Juan 20
20
Gï duakatu go Suxi ïpamu
1Daidi tumiñoko kiamoko mai kia maaxikai oidigi go Maria Magdalena mïï dibia yaasakaruana. Dai ami tïï ïgai ix maigobai dajatadai go gïï odai ix makïdï gï dáítadai ami taagiña xakoga yaasapikatadai go Suxi. 2Dai bhodïrï otoma mïï ïgai abhiadïrï dai mïïka aagidi go Ximuñi Piduru ïmadï go gïmai mamaatïrdami ix makïdï kïïga oigïdai Suxi.
Daidi go Maria Magdalena itïtïdai go mamaatïrdami,
—Kaxi mïtai bhïkai tukugadï Gïr Nukadakami dai ka mai maatï aatïmï xako tïï ïgai— itïtïdai.
3Daidi otoma iji Piduru ïmadï go gïmai mamaatïrdami ix makïdï oigïdai Suxi dai mïï nïida agai xako gï yaasatu ïgai. 4Ïmapi iji ïgai dïï go gïmai kabamioma mïï ix bhai go Piduru dai otomioma ayi yaasakaruana. 5Daidi kuiki ïgai dai gai nïnïaba gamo yaasakaruana dai tïï go ikuxi ixtukïdï bhixapikatadai tukugadï Suxi dïï mai baa ïgai ami. 6Dai gokiïrï ayi go Piduru dai ïgai gia sïïrhi imïi dai baa dai tïï go ikuxi ïpï ix ami kaatïkatadai. 7Dai tïï ïgai ïkobai bhixapikami kaatï go gïmai ikuxi ïpï ixtukïdï bhixapikatadai modï Suxi. 8Dai bhodïrï baa go gïmai mamaatïrdami ïpï dai mos tïïgakai go ikuxi kïïga buaboitu ix kaxi gï duakatutadai go Suxi. 9Aidïpïrï go mamaatïrdami mai kia maatï kaïkatadai go ojai Diuxi ñokidïrï xako ikaiti sai gï agaitadai ix ïpamu gï duakaltudagi go Suxi.
Gï maaxitu Suxi Maria Magdalena buitapi
10Daidi bhodïrï aa surhi ï goka mamaatïrdamigadï. 11Tai ïïgi amaxi yaasakaruana bii go Maria Magdalena dai suakai ami kïakatai. Dai kuiki ïgai dai gai nïnïaba yaasakaruana. 12Dai tïï ïgai goka Diuxi tïtïañikarudï totoa yukusukami sai ami darajatadai xako kaatïkatadai Suxi tukugadï. Ïmoko mobasana dajatadai dai go gïmai taatápïxiana.
13Daidi itïtïdai go Diuxi tïtïañikaru go Maria aidï,
—¿Aapi oki, tuipïxi suakai?— itïtïdai.
Daidi Maria Magdalena itïtïdai,
—Kaxi mïtai bhïkai tukugadï gin Tïanïdamiga dai mai maatï aanï mïx xako tïï— itïtïdai.
14Dai mos potïkai go Maria sai bhodïrï gokiamakoga nïnïaba ïgai dai tïï go Suxi ix ami kïïka dïï mai máí ïgai.
15Daidi go Suxi itïtïdai,
—¿Tui pïxi suakai? ¿Borai gaagai aapi?— itïtïdai.
Daidi go Maria pobïrhiditadai ix ïgai ïr go nukadakami ami ïxikamiana dai potïtïdai,
—Aapi kïïrhi, ix aapi bhïkai tukugadï go mukiadï gin aagidañi pïxako tïï nai aanï imiagi dai mïïkadïrï buapagi ïpamu— itïtïdai.
16Dai Suxi itïtïdai,
—Maria— itïtïdai.
Daidi go Maria ajako kïkiba dai bui nïnïaba daidi itïtïdai,
—Rabhoñi— itïtïdai.
Rabhoñi itïiya ïrhidi Hebreokïdï ïmo ñoki mamaatïtuldiadami.
17Daidi go Suxi itïtïdai,
—Maiti bhïbhïda gin tukuga, mai kia tïsai aanï mïïka xako daja gïr Oga— itïtïdai. —Bhaiyoma imi dai mïï aagida gin mamaatïrdamiga sai ka imïda iñagai aanï mïïka xako daja Diuxi gin Oga. Aagidañi sai Diuxi gin Oga ïr aapimï gïn Diuxiga dai aapimï gïn Oga ïpï— itïtïdai.
18Dai bhodïrï jii go Maria Magdalena amïka xako darajatadai go gaa mamaatïrdamigadï daidi potïtïdai,
—Kaxi aant tïï Gïr Nukadakami— itïtïdai.
Dai bhodïrï aagidi ix tïtïdaitadai go Suxi.
Gï maaxitu Suxi mamaatïrdamigadï buitapi
19Dai aidï tumiñoko mos baakïkïrï ïkarhi go mamaatïrdamigadï gïn ïmpagi ïmo kiiyïrï dai kïïga kuu kuuparadï ïbhïiditai go judidiu. Dai todian dukai baa go Suxi dai ami gasaagida kïkiba dai biaturhi.
—Gin aaduñi, bhïibïrai ibhïxtaragai gïn iibhïdagïrï— itïtïdai.
20Dai bhodïrï tïtïgidi ïgai noonobidï dai onomadïrï ix maaxi. Baidi go mamaatïrdamigadï kïïga bhai gïn ïrhidi nïiditai dai maatïkatai sai ïgai ïr gïn Tïanïdamiga.
21Dai Suxi ïpïpï potïtïdai,
—Bhïibïrai ibhïxtaragai gïn iibhïdagïrï— itïtïdai.
—Daiñi, podukai ix dukatai gin Oga gin otoi bhaigobai óídakami saagida, podukai ïpï aanï gïn otosai óídakami saagida aipakoga— itïtïdai.
22Daidi bhodïrï Suxi buijako buxta mamaatïrdamigadï daidi itïtïdai,
—Bhïibïrai Diuxi Ibhïgadï— itïtïdai. 23—Dai ix oigïrhiadagi aapimï jaa ix makïdï soimaaxi ibuadagi aidï gia ka oigïlda bimu ïgai. Dïï gia ix aapimï maiti ipïrhiada ix oigïrhiadagi ïgai soimaaxkamigadï ix makïdï idui aidï gia ka mai oigïlda bimu ïgai— itïtïdai.
Gï maaxitu Suxi go Tomás buitapi
24Dai oidakatadai ïmai mamaatïrdamigadï Suxi Tomás tïgidukami. Bai ïgai kuatai aagaiña odami ïpï. Dai ïgai mai ïmadï dajatadai go gaa mamaatïrdami aidïxi gï maaxitutadai go Suxi buitapi.
25Dai go gaa mamaatïrdami itïtïdai go Tomás,
—Tïï aatïmï Gïr Nukadakami— itïtïdai.
Dai go Tomás itïtïdai aidï,
—Aanï gia xadïrï buaboitudaiña ix mai ïpïgioma nïidagi xako xixixatadai klabo ïkadï dai tomarhi ix mai taatagi ïkadï ïpï ïmadï onomadï uta xako gï muragitu ïgai. Ïbogiami podukai gia buaboituda antaada aanï— itïtïdai.
26Dai bhodïrï ïpï mamaako tasaikïdï ïpamu gïn ïmpagi go mamaatïrdami. Dai aidï gia gaïmadï dajatadai go Tomás. Dai kïïga kandadumagikatadai kuuparagai daidi bïïxkïrï todian dukai ami gasaagida kïkiba go Suxi daidi itïtïdai,
—Gin aaduñi, bhïibïrai ibhïxtaragai gïn iibhïdagïrï— itïtïdai.
27Dai bhodïrï itïtïdai ïgai go Tomás,
—Gimi dai taata gï ïkakïdï dai nïida sai kia kïï maaxi xako gï xixixatu gin ïïka. Dai tami gin onoma dïgakïrï taata ïpï dai podukai ka mai xu xi poïrhiada aapi sa bhai maiti ïr buaboi dai bhaiyoma kïïga buaboitudada aapi— itïtïdai.
28Dai aidï gia go Tomás itïtïdai,
—Gia ïr buaboi ix aapi ïr gin Tïanïdmiga dai ïr gin Diuxiga— itïtïdai.
29Daidi go Suxi itïtïdai go Tomás,
—Xibi gia gin buaboitudai aapi gin nïiditai. Dïï gia gïïpi bamioma bia bhai ïrhiaragai go odami ix makïdï gin buaboitudai mai kia gin nïiditai— itïtïdai.
Juan aagai ix tuma bïïtarï idui idi ojai
30Gin aaduñi, naana maaxi maaxidaragai idui Suxi ix makïdï nïidi go mamaatïrdamigadï dïï mai bïïxi ojixi idi libroïrï. 31Tami idi libroïrï oja aanï ïïmoko ipïrhiditai ix nïiditai aapimï gobai kïïga buaboitudada aapimï ix go Suxi buaboikïdï ïr Diuxi maradï daidi ïr Ga Tïanïdami ïpï. Ojixi go maaxidaragai idi libroïrï sai ïgaikïdï buaboitudana aapimï dai sai ka buaboitudakai sai bhodïrï kïïgakïrï óídakana aapimï bïïxkïrï bïïtarï.
Aktuálne označené:
Juan 20: NTP
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Copyright: Ethnos360 Sanford, Florida
