu a kɛla a mʊgɔ tǝm Galili. A swɨ bɔ a dɔ a mʊgɔ tǝm Yahudiya, jʊ a bwɨɨ Yahudawa nɨ fʌleni saa lɛ a jʌ gǝn. 2Dikulom gushitɨn Yahudawagɨɨ a dwama. 3Nǝngɔ kɛtǝlam Yesui a sʊwa gǝn gɔ, “A bʊm nyɔ ń gun fɔ ń shu a Yahudiya, sǝ bɛtɔ mɛlalɨ mʊnɔ a kuwo jǝ laatǝm kang nɨ mʊ maa lɛɨ. 4Pʌd nʊ nɨ swɨ lɛ ja nyǝm gǝnɨ, mɨ gǝ yʊ jʊ nɨ lɛ gǝ maa lɛɨ. Kanjǝl nɨ mɔ maa lɛɨ, bɛ nʊng dul mʊnɔ sǝ yooligɔ a nyǝm ń.” 5Kɛtǝlam Yesui ja nǝ bɔ bɨlǝngkɛl a daa gǝ woi.
6Nǝngɔ Yesu a sʊwa ji gɔ, “Kwama mǝndɨ a lǝga bɔ a la dɨn. A daa jen woi, kwamagɔ pʌd dǝngdǝng. 7A jenɔ yooligɔ mɨsɔ kɔ jen nɛ. A mǝndɨ a kɔ ɨ, jʊ a bwɨɨ n sʊwala gǝn bwɨlang kanjǝl nɨ gǝ maa lɛɨ. 8Jǝ́ yɔ dikulomɔ. Mɨsɔ mǝ shu dikulomɔ lɛ kǝngkɔ, jʊ a bwɨɨ kwama mǝndɨ a lǝga bɔ a la dɨn.” 9Yesu a sʊwa ji kɛl nɨɨ, nǝngɔ a tɨ dǝm a Galilii.
10Nǝn kwama kɛtǝlam gǝnɔ a shum dikulomi, nǝngɔ Yesu a shu tǝgǝnɨ. A waam waam, a jel bɔ a talɨ. 11Yahudawagɔ a tɨtǝn saa gǝn nɛ a daa dikulomɔ gǝm. Jǝ bʌbko lɛ jǝ sʊwa lɛ gɔ, “Nʊ nɨ gǝ na a fee?”
12A mʊgɔ mʊrkatǝm nɨɨ, nǝbɔ sʊwaka kɛltɨn nɛ a kʊm jin a dul Yesui. Kaamɨ sʊwa lɛ daddad gɔ, “Nǝfili nyan.” Kaamɨ tag sʊwa lɛ gɔ, “Swagtǝm maa nǝbɔ gǝm lɛɨ.” 13Mɨ nʊ nɨ wo a nya kwaan sʊwatǝm kɛl a dul Yesui a talɨɨ, jʊ a bwɨɨ jǝ nyʊwa taal nǝb dʊʊm Yahudawagɨɨ lɛ.
Yesu A Maa Mɛlalɨ A Dikulom Gushitɨn
14Kwama ja lam tɨbǝl dikulomi, nǝngɔ Yesu a dɔ mʊgɔ Kan Kwaamanɔ a tǝl mɛlatǝmɨ. 15Nǝngɔ dʊʊm Yahudawagɔ a ta kang a nyiyo jǝ sʊwa lɛ gɔ, “Nʊ nɨ a maa bɔ gǝlalantal wo sǝ a nya kiyotǝm. A la maa nyǝn a yǝlam nǝ nyǝmtǝm nyɨɨ?”
16Nǝngɔ Yesu a jǝla ji gɔ, “Kanjǝl nɨ mǝ maa mɛlalɨ gǝnɔ lɛɨ, ke bɔ a mɨ, na nʊ nɨ a twam ɨɨ. 17Nʊ nɨ a jǝgǝm jʊ nɨ Kwaama swɨ lɛɨ, nyǝm nyǝm gɔ mɛlalɨ mǝndɨ a jel a daagɔ Kwaama woi, ke bɔ a daagɔ mǝ woi. 18Nʊ nɨ mɛla kanjǝl nɨ lɛ a yʊlan gǝnɨ, gǝ saa dul gǝnɔ gǝm dʊʊlǝn. Nʊ nɨ swɨ lɛ a saa nʊ nɨ a twam gǝnɨ gǝm dʊʊlǝnɨ, n nǝ bɨlǝngkɛl, mɨ nǝn bwɨlangkɛl a mʊgɔ gǝn. 19Ke bɔ Musa a nǝ jen diili ka? N wɛ a bwɨ mɨ nʊ nɨ wo bwangtǝn diilɔ lɛ a kʊm jeni? N wɛ bwɨ jǝ́ swɨ lɛ jǝ́ jʌ i?”
20Nǝngɔ nǝbɔ a jǝla gǝn gɔ, “Mʊ nǝngǝn nǝn yʊwa bwɨla a bʊtɔ mʊn. Na bǝ wo swɨ lɛ a jʌ ńi?” 21Nǝngɔ Yesu a jǝla ji gɔ, “N maa jǝ laatǝm kang win. Jǝ́ ta kang a nyiyo pʌd gwam jenɔ a dul jʊ nɨ. 22Musa a nǝ jen diil biyotǝm mwɛnɔ (ke bɔ gɔ a tǝlɨ, n tʊgalam jenɔ a tǝlɨ). Jǝ́ biyo biyo bwɛsǝn gǝm mwɛn nǝn Kum Fǝbtǝm. 23Na jǝ́ biyo biyo bwɛsǝn gǝm mwɛn nǝn di Kum Fǝbtǝmɨ sǝ jǝ́ bwangtǝn diil Musaɨ, n wɛ a bwɨ jǝ́ maa nabwɨl lɛ jǝbɔ mǝ, mǝ gung bʊtɔ nǝlɨ gwam nǝn di Kum Fǝbtǝmɨ? 24Ka jǝ́ maa lɛ borang a dul kanjǝl kuwotǝm nu. Bɛ jǝ́ maa borang nǝn jʊ nɨ n dǝngdǝngɨ.”
Yesu Nǝn Kiristi Ka?
25Nǝngɔ kaam nǝbɔ Urushalimaɨ a sʊwa gɔ, “Ke bɔ nʊ nɨ jǝ saa lɛ ja jʌi ka? 26N wɔ sʊwa kɛlɔ lɛ a talɨ. Ja maa gǝm bɔ kaa jǝl. Jǝ́ kuwo lɛ nǝb dʊʊmɔ a nyǝm dangǝn gɔ nǝn gɔ nǝn Kiristi ka? 27N wɔ bǝ nyǝm daagɔ nʊ nɨ a jelʌmi. Na nǝn Kiristi bɨlǝngǝn a bɛɨ, mɨ nʊ nɨ wo nyǝm daa nɨ lɛ ga jelʌm woi.”
28Yesu maa mɛlalɨgɔ lɛ a Kan Kwaaman, nǝngɔ a gung diilɔ a sʊwa gɔ, “Jen jǝ́ nyǝm ɨ, jǝ́ nyǝm daagɔ mǝ jelʌm woi. Mǝ bɛ bɔ nǝn fɔlɔn dul mɨ. Nʊ nɨ a twam ɨɨ n nǝ bɨlǝngkɛl, jǝ́ nyǝm gǝn bɔ. 29Mǝ, n nyǝm gǝn, jʊ a bwɨɨ mǝ bɛ a daa gɔ woi, nǝn gɔ a twam ɨ.”
30Yesu a sʊwa kɛl nɨɨ, nǝngɔ nǝbɔ saa lɛ sǝ jǝ ta gǝnɨ. Mɨ nʊ nɨ wo a ke gǝnɨ, jʊ a bwɨɨ kwama gǝnɔ a lǝga bɔ a la. 31Nǝbɔ a lada tag a kʊm nǝbɨɨ a nǝ bɨlǝngkɛl nǝn Yesu, jǝ sʊwa lɛ gɔ, “Nǝn kwama Kiristi bɛm lɛɨ, maa maa kanjǝl laatǝm kang nɨ shu shui a wʊnɨ nʊ nɨ a maaɨ ka?”
Nǝb Dʊʊm Yahudawagɔ A Saa Tatǝm Yesui
32Nǝbɔ Farisaɨ a nyʊwa nǝbɔ sʊwa kɛl lɛ daddad a kʊm jin a dul Yesui, nǝngɔ dʊʊm nǝbkǝlamɔ jǝbɔ nǝbɔ Farisaɨ ja twam nǝb tɔɔtǝm Kan Kwaamanɔ gɔ ja ta gǝn.
33Nǝngɔ Yesu a jǝla gɔ, “Kwama mǝ yɨ lɛ nǝbɔ jeni a taam nǝn dǝm nyɔ, sǝ n yǝla n shu a daagɔ nʊ nɨ a twam ɨɨ. 34Jǝ́ saa ɨ saa ɨ, mɨsɔ jǝ́ nya ɨ lɛ. Daagɔ mǝ woi, mɨsɔ jǝ́ dwal lɛ jǝ́ yɔ wo.” 35Nǝngɔ Yahudawagɔ a sʊwaka a kang bʊtɔ jin gɔ, “Gǝ yi a fee, mɨsɔ bǝ nya gǝn nɛɨ? Kɛna yi a daagɔ Yahudawa nɨ a kwɨya tǝmɔ nǝn kwan jǝ yǝm jǝbɔ nǝbɔ Girikaɨ, sǝ ya mɛla nǝbɔ Girikaɨ gǝm lɛ fʌleni? 36N wɛ gǝ nʊng lɛ nǝn sʊwatǝmɔ gɔ, bǝ saa gǝn saa, mɨsɔ bǝ nya gǝn nɛɨ? N wɛ gǝ nʊng lɛ tag gɔ, daagɔ gǝ woi, mɨsɔ bǝ dwal lɛ bǝ yɔ woi?”
Laa Mwɛ Kʊlɨ
37Nǝn kum dɨltǝm dikulomɔ, wʊnɨ a yǝlam kɔkɔ dʊʊn dikulomi, nǝngɔ Yesu a gun a tɨɨ a gung diilɔ sʊwa lɛ gɔ, “Nʊ nɨ nyʊwa diil mwɛn nɛɨ, bɛ ga bɛ a daa mɨ woi sǝ ga nɔɔ. 38Nʊ nɨ a nǝ bɨlǝngkɛl a daa mǝ woi, ‘Laa mwɛ nɨ nǝ kʊlɨ lɛɨ, jel jel a nǝl gǝn,’ kanga mʊlalɨ kɛl Kwaamaɨ a sʊwaɨ.” 39Yesu gǝ sʊwa kɛlɔ a dul Yʊwa Kwaamaɨ, wʊnɨ nǝb nɨ a nǝ bɨlǝngkɛl a daa gɔ woi jǝ yo lɛɨ. A kwama gɔ lǝga bɔ ja nǝ ji Yʊwa Kwaamaɨ, jʊ a bwɨɨ lǝga bɔ ja do Yesu a dʌbʌl dɨn.
Nǝbɔ A Maa Gʊbkatǝm A Dul Yesui
40Nǝbɔ a nyʊwa kɛlɔ Yesu a sʊwaɨ, kaamɨ gɔ, “N bɨlǝngkɛl, nʊ nɨ n nǝkuwotǝmkǝga.”
41Kaamɨ gɔ, “Nʊ nɨ nǝn Kiristi.” Tangǝnɔ gɔ, “Kiristi nɨ jel jel a mʊgɔ Galili ka? 42Mʊlalɨ kɛl Kwaamaɨ a sʊwa gɔ, ‘Kiristi jel a dʊʊm Daudaɨ, ja bʌ gǝn a Baitalami, a bɛ tuulɔ nɨ Dauda a yɨmɨ, mɨ nyɔ ka?’ ” 43Nǝngɔ nyiyo nǝbɨɨ a bel a dul Yesui. 44Kaamɨ swɨ lɛ jǝ ta gǝn. Mɨ nǝn nʊ nɨ a ke gǝnɨ.
Nǝb Dʊʊm Yahudawa Nɨ Mɨ Nǝn Nǝtǝm Bɨlǝngkɛlɨ
45Nǝn kwama nǝb tɔɔtǝm Kan Kwaamanɔ a yǝlamɨ, nǝngɔ dʊʊm nǝbkǝlamɔ jǝbɔ nǝbɔ Farisaɨ ja bʌ ji gɔ, “N wɛ a bwɨ jǝ́ bɛ bɔ nǝn gɨɨ?”
46Nǝngɔ nǝb tɔɔtǝm Kan Kwaamanɔ a jǝla ji gɔ, “Mɨ kaa nǝl wo sʊwa kɛl lɛ na nʊ nɨɨ.” 47Nǝngɔ nǝbɔ Farisaɨ a sʊwa nǝb tɔɔtǝm Kan Kwaamanɔ gɔ, “Jen tʌjen, a swag jen ka? 48Kaa nǝl wo a kʊm nǝb dʊʊmɨ jǝbɔ nǝbɔ Farisaɨ a nǝ bɨlǝngkɛl a daa gɔ woi ka? 49Mʊrkatǝm nǝb nɨ a nyǝm bɔ kaa jǝl a dul diil Musaɨ, Kwaama a kwɛl a lag ji lagɨ.”
50Win a kʊm nǝbɔ Farisaɨ nɨ nǝn Nikodimu, wʊnɨ a saa kuwotǝm gǝnɔ galɨgǝnɨ, nǝngɔ a sʊwa tangǝn nǝbɨɨ gɔ, 51“A diil bǝnɔ gǝmɨ, mɨ bǝ mwatɨ borang lɛ, na bǝ nyʊwa bɔ kɛl nɨ a jel a nyiyo gǝnɨ, bǝ dʌng jʊ ga maaɨ.”
52Nǝngɔ ja jǝla gǝn gɔ, “Mɔ tǝmʊn mʊ bwɛ Galilii ka? Fɛ ń dʌng kɛl Kwaamaɨ sǝ ń kuwo, mɨ nǝkuwotǝmkǝga nɨ jel lɛ a mʊgɔ Galilii.” 53Nǝngɔ gwam ja shu a lɔɨ.
Aktuálne označené:
Yohana 7: DBD
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
©️2024 Luke Initiative for Scripture Translation
