Johanes 15
15
Nongen le sengen hian, i gmeher derbe.
1Io gei ber beleng ndangen, Bo Domo aga ndremda beleng. 2Ndrandran hendre sengen bui, i sehi giao. Ndrandran hendre i da horuan ge, i ghinen i rosan ge, boen sengen mabosanged i meher ri. 3Mu rosan ge gle nongen ordo, io gin bai le ndro mu. 4Hian mu dandon or ndro io, io da ndro mu dagara lie. Ndrandran sengen aden bui, be su gin sehi i gineao le gei. Mu dagara lie, sengen ademu bui, ar mu da baghege ndro io bui. 5Io gei, mu ge, mu ndrandran, homo ma homo i da ndro io, io da ndro i, sengen aden mabosanged, de danmu hinen hebsa bui, be io de sobani mu bui. 6Ar homo i da ndro io bui, su gbieni i giao, dege ndrandran molhe, i da gin meng. Su hedi ndrandran ogoro me goure, su gbieni i le moan. Moan i dilmui. 7Ar mu da ndro io, ar nongen ordo ir bergolmu, mu soling le longu hendre e hendre, dege mu lengi, io ghengen i le ndro mu. 8Mu gabmugueni Bo Domo, ar sengen ademu mabosanged, boen mu lao ordo hohunan.
9Dege Bo Domo golnisden io, io goloisden mu dagara lie. Hian mu dandon le golnisden ordo. 10Ar mu ghinen nongen ordo, mu dandon le golnisden ordo, dege io lie, io da gin hinen nongen ad Bo Domo gane, golnisden aden i da ndro io sidesi. 11Io gin vong nongen ogo le ndro mu, io ha lengi, mu mugmug ge, dege io mugmug. Mugmug ordo i da ge ndro mu, mugmug manden ge. 12Aga io ha lengi: Homo i golnisden homo, homo i golnisden homo, dege io goloisden mu. 13Aga golnisden manden mandromai ge, ar homo i daui mandrn e ndrai aden gle ndro su gous aden. 14Ar mu hinen i, dege io gin bai le ndro mu, mu gous ordo. 15Io de bosoui mu lao dandendegei ordo bui, hom lao dandendegei de danen i bui Ndorlaben i hinen sa bing si e rang si. Io gin bosoui mu “Mu gous ordo,” io gin boharni le ndro mu longu masigane, Bo Domo gin bai me ndro io. 16Mu de gin boro io bui, io gin boro mu ge, gin rendegien mu, mu gal gor masi sengen na gmehere, sengen hian ge i da ndro mu. Boen Bo Domo i ghengen le ndro mu longu masigane mu da soling le ndro i gle ngoro. 17Aga io ha lengi mu ghinen i: Homo i golnisden homo, homo i golnisden homo.
18Be su gor masi su irgu le ademu, ghanguruen i, ndrnesu gin mah me ordo hanu. 19Ar mu ber gor ogo, gor masi voasuiso ademu, mu ber gor ogo bui, io gin loh mu le gor i da le belengan, malabo su ber gor ogo ndrnesu i mah le ademu. Ghanguruen nongen io da gin bai le ndro mu: Hom lao i de hanu le ad Ndorlaben bui, be su gin hingismad ordo, su ghinen i dagara le ndro mu. 20Ar delengasu le nongen ordo, delengasu le nongen ademu lie. 21Longu ogo masigane su ghinen le ndro mu, be su hanguruen, mu ordo ge, de dansu i bui, i da gin rendegien io. 22Be io de gin meher de la ndro su bui, be io de gin bosoui nongen ordo de la ndro su bugane, longu momen asu bugane, malabo homo i de danen vong bui, i de gin hirong leri bui. Be su de delengasu le nongen ordo bugane, aga longu momen asu. 23Ar hom ndrnen i mah le ordo, ndrnen i mah le ad Bo Domo lie. 24Ar io de gin hinen de la ndro su gelman ordo bui, homo ber boan de gin hinen gelman manden, dege io gin hinen i bui. Longu momen asu bui. Malabo su gin ilndri longu masigane io da gin hinen i, ndrnesu i mah le ordo, ma le ad Bo Domo dagara lie. 25Nongen Helian su da gin hondre le Buk, i monen ge: Ndrnesu gin mah le ordo le heb longu hendre bui. 26Be Meluan Helian i gmehere, ndremda sobani mu, io da beg rendegien i, i da baghege ndro Bo Domo, muren i gmeher ndro mu, i ogo, i gobharni le ndro mu longu ordo masigane. 27Mu lie, danmu boharni longu masigane ordo, mu da baghege ndro io sidesi, mu gin ilndri i.
Aktuálne označené:
Johanes 15: LLENT
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Published by the British and Foreign Bible Society 1956
