Siin Giala 12
12
Abrahamu boo
(12.1—24.67)
Lawa a Abramu bíi
1 #
NDS 7.2-3; EBR 11.8. Dɛnaa pɛ Abramu ni: «Soo n nə n bɔ n gána nɛ, n nə n kiwi laanka ǹ dikion toa walan. Ma bɛ́ re gána mɛn nyɛɛ n nɛ, n wo walan. 2Ma á re n tɔrɔ mɔnɛɛ. Ma á re barka we n ne, ma n tɔ bɔ. Min kɔsɔn wɔ á re bǐɛ̃ koe n wɔ gɔ́ɔ̃ nɛ. 3#GAL 3.8. Bɛ̀ min mɛnɛn nə́ lɛn bǐɛ̃ bíi n li, ma á re lɛn bǐɛ̃ bíi bɛa dɛnan li. Bɛ̀ min mɛnɛn nə́ lɛn pipiã bíi n li, ma á re lɛn pipiã bíi bɛa dɛnan li. Kanaa a tɔrɔn tumaa wɔ á re bǐɛ̃ koe n wɔ gɔ́ɔ̃ nɛ.»
4Abramu soo miɛ̃ á woo, ka Dɛnaa bɛ́ á pɛ-n lɔn. Lɔti dɔ woo kun ni.
Abramu bɛ́ soe Kaaran, bɛ̀ a lɛ̀ pɔsɔbaawensooro ne. 5A ná a lɔ Sarayii kũ, ka ǹ dɔɔ̃ngiĩ a nɛ Lɔti ni, ǹ gɔn màn mɛn tumaa yɛ Kaaran, ǹ bɛ̀rɛn mɛnɛn pii, ǹ nə́ yoo ka bɛ tumaa nɛ. Ǹ nə́ soo ǹ nə́ Kanaan gána zii saa.
Abramu á ta Kanaan laanka Ezipti gána-n boo
6Ǹ bɛ́ ǹ nə́ dɔ Kanaan gána nɛ, Abramu gána lɛ bii wɔsɔ kɔn, á woo yǎa Moore dì dan bǎã nɛ, Sisɛmu kiwi. Bɛa biikoo li, Kanaan minin nə́ goã bǎã lɛ nɛ. 7#NDS 7.5; GAL 3.16. Dɛnaa nə́ n din nyaa Abramu ni, á pɛ nɛ: «Man die gána kɛ koe n din tɔrɔn la.» Dɛnaa nə n din nyaa nɛ bǎã mɛn nɛ, Abramu *wúlu bɔ ǹ bǎã dɔ walan Dɛnaa wɔ lɛa. 8Á yoo walan á woo kelen bǎã nɛ Betɛli a lɛ̀giala gɔn la. Á Betɛli toa lɛ̀nyɛɛn gɔn la, á Ayii toa lɛ̀giala gɔn la, a ná a zìã dɔ bɛn bii ni. Á wusoo á wúlu bɔ ǹ bǎã kɔsɔ dɔ Dɛnaa wɔ lɛa walan doo, a ná a nyankɔ, a n bíi ka a tɔ nɛ. 9Bɛ kio, Abramu nə́ n zɔ̃ miɛ̃ boɛboɛ, á woo Kanaan a gusin a lɛ̀gɔn la.
10Bɛ kio, bòo gole daa á wɔ gána lɛ nɛ. Bòo lɛ bɛ́ á baraa kɔ á la yii ni, Abramu soo, mà asɛ n woe Ezipti gána nɛ, á giã walan boɛɛnɛ. 11Ǹ bɛ́ re we gána lɛ nɛ ǹ mɛn waáraa, á pɛ a lɔ Sarayii lɛ nɛ kɛnɛn: «Haya! Ma á doɛ̃, máa n nə ǹ lɔ lɛa, n tá siĩn yɔrɔ-a. 12Bɛ̀ Ezipti minin kɛn nə́ n yɛ, ǹ nə́ pɛ mà masɛ á lɔ nə n nɛ, ǹ tá re masɛ dii, ǹ nə n din Sarayii yii toa koo. 13#SGK 20.2; 26.7. Ma nə n nyankoe máa n pɛ, mà n nə ǹ ma miãnɛn lɛa, màn mɛn bɛ́ toɛ, ǹ masɛ kũ doɛ̃ n din taman yii, ma la ka n din barka nɛ.»
14Abramu bɛ́ á dɔ Ezipti sonbore, Ezipti minin lɛn nə́ yɛ, mà a lɔ lɛ á siĩni á là da. 15Ǹ kii lɛ, ǹ nə́ bíi *Faarahɔn, bɛa pàãdɛnan bɛ́ ǹ nə́ lɔ lɛ yɛ, ǹ nə́ ga a ganaa, ǹ nə́ woo a laakalaa nɛ. Ǹ nə́ daa lɔ lɛ kũ, ǹ nə́ woo ne kii lɛa kion. 16A din lɛ taman yii, kii lɛ Abramu kũ doɛ̃. Á bòen laanka sèren kɔ la, ka diin ni, ka dundun sàn laanka ǹ daanan nɛ, ka nyɔɔmaan nɛ, ka bɛ̀rɛgiĩn laanka bɛ̀rɛlɔn nɛ.
17Sɛnɛ, Dɛnaa là paparɛɛ gole da kii lɛ laanka a kion minin mìi ni, Abramu a lɔ Sarayii taman yii. 18Bɛ lɛ nɛ, kii lɛ Abramu bíi, á pɛ nɛ: «Wàa-n sii n ka kɛ nɛ ń zɛnaa ma nɛ? Wàa na á baa, n ba pii ma-n, mà n din a lɔ-n wa? 19Wàa na á baa, ń pɛ ma nɛ, mà n miãnɛn nɛ? Bɛ lɛ nɛ, masɛ dɔ saa maa lɔ lɛa. Sisia, n lɔ á ke, a kũ, n wo ne, n nə n bɔ kànaa!»
20Kii lɛ tɔ́n pɛ a minin manɛ, mà ǹ da zii, a din laanka a lɔ nɛ, ka ǹ gɔn màn tumaa nɛ.
Aktuálne označené:
Siin Giala 12: SCE2013
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
San Catholic Edition Bible © Bible Society of Burkina Faso, 2013.