Marko 3
3
OW’OMUKONO GWOMIRE NAKIZIBWA. — KUSORWA KW’ENTUMWA.
1Yezu nasuba kutaha mw’isomero, haliga halimo omuntu ali n’omukono gwomire. 2Baliga nibamuhenga okwo alamukiza ha lunaku lwa sabato, baze kumulega. 3Nagambira omuntu ayaliga ali n’omukono gwomire ati: Imerera hagati. 4Kandi nabagambira ati: Kifuhirwe ha lunaku lwa sabato kukola kuzima, nangu kubi? kukiz’omwoyo, nangu kugwihaho? Bonene nibabuza. 5Nabarabyamo ameso n’ebiniga, abihirirwe obuhume bw’emitima zabo, nagira omuntu ogwo ati: Gorora omukono gwawe. Nagorora, omukono gwe nigusuba kukizibwa. 6Mbe Abafarizayo nibahuruka nibagenda aho n’aho kumwegambanirwa hamo n’Abaherodyani okwo balamwita#3, 6 Lora Matayo 22, 16..
7Nawe Yezu nayegendera n’abahemba be ha chambu, embaga ningi neruga Galilaya na Buyahudi, 8na Yeruzalemu na Idumeya na ha mwambu gwa Yordani, nemuruba; kai mu nsozi za Tiro na Sidoni embaga ningi, ka yahulire ebyo yakozire, nemwizaho. 9Nagambira abahemba be bamutere aho obwato, kuber’abantu, batamuhiganisya. 10Mbe, obwo yakizaga bengi, bamwehumirahoga, bahiche kumukwataho, bona abaliga bemirwe kubi. 11N’emyoyo z’obulofu ka zamubonaga, nizimugwaho, niziyomba, nizigira ziti: 12Iwe oli Mwana wa Mungu. Mbe yabazibiraga mani, baleke kumusokora.
13Ka yahanamire mw’ibanga, nayeta abo yayendaga wenene, nibamwizaho. 14Nabagira babe nage ikumi na babili, abatume kwolekerera. 15Nabaha obuhicha bwo kukiz’abarwere n’obwo kwiruch’amasitani. 16Kai Simoni, akamuruka izina lya Petro; 17na Yakobo, mwende Zebedeyo, na Yohana, mutabani wabo Yakobo, nabaha izina lya Boanergesi, nikwo kugira ati: bana b’enkuba#3, 17 Yezu nabaruka izina elyo obwo baliga nibomereza n’amani mengi.; 18na Andrea, na Filipo, na Bartolomeyo, na Matayo, na Toma, na Yakobo wa Alfe, na Tadeyo, na Simoni Omunakanani, 19na Yuda Iskaryota, niwe ayamutunzire.
EBIZUMI BY’ABANDIKI. — ABABO YEZU.
20Nibeza mu nzu, embaga nesuba kusumba, nibabura no kuhicha kuly’omukate. 21Mbe ababo ka bahulire, nibemuka kuza kumukwata, kuba bagiraga bati: Yasara#3, 21 Ababo Yezu batinaga abahate be, nibayenda aleke kwolekerera.. 22Kandi abandi abaliga barugire Yeruzalemu bagambaga bati: Ali na Belizebubu#3, 22 Lora Matayo 10, 25., kai akwiruch’amasitani mu mani g’omukuru w’amasitani. 23Ka yabayesire, nabagambira mu ngani ati: Isitani likuhicha lita kwirucha sitani? 24Obukama ka bukutagana bwonene bwonka, mbe obukama obwo tibukuhicha kuguma. 25Kandi n’enzu yona k’ekubura kuhulirizanya, enzu egyo tekuhicha kuguma. 26Mbe raba sitani nilyegomera, likuheneka, kai tilikuguma, nawe obuhicha bwalyo bukuhwaho. 27Tihaliho muntu akuhicha kutaha mu nzu yo w’amani akanyaga ebintu bye, atatandikire kuboha ow’amani, niho akanyaga enzu ye#3, 27 Lora Matayo 12, 27–28.. 28Koto nkubagambira nti: Abana b’abantu balikizibwa ebiheno byona, n’ebizumi byona ebyo balizuma Mungu; 29nawe omuntu alizuma Omwoyo Mutakatifu, ogwo niwe atalibona kukizibwa mu myaka zona, kai hona ali n’entambala etalihwaho#3, 29 Lora Matayo 12, 32.. 30Mbe nibagira bati: Ali n’omwoyo mulofu.
31Mbe nina n’abatabani babo nibeza, nibemerera hanza, nibamutumira owo kuza kumweta. 32Embaga yaliga emwikereho, nibamugambira bati: Lora, noko n’abatabani banu bali hanza, bakukuhiga. 33Nabasubiramo nagira ati: Mawe n’abatabani betu ni baha? 34Nabarabyamo ameso, abaliga bekere bamuzingire, nagira ati: Ngugu mawe n’abatabani betu. 35Mbe akukola ebyo Mungu akwenda, niwe mutabani wetu, na muhara wetu, na mawe#3, 35 Lora Matayo 12, 50..
Aktuálne označené:
Marko 3: KED1946
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
First published in 1946 by the White Fathers. Published online with the permission of the White Fathers.
