मत्ति 13
13
चालाइ बिअ्काको तुलना
(मर्कुस ४:१-१२,२५; लुका ८:४-१०; १०:२३-२४)
1इङकोङ दिना इसु साअ्सो ओल्हितेङ चावान्दिको काम्बेता योम्हि। 2जेलाउ हेन्जाङ द्याङगेलाइ वाको भेर्पा जोम्हि रो वा नाउता धोलतेङ योम्हि, कालाउ बुङ झाराङ द्याङगेलाइ काम्बेता जाअ्हि।#लुका ५:१-३ 3इसु इङको द्याङगेलाइहेङ हेन्जाङ काथागेलाइ तुलनागेलाइता इसिका काथा दोअ्हि:
“एमि चालाइ बिअ्का चालाइ बिअ्लि ओल्हेहि। 4कालाउ एसापा बिअ्लाउ आतुइसा चालाइ दामाभारि बिअ्न्हाहि रो जिह्याँ जुइल्हेङ लोतेङ इङको चापिहि। 5आतुइसा चालाइ उन्ठुइहिका भोनोता बिअ्न्हाहि, जेता हेन्जा भोनो मान्थुघाहि रो वाङखारापा भोनो मान्थुनाङसिङ इङको मारफाङ योहि। 6कालाउ बुङ जेलाउ साने देहि इङको ओलोमन्हाहि रो लिअ्ताथिकापा जारिजोलि मादोनाङसिङ इङको सेङहि। 7हेथे चालाइचाहिँ चुइगेलाइको झालासता बिअ्न्हाहि, कालाउ बुङ चुइगेलाइ धाङगातेङ लोहि रो चालाइहेङ बारालि मापिहि। 8बो चालाइ रेम्का भोनोता बिअ्न्हाहि रो आधे नाकुरि, आधे सुमकुरि रो आधे एकुरिते गुना उब्जा पिहि। 9जाइको न्हातोङ हि, वा हिनाको।”
10कालाउ चात्यागेलाइ लोतेङ इसुहेङ दोअ्हि, “ना एम्बालाइदोफा हाइपालि तुलनागेलाइता धुइखेना?” 11वा एम्बालाइहेङ दोअ्हि, “नेलाइहेङ ते सादेल सारभिको लिअ्ताको काथा गेलि आकिल पिका हि, कालाउ बुङ एम्बालाइहेङ चाहिँ पिका मान्थु। 12हाइपानु जाइदोफा गिका मन हि, इङकोहेङ आरोङ हेन्जाङ आकिल प्यावा रो इङकोदोफा हेन्जा ज्यावा। कालाउ बुङ जाइदोफा गेका मन मान्थु इङकोदोफा हिका आकिल बुङ घिङन्हावा।#मत्ति २५:२९; मर्कुस ४:२५; लुका ८:१८; १९:२६ 13इदोङखातिर का एम्बालाइदोफा तुलनाता धुइखा, हाइदोनु एम्बालाइ खाङनु ते खाङखे कालाउ बुङ मातिङखे, हिङनु ते हिङखे कालाउ बुङ हिङतेङ बुङ मागेखे। 14आगाधुइका यसैयाको दोअ्का काथा एसापा एम्बालाइता पोङघाहि:
‘हिङनु ते नेलाइ हिङसुखेना, कालाउ बुङ हेअ्लाउ मागेसुखेना,
खाङनु ते खाङसुखेना, कालाउ बुङ हेअ्लाउ मातिङसुखेना।
15हाइपानु इदोइ द्याङगेलाइको कोन्धाङ बोधालाका हि,
एम्बालाइको न्हातोङ बाम्का हि,
एम्बालाइको मिँ तुअ्का हि,
माकुनुते एम्बालाइ मिँहोइ तिङधावा,
न्हातोङहोइ हिङधावा,
कोन्धाङहोइ गिधावा रो का भारि घुरिधावा,
कालाउ का एम्बालाइहेङ एल्पा धाङका।’#यसैया ६:९,१०
16“कालाउ बुङ नेलाइहेङ चाहिँ परमेस्वर आबा सहसाम्पा पिका हि, हाइपानु नेलाइको मिँ तिङका रो न्हातोङ हिङका जेङका हि।#लुका १०:२३-२४ 17जातिङको, का नेलाइहेङ दोअ्खा, नेलाइको तिङका काथा हेन्जाङ आगाधुइका रो धरम द्याङगेलाइ खाङलि लाल्सा पाघाखे, कालाउ बुङ मातिङहि, कालाउ नेलाइ हिङका काथा हिङलि लाल्सा पाघाखे, कालाउ बुङ माहिङहि।
चालाइ बिअ्का तुलनाको माने
(मर्कुस ४:१३-२०; लुका ८:११-१५)
18“चालाइ बिअ्काको तुलना माने हिङसु। 19हेथे द्याङगेलाइ सादेलको सारभिको कथन हिङनुते हिङखे कालाउ बुङ मागेखे, कालाउ दुरजन लोखे रो इङकोको कोन्धाङता जे बिअ्का हिघाहि इङको कुर्हाइतेङ चुमपुखे। दामाभारि बिअ्न्हाका चालाइचाहिँ इङकोङ एइ: 20उन्ठुइहिका भोनोता बिअ्न्हाका चालाइचाहिँ इङको द्याङ भाइका एइ, जाइ कथन हिङतेङसाङ लेङचातेङ ओदोङघरि मन्जुरि पाखे। 21कालाउ बुङ इङकोको कोन्धाङ लिअ्ता थिकापा जारि माजोनाङसिङ इङको आतुइसा पहर थिकापा खिनिङ हिखे। कालाउ परमेस्वरको कथनता खान्धुर पाका खातिरसो तु: रो सान्ताइका लोतेङसाङ इङको न्हु पासाइखे। 22आरोङ हेअ्मि द्याङको कोन्धाङचाहिँ चुइको झालास्ता बिअ्न्हाका चालाइभाइकाङ एइ। एम्बालाइ परमेस्वरको कथन हिङतेङ बुङ दुनियाको पिर रो टाका काउरिको लाल्साता फासिखे। एन्साङ एम्बालाइको हिङका कथनगेलाइ राम्तेङ हानिखे रो ताइको ज्यानता हिदिङ बुङ फल मासेपाखे। 23कालाउ बुङ हेअ्मि द्याङको कोन्धाङ रेम्का भोनोता बिअ्न्हाका चालाइ भाइका एइ, जाइ कथन हिङखे, गेखे रो जातिङको उब्जनि सेपाखे। इङको बिअ्का चालाइसो नाकुरि गुना, सुमकुरि गुना रो एकुरिते गुना उब्जनि सेपाखे।”
माइरिमाको तुलना
24इसु आरोङ एम्बालाइहेङ भेनेङ तुलना हिङपाहि, “सादेलको सारभि एमि द्याङभाइका एइ, जाइ ताइको मिलिङता रेम्का चालाइ बिअ्हि। 25कालाउ बुङ द्याङगेलाइ जिम्का पहर वाको दुस्मन लोहि रो गोहोमको माझा माझाता माइरिमागेलाइ बिअ्तेङ हान्हेहि। 26जेलाउ सिङ बारातेङ इङकोता सिह्याँ लागेहि, कालाउ माइरिमा बुङ देखाल पिहि।
27“साअ् गिर्हिको कामत्यागेलाइ लोतेङ वासेहेङ दोअ्हि, ‘हाइ ना ताइको मिलिङता रेम्का चालाइ बिअ्का माको? इन्ता माइरिमा हितासो लोहि?’ 28साअ् गिर्हि एम्बालाइहेङ दोअ्हि, ‘हिदिङ दुस्मन एसा पापिहि वाला।’ कामत्यागेलाइ वासेहेङ दोअ्हि, ‘हाइ केलाइ हानितेङ इङको उअ्ताङ?’
29“कालाउ बुङ वा दोअ्हि, ‘एन्सा मापासु’ माकोनुते नेलाइ माइरिमा उअ्लाउ गोहोमसुदाङ उअ्स्वाना। 30बालि चेका माजेङपाधाउ न्हेमिहेङ दोसादोसाङ बारालि पिसु। कालाउ का बालि चेकालाइहेङ दोअ्ताङका, ‘लाम्फा माइरिमा उअ्तेङ ओअ्पालि बोझा जिङसु, कालाउ बुङ गोहोमचाहिँ काङको भाकारता ताअ्सु।’”
पासाइको चालाइ रो साउरिको तुलना
(मर्कुस ४:३०-३४; लुका १३:१८-२१)
31इसु एम्बालाइहेङ भेनेङ तुलना दोअ्हि, “सादेलको सारभि पासाइको चालाइ भाइका एइ, जाइ एमि द्याङ ताइको बारिता चुमपुतेङ बिअ्हि। 32इङको गोताङ चालाइगेलाइता म्हुइका जेङखे, कालाउ बुङ जेलाउ बाराखे, कालाउ इङको गोताङ सारसिङगेलाइखान्तेङ बाराका जेङखे रो जिह्याँ जुइल्हेङगेलाइ लोतेङ इङकोको दालेङगेलाइता भासा जोखे।”
33वा एम्बालाइहेङ भेनेङ तुलनाता दोअ्हि, “सादेलको सारभि साउरिभाइका एइ, एमि बेबाल ना पाथि झोको तोलेता आतुइसा साउरि मिसालाइहि रो इङको गोताङ तोले साउरिहोइ माफुलिपा धाउ इङकोहेङ ए थाने ताअ्हि।”
34इसु इदोइ गोताङ कथन द्याङगेलाइहेङ तुलनाता दोअ्हि। एम्बालाइहेङ तुलनामाकोसिङ वा हाइ बुङ मादोअ्हि। 35आगाधुइकासो दोअ्का कथन एसापा पोङघाहि:
“का तुलनागेलाइता धुयाङका,
दुनियाको सिरजाइ जेङकासो मागेका कथनगेलाइ दोअ्ताङका।”#ले ७८:२
माइरिमाको तुलनाको माने
36कालाउ इसु द्याङगेलाइहेङ लाअ्तेङ साअ्ता हानेहि रो वाको चात्यागेलाइ वाकोता लोतेङ दोअ्हि, “मिलिङको माइरिमाको तुलनाको माने केलाइहेङ दोअ्पि।” 37वा एम्बालाइहेङ दोअ्हि, “रेम्का चालाइ बिअ्काचाहिँ का द्याङको चान एइ। 38मिलिङ दुनिया एइ। रेम्का चालाइचाहिँ सादेलको सारभिको खाल एइ रो माइरिमा दियाबलसको खाल एइ। 39माइरिमा बिअ्का दुस्मनचाहिँ दियाबलस एइ। बालिको चेका पहरचाहिँ दुनियाको दोका एइ। हाउलिगेलाइ सादेलचरगेलाइ एइ। 40जेसापा माइरिमा उअ्तेङ मेता दुकावा, दुनियाको न्हुअ्ता बुङ एन्साङ ज्यावा। 41का द्याङको चान ताइको सादेलचरगेलाइहेङ दिङगिलाङका। कुकरम पालि लागाइका गोताङ थोक रो आसाति काम पाकालाइ झाराङहेङ एम्बालाइ काङको सारभिसो जोम्पावा, 42कालाउ ओबालाइहेङ मेको रापता थाल्पिगिलावा। इन्ता द्याङगेलाइ खारस्वावा रो तासि रेअ्तावा। 43कालाउ धरम द्याङगेलाइ ताइको परमेस्वर आबाको सारभिता बेलाभाइपा जोल्तेङ ह्यावा। जाइको न्हातोङ हि, इङको हिनाको।
लिअ्काटाका रो मोतिको तुलना
44“सादेलको सारभि हिदिङ एलोङ मिलिङता लिअ्तेङ ताअ्का लिअ्का टाकाभाइका एइ। एमि द्याङ निङतेङ म्होअ्तेङ ताअ्तावा। कालाउ लेङचातेङ वा हानावा रो ताइमिदोसा हिका गोताङ पिअ्तेङ इङको मिलिङ चोलावा।
45“आरोङ सादेलको सारभि रेम्का मोतिगेलाइ भोका एमि पाइकारिभाइका एइ। 46इङको एलोङ हेन्जाजाङका मोति निङकान्हुअ्सो हानितेङ ताइमिदोफा हिका गोताङ पिअ्तेङ इङको मोति चोल्हि।
हाया माङका जालेको तुलना
47“सादेलको सारभि चावान्दिता थाल्का एलोङ जालेभाइका बुङ एइ, जाइता गोताङखाल्को हायागेलाइ देखे। 48कालाउ जाले पोङघाकान्हुअ्सो जालेघाकालाइ इङकोहेङ काम्बेता तान्हितेङ ओल्हेपाखे। इङकोन्हुअ्सो योम्तेङ रेम्का हायागेलाइ दुङघ्रिता जोम्पाखे कालाउ बुङ काम मालागेकालाइहेङ थाल्गिल्खे। 49दुनियाको न्हुअ्ता एन्साङ ज्यावा। परमेस्वरको काथा चुमाकालाइ लोतेङ आसातिगेलाइहेङ धरमगेलाइको माझासो खेनावा। 50कालाउ एम्बालाइ मेको रापता थालन्हावा, इन्ता एम्बालाइ खारावा रो तासि रेअ्तावा।”
51इसु हिअ्हि, “हाइ नेलाइ इदोइ गोताङ काथा गेसुन्हा?” एम्बालाइ वासेहेङ जावाफ पिहि, “गेन्हाहि।” 52कालाउ इसु एम्बालाइहेङ दोअ्हि, “इदोइखातिर सादेलको सारभिको बिद्या निङका झाराङ धरममास्टर एमि साअ्को गिर्हिभाइका एइ। जाइ ताइको भाकारसो नावा रो पुर्ना जाङका आनेमानेगेलाइ बाहार ओल्हेपाखे।”
नासरतता इसुहेङ मामानेका
(मर्कुस ६:१-६; लुका ४:१६-३०)
53इदोइ तुलनागेलाइ दोअ्लिदोकान्हुसो इसु इन्तासो हानेहि। 54कालाउ ताइमि हुर्किका पुरता लोतेङ वा एम्बालाइको कचहरिसाअ्ता एम्बालाइहेङ इसिका बिद्या पिलाउ एम्बालाइ भारभुसाइ तेङ एम्बालाइ दोअ्हि, “यासेहेङ इदोइ आकिल रो भारभुसाइका काम पाका सरबङगेलाइ हितासो निङहि? 55हाइ या मिस्तिरिको चान माको? हाइ याको आमाइको मिङ मरियम रो याको ओनेगेलाइ याकुब, योसेफ, सिमोन रो यहुदा माको कुनु? 56हाइ याको बेजानओनेगेलाइ झाराङ केलाइदोफाङ माहि कुनु? या इदोइ गोताङ काथा हितासो निङहि?”
57कालाउ एम्बालाइ वाकोदोफा चेरताम्पाहि। कालाउ बुङ इसु एम्बालाइहेङ दोअ्हि, “आगाधुइकाहेङ ताइकोङ मुलुक रो ताइकोङ देराता बिना बोमिसो गोताङ थामेता मान जेङखे।”#युहन्ना ४:४४ 58कालाउ एम्बालाइको खान्धुरमापानाङ सिङ वा इन्ता भारभुसाइका हेन्जा कामगेलाइ मापाहि।
Aktuálne označené:
मत्ति 13: DHIM
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© 2024 (Active), Wycliffe Bible Translators, Inc. All rights reserved.
