San Mateo 2
2
Ko je̱'e̱ u̶xpu̶kytyu̶jk mu̶dza'a ni'u̶xpu̶gu̶u̶ybyu̶du̶jk je̱'e̱ pi'kma'axúng oy ku'ijxku̶xy mu̶dyiibu̶ najty ju̶gue̱m tzóngu̶xpu̶ñ ma je̱'e̱ xu̶u̶ pyu̶dzu̶myu̶ñ
1Jim je̱'e̱ Jesús mya'axung'ajty ma je̱'e̱ kajpt tu'ug xyu̶u̶'átyu̶ñ Belén, Judea naaxjooty, mu̶'it ko najty je̱'e̱ Herodes y'ane'emy ma je̱'e̱ jimbu̶ naaxjootyu̶ñ. Mu̶'it je̱'e̱ u̶xpu̶kytyu̶jk nije̱' jya'tku̶xy jim Jerusalén mu̶dyiibu̶ ju̶gue̱m tzóngu̶xpu̶ñ ma je̱'e̱ xu̶u̶ pyu̶dzu̶myu̶ñ mu̶dyiibu̶ je̱'e̱ mu̶dza'a najty ni'u̶xpu̶gu̶u̶ygyu̶xpu̶ñ, 2y chi yajtu̶u̶y ajku̶xy:
—¿Ma je̱'e̱ judío ja'ay y'ane̱'e̱mbu̶ ajku̶xy je̱'e̱ mu̶dyiibu̶ tu̶ mya'axung'átyu̶ñ? Tu̶ u̶u̶ch je̱'e̱ myu̶dza'a n'ijxu̶ ajku̶xy ko tu̶ pyu̶dzú̶my#2.2 Tu̶ u̶u̶ch je̱'e̱ myu̶dza'a n'ijxu̶ ajku̶xy ko tu̶ pyu̶dzu̶my: nije̱' wiingpu̶ jaaybyu̶du̶jk myu̶naangu̶xy: tu̶ u̶u̶ch je̱'e̱ myu̶dza'a n'ijxu̶ ajku̶xy jim ju̶gue̱m ma je̱'e̱ xu̶u̶ pyu̶dzu̶myu̶ñ. y paadyu̶ch tu̶ nmiingu̶xy n'o'owu̶dattaangu̶xyu̶ch.
3Ko je̱'e̱ ane̱'e̱mbu̶ Herodes du'un mu̶dooy, chi mu̶k tyajtu̶gu̶u̶y myaaydyu̶gu̶u̶y mu̶u̶d je̱'e̱ kajptja'ay nandu'un nigu̶xyu̶ ajku̶xy mu̶dyiibu̶ najty jim Jerusalén tzu̶naaygyu̶xpu̶ñ. 4Mu̶'it je̱'e̱ ane̱'e̱mbu̶ Herodes niduungu̶u̶y ku̶xyu̶ je̱'e̱ teedy windzu̶ndu̶jk y je̱'e̱ Dios y'ane̱'e̱mu̶ñ windzu̶ndu̶jk ajku̶xy, y yajtu̶u̶gu̶xy ma je̱'e̱ Cristo najty mya'axung'ada'añu̶ñ. 5Chi je̱' y'adzooy ajku̶xy:
—Jim Belén Judea naaxjooty, je̱' ko du'un je̱'e̱ Dios y'ayuuknajtzkapxu̶u̶ybyu̶ kujaay:
6‘Y miich Belén kajpt, mu̶dyiibu̶ Judea naaxjootyu̶ñ,
ka'p miich mútzku̶ch ma je̱'e̱ jimbu̶ mu̶jnaax mu̶jkajptu̶ñ;
je̱' ko jim pyu̶dzu̶ma'añ ma miichu̶ñ tu'ug je̱'e̱ ane̱'e̱mbu̶
mu̶dyiibu̶ ane̱'e̱mu̶bu̶ñ je̱'e̱ Israel ja'ay, u̶u̶ch je̱'e̱ nja'ay.’
7Mu̶'it je̱'e̱ ane̱'e̱mbu̶ Herodes amechu̶ niduungu̶u̶y je̱'e̱ u̶xpu̶kytyu̶jk ajku̶xy, y chi mu̶du̶u̶y yajtu̶u̶y ajku̶xy y nejwu̶u̶y oy yajxón mu̶naa je̱'e̱ mu̶dza'a najty aga'an ijxku̶xyu̶ñ. 8Y chi jim Belén kejxy ajku̶xy, y nu̶maaygyu̶xy:
—Nú̶kxku̶x jim, y mu̶du̶u̶gu̶x yajtu̶u̶gu̶x oy wa'adzu̶ je̱'e̱ pi'kma'axúng, y ko naty mbaatku̶xy, xy'awaanu̶bu̶ch ajku̶xy, wan u̶u̶ch nandu'un nnú̶kxu̶ch, nnú̶kxyu̶ch n'o'owu̶dáty.
9Ko je̱'e̱ ane̱'e̱mbu̶ Herodes du'un myu̶naañ, chi je̱'e̱ u̶xpu̶kytyu̶jk ñú̶kxku̶xy. Y je̱'e̱ mu̶dza'a mu̶dyiibu̶ najty tu̶ ijxku̶xyu̶ñ pyu̶dzu̶my, jayu̶jp najty je̱'e̱ ñu̶kxy ma je̱' ajku̶xyu̶ñ, u̶xtu̶ koonu̶ jim wya'kxu̶jpy ma je̱'e̱ pi'kma'axúng najty yajpaadyu̶ñ. 10Ko je̱'e̱ u̶xpu̶kytyu̶jk je̱'e̱ mu̶dza'a du'un ijxy ajku̶xy, chi xyooñ y'ijty ajku̶xy. 11Chi tyu̶jktu̶gu̶u̶ygyu̶xy, y ijxku̶xy je̱'e̱ pi'kma'axúng mu̶u̶d je̱'e̱ tyaj, je̱'e̱ María, y chi ñayñajtzkojxtu̶na'awu̶u̶yu̶ ajku̶xy; cham ja'aymye̱jtz o'owu̶dajtku̶xy. Chi je̱'e̱ pyi'kkaaju̶ yaj'awaach ajku̶xy y yajpu̶dzu̶u̶mgu̶xy je̱'e̱ ooru̶, je̱'e̱ poom y mirra tzooy y mooy je̱'e̱ pi'kma'axúng ajku̶xy. 12Ko najty tu̶ ja'aymye̱jtz o'owu̶dajtaaygyu̶xy, chi je̱'e̱ Dios kuma'ayjyooty ñu̶maayu̶ ajku̶xy ko ka'p jim mu̶baad y'oknaxu̶u̶ygyu̶xnu̶ ma je̱'e̱ Herodes najtyu̶ñ, chi wyimbijtku̶xnu̶ ma je̱'e̱ ñaax kyajpt ajku̶xyu̶ñ, wiing tu'u ñu̶kxu̶u̶ygyu̶xnu̶.
Ke̱e̱ktzookpu̶ ñú̶kxku̶xy jim Egipto
13Ko najty je̱'e̱ u̶xpu̶kytyu̶jk tu̶ wyimbijttaaygyu̶xnu̶, chi je̱'e̱ Windzú̶n Dios y'ángel tu'ug kuma'ayjyooty ñayyajni'igu̶xu̶'ku̶ ma je̱'e̱ Joseju̶ñ, y chi je̱'e̱ José nu̶maay: “Pu̶du̶'u̶g, mu̶dtzoon je̱'e̱ pi'kma'axúng yaa mu̶u̶d je̱'e̱ ñidaj, nu̶kx jim Egipto naaxjooty ke̱e̱ktzookku̶x. Wu̶'u̶mu̶u̶ygyu̶x jim u̶xtu̶ koonu̶ n'awaanu̶ch ajku̶xy mu̶naa jim mu̶baad mwimbijtku̶xnu̶ju̶ñ, je̱' ko je̱'e̱ Herodes je̱'e̱ pi'kma'axúng u̶xta'awa'añ y yaj'o'oga'añ.”
14Chi je̱'e̱ José pyu̶du̶'ky y mu̶dtzoñ je̱'e̱ pi'kma'axúng y je̱'e̱ ñidaj y tyu'ubu̶jkku̶xy koodz, ñú̶kxku̶xy Egipto. 15Jim jeky chu̶naaygyu̶xy u̶xtu̶ koonu̶ je̱'e̱ Herodes y'o'knu̶. Adaa paady ada tyuunu̶ jyajtu̶ wan du'un yajkuydyúnu̶ch neby je̱'e̱ Dios y'ayuuknajtzkapxu̶u̶ybyu̶ najty tu̶ nu̶ma'ayu̶ñ ko du'un myu̶naañ: “Jim Egipto u̶u̶ch je̱'e̱ n'ung nyaaxpu̶dzu̶u̶my.”
Herodes ane̱'e̱mu̶ñ yeky ko je̱'e̱ ma'axungtu̶jk wan yaj'o'kta'ayii
16Ko je̱'e̱ Herodes nejwu̶u̶y ko je̱'e̱ u̶xpu̶kytyu̶jk najty tu̶ wyin'ú̶nu̶gu̶xy, chi jyoot'ambu̶jky y yejky je̱'e̱ ane̱'e̱mu̶ñ ko je̱'e̱ ma'axungtu̶jk wan ku̶xyu̶ yaj'o'kta'ayii mu̶dyiijáty najty jim Belén tzu̶naaygyu̶xpu̶ñ y Belén mu̶wingón, mu̶dyiijáty je̱'e̱ jyumu̶jt me̱tzk ajku̶xyu̶ñ y je̱'e̱ jakmutzkjatypyu̶ ajku̶xy. Paady je̱'e̱ du'un tuuñ, je̱' ko tu̶ najty je̱'e̱ jumu̶jt payo'oy maabu̶ je̱'e̱ u̶xpu̶kytyu̶jk najty du'un ñu̶maayu̶gu̶xyu̶ñ. 17Du'un du'un yajkuydyuuñ neby je̱'e̱ Dios y'ayuuknajtzkapxu̶u̶ybyu̶ Jeremías najty tu̶ kuja'ayu̶ñ:
18“Jim Ramá ayuuk yajmu̶dooy,
jyu̶'u̶y ya'axy je̱'e̱ ja'ay ku'uwópy ku'uga'ach y yajnú̶kxy yajju̶wu̶'u̶y najty mu̶k.
Je̱'e̱ Raquel najty je̱' je̱'e̱ mu̶dyiibu̶ je̱'e̱ y'ung y'ana'k najty du'un niyaaxpu̶ñ.
Y ka'p najty tyimyyajpudaj tyimyyajpumayu̶'u̶wa'añ,
je̱' ko tu̶ najty je̱'e̱ y'ung y'ana'k y'o'kta'ay.”
19Peru̶ ko je̱'e̱ Herodes y'o'knu̶, chi je̱'e̱ Windzú̶n Dios y'ángel tu'ug kuma'ayjyooty ñayyajni'igu̶xu̶'ku̶ ma je̱'e̱ Joseju̶ñ jim Egipto, y ñu̶maayu̶: 20“Nayñi'ixu̶'u̶wu̶u̶, mu̶dtzoon je̱'e̱ pi'kma'axúng mu̶u̶d je̱'e̱ ñidaj y wimbijtku̶xnu̶ jim Israel naaxjooty, je̱' ko tu̶ je̱'e̱ y'o'ktaaygyu̶xnu̶ je̱'e̱ mu̶dyiibu̶ je̱'e̱ pi'kma'axúng najty yaj'o'ogaangu̶xpu̶ñ.”
21Mu̶'it je̱'e̱ José pyu̶du̶'ky y mu̶dnu̶kxy je̱'e̱ pi'kma'axúng mu̶u̶d je̱'e̱ ñidaj jim Israel naaxjooty. 22Peru̶ ko du'un nejwu̶u̶y ko je̱'e̱ Arquelao najty jim Judea y'ane'emy neby je̱'e̱ tyeedy Heródesu̶ñ, chi chu̶gu̶u̶ybyu̶jky ñú̶kxu̶ch jim, je̱' ko tu̶ najty je̱'e̱ Dios kuma'ayjyooty y'awaanu̶xyu̶ ko jim ka'p ñú̶kxu̶ch, chi Galilea naaxjooty ñú̶kxku̶xy. 23Ko jim jya'tku̶xy, chi tzu̶naaydyaakpu̶ ñú̶kxku̶xy ma je̱'e̱ kajpt xyu̶u̶'átyu̶ñ Nazaret. Adaa paady ada du'un tyuunu̶ jyajtu̶ wan du'un yajkuydyúnu̶ch neby je̱'e̱ Dios y'ayuuknajtzkapxu̶u̶ybyu̶du̶jk myu̶naañ ajku̶xyu̶ñ: ko je̱'e̱ Jesús xyu̶u̶'ádu̶ch nazareno ja'ay.
Aktuálne označené:
San Mateo 2: MIXE
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005
