Apostel 4
4
Petrus sor Johanes sor da kalabus.
1Sor da vong ndon, su ndremda dirhor, polismaster i da bogulue um ad Jehova, ma su Sadusi su meher ndro sor. 2-3Ndrnesu i irgu be su gin ilndri sor henunuen su ndramed, sor bohernou le ndro su Su hosi sor, su daui sor le kalabus, sor do da le kalabus lobing si, malabo aga lobing. 4Su mabosanged, su da gin hirong nongen ad Petrus, su lao ad Jesu. Su gamel, su da le lain ad Jesu, su malibou.
5Mabing, su labenen ber gor Jerusalem, su ndurhian ma su ndremda hernou, 6dagara Hanas, Kaivas, Johanes, Aleksander ma su ber um ad ndurhian masi. 7Su dulieni sor le ndro su, su ndemani sor, sor da gin hinen gelman ogo gle ndoui ad sie, le ngarn ad sie? 8Petrus bergoln i beb le Meluan Helian, i vong le ndro su, i boi: Mu ndurhian ber gor, mu labenen asu Israel, 9be iou da eruar le bormarmu gle gelman adu, iou da gin hinen i le ndro ndramed homo, ndrun aden momen ge, mu ha leng bo gord me ndro du, mu ndemani du, iou da gin regurdueni i gle ndoui ad sie? 10Io beg boharni le ndro mu, ma le ndro su Israel masigane, ndramed ogo i da mamaren, i da horuan gle ndoui ad Jesu Kristo ber Nasaret. Ehe, le ngarn aden, mu da gin dadhe i le gei, Jehova i da gin hingeni le ngad aden. 11Jesu ogo, aga bahud, su ndremda um gin bieni gineao, dege gei molhege, Jehova ge, gin hinen i le bahud ber um. 12Ngarn aden i hian ge, i hanu le ngarsu masi ber lang ma ber boan, iou da horuan ge le ngarn aden.
13Be su gin ilndri mugmug ad Petrus sor Johanes, dandu sor ndramed molhege, sor ndramed ber mbruer, meluasu masi i ieb, su gin hirong i, sor lao ad Jesu. 14Be su gin ilndri ndramed, sor gin regurdueni i, i da baghege ndro soro, de dansu vong hebsa bui. 15Su gin dulieni sor lendi, boen su vong me goure, su boi: 16Iou da gob sa le ndro ndramed ogo, dandu gorni bui gelman, sor da gin hinen i, su ndramed ber Jerusalem masi dansu i, dansu vong bui: Aga bahilou ge. 17Iou mbuere ngarnongen le gelman ogo i da hilou ge le gor masi, iou beg sendraini sor, mbue sor bohernou le ndro su ndramed le ngarn ad Jesu. 18Boen su loh sor, su vong le ndro sor ndoun ndoun, mbue sor henunuen su ndramed le ngarn ad Jesu. 19Petrus sor Johanes sor bodeie: Hanguruen monen le bergolmu i hian, de i monen bui be iouoro hirong nongen ad Jehova hanu gle nongen ademu, dandu hangaini i bui. 20Bohodu i de simge bugane, beg boharni le ndro su longu masi iou gin ilndri, ma iou gin hirong i. 21De dansu dieni sor bui, de dansu danoni heb longu hendre momen asor bugane, su ndramed masi su mugueni Jehova gle gelman, sor da gin hinen i. Su sendraini sor ge, mbue sor boharni. 22Gamel ogo, sor da gin regurdueni i Kristmas aden mahangul.
Raring le lodu asu.
23Petrus sor Johanes sor gina le um asor, sor boharni le ndro su longu masigane, ndurhian ma su labenen gin boi. 24Be su lao ad Jesu gin hirong i, su lug bohosu bersi le ndro Jehova, su lodu le ndro i, su boi: Ndorlaben, uo ge, uo da gin mengseni lang e boan, ndas ma longu masigane i do da ri. 25Uo gin bai le ndoui ad Meluan Helian le bohon ad Damdu David, i lao dandendegei aden: Desa su Haiden su loholo, desa su gor masi me goure, su da hanguruen momen ge le ndro i? 26Su King ber gor su hilou, su ndurhian ber boan su me goure, beg bo iil le ndro Ndorlaben, beg bo bahun le ndro i, Ndorlaben gin daui ndrelgei le borbalen. 27Ehe, ndangen su da hilou me goure dege su gin hinen i mahanu, Herodes ma Pontius Pilatus, su Haiden ma su Israel masi su da gin me goure, su gin bo iil le ndro Jesu, lao adem Helian, uo da gin daui ndrelgei le borbalen. 28Su beg hinen longu masigane, bohom i da gin bai nandugian, dege uo gin hanguruen goru. 29Ndorlaben, e lele, su da sendraini du, hengen ndoui adem le ndro su lao dandendegei adem, su gobharni nongen adem ndoun le ndro su. 30Nemem gle ndro su, gregurdueni su, ghinen gelman ma longu ndoun le garn ad Lao adem Helian, Jesu. 31Be su da gin lodu dagara um asu i rerr. Bergolsu i beb ge le Meluan Helian, su bohernou le ndro su nongen ad Jehova ndoun.
32Su lao ad Jesu masigane, hanguruen asu bersi ge, homo golnisden homo, homo hanguruen homo gle hian ge, homo de danen vong bui: Aga memrad ordo ge. I asu masi. 33Su Apostel su da gin bohernou le ndro su nongen le Ndorlaben Jesu, i da gin ndne lie, su ndramed masi voasuiso su lao ad Jesu. 34Homo de mundrul bui, su holel memrad ma beleng asu i da ndro su, su gin semani memrad asu, boen su gin me, 35Su gin daui moni le nemesu Apostel su gin semani gan la. 36-37Homo asu ngarn Josev, su Apostel bosoui i ngarn Barnabas, aga i vonei ndremda rederhi, i homo asu Levi ber Sipern, i gin semani beleng aden, boen i gin daui moni le nemesu Apostel.
Aktuálne označené:
Apostel 4: LLENT
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Published by the British and Foreign Bible Society 1956