Luka 5
5
Yeso ma tisa ano yemasanga mame awo bura
(Mat 4.18-22; Mar 1.16-20)
1Oye dara Yeso maze atore a binu bo rawa owa Janisarat. Nze ano ageme se nga binja arame a rakara kame nga shinga me, a narro kuna beleng be Ogomo Asharri. 2Nze Yeso nǝri to konggo to manyi to repo tano meshe eginu a binu burawa beme. Ano meshe eginu mi nga na suru nga ya kweju to jarra to meshe eginu mi. 3Nze Yeso pete oye okonggo me, ogome se oze o Bitrus, nze ma gom me durkun okonggo me bate ayimi manyi. Nze ma chǝkǝnǝ ayim mi maya yemasanga ano.
4Ni si ma jamu belen, nze ma gon Bitrus, “Vati otipi okonggo me ara gwerroppo, evǝti to jarra to meshe eginu tome, ewunki eginu.”
5Nze Bitrus gom me, “Achakura, ai, woro na muru ogatamozo edan me eyabo ne, tonise ngona buku nane, ya ngona me.”
6Se nga vati to jarra to meshe eginu, nze nga meshe eginume chebete nze to jarra to meshe eginu tome to bura otaso. 7O nǝrǝ nane, nze nga vitaka awantano akanye okonggo o repo me a nga rai nga malanye. Nze nga rai nga binjaza to okonggo to repo tome neng eginu mi, to okonggo tome to we voto a pete ama nyi baka edenden.
8Ni se Bitrus nǝri nane se epeme ze, nze magirwanǝ a ji Yeso nze ma go, “Warnan mi, Achakura! Mi ono masharra ze!” 9Baka se Bitrus neng ana geme se nga mazeng nye zalle, emo damara me nye neng ecebete eginu egemese nga na meshe, 10Nane meze gaze Yakubu neng Yohana abiya Zabadi awantano awe Toma Bitrus.
Nze Yeso gunan Bitrus “Tego kuna beye ne, asuru ase e gina na ano ze oya rasan no dan eginu zini.” 11Baka nane nga wonki to okonggo tome a ngame a kerro orawa me, nze nga deke koyaya, nga tarse Yeso.
Yeso ma ngona okoto a ngamo
(Mat 8.1-4; Mar 1.40-45)
12Oye dara Yeso ayimi aye ape, nze oye ono se ma zen yepung yebero dede. Se ono me ma nǝri Yeso nze ma rai, nze ma tangǝnǝ neng emminu anyanga, nze ma gom me, “Achakura, in go garre ozena agata, ongonang an ngamo, an kuri ono ngoma!”
13Nze Yeso watǝ oware ma dorre me, nze ma go, “Na garra, na ngonaye a ngamo, ochǝkǝnǝ ono ngoma.” Se ma buku nanemme, nze okwene oyepung yebero yedorra yedekeme.
14Nze ma wongku me utinye magunme, “Togo beze woi ne, ngame ka wongke apana a kai opiris. Ongame okanya eme geme se a ya pusumi, nane se Ogomo Asharri ma buki a makirri ma Musa ma go a wuza baka a ru se ngona ngamo.”
15Zalle neng nane beleng be Yeso biya dako o wucaji zi. Ano chebete nga ya rasa doguna nga rakara me, nga ga morra ngamozo ayimi tokwene atonye zal. 16Nze Yeso me ma ngame ara geme se woi ze ma nu ni baka ma we beroromo.
Yeso ma we ono geme se rrepung nga rrome yina wǝnǝ a ngamo
(Mat 9.1-8; Mar 2.1-12)
17Oye darase Yeso ayemasanga nze toye to tuFarisi, neng ano masano makirri ma Musa, anagemese nga na kasuru a koyo gwiri anyanga ma Galili, neng a Yahudiya, neng osuru a Urshalima, nga ya chǝkǝnǝ arame. A gata Ogomo Asharri o ngona ano a ngamo ozenan me. 18Ayimi nanemme nze an ngai ranon woi ono geme se atitǝu kame na wǝnǝ a tete openye. Nga ya gatamo apeten ono ayimi atitǝu doguna nga latame a ji Yeso. 19Nga ta morra orona opetene baka ecebeta ano nze nga nya a tara ogora me. Nze nga parri udurommi nze nga duzu mi ono kweneme neng openye ogome se maya tete a tara me, nga we me a zatano a ji Yeso.
20Se Yeso nǝri o wuna erowa ekenye, nze ma gon ono geme se maya teteme, “Wano, ana viski esharra ekei.”
21Nze tuFarisi neng ano masano makirri ma Musa nze nga bura gusa a nye a topana tonye, “Avizi ono gina se maya bi belen bo yizu Ogomo Asharri nane! Ogomo Asharri zi base ma zen a gata oviski esharra!”
22Yeso ru eme geme se nga ya dodonzo anu, nze ma gungnye, “Baka yaya ze nyi ya dodonzo ageme e nyi erowa? 23Iyu ze ikera, ago, ‘Ana viski masharra mai,’ ne ago, ‘Wera nga na tano’? 24Miya ngona ono gina a ngamo doguna a nyi ru mi Vana ono ezenan a gata a masano in viski ano masharra ma nye.” Nze ma gon ono geme se rripung nga rrome yina wǝnǝ, “Min gon ngo wera oyete openye okoi ongame atitǝu!”
25Nze ono me ma dorra ma werra a ji kavi, nze ma yete openye ogomme se manana a tete a tara me, nze ma ngame atitǝu, maya tungngarra Ogomo Asharri. 26Zalle okonye ngame tonu baka nga na ni emo damara nga ya tonngarra Ogomo Asharri. Beye ba me nye dede nga ya gusa, “Kane woro na nǝrǝ emo damara.”
Yeso na tisa Lawi
(Mat 9.9-13; Mar 2.13-17)
27Amarro nane, Yeso maka suri ayima ape, nze ma nǝri woi ono kasa ogandu se rrijarrome ye ze Lawi maya chǝkǝnǝ aro kasa ogandu. Nze Yeso gom me, “Tarson!” 28Nze Lawi, deke koyyeya, ma wera, ma tarso me.
29Nze Lawi ma gorro obaki osaru ama atitǝu baka Yeso. Aye awantano akame ano kasa ogandu neng aye ano chebete nga rai nga ya a wucu eme wucu neng nye. 30Nze tuFarisi neng ano masano makirri ma Musa se nye ma gaze tuFarisi toze nga bura ogogomozo, nga ya gusa neng ane yemasanga ye Yeso, “Baka yaya ze nyi ya tuwucu neng ano kasa ogandu neng ana geme se nyi ma ano masharra ze?”
31Nze Yeso ogarre ugunnye, “Ano ageme se nga ze shammo nga ta barsa onotukane, se ano kwene. 32Mi dan rai baka ano dera masharra ze ne, mina ra baka ano masharra ze, a nga deke, a nga shuwala towoza tonye.”
Bi sanyarra a tara oweren ekomo
(Mat 9.14-17; Mar 2.18-22)
33Nze aye ano sangarra Yeso, “Nga go ane yamasanga ye Yohana nga weresen ekomo koyo odara nga kuri nga wuza beroromo, nane ze ane yemasanga ye tuFarisi nga woze, a tatui se tuwucu.”
34Nze Yeso garre ma gon nye, “Nyi ya nǝrǝ ogongo nyi eya utuna arene onorrome owai osau eyabo wucu, inga nga zen onorrome owai osau me? Bita ngona ne. 35Ocha ya ra se a ya yeta onorrome owai osau me a deke nyi. To, ocha gom me oze nga ya wersen ekomo.”
36Nze Yeso nya nye oye o nǝrǝmi ma go, “Woi ze ma bare ma shalle bivire be udiyu osau maka lape udiyu okozone. Inga ma we nane, ina chǝkǝnǝ mana shalla udiyu osau okome, bivire be udiyu osau beme bize ma rreze udiyu okozomene. 37Woi ze ma ngona manyi ma inabi ma sau edaso ungwa ekozo ne. Inga se ma we nane, manyi ma inabimmi ma sau maya pusa endasom me, manyi ma inabimmi maya kunku. 38Manyi ma inabi ma sau, agwarri ayimi edaso ungwa osau ze! 39Woi ze ma garre oshinǝ manyi ma inabi ma sau a mana shini ma ngono. Maya guna, ‘Ma ngonong me ma kera alo.’ ”
Aktuálne označené:
Luka 5: JER
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
©️2022 Luke Initiative for Scripture Translation
