Lukas 1
1
Heb nongen hanu.
1Uo danem, su mabosanged su gin hondre le Jesu, le longu masigane i da gin mehere le dogrodu. 2Su beg hondre longu masi monen ge, dege begmarsu gin lele i, dege su lao aden gin bohernou. 3Dagara io, io gin gahi longu masi ber mahanu, longu hendre e hendre, dege i gin me, io gin hondre le peper gle ndro uo, Teovilus uo da hian ge. 4Io lengi uo danem nongen le Jesu masigane, hian monen ge, le longu, su da gin henunuen uo.
Johanes beg meher le boan.
5-6Ar Herodes, King asu Juda, i da le gor, hom gamel ngarn Sagarias, hom ndremda dirhor, homo ber lain Abia, gorda, nambulen hom ndurbihin ad Aron, ngarn Elisabet, sor marmou sor dogi monen le bormarn ad Jehova, sor hinen longu ad Jehova monen ge. 7Ndursor bui, sor marmou hibermanda. 8Bersi muren, su ber lain Abia, su gin dirhor le ndro Jehova. 9Rang ogo, mburer ad Sagarias le um ad Jehova, beg dirhor le ndro i. 10Su ndramed masi su da lobohonum, su da lodu, su raring. 11Malabo Angelo ad Ndorlaben i da le nemen sengen le logna dohor. 12Sagarias i lele i, i noh manden. 13Malabo Angelo i boi le ndro i: Mbue uo go noh Sagarias, Ndorlaben gin hirong soling adem, nambulen Elisabeth i gini ndurgamel, absoui ngarn Johanes. 14Uo mugmug manden gleri, ma su mabosanged su mugueni i, be su hirong i. 15I hom laben le bormarn ad Ndorlaben. I de gilmui ndrunvain bui, bergoln i beb gle Meluan Helian ar i hom mamemei ge. 16I gsobani su Israel mabosanged, i grui su mul le ndro Ndorlaben Jehova. 17I irgai gle ndoui ad Elias, gle ndoui ber lang. I ghenunuen su labenen, ma su ndurn, su garbelueni bern asu, delengasu le nongen ad Jehova. 18Sagarias i vong le ndro Angelo i boi: Nongen adem i derbe, i monen derbe, io hom hibarmanda nambulo barmanda lie. 19Angelo i bode: Io Gabriel, io da le bormarn ad Jehova, i ge i gin rendegien io, io gobharni longu ogo, io absoui le ndro uo. 20E lele, bohom bui, de danem bosoui heb nongen bugane, mabenan le rang longu masi na gmeher, dege boho gin bai. Aga le surien hanguruen momen, uo de gin boro nongen ordo heb hian monen bui. 21Su ndramed masi, su da lobohonum, su belengeni Sagarias, de dansu i bui, desa i da le lundieum eluen dagara. 22Malabo Sagarias i la ndro su, bohon bui, de danen vong heb de la ndro su bugane. Malabo su dansu longu hendre gin meher ndro i le lundieum. I gemdi su, su gao, bohon bui. 23Mburer aden boen, i gin mul le um aden. 24-25Heb eluen bui muren ndurn i da ndrnen Elisabeth, i da le um aden le vara malima, i hanguruen le bergoln: Aga Ndorlaben gin hinen i, i gin hanguruen io, debosan su ndramed su hal le ordo.
Ndur Maria beg meher.
26Vara manono muren, Gabriel, Angelo ad Jehova, i gina le nongen ad Ndorlaben le gor Galilea, le gor si Nasaret, le ndro Ndurbihin homo, ngarn Maria. 27Hom gamel, ngarn Josev, homo her um ad David, beg ibdi i gle nambulen. 28Angelo ad Ndorlaben i la ndro i, i vong le ndro i, i boi: Io mugueni uo, uo bihin homo, golnisden ad Jehova i da ndro uo. Ndorlaben i da ge ndro uo, uo hanu le asu bihin masigane. 29Maria, be i gin hirong nongen ogo, meluan i ieb, i de danen nongen ogo heb hian bui. 30-31Malabo Angelo i vong le ndro i, i boi: Maria, mbue uo go noh. Jehova golnisden uo e lele, ndurm na gmehere, hom gamel gle ndirem, absoui ngarn Jesus. 32I homo laben ge, i ndur Jehova ber belengan, Jehova Ndorlaben na ghengen le ndro i logna ad King David, damen. 33I King asu ndur Jakob sidegesi. 34Maria i vong le ndro Angelo i bode: Longu ogo derbe? Io de dono hom gamel bui. 35Angelo i vong le ndro i, i bode: Meluan Helian i gmeher ndro uo, ndoui ad Ndorlaben gle ndirem. Mamemei Helian i da gmeher le ndrnen, su gbosoui Ndur Jehova. 36Hanguruen i, Elisabet, loum i da barmanda, i da belengeni ndurn le vara manono. Su ge, su gin boi, ndurn bugane. 37Jehova i ndoa le longu masigane. 38Maria i bode: E lele, io bihilou ad Ndorlaben, longu masi na gmeher, dege bohom gin bai. Malabo Angelo i bieni Maria.
Maria irgai le ndro Elisabet.
39Boen Maria i dogi ndre bahali, le gor si, ber Judea. 40I iao le um ad Sagarias beg lele Elisabet. 41Be Elisabet gin hirong ngasen ad Maria, ndurn i da ndrnen i reblouni. Elisabet, bergoln i beb le Meluan Helian, 42i vale, i boi: Io bamugueni uo, uo hanu le asu bihin masigane, horuan ge i hian ge, i da beg meher le ndrnem. 43Sehe longu i da mehere ndro io, nanen ad Ndorlaben ordo i da gin mehere ndro io. 44E lele, be io gin hirong ngasen, nduro i da ndrno, mugmug ge, i reblouni. 45Horuam ge, uo da gin boro ndoui ad Jehova, nongen ad Ndorlaben, i da gin meher ndro uo. 46Boen Maria i vong: Bergolo i bamugueni Ndorlaben, 47meluo i loholo, i ngei le Jehova i da sobani su. 48I da gin hanguruen bihilou aden molhege. E lele, su gor masi su gabmugueni io. 49Ndorlaben ber belengan, i da gin bo hian ge me ndro io. Ngarn aden i helian ge. 50I da ibdi gahaloseli le ndro su ndramed sidegesi, le ndro su, voasuiso aden. 51Nemen i da ndoa ge, 52i da masumbue su, bergolsu i momen. I da robuldi su ndurhian, i hengen logna asu le ndro su ndramed molhege. 53I da hengen gan le ansu su da mundrul, memrad le ndro su, heb memrad asu bui. I robuldi su labenen, de hengen heb de la ndro su bui. 54I da gin sobani lao dandendegei aden Israel, i da ibdi gahaloseli le ndro su, 55dege i gin bai le ndro su damen ber goru, le ndro Abraham, ma le ndro su ndurn masi ber muren. 56Maria i dandon le um ad Elisabet le vara madolo. Boen i iao mul le gor aden.
Johanes i meher le boan.
57Rang gin meher, Elisabet i belengeni ndurn, i gin meher, hom gamel. 58Lounsu, ma su gous, be su gin hirong leri, Ndorlaben i golnisden Elisabet dagara, su me goure, su mugmug ge. 59Manondruo muren, su gin me geherong beg bosoui ngarn ad ndurn, beg bosoui i Sagarias, dege ngarn ad damen. 60Nanen i mburen, i bodeie: Bugane, ngarn Johanes. 61Su vong le ndro i, su bode, homo i da le um adem ngarn Johanes ie? 62Su gemdi damen, su ndemani i, i bosoui ngarn sie? 63I soling le ndro su le sled, i hondre leri: Ngarn Johanes. Meluasu i irgu leri. 64Malabo bohon ad Sagarias i deh. I danen vong nongen lie, i bamugueni Jehova. 65Noh asu dsoln, su masigane ber Judea, su da vong le goure le longu ogo. 66Su masi, su da gin hirong i, su gin hanguruen le bergolsu, su gin vong, su bai: Mbunana ogo i derbe. Nemen ad Ndorlaben i da ndro i ndangen. 67Sagarias, bergoln i beb le Meluan Helian, i boharni nongen, i vong, i bai: 68Io bamugueni Jehova, Ndorlaben ad Israel, i da golnisden su lao aden, i bolumia su. 69I gin daui logna hian le um ad lao dandendegei aden David. 70Mahanu i gin boharni le bohosu Provet aden helian, i boi: 71I beg rumburdi du le nemesu ndremda rah adu, le ndoui asu, ndrnesu i mah le adu. 72I da ibdi gahaloseli le ndro su damdu, beg hanguruen nongen aden. 73I da gin daui nemen le belengan, be i da gin boi le ndro Abraham, i beg rumburdi du le nemesu ndremda rah adu. 74I beg hengen me ndro du, iou da gob mburer aden de noh hebsa bui. 75Iou da hanguruen dagara le begmarn bing si rang si sidegesi. 76Uo mbunana, su absoui uo hom Provet ad Ndorlaben ber belengan, uo gal hanu le sal ad Ndorlaben, uo ghinen sal aden gmonen. 77Uo ghenunuen su lao aden le longu ber lang. Uo ghenunuen su: Ndorlaben esbui longu asu momen giao. 78Jehova, Ndorlaben adu, i da ibdi gahaloseli le ndro du ie lengi. I da gin meher ndro du, dege mernal i da gobad mabing, 79beg hinganen le ndro su, su da lugdo im gor ndrogmoan, beg dulieni du le sal hian, le gor lundielang. 80Mbunana ogo i menda, meluan i ndoa ge, i da le marboga mabenan i hom hian, beg henunuen su Israel.
Aktuálne označené:
Lukas 1: LLENT
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Published by the British and Foreign Bible Society 1956
