Lukas 23
23
Jesu la ndro Pilatus e Herodes.
1Malabo su masi su dne, su dulieni Jesu le ndro Pilatus. 2Su bo gord le ndro i, su boi: Iou gin danoni longu hendre aden momen ge, i seslaini su ndramed, su gob iil le ndro Sesar. I vong, mbue su ghengen taks le ndro i, i vong, i boi, i Mesias, King asu Juda. 3Pilatus i ndemani i: Uo King asu Juda? Jesu i bodeie: Ehe. 4Pilatus i vong le ndro su ndurhian, ma le ndro su masi, i de danen danoni heb longu momen le ad ndramed ogo bui. 5Su masi, su lug bohosu ndoun, su vong, su boi: I seslaini su ndramed masi, i ghenunuen su ndramed su gob iil le ndro du, hanu i da le Galilea, malabo i gin meher le gor ogo lie. 6Pilatus gin hirong i, i ndemani su ndramed ogo ber Galilea, de bui? 7Be i gin hirong i, Herodes i ndurhian aden, i rendegien i le ndro Herodes, i da le gor Jerusalem le rang ogo.
8Herodes i mugmug manden, beg ilndri Jesu. Eluen i ha leng ilndri i, i gin hirong longu mabosanged de aden. I hanguruen le bergoln, i danen ilndri gelman si, Jesu beg hinen i. 9I ndemani i le longu hendre e hendre, Jesu de vong heb de la ndro i bugane, i simge. 10Su ndurhian, ma su ndremda hernou, su da baghege ndro i, su vong nongen le gord le aden. 11Herodes, ma su labenen, su da ndro i su hal ad Jesu, boen su daui salo hian, eluen, gle mandrn ad Jesu, i rendegien i mul le ndro Pilatus lie. 12Le range ogo Herodes sor Pilatus sor gous, hom le ndro homo, hanu hom gin bo iil le ndro homo.
13Pilatus i loh su ndurhian ma su labenen, dagara su ndramed masi le goure, 14i vong le ndro su, i boi: Mu gin rui ndramed ogo me ndro io, mu boi, i seslaini su ndramed gle bahun, e lele, io gin ndemani i le bormarmu masigane, io de dono ilndri heb longu hendre momen aden bui. 15Herodes dagara lie de gin danoni heb longu hendre momen bugane. I gin rendegien i mul me ndro io, ha hirong i, io de dono dieni i na gmed bui. 16Io vong le ndro su polisboi, su rii i, boen io beg robuldi i.
17Uru si, uru si, i hengen le ndro su Juda homo i da kalabus, i rumburdi i. 18Su lug bohosu manden su loho, su boi: Gdaii i, iou ha lengi Barabas. 19I gin daui Barabas le kalabus i da gin bo bahun le gor, i gin daii homo. 20Pilatus i vong le ndro su nongen lie, beg rumburdi Jesu. 21Su ge, su loholo ndoun ndoun e dadhe i, e dadhe i, irgei! 22Bersilie i ndemani su: Ndramed ogo i gin hinen sehe longu momen ie? Io de dono danoni heb longu momen le ad ndramed ogo bui, io beg rii i, boen beg robuldi i. 23Su lug bohosu manden ge, su vong nanenongen le aden, su loholo ndoun ndoun, su ha lengi, Pilatus ir dadhe i le gei, su gin ndounen Pilatus leri. 24I dieni Jesu na gmed, dege su masi ha lengi i. 25I rumburdi Barabas i da gin bo bahun, gin daii hom ndramed. Su gin daui i le kalabus ri. I gin daui Jesu le nemesu.
Jesu dogi le bahali Golgata, i med.
26Su dulieni Jesu le Golgata; su da le sal, su boro homo, ngarn Simon ber gor Kirene i da gin bo mburer le beleng aden, gin mul le um aden, su ndounen i, ir sab gei ad Jesu. 27Su ndramed mabosanged su ir ndrbon Jesu dagara su bihin su da dang, su da reng. 28Malabo Jesu i belueni bormarn le ndrbon, i vong le ndro su, i boi: Mu ndurbihin ber Jerusalem, mbue reng me ordo, reng le ademu ma le ad ndurmu. 29Ghanguruen i: Rang i gme, mu vong mu boi: Su horuan ge, su de gini ndurn bui, su bihin mamaren ge ndur asu bugane. 30Boen su vong, su boi le ndro su bahali: E ndrodhi du, ma le ndro su bahali manden: Ha gorni du. 31Be su da bo momen le ndro Ndorlaben asu dagara su da gob sa le ndro su lao aden? 32Sor daiandramed marmou sor la born ndro Jesu. 33Su gin meher le logna si, su bosoui logna bobalen, su dadhe Jesu le gei, ma sor daiandramed la born, homo le nemen sengen ad Jesu, homo le nemen gameao. 34Jesu i vong, i boi: Bo Domo, mbue hanguruen longu asu momen, de dansu i bui, su ghinen sa me ndro io. Boen su sindrdi salo aden, homo hedi hasel, homo i hedi hasel. 35Su ndramed masi, su ha ilndri la, su labenen su hal le aden, su vong su boi: I gin sobani su ndramed, i rumburdi mandrn i Mesias ad Jehova hohunan, i da gin loh i. 36Su polisboi lie, su hal aden, su la ndro i, su daui viniger le bohon. Su vong su boi: 37Ar uo King asu Juda, hian osbani mandrm. 38Su gin hondre nongen, su gin daui le gei bage le balen ad Jesu: Aga King asu Juda! Su gin hondre nongen ogo le nongen asu Grek, le nongen asu Rom, ma le nongen asu Juda.
39Homo asu daiandramed i da le gei lie, i boii Jesu, i boi: Uo Mesias asu derbe, e rumburdi mandrm ma osbani du lie. 40Daiandramed i da le gei le horo, i habai daiandramed i da gin vong nongen ogo, i bai: Uo de noh Jehova hebsa bui, su da gin dieni uo dege i lie? 41Gord asu le ndro doro monen ge, i ogo de hinen heb longu momen bui. 42Boen i vong le ndro Jesu: Jesu, hanguruen io, be uo meher le gor adem. 43Jesu i bodeie: Ndangen io boi le ndro uo, eruar uo da ndro io le gor ordo lundielang.
44I mesar, ndrogmoan i hilou le gor masi, i roh le ibia. 45Mernal de hinganen bui, salo manden i da le babi le um ad Jehova, i mbuserei gle marnder. 46Malabo Jesu i loholo, i bai: Bo Domo, io daui meluo gle nemem, boen i ginmad. 47Polismaster, be i gin ilndri longu ogo masi, i mugueni Jehova, i bai: Ndramed ogo i monen gane. 48Su ndramed masi su da gin me goure, beg ilndri longu ogo, su rii mandrsu, boen su mul la um asu. 49Su gous ad Jesu ge, su dandon, su da manan hebe, dagara su bihin ber Galilea, su do da, su da gin ndrbon Jesu le sal aden, su ilndri longu ogo masigane.
Su doni Jesu le ngad.
50E lele hom gamel ngarn Josev, homo asu labenen ber Juda, i homo i da gin dogi monen hian ge. 51I de gin somui le gord asu labenen masi bugane, gor aden Arimatia, gor si asu Juda. I ogo i belengeni gor ad Jehova. 52Josev ogo i la ndro Pilatus, i ndemani i gle numbuen Jesu. 53Boen i hedi numbuen Jesu, i nhui i le salo hian, i doni i le ngad, ngaibad si houen, su de gin doni homo leri masou. 54Rang ogo freide ge, sabbath baghege. 55Su bihin, su da gin me, su ber gor Galilea, su ha dogi bage le numbuen Jesu. Su ilndri ngaibad ma mburer asu su da gin hinen i le doni Jesu le ngad. 56Boen su mul le gor Jerusalem su semani longu le ngohondonreen. Sabbath gin me, su da hengang ge, dege nongen ad Jehova gin bai.
Aktuálne označené:
Lukas 23: LLENT
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Published by the British and Foreign Bible Society 1956
