Luke 13
13
Wuviinze bitsagilitsi vo wufu
1Mu dikyesi dyene, dikabu di batu diruge gu yambile Sesu re: «Pilate abokise bisi Galilé mu dikyesi diveegenge yandi malagu gu Nzambi.» 2Sesu ayagule yawu re: «Ake yenu digonetaase nde tsenyi? Yawu bafu nane nde mumbare bavage mabi wuvyogilile bisi Galilé bane botswa? 3Sage nane, te malubuse yenu re: kalulanu bitsagilitsi byenu mbe yenu bootsu digufu ga yawu. 4Ake digumi ne batu poombu banyigu ne yibage gi murumbe wu Silowé, yenu digonetaase nde re yawu babile ne mbele yivyogilile batu bootsu ba Serusalema? 5Sage nane, te malubuse yenu: kalulanu bitsagilitsi byenu mbe yenu bootsu digufu ga batu bene.»
Mwiri wugabure miluunde
6Kere vane Sesu atwile yawu noongu yiyi: «Dibagele dimoosi avare mutsafu gu nuungyandi. Ve pule dikyesi dikayu batsafu, ayende mubene wudoke te asedagise tsyo. 7Ne vane, ayambile musalitsi wandi re: “Labe bilime bikende bireru magonevepe gu bene wudoke batsafu mu mutsafu wuwu, te masakadagisi tsyo. Kagu gwaange wo mure wukerekalemine yitsige nzolu.” 8Musalitsi ayagule yandi re: “Muloonzi, besiise wo yilime gigi, maguseenge mu tuungu wo, nusunze batsibi tsi batabe. 9Muvage nane, gotsu yilime gi nzime wugubure. Ga sanane yigugwaangise wo.”»
Sesu abeeluse mugyetu mu wisi wukaloogi Basifu
10Mu wisi wukaloogi Basifu Sesu aloonzenge gu ndagu disaambulu. 11Vane vebile mugyetu wumoosi nubeele: mu dinyunyi didibi dibile naandi, abila keke wuviindeme, digumi ne bilime poombu aseberungulenge wusiimbugu. 12Ve labe Sesu mugyetu wene, atsitse yandi ne mu yambile re: «Wubeele wagu wumavu.» 13Sesu asunzile yandi makake, vane ne vane mugyetu asiimbugu ne ayambile re: «Dinyi gu Nzambi.» 14Te yivuunde gi ndagu disaambulu ayulu kabu yimbili mumbare Sesu abeeluse mutu mu wisi wukaloogi Basifu. Kere ayambile gu piti re: «Guyi tsufu yisamunu tsi wudyaanze kagu ruganu batsufu tsyene mubeelusu, te sa mu wisi wulooge.» 15Fumu agabusile yandi re: «Bifutsi bibi, ve ganegare yenu bootsu nde nyi wusakanyanguli yiboodu gyandi ve yitsige gikayisu gyo muyende ne gyo munwiise maambe mu wisi wukaloogu? 16Ne mugyetu wuwu, wu gu yitsuku gi Abaraam, Sate atuunge yandi digumi ne bilime poombu, kagu sabile dyaambu dibweedi mubeeluse yandi mu wisi wukaloogi basifwa?» 17Gyotsu gi yambilenge Sesu nane, bakolitsi baandi bafu ne mbili tsonyi. Te piti yotsu yibile ne yinyunge mumbare Sesu avagenge maambu mamanyi.
Bufumu bu Nzambi bugubagusunu nde ne gi?
18Ve yulu vane, Sesu akoonde wuyambile re: «Bufumu bu Nzambi bugubagusunu nde ne gi? Makebagusunu bwo nde ne gi? 19Bufumu bu Nzambi buyi munoongu wumoosi ga mwiinzi wu ditsafu wukavari mutu gu nungyandi. Mwiinzi wene wukabeendi, wukabangugi ne wukakalugi mwiri ne banyonyi bakaruungi muufu mawu mu bitaki byandi.»
20Sesu abekoonde yambile re: «Magubagusunu Bufumu bu Nzambi nde ne gi? 21Bufumu bu Nzambi buyi munoongu wumoosi ga mukyemu wukaboongi mugyetu muputesene ne ma pesu fwarine murandise mbumbi.»
Wuke nyingene gu Bufumu bu Nzambi nde nyi?
22Ve yendenge Sesu gu Serusalem avyogenge mu mavule ne mu miimbu nuloonzenge batu maambu ma Nzambi. 23Mutu wumoosi atombe yandi re: «Fumu, Nzambi aguyobule ke ma dikabu pesu di batwa?» 24Sesu ayagule bootsu re: «Ragemanu mu nyingene mu mune wu ndagu wu mukyeki. Nungyenze, mayambile yenu, nzoku batu bagubene wunyingene mu wo te basakerungule.
25Vekerambugu nge ndagu mu baandige gyabutsu ne musapi yenu digusale gu kane. Yenu diguvuredumise gyabutsu nuyambile re: “Fumu kokolu tsibulile yetu ndagu.” Te yandi agugabusile yenu re: “Maseyabe yenu.” 26Ne vane yenu diguyambile yandi re: “Yetu diyi ne wunu nagu, yiloonze mu bitsigi bi mbili batu bi mavule metu.” 27Te nge ndagu agubekoonde yagule yenu re: “Maseyabe yenu badigonevage mabi!” 28Veke labe yenu Abaraam, Isaak ne Sakob ne babigitsi bootsu, gugare Bufumu bu Nzambi, vane re vekelilenge yenu, nugwerisenge minu mumbare Nzambi asakesiingise yenu mu nyingene. 29Kere vane batu baguruge gu taandu ne baande ne kube magyetu ne kube mabagele mutsagele ve take muyi yilaambu gi diyayi gu Bufumu bu Nzambi. 30Ne vane batu bagu nzime ne mapape baguvyoge gu wusu, baba gu wusu ne mapape bagukitigile gu nzime.»
Sesu agufu gu Serusalem
31Mu dikyesi dyene dikabu di bafwarisi digogule ve mbare Sesu mu yambile yandi re: «Burugu vave, yende kube yimosi mumbare Irode agoneroonde wubokise yu.» 32Sesu ayagule yawu re: «Yendanu guyambile mutu wene wu yiyedi ga nganyi re: “Ne munyi ne ngwaali magupunze manyunyi mamabi nubeeluse babeetsi, mu wisi wu mureru magumanisile yisalu gyami.” 33Te nemunyi ne ngwaali ne wunemosi, magwende nguu ne gu Serusalem, sabweedi re mubigitsi arefu vale ne Serusalem.
34Bisi Serusalem, bisi Serusalem, yenu digonebokise babigitsi, ne wuboke ne mamanyi bakasindugulu yenu ne Nzambi. Makyesi mambili maroondenge wugukige yenu nakagukigi koku baane baandi gu tsi mapapi mandi, te yenu diseroonde. 35Kagu mu dyaambu dyene, Nzambi agusambule divule dyenu. Mayambile yenu re: yenu disakebelabe me kwanga ne vakepule dikyesi dikeyambile yenu re: “Myule gu yandi wukarugi mu dine di Fumu.”»
Aktuálne označené:
Luke 13: SNQ
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
