Yohana 1
1
Kɛlɔ A Yǝlam Nǝfili
1A tǝltǝmɔ gǝmɨ Kɛlɔ wo. Kɛlɔ gǝ na jǝbɔ Kwaama. Kɛl nɨ nǝn Kwaama. 2Nǝn gɔ a tǝltǝmɔ gǝm jǝbɔ Kwaamaɨ. 3Kwaama a fwal kanjǝlɔ gwam a gola gǝn. Mɨ nǝn jʊ nɨ a fwal ke bɔ a gola gǝnɨ. 4A daa gǝ woi kʊlɨgɔ wo, kʊlɨ nɨ nǝn gɔ a bɛ nǝn nyalǝm a nǝbɔ gǝmɨ. 5Nyalǝmɔ beta lɛ a kumtojiligɔ gǝm, kumtojiligɔ a dwal bɔ a dum gǝn.
6Kwaama a twam kaa nǝl, dun gǝnɔ nǝn Yohana. 7A bɛ sǝ ba nǝ nyiyo a sʊwa nǝbɔ bɨlǝngkɛl a dul nyalǝm nɨ, sǝ nǝbɔ gwam a nǝ bɨlǝngkɛl a gola gǝn. 8Gǝ nǝn kang gǝn ke bɔ nyalǝm nɨ. A bɛ sǝ ba sʊwa nǝbɔ kɛl a dul nyalǝm nɨ. 9Nyalǝm bɨlǝngǝnɔ nɨ won nɛ a nǝbɔ gǝm gwamɨ, bɛ lɛ a yooligɔ gǝm.
10Kɛl nɨ gǝ na a yooli, Kwaama a fwal yooligɔ a gola gǝn, yooligɔ a nyǝm gǝn bɔ. 11A bɛ a yooli nɨ, wʊnɨ na a gɨɨ, nǝbam gǝnɔ a yo gǝn bɔ. 12A nǝb nɨ gwam a yo gǝnɨ, a nǝ bɨlǝngkɛl a daa gǝ woi, a nǝ ji fɔlɔn ja yǝlam bɛtɔ lɔ Kwaamaɨ. 13Ja yǝlam bɔ bɛtɔ lɔ gɨɨ a gola nǝfitʌmi, ke bɔ a gola wɛl bʊtɔ jǝbɔ swɨtǝm nǝfitʌmi, n Kwaama nǝn kang gǝn nǝn gɔ nǝn Tɨya jii.
14Kɛl nɨ a yǝlam nǝfili, a yɨɨ jǝbɔ nǝn. Nǝn kuwo dʊʊlǝn gǝnɔ, dʊʊlǝn nɨ ja maa Bwɛ gǝm win swarɨ, a jel a daagɔ Tɛ bwɛ woi, wʊnɨ a yii nǝn lǝma jǝbɔ bɨlǝngkɛlɨ.
15Yohana a sʊwa kɛl a dul gǝn, a gung diil gǝnɔ, nǝngɔ a sʊwa gɔ, “Bwɛ nɨ nǝn gɔ mǝ sʊwa kɛl lɛ a dul gǝnɨ, nǝn kwama mǝ sʊwa mǝʊ, ‘Nʊ nɨ bɛ lɛ a gul mɨɨ a laa ɨ dʊʊnɔ, jʊ a bwɨɨ, wo nǝn kʊlɨ na lǝga bɔ ja bʌ i.’ ” 16A nǝ bǝn lǝma pʌd a dul lǝma jʊ a bwɨɨ n gʌleng swɨtǝm gǝnɔ a ladaɨ. 17Kwaama a nǝ bǝn diilɔ a kang Musaɨ, a nǝ bǝn lǝmagɔ jǝbɔ bɨlǝngkɛlɔ a kang Yesu Kiristii. 18Mɨ nǝn nǝfili nɨ a kuwo Kwaama woi, nǝn Bʊla gɔ kwaagɔ win, nǝn gɔ dakini jǝbɔ Tɛ bwɛɨ, nʊng bǝn jelkalǝng Kwaamaɨ lɛɨ.
Yohana Nǝ Yʊtǝm Mwɛ Sagsagɔ A Sʊwa Gɔ Gǝ Kebɔ Kiristi
(Mat 3:1-12; Mar 1:1-8; Luk 3:1-18)
19Wʊnɨ nǝn gɔ nǝtǝm nyiyo nɨ Yohana a nǝ nǝn kwama nɨ Yahudawagɔ a Urushalimaɨ ja twam nǝbkǝlamɔ jǝbɔ nǝbɔ Lawii, gɔ ya ja bʌ gǝn gɔ, “Nǝmɔ mʊ wo?”
20Yohana a kana bɔ, a sʊwa ji a talɨ gɔ, “Mǝ ke bɔ Kiristi.”
21Nǝngɔ ja bʌ gǝn gɔ, “Mɔ nǝn nuwo? Mɔ nǝn Iliya ka?”
Nǝngɔ a jǝla ji gɔ, “Ɔ ɔ, mǝ ke bɔ gɔ.”
“Nǝmɔ mʊ nǝkuwotǝmkǝgagɔ gǝ bɛ lɛɨ ka?”
A yǝla jǝla ji gɔ, “Ɔ ɔ.”
22Nǝngɔ jǝ bʌ gǝn gɔ, “La mɔ nǝn nuwo? Sʊwa nǝn jʊ ya nǝn sʊwa nǝb nɨ lɛ a twam nǝnɨ. Mɔ jo dul mʊnɔ mɔ wo?”
23Nǝngɔ Yohana a jǝla ji nǝn kɛl nǝkuwotǝmkǝga Ishayaɨ a sʊwaɨ gɔ, “Nǝmǝ mǝ diil nɨ jo jangajǝl lɛ a kuul sʊwa lɛ gɔ, ‘Jǝ́ fɛka gola Tɛlalɔɨ!’ ”
24Nǝngɔ kaam nǝbɔ Farisaɨ wʊnɨ ja twam jii, 25ja bʌ Yohana gɔ, “Na mʊ ke bɔ Kiristii, mʊ ke bɔ Iliya, mʊ ke bɔ nǝkuwotǝmkǝga nɨɨ, n wɛ a bwɨ mʊ yʊ nǝbɔ mwɛ sagsag lɛɨ?”
26Nǝngɔ Yohana a sʊwa ji gɔ, “A mǝndɨ mǝ yʊ jen mwɛ sagsagɔ nǝn mwɛ. Kaa nǝl wo a kʊm jen, wʊnɨ jǝ́ nyǝm gǝn bɨɨ. 27Wʊnɨ bɛ lɛ a gul mɨɨ, wʊnɨ mǝ la bɔ n kwɨ dwang twam gǝnɨ.”
28Kanjǝl nɨ a bwɨ a Betanya, a dʌng Tiyo Urdun, a daa nɨ Yohana yʊm nǝbɔ mwɛ sagsag lɛɨ.
Yesu Nǝn Gɔ Bɛ Gal Kwaamaɨ
29Nǝn tǝmsɛlɨgɔ, nǝngɔ Yohana a kuwo Yesu bɛ lɛ a daa gǝ woi, nǝngɔ a sʊwa gɔ, “Jǝ́ dʌng bɛ gal Kwaamaɨ, wʊnɨ a dem bwɨlangkɛl yooli nɨɨ. 30Nǝn gɔ nʊ nɨ mǝ sʊwa jen kɛl lɛ a dul gǝnɨ mǝʊ, ‘Kaa nǝl bɛ lɛ a gul mɨ, wʊnɨ a laa ɨ dʊʊnɨ, wo nǝn kʊlɨ na lǝga bɔ ja bʌ i.’ 31Galɨgǝn mǝ nyǝm gǝn bɔ. Mǝ bɛ mǝ yʊ nǝbɔ mwɛ sagsag, sǝ n dǝg nǝbɔ Israilaɨ a nyǝm gǝn.”
32Nǝngɔ Yohana a sʊwa nǝbɔ kɛl nɨ a dul gǝn gɔ, “N kuwo Yʊwa Kwaamaɨ gǝla lɛ kwama na kumfiyo ba yɨ a dul gǝn. 33A kwama gɔ mǝ nyǝm bɔ mǝʊ nǝn gɔ. Kwaama nɨ a twam mɨ gɔ n yʊ nǝbɔ mwɛ sagsagɨɨ, nǝngɔ a sʊwa ɨ gɔ, ‘Nʊ nɨ mʊ kuwo Yʊwa Kwaamaɨ a gǝla a yɨ a dul gǝnɨ, nǝn gɔ yʊ nǝbɔ mwɛ lɛ nǝn Yʊwa Kwaamaɨ.’ 34N kuwo kuwoi a bwɨ nyɔ, n sʊwa jen nʊ nɨ nǝn Bʊla Kwaamaɨ.”
Bɛtɔ Mɛlalɨ Yesui Nǝn Tɨkǝgaɨ
(Mat 4:18-22; Mar 1:16-20; Luk 5:1-11)
35Nǝn tǝmsɛlɨ tag Yohana tɨm dakini jǝbɔ kaam bɛtɔ mɛlalɨ gǝnɔ yo. 36Nǝn kwama a kuwom Yesu shu lɛɨ, nǝngɔ a sʊwa gɔ, “Jǝ́ kuwo bɛ gal Kwaamaɨ!”
37Bɛtɔ mɛlalɨ nɨ yoi ja nyʊwa jʊ nɨ ga sʊwaɨ, nǝngɔ ja bwangtǝn Yesui. 38Yesu a yǝla dʌng gul gǝnɨ, nǝngɔ a kuwo ji jǝ bwang gǝm lɛɨ, nǝngɔ a bʌ ji gɔ, “N wɛ jǝ́ saa lɛɨ?”
Nǝngɔ ja sʊwa gǝn gɔ, “Rabbi” (kɛl nɨ gǝ nʊng “Nǝ mɛlalɨ”), “mʊ na nǝn yɨmɔ a fee?”
39Nǝngɔ Yesu a jǝla ji gɔ, “Jǝ́ bɛ ba jǝ́ kuwo.”
Nǝn kwamagɔ kemʌnɔ naal na kɔkɔ. Nǝngɔ ja bwang gǝm ya ja kuwo daa yɨm gǝnɨ, ja yɨ jǝbɔ gɔ nǝn kɔkɔ gɔ.
40Win a kʊm nǝb nɨ yoi nǝn Andarawas, kɨla Saminu Bitrusi. Kwama a nyʊwa jʊ Yohana sʊwa a dul Yesui, nǝngɔ a bwangtǝn Yesui. 41Tʌgo a kang Andarawas a saa kɨla gɔ Saminui, a sʊwa gǝn gɔ, “Nǝ nya Nʊ nɨ ja jǝgǝmɨ,” wʊnɨ nǝn Kiristii.
42Nǝngɔ a yɔ nǝn Saminu a daagɔ Yesu woi. Yesu a dʌng gǝn, nǝngɔ a sʊwa gǝn gɔ, “Mɔ nǝn Saminu bʊla Yohanaɨ. Ya jǝ jo ń gɔ Kefas.” Dun nɨ win jǝbɔ Bitrus, gǝ nʊng “Tɛl.”
Yesu A Jo Filibus Jǝbɔ Nataniyel
43Nǝn tǝmsɛlɨ nǝngɔ Yesu a fɛka yɔm Galilii. A dɔ Galilii, nǝngɔ a tǝgaka jǝbɔ Filibusi, a sʊwa gǝn gɔ, “Bwang mɨ.”
44Filibus n bwɛ Betsaida, tuulɔ bǝ Andarawasɨ jǝbɔ Bitrus. 45Filibus a nya Nataniyel nǝngɔ a sʊwa gǝn gɔ, “Nǝ nya nʊ nɨ jǝ mʊla fulon kɛl gǝnɔ a diil Musaɨ jǝbɔ langǝn bwangǝn nǝbkuwotǝmkǝgagɨɨ, gɔ, nǝn Yesu bwɛ Nazarat, bʊla Yusufui.”
46Nǝngɔ Nataniyel a bʌ gǝn gɔ, “Mʊ kuwo lɛ jǝ nyan jel jel a Nazarat ka?” Nǝngɔ Filibus a sʊwa gǝn gɔ, “Bɛ ba kuwo.”
47Nǝn kwama Yesu a kuwom Nataniyel bɛ lɛ a daa gǝ woi, nǝngɔ a sʊwa gɔ, “Bwɛ nɨ n bwɛ Israila dangǝn, wʊnɨ mɨ nǝn gabakɛlɨ.”
48Nǝngɔ Nataniyel a bʌ gǝn gɔ, “Mɔ nyǝm ɨ nyǝn?” Nǝngɔ Yesu a jǝla gǝn gɔ, “Nǝn kwama nɨ Filibus a lǝga bɔ a jo ńi, n kuwo ń a jʌng tɨya dʌfeng.”
49Nǝngɔ Nataniyel a sʊwa gǝn gɔ, “Feyi, mʊ nǝn Bʊla Kwaamaɨ! Nǝmɔ mʊ nǝn Fɔlɔ nǝbɔ Israilaɨ.” 50Nǝngɔ Yesu a jǝla Nataniyel gɔ, “Mʊ nǝ bɨlǝngkɛl a kɛlɔ mǝ gar mǝʊ n kuwo ń a jʌng tɨya dʌfengi ka? Mʊ kuwo kuwo kanjǝl nɨ a laa a wʊnɨ.” 51Nǝngɔ a sʊwa gǝn gɔ, “N bɨlǝngkɛl mǝ sʊwa jen nɛɨ, jǝ́ kuwo kuwo dʌbʌl kwamagɔ a wumo, bɛtɔ twama Kwaamaɨ gǝla lɛ kaamɨ gwi lɛ a dul Bʊla Nǝlɨ.”
Aktuálne označené:
Yohana 1: DBD
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
©️2024 Luke Initiative for Scripture Translation
