Pwa̤nophû̌ 1
1
1Saradû̌ Sò̌phǐlǔ, sahtò̌ bǎ Běcǎ Yeshǔ ma̤ Cǒmara ata̤ma̤ nutôni̤ dě a tǒ̤dǒ Cǒmara kaǎ gehtò̌ lû̌û nutini̤ awe̤akè kû̌ a ta̤sû̌ǐtòwòǐ lǒ̤bò tokhlǒnu, he wě̤mǎnǎbò dǒ lî̤ awǐlǒ nutôbǎ akû hǒ.#Lǔka 1:1-4 2Bǎ kòyò kaǎ gehtò̌ a dǒ mǒkhû̌ nò̌khôtô̤̌nu, dǒ Yôla Plò̌shǐ Běcǎ a ta̤pô̤ta̤phǎ akhû̌akhî, dě a mǎnǎ a pwa̤nophû̌ dǒ a rû̌htò̌ hto lû̌û nutokhlǒ kû̌ asî bǎ ma̤ta̤ tokhlǒ awe̤akè. 3A tṳ̌sikhòsi hto anǎ̤ dě a ihtǒ htûpwa̤ getîkhî dǒ ta̤si htodě dǒ nô̌kò asa lǐ̤shi akûnu, a dǔlè̌lṳ̌ bǎ dû̌wî̤ anǎ̤ kû̌ akhôphijǎ sî htodě a shôbǐǐlṳ̌ bǎ asî kû̌ Cǒmara ashiagǎ awe̤akè. A khôphijǎ tokhlǒ kè̌shǐ yǎ dě asǎphlǒ wò̌wuwò̌wè̌ lô̌khô bǎtô̤̌. Asî yṳ̌ǎ shapwǎ̤ kû̌ a htûpwa̤ mè̤̌mî̌ca. 4Tôplǎnu bǎ a ǎô kû̌ akhôphijǎ tokhlǒ akhanu, a mǎnǎ asî kû̌, “Hǎhtò̌cû̌kè tǎ̤ lô̌khô dǒ Wî̤̌yarǔshôle akûnu nò̌khôtô̤̌ tǎ̤mǎ̤ nî̌. Ô̌pǒ̤ lô̌khô bǎnu tǒ̤dǒ sî nǐ̤bǎ sû dǒ he shôbǐǐlṳ̌ nǎ hto sî kû̌ hepha olò̤ dǒ a gǔ ǐ sî pěnu nî̌꤮.”#Lǔka 24:49 5Kǎtô̤̌ a hî̌ asî kû̌, “Khûyṳ̂ha ju bǎ kòyò kû̌ shi, bǎbǎkǎlè yî̤khôtô̤̌ pěnu kòyò gǔ ju bǎ sî kû̌ Yôla Plò̌shǐ Běcǎ pě.”#Matè̌ 3:11; Makǔ 1:8; Lǔka 3:16; Yṳ̂ha 1:33
Yeshǔ gehtò̌kè dǒ mǒkhû̌
6Bǎ pwa̤nophû̌ tokhlǒ hè kè̌shǐ kè̌khî sô̌ lû̌û dǒ Yeshǔ ô̌ akhanu, a gwè̌ Yeshǔ kû̌, “Běcǎ, khònò̤̌ mî̌ shěkhǎ tôbǎ kû̌ dǒ na glè̌ ǐtîkhî Isôrělaphû̌ tokhlǒ ashigǎ nuhǒ ya?”
7Dě Yeshǔ hî̌shěshu asî kû̌, “Ta̤shěta̤khǎ kû̌ lṳmṳ̌ni̤ lṳmṳ̌sa tokhlǒ numî̌ a htûhtò̌ kû̌ pha a ta̤siwi̤sòwò̤ pwǎ. A gǔ htûhtò̌ bǎkhò̌tè pě numî̌, sî lǎ̤lṳ̂ sî̌ganǎ̤ bǎtô̤̌. 8Bǎbǎkǎlè bǎ Yôla Plò̌shǐ Běcǎ hèlò̤ dǒ sîlô̤ pě akhanu, sî gǔ lǒbe kû̌ ta̤shû̌ta̤sho pě. Dě sî gǔ htûhtò̌ bǎ he pwa̤khòlṳ̌ tokhlǒ dǒ Wî̤̌yarǔshôle akû, kû̌ Yǔda tôgǎ lǎ̤, kû̌ Shamarǐgǎ htokhôtô̤̌ a gǔ tǒ̤dǒ hǎkhû̌běkhû̌ lǒ̤bò pě,” A ahî̌pô̤̌nu.#Matè̌ 28:19; Makǔ 16:15; Lǔka 24:47,48
9Yeshǔ hî̌bǎ htodě bǎ akhôphijǎ tokhlǒ kè̌htò̌ yǎ akhanu, Cǒmara kaǎ gehtò̌kè yǎ dǒ mǒkhû̌. Poǒlṳ̌ tôbě glǒbǐkè yǎ dě asî kè̌shǐ pe lû̌û tô̤̌.#Makǔ 16:19; Lǔka 24:50,51
10Bǎ asî kè̌htò̌ shôpe̤ dǒ mǒlǎ̤ akhanu, kòyò sò̌ginǐ̤ kûsô̌ jejûbû dě hèihtǒ htò̌lṳ̌ sumṳ̌htò̌ bǎ asî kòshî̌. 11Dě a hî̌ asî kû̌, “Galilè̤̌phû̌ sî, sî cû̌ ihtǒ kè̌htò̌ lô̌khô dǒ mǒlǎ̤ ma̤titè? Yeshǔ dǒ sî kè̌shǐ kû̌ Cǒmara kaǎ gehtò̌kè yǎ dǒ mǒkhû̌ tôpwa̤nu a gǔ hèlò̤ sô̌ ma̤pô̤̌ sî kè̌shǐ a gehtò̌ khònò̤̌nu pě.” 12Htodě akhôphijǎ tokhlǒ ô̌ dǒ Òlǐba khôlôkhû̌ dě a getîkhî sô̌ lô̌khô dǒ Wî̤̌yarǔshôle. Wî̤̌yarǔshôle numî̌ a ô̌phǔ yî̤ kû̌ khôlônu mila taklama pwǎ. 13Asî getǒ̤ dǒ Wî̤̌yarǔshôle akû dě a cû̌htò̌nṳ̌ dǒ hǐ dǒ asî lǎ̤cû̌ô̌kǔ kûmṳ̂̌ tòshò̌phû̌ nutômè akhû̌nu tôtô̤̌. Dě asî tokhlǒ numî̌ kwè̌꤮ mò̌pè hî̌dě Khûpetarǔ, Khûyṳ̂ha, Khûya̤kû, Khûîdru, Khûphǐlǐpǔ, Khûtû̌mǎ, Khûbatòlòmè̌, Khûmatè̌, PhaAlaphè̌ aphû̌khû Khûya̤kû, Khûshǐmṳ̂ dǒ a mô̤ǐ ashiagǎ nutôpwa̤ kû̌ Phaya̤kû aphû̌khû Khûyǔda sîtokhlǒ pwǎ.#Matè̌ 10:2-4; Makǔ 3:16-19; Lǔka 6:14-16 14Asî tokhlǒ nî̌ a hè kè̌shǐ sǎla̤la̤ kû̌ pwa̤mǒ̤ dǒ ashǔshawa̤ tokhlǒ kû̌ Yeshǔ amǒ̤ Mǒ̤ma̤rǐ kû̌ Yeshǔ a pṳ̌pwa̤khû tokhlǒ. Dě asî kwicaba wô̤̌wô̤̌ lû̌û bǎnu.
Rû̌htò̌ kòyò dǒ a tôhtò̌ Khûyǔda agûlǎ̤
15Tôni̤khanu, ta̤dòkûphû̌ dǒ a phǔ ô̌ pwa̤ tôya̤ginǐ̤shinu a hè ô̌plǒhî̌bǎcu bǒsû̌khǎkhô lû̌û. 16Dě Khûpetarǔ ihtǒ hî̌ kû̌, “Pṳ̌wè̤̌ sî꤮, lî̤plò̌shǐ hî̌nǎ hto kû̌ Khûyǔda dǒ a yṳ̂̌ bǎ kòyò klè̌ dě a nopṳ̂̌ kòyò kû̌ Yeshǔ awe̤akènu. Dě Yôla Plò̌shǐ Běcǎ nohî̌bǎ Khwǐdawi̤ kû̌ hǒo tokhlǒ awe̤akè numî̌ a tôbǎ lǒhtò̌behtò̌ nòpwǎ. 17Khûyǔdǎ mî̌ a ô̌ kû̌ pa saprṳ̂ tôpwa̤ dě Yeshǔ rû̌htò̌ yǎ dǒ a gǔ ma̤ kû̌ pata̤ma̤.”
18(Khûyǔda ma̤nṳ̌ ru dǒ a phû̌mò̤̌shǐhtô nî̌ a pwî̤ kû̌ hǎkhû̌ tôlǎ̤ dě a lò̤tě̤si bǎnu dě a hǐphu pǒ̤phò̌kè dě aphupwě̤ sî hǎhtò̌ bòkè.#Matè̌ 27:3-8 19Kòyò ô̌ dǒ Wî̤̌yarǔshôle tokhlǒ ganǎ̤de lô̌khô ta̤ma̤anǎ̤nu dě a kaǎ lô̌khô gûlǎ̤ nutûkû ami̤ kû̌ ayô̤̌. Dě asî kaǎ kû̌ “Akeladamǎ,” Yô̤̌sǎyô̤̌mû mî̌ “Sǐ hǎkhû̌.”)
20“Kòyò wě̤ dǒ lî̤htû̌sò̌htò̌ akûnu dě a hî̌ kû̌,
‘ahǐ ô̌lò̤tò̤̌ sǔtǔkǔkè tûû̌ pě, nṳ̌ô̌ tǎ̤ hǐnu akû tôpwǎ̤꤮ tǎ̤mǎ̤ nî̌꤮.’#Htû̌sò̌htò̌ 69:2; Htû̌sò̌htò̌ 109:8
Htodě a hî̌ kû̌,
‘kòyò nṳ̌ma̤ tûû̌ agûlǎ̤ tôpwa̤ pě.’#Htû̌sò̌htò̌ 109:8
21-22Pô̤̌nudě kòyò tôpwa̤pwa̤ tôbǎ nṳ̌ ô̌plǒ kû̌ pa dě a gǔ khòlṳ̌ kû̌ Běcǎ Yeshǔ si ihtǒhtûpwa̤ getîkhî awe̤akè. Kòyò dǒ pa glè̌ rû̌htò̌ tèplè̌ a tôpwa̤ numî̌, bǎ Yeshǔ cû̌cukhacu pe kû̌ pa bǎ hǎkhû̌ akhanu, htokhôtô̤̌ sahtò̌ bǎ Khûyṳ̂ha ju bǎ kòyò shi hènè tǒ̤dǒ Cǒmara kaǎ gehtò̌kè Běcǎ Yeshǔ dǒ mǒkhû̌, bǎnukha a mî̌ a tôbǎ mè̤̌ kòyò dǒ a cû̌cukhacu kû̌ pa pṳ̂̌꤮ plǎ tôpwa̤,” Khûpetarǔ hî̌ pô̤̌nu.#Matè̌ 3:16; Makǔ 1:9; Lǔka 3:21; Makǔ 16:19; Lǔka 24:51
23Dě asî shôbǐǐlṳ̌htò̌ kòyò sò̌ginǐ̤ dǒ ami̤ kû̌ Khûyṳ̂tǎ, kòyò tokhlǒkhlǒ kaǎ lû̌û kû̌ Khûbasabǎ (mè̤̌tô̤̌dě Khûyǔsatu) kû̌ Khûmasǐ. 24Htodě asî kwicaba lô̌khô kû̌, “Ǒ Běcǎ na sî̌ganǎ̤ tûû̌ kòyò sǎphlǒ a ta̤gènè̤ tokhlǒ akhû̌akhî, dǒ kòyò hǒo sò̌ginǐ̤ aklanu na rû̌htò̌ hto a bǎtè tôpwa̤, 25kǎtô̤̌ kòyò dǒ na rû̌htò̌ hto a tôpwa̤ pô̤̌khô a gǔ phî̌nṳ̌ pwa̤nophû̌ Khûyǔda dǒ a wîkè a ta̤phǐta̤ma̤ nutôpwa̤ agûlǎ̤nu, dǔlè̌lṳ̌htò̌ bǎ pa khònò̤̌. Khûyǔda mî̌ a sihǒ dě a cû̌ tûû̌ klè̌ dǒ a tô kû̌ lû̌û nuhǒ.” 26Htodě pô̤̌khô khôphijǎ gǔ rû̌htò̌ dǒ hǒosò̌ginǐ̤ akla tôpwa̤ nudě asî bǒ lô̌khô ta̤bèbwǐ tocǒ. Dě a lò̤tě̤tô dǒ Khûmasǐ dě kòyò shû̌nṳ̌ a dǒ pwa̤nophû̌ shǐtôpwa̤ saprṳ̂ akû.
Aktuálne označené:
Pwa̤nophû̌ 1: KXF
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Wycliffe USA