Marko 2
2
1Na apa akayingili kawili pa Kapernaum panyuma pa magono gangi, yikayufwaniki kukita ayii mu nyumba. 2Na wingi wakawunganiki, mpaka pakayili lepa pandu haka pa ndyango: ni akalongili nawo lilowe. 3Ni wahicha, kuntolela mundu wa kindengu‐ndengu, wakapindasini ncheche. 4Na pala wakahotwili lepa kumpindila ndawa ya lipuga, wakafundamwili king’ango pala akayili: ni apa wakamaliti kufundamula, wakaselisi litala pala akayili mu kugonela wa kindengu‐ndengu. 5Nu Yesu pakaweni kiyitakiso kyawe, anjowela wa kindengu‐ndengu, Mwana, sambi syako silekelasiki. 6Leka wakayili wangi wa kulembela bahalapala, watemi pasi nu kujowana mu mioyo yawe, 7Wuli uyu alongela wila? ajowa blasfemia: nani ahotola kulekelakesa sambi lema yumonga, yuyu Mulungu? 8Na hino apa Yesu, pakawalalili mu roho wake kukita wakayili mu kujowana wiwila mugati mwawe, awajowela, Kiki mujowana wiwila pa mioyo yinu? 9Kiliku kiyuyufu, kujowa kwa wa kindengu‐ndengu, Sambi syako silekelasiki; pangi kujowa, Yimaye, pinda kitala kyako, ni ugende‐gende? 10Koma nausi mumanye kukita Mwana wa adam ayii ni chengo kulekelakesa sambi pa ndima (anjowela wa kindengu‐ndengu), 11Nikujowela wenga, Yimaye, pinda kitala kyako, ni ubite ku nyumba yako. 12Ni akayimi, na hino apa akapinditi kitala, ni akapititi pa miho ga woha; mpaka woha wakakangichi nyahope, ni kunkwisisya Mulungu, kujowa, Wila tikiwoneye lepa.
13Ni akapititi kawili mu makigi mwa nyanja: ni lipuga lyoha likanchilili, ni akawayigalisi. 14Na pakalutangini, akambweni Levi mwana wa Alfayo, atemi pandu pa kuyupa nsongo, na anjowela, Unikise nenga. Ni akayimi, akankisiti. 15Ni ikayili kukita akayili mu kutama pasi pa fyakulya pa nyumba yake, ni wingi wa wakuyupa nsongo na wene sambi wakayili mu kutama pasi pamonga nu Yesu ni wanafunsi wake: pakuya wakayili wingi, ni wakankisiti yombe. 16Ni wakulembela wa waFarisayo, apa wakaweni kukita alya pamonga na wene sambi na wakuyupa nsongo, wakawajowili wanafunsi wake, Alya na anywa pamonga na wakuyupa nsongo ni wene sambi. 17Nu Yesu pakayufwini awajowela, Wakusangaluka walonda lepa nganga, koma watamu: nikachiti lepa kuwakemela wagolofu, koma wene sambi.
18Ni wanafunsi wa Yohana na wa waFarisayo wakayili mu kwinota fyakulya: ni wahicha ni wanjowela yombe, Ndawa kiki wanafunsi wa Yohana na wanafunsi wa waFarisayo wayinota fyakulya, leka wanafunsi wako wayinota lepa? 19Nu Yesu akajowiti kwa wombe, Wila wana wa nyumba ya nduwusi wahotola kwinota fyakulya pala mkohano chengo ayii pamonga nawo? lukumbi lwoha ulu wayii ni mkohano chengo pamonga nawo wahotola lepa kwinota fyakulya. 20Leka yagayiche magono, pala mkohano chengo yatolewe kuhuma pa wombe, na bahalapala yawayinote fyakulya pa ligono lila. 21Pa waka mundu yuyu awika kigamba kya nguo yene ufuya‐fuya pa mwingila wa kulala: pangi kya kukwila kiwusa pa kyombe, kila kya hino pa kila kya kulala, ni lipala lilutila. 22Ni pa waka mundu alekela mvinyo wa hino pa mahaku malala: pembee mvinyo yaupefule mahaku, na mvinyo yauyanangike, na mahaku kawili: leka mvinyo wa hino pa mahaku mapya.
23Na ikayili kukita, akayili mu kubita mwanja pa sabato pagati pa milimo; ni wanafunsi wake, pakubita ndila, wakatumbwili kudumula mahojo. 24Na waFarisayo wakanjowili yombe, Lola, kwa kiki wakita ligono lya sabato iki kyangayitikalika kukikita? 25Na akajowiti kwa wombe, Mukona nukusoma leda mpaka hino kila akakiti Daudi, pala kukansowiti, ni akaweni njala, yombe na wala wakayili pamonga nako? 26Umu akayingili mu nyumba ya Mulungu pa lukumbi lwa Abiathar kasisi nkulungu, na akalili mikate ya kuwikika pa miho, yila nukuyitikalika leda yiliwe lema kwa makasisi, na akawapili kawili wala wakayili pamonga nako? 27Na akawajowili, Sabato yikawikiti ndawa ya mundu, nukuya mundu ndawa ya sabato: 28mpaka Mwana wa adam ayii bambo wa sabato kawili.
Aktuálne označené:
Marko 2: MGS1937
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
First published by the British and Foreign Bible Society in 1937.
