BOTHUBO 19
19
Alhou no Lot Xalu
1Kungumi kini no avelau Sodom lo ighi, Lot ye Sodom khagho lo iqa ae. Kughou Lot no pama ithulu keno, pa no pama kusholu nike ithuve no ayeghi lo pa gi pishiqhove, 2eno pi, “I mpeu, kimiyeno o qeu kilo ighi no putho ye hila ngovelo eno nokujo pukhu qhulo. Tishino nokujo no itheno ithu nokujo la lo wu penie.” Pama no pi, “Moe; nikujo ye putho ye aphughi laghila lo ngovenie.” 3Ikemu pa no tsüikhomo pama vilo pi; ikehu pama no pa lau ideighive no pa kilo ilove. Pa no pama ghenguno aghulhu kutotsü, kholaqhi sümokeu sho mla, eno pama no ti chuve.
4Ikemu panongu no zühu mphi lono mishighüna lo kiptimi, Sodom kiptimiqo, apumi eno muchomi, timi kümtsü no aki süho luve. 5Eno panongu no Lot kuno pi, “Itiji o lau ighi kemi ye khile ani kea? Ningu lau pama saipeghi lo, tishianguno nino pama ithinie.” 6Lot no khalau timiqo lau ipeghi no ahukikha khasüve, 7eno pi, “I thiküzümiqo, I no nongu qhüiniju anike hitoi küsakügha shi kevilo. 8Julo, ni ye anga kini ani, pama ye kiptimi khumu ithi mphie. I no nongu lau pama saipeghi tsüni, eno nongu no kümsü aketoi pama lau shilo. Timi pama lau ye kiumu shitsü kevilo, kughengu pama ye I ki kicheqho lo ighive ake.” 9Ikemu panongu no pi, “Ithauve lo! Timi hipau ye kupokichemi shisü ighi no pau no xaküthau shi auvae! Itehi ye nino pama shou nguno alhoksau o shou shinie.” Tishino panongu no anguka shi Lot tuchile no ahukikha hepho niye kupunu ighi. 10Ikemu timi pama no pama u chhophe no aki alou panoqo gholo Lot sünhesü luve no ahukikha khasüve. 11Eno panongu no ahukikha lo timi kichimi itimi akeqo kümtsü nhethi kighicheve tsü, ikehu panongu ye ahukikha phuju pühauve.
12Pama no Lot vilo pi, “No ye hila khuana aphi keshea? Amalimi, ati-anuli, momu khukhumu mishighüna hipau lo ani keshea, hipa-a lono panoqo saipeve lo. 13Kughengu hipa-a lo timiqo no ighamku keu ye Ampeu zülo ighono kije shive akehu ningu ye hipa-a kütsa niye shivae, eno Ampeu no hi kütsave peniye ningu puwuvae.” 14Ikehu Lot no ipe püzü pa makishimi, pa nongaqo sasü akibo shiniye akemi vilo pi, “Ithulo! Hipa-a lono ipevelo, kughengu Ampeu no mishighüna hipau kütsave niye shivae.” Ikemu amalimi no pa ye ghava shi ani küghashi kümsüve.
15Inaqhe vüipeghi kelo, kungumi no Lot ghutu ghi pi, “Ithulo! O nipu eno o nga hile akeu pama sawuve lo, tikumo aye nongu ye mishighüna ghime keu gholono joleve nosae.” 16Ikemu pa ye künachove. Ikehu timi pama no pa ngo pa nipu eno anga pama au lono tsüqü luve, Ampeu no pa lau küpüqhiyi akehu pama no pa sasü mishighüna khalau po ipeghive. 17Pama no panoqo saipe cheke lono milakhi no pi, “Nongu küxü ghenguno pokalu lo. Athiu jupuwo kevilo momu akhila lo ngo kevilo. Atoghi lo poka wuvelo, tikumo aye nongu ye joleve nosae.” 18Lot no pama vilo pi, “O moe, I mpeu nokujo. 19Julo, nokujo qeu kimiyeqhiyi tsüno I küxü xaphe tsükeu lono kikimiye kije I piyevae. Ikemu ni ye atoghi lo poka wulu moae, tikumo aye amhekiqi no I haluve no ni ye thive nosae. 20Julo, mishighüna hipau lo poilo kulupu akupunu lo ani, eno tipau ye aghulo ke. I pelo tilau pokawuve pelo—ti ye aghuloke kumo?—eno I küxü ye ghülu nanie!” 21Kungumi no pa vilo pi, “Julo, nono qhüiniju akeu ghi o tsüve ani, ti ye mishighüna khipau tsa nono pive akeno ni ye tipau kütsa moae. 22Mtazü tilau povelo, kughengu nono ti tomoke kutolo ni ye kiumu shi mlae.” Tighenguno mishighüna tipau je pesü Zoar#19:22 Zoar kiqi ye aghulo kuvetsü.
Alhou no Sodom Kütsave
23Kughou Lot no Zoar lo ighi keno, khetsünhe ye ayeghi shou vü ipeghive. 24Tishino Ampeu no atsütsü lono Sodom ngo Gomorrah shou tsübuta kipti ngo ami ghuqhi tsü. 25Eno Pa no mishighüna tipaqo, akhila, aphughi lo küxümi eno ayeghi lono kiu lhoipeghi cheni keno ti kümtsü kütsave tsü. 26Ikemu Lot nipu no athiu jupuwove, eno li ye amti tsükucho ilhouve.
27Abraham no inaqhe itheno pa no khile Ampeu zülo puthugho akeno tipa-a lo wue. 28Eno pa no Sodom ngo Gomorrah küdau eno akhila yeghi kümtsü lo jupuwo, eno julo, ayikiyiqiu miphoki lo toi ayeghi lono amchhi phoikughi aghi keu ithulue.
29Ikehu kughou Alhou no akhila lo mishighünaqo kütsave keno, Pa no Abraham kümsülu, tileno Pa no mishighüna khikhi Lot no ache keno tipau kütsa akelono Lot saipeghie.
Lot eno Pa Nonga pama
30Lot ye Zoar lono iqhove no pa nga kini sasü atoghi lo xüuve, kughengu pa ye Zoar lo xünike msave. Ikehu pa ye pa nga kini sasü atuki lo ache. 31Anga akichiu no ayitiu vilo pi, “Nikujo papu ye kitemi shivae, eno ayeghi lo khuaye kiqi lono nikujo lau ighini kemi kiptimi lakhimu ayeghi lo kühae. 32Ighilo, nikujo papu pelo aji shove peni, eno nikujo no pa sasü züni, tishianguno nikujo no pa tikughuko tsünie.” 33Ikehu tipaji pama no apu pelo aji shovepe. Eno anoghiu no ilo no papu sasü züve. Pa ye li no kughou no pa sasü züno ithuve keno mthae.
34Thoghiu anoghiu no ayitiu vilo pi, “Julo, iji I no I pu sasü züvae. Nikujo itiji ghi pa pelo aji shove penie. Tithiuno nono ilo pa sasü zülo, tishianguno nikujo no pa tikughuko tsünie.” 35Ikehu pama no tipaji ghi apu pelo aji shovepe. Eno ayitiu no pa sasü züve, ikemu pa ye li no kughou no pa sasü züno ithuve keno mthae. 36Ikehu Lot nga pama ye pama papu launo mishive. 37Anoghiu no anu lakhi punu eno pa je Moab#19:37 Moab kiqi ye apu launo kuvetsü. Pa ye itehi Moabmi pasü ke. 38Ayitiu ghi anu lakhi punu eno pa je Ben-ammi#19:38 Ben-ammi kiqi ye Iw timi momu I bolomi nu kuve tsü. Pa ye itehi Ammonmi pasü ke.
Aktuálne označené:
BOTHUBO 19: SUMRVBSI
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
The Bible Society of India
© 2023, Used by permission. All rights reserved. More