Luk 6
6
Jisɔs Ode Ɔvaar kwɛ Ɛwɔngkwoga gwu
1Ɛwɔngkwoga gwu zan, Jisɔs ono senga ki imɨn sa atsifog#6:1Atsifog: Atsifog inyɨna tsɨ Mosis ette anang ɔbɔg abɛ odesɛ abɛ ayɨn ofon, aba ata seng kɛ ɛtam sɔ ɔnang abɛ akema ashag atsifog ma kɛ ɛdam nzo aba atsi odesɛ okwo ɔkam bɛ. Jer Nnwɛr kwu Ditrɔnɔmi 23:25, 26. Abuwinnam pɨ Jisɔs udɨg naza sa aba atsi atsifog mbyo. Akpewinyɨna aba akam inyɨna se eben aba ɔnang ɔnang atsifog udwɨng kɛ ɛwɔngkwoga gwu. Odesɛ ɔnang udwɨng atsifog abɛma na taga abɛ ki itɔga ussa, abɛ kana tsera ɔnang ussi ɔtɔm pfidede kɛ ɛwɔngkwoga gwu., abuwinnam pa Jisɔs atitso akpenga amama byo, aba atɨma mbɔg aba atwug pyɛ aba tsi. 2Afarisi ban pa anɨng muma aba bɔw-ɛ, “Bugudɨg gwɔ ussi kwa abanga na assi udɨg kwi inyɨna sa amana eben abɛ ananga assi kɛ ɛwɔngkwoga gwu?” 3Jisɔs ɔpɔn bɛ, “Abanga ataga jera udɨg kwɨ Devid ussi okpe kwo okwo ɔkam-ɛ ɔttara ka anang pa atwan abɛ? 4Ɔnwa kɔ ɔtsɔm kwu Ubɨnɔkpaabyi, ɔtaga utsapfɛ fa aba tsog Ubɨnɔkpaabyi utsi ɔttɔg fa affɔnɛzza pu Ubɨnɔkpaabyi mɨntsen ana tsi, ommeg ɔnang anang pa atwan abɛ?” 5Ɔttara Jisɔs oben bɛ abɛ, “Unwa kwu Udwunɨng ode Ɔvaar kwɛ ɛwɔngkwoga gwu.”
6Kɛ ɛwɔngkwoga gwu ɔdwagɔdwag, Jisɔs ɔta ga kɔ ɔdappa kwa abɛ ono okpew bɛ, ɔnang wan kwu udɨmbɔg ku uppa unɨng ma ɔttara. 7Afarisi ɔttara akpewinyɨna tsɛ Mosis aba aror eden otse kwa abɛma bɔma Jisɔs udɨg, aba ker-ɛ tɔng aba se odesɛ sɨma ussi ɔnang nwo ogweng kɛ ɛwɔngkwoga gwu. 8Jisɔs masɛ song ntana ra abɛ, oben udwunɨng nwo kwo oppe ɔbɔg gwan abɛ, “Bɨna be go oro pfɔ ɔnang kwidede.” Ema ubɨna oto be ga ko oro.
9Jisɔs oben bɛ abɛ, “Mbɔw banga, ngwan gwɔ otor-otor kɛ ɛwɔngkwoga gwu; assi izuwa ɔttara assi ipyuwa, akkana akpen ɔttara allɨg akpen?”
10Okker bɛ ibɨng pɛrɛ no oben ɔnang nwo abɛ, “Nem ɔbɔg kwɔ.” Ɛma ussi otse ngwo, ɔbɔg okwo ogweng. 11Afarisi ɔttara ka akpewinyɨna tsɛ Mosis ɔdwag bɛ, aba ttitso attɔnna ayog abɛ ɔttɔg fa abɛma si Jisɔs.
Jisɔs oreng atɔmɔtɔm zowaffa
12Kɨ ngwu ndo, Jisɔs ubɨna ota ko okpetso kwi ididen wan ɔtɔ zɔm atɨm, uwung muma ɔnɔ ɔzɔm atɨm ɔnang Ubɨnɔkpaabyi. 13Si igwu etsow, ojer abuwinnam pɛ aba kwu, ukwu kwo oreng anang zowaffa po ojer atɔmɔtɔm. 14Saimɔn (kwo jer-ɛ Pitɛ) unwɔkka kwɛ Andro, Jems, Jɔn, Filip, Batolomi, 15Matiyu, Tɔmɔs, Jems unwa kwa Alfius, Saimɔn kwo oke ettem ko ofon kwɛ. 16Judas unwa kwu Jems ɔttara Judas Iskariyɔt kwu ukpe-ɛ.
Nllɛ ɔttara kɨnbyi
17Ɔraga ɔttara ka abuwinnam pa Jisɔs aba ta be kɔ ɔwang kwo ode ɔkpɛn. Abuwinnam pa Jisɔs sawada aba nɨng ma, anang pa sawɔsaw pa aba bɨn Judiya, Jɛrusɛlɛm ɔttara ki ifon rɔ ɔranga ɔkanɔkan rɛ Tai ɔttara Sidon. 18Aba akwu aba kɔm-ɛ itɔng ɔttara ogweng bɛ kɨ mmada. Ayog pa akpakpa pyiwa ɛnɛ yag bɛ idɨg ogweng bɛ. 19Anang mbo aba ayɔr ko otse kwa abɛ ma lag-ɛ mbɔg ukwurabɛ ɛffa ini bɨna ma kakɛ issi bɛ agweng ibɨng.
20Jisɔs ɔwag okker abuwinnam pɛ, oben bɛ abɛ,
“Ɛllɛ ede sa abanga akpukpora,
ukwurabɛ Ɛvaar tsu Ubɨnɔkpaabyi ede sa abanga.
21Ɛllɛ ede sa abanga tso okwo ɔnɔ kam banga mazizan,
ukwurabɛ abanga na dɔwɔdɔw.
Ɛllɛ ede sa abanga pana gama mmang mazizan,
ukwurabɛ abanga na amma ara.
22Ɛllɛ ede sa abanga ko okpe kwa anang akwan banga,
aba reng banga atsog ɔkan-ɔkan ɔttara aba araag abanga,
afɨm ntse pyuwa ra banga,
ukwur Unwa kwu Udwunɨng.
23“Low ki igwu nzo ɔttara tuw ibɨn ko olew ukwurabɛ uru kwididen unɨnga utɨg-ɔ kɛ Ɛvaar tsɛ ɛrang. Otse ngwo gwɔ aba atte assi ategnkkawa pu Ubɨnɔkpaabyi.
24“Ubyi ode fa abanga pa akam akpog,
ukwurabɛ abanga ko ottem-lew kwa abanga akama ibɨng mazizan.
25Ubyi ode fa abanga pa ka adɔwa mazizan,
ukwurabɛ okwo nɔ kam banga ɔkama.
Ubyi ode fa abanga pana ma ara mazizan,
ukwurabɛ abanga na gam mmang.
26Ubyi ode fa abanga kwa anang ibɨng ana tɔnga zuwa-zuwa anang banga,
otse ngwo gwɔ aba atte atɔng anang ategnkkawa pana ateg ndag.
Ididaga ra ayogikwan
27“Nteg banga pana awang-m, ayogikwan adag banga, si izuwa nang anang pa akwan banga. 28Wɔw itta nang anang pana azɔm banga, azɔm atɨm nang anang pana anang banga irem. 29Odesɛ ɔnang ukpɨn-ɔ ɔbɔg ka agba, wag agba mboga nang-ɛ. Odesɛ ɔnang ɔtag ɔnɔma kwɔ, nang-ɛ uwagɛ kwɔ ɔttara. 30Nang ɔnang ɔttɔg fidede fɔ ɔbɔw-ɔ ɔttara odesɛ ɔnang ɔtag ɔttɔg pfɔ, kɛ ka ben abɛ ɔmanga ɔnang-ɔ. 31Si nang anang otse kwɔ ɔma aror abɛ aba assi anang-ɔ.
32“Odesɛ oma kam ididaga ɔttara ka anang pa akam ididaga ɔmabɛ, buguru wɔ ma kwa akam? Osenga aluloma na gba akama ididaga ɔttara ka anang pa aba kam ididaga abɛma abubɛ. 33Ɔttara odesɛ assi izuwa nang anang pa azuw anang-ɔ, buguru wɔma kwa akam? Osenga aluloma ana si otse ngwo. 34Ɔttara odesɛ afor ɔnang akpog abɛ utwug-ɔ, buguru wɔma kwa akam? Aluloma ana gba afor aluloma akpog otse ngwo, aba tsog itsen abɛ aba ammanga ibɨng anang bɛ. 35Kama ididaga ayogikwan pɔ abɛ, si izuwa nang bɛ ɔttara for bɛ akpog kɔ ɔsham. Ma akama uru kwididen ɔttara abanga ma de uva pɛ Ɛma kwo Ogor kidam ukwurabɛ ɛma unu si ɔsham ɔnang anang pana kanakɔga abɛ ɔnang ki izuwa usa ɔnang bɛ ɔttara ka anang pyiwa. 36Akama ikwosisi masɛ atte kwa abanga ɔkam ikwosisi.
Nang ayog apong
37“Abanga anang ayog apong, fasɛ aba anang banga apong; abanga anang ayog allɨg, fasɛ aba anang banga allɨg. Abanga abɨna anang ayog, fasɛ aba agba abɨna anang banga. 38Anang anang, Ubɨnɔkpaabyi mɔ manga ɔnang banga, eyoma ɔkatse, aba jag, aba nyeng ɔttara iffu kpinyang, ɛnyan kɨ ntag ra abanga, ɔttɔg fa abanga atɨm ayoma apfɛma vɔ fa abɛma atɨma ayoma anang banga.”
39Jisɔs ɔkɔrɔ ɔtta bɛ otse abɛ, “Ɔkpatsen sɨma okke utuw ɔkpatsen eden o? Abɛma anang mbo affa ke eppe ma to o? 40Unwa kwu nnwɛr okpewnnwɛr mɔyɔnga. Ɔnang kwɛ abɛ kɛ akpewa obengana node otse kwɔ ɔnang kwo okpew-ɛ.
41“Bugudɨg gwɔ kwa ase owerra kwi itsen tsu unwakka arɨg itsi kɨma gi itsen tsɔ oyen? 42Kayan wɔ kwɔ ɔma ma ben unwakka bɛ, ‘Ɔkpanna, kwu nreng-ɔ owerra gi itsen,’ sɔ ɔma oyen ana itsi kɨma gi itsen tsɔ oyen nasa? Ɔma ɔfaranang, tɨmeden reng itsi kɨma nzo ki itsen tsɔ oyen pɛrɛ ase iyang obengana areng owerra nwo kwi itsen tsu unwakka.
Itsi ɔttara ka Adwug
43“Itsi zuwa kede sene wɔm adwug pyuwa pɛrɛ itsi pyuwa ɛwɔm adwug zuwa. 44Itsi tsidede aba na tɨn ka adwug pɛ. Anang fig kana dwunga kɨ nsidɨma pɛrɛ aba dwunga agrep kɨ nshok. 45Ɔnang zuwa unutɨma idɨg zuwa ga ke ettem uyɨn ki iyan, ɔnanag pyuwa unutɨma idɨg pyuwa ga ki ettem tsɛ uyɨn ki iyan. Idɨg ri inɨng ga ke ettem arɛma dɔ ɛmma nɛ tɔnga.
Esonga ɔttara ki Akwungkpa tsɔ Ɔtsɔm Mɨna
46“Bugudɨg gwɔ abanga na jer-m Ɔvaar, Ɔvaar, abanga naka si otse kwɨ mben? 47Mɨnkɔg banga otse kwɔ ɔnang kwu ukwu otor-m, ɔwanga ɔtɔnga kwam ɔttara ussi otse kwɨ mben. 48Ode masɛ ɔnang unu mɨn ɔtsɔm, utɨm appe edong ɔkpa ibagor ka atakpa. Okpe kwɔ ɔnwa assi, aba ɔtsɔm ngwo naka nyeng ukwurabɛ ussi kwɛ obengana. 49Ɔnang kwɔ ɔwang ɔtɔnga, ɔnanusa otse kwɨ mben, ode masɛ ɔnang kwu umɨm ɔtsɔm ki iseg azaga ɔni ibagor nɔkpa, okpe kwɔ ɔnwa assi ɔtɔw kwɛ, akwɛ oto ibɨng shuwan.”
Aktuálne označené:
Luk 6: mfn
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
©️2022 Luke Initiative for Scripture Translation
