Matayo 23
23
KWEKUZA KW’ABAFARIZAYO N’ABANDIKI. — YEZU NABAZUMIRIZA.
1Aho Yezu nafumora n’embaga n’abahemba be, 2nagira ati: Abandiki n’Abafarizayo bekere ha kitebe cha Musa#23, 2 Yezu akwenda abahemba be bayekenge ha mitungirwe z’abandiki n’abezabo.. 3Mbe byona na byona ebyo balabagambiraga, mubihiche nimubikore; nawe mutakora okwo bonene bakukora, kuba bakugamba, nawe tibakukola. 4Kuba bakuboha emitegulo ezizitohire n’ezitakubaturwa, kai nibazitwekereza ha mabega g’abantu, nawe tibakwenda kuzitengesyaho n’echara chabo. 5Kandi ebikorwa byabo byona bakubikolera kubonw’abantu; bakugazihya efulakiterya zabo#23, 5 “Efulakiterya” nigo amapapula agayandikirweho ebigambo bike by’Enandiko. Abayahudi bazibohaga ha busyo bwabo na ha mikono zabo., kai bakwongeza amasansuma g’emyenda zabo. 6Bakwenda obwikaro bwo kutandika mu mageni, n’ebitebe by’obusyo mu masomero, 7no kubwakibwa mw’iguliro no kwetwa izina lya Rabi#23, 7 “Rabi” ensonga zacho: mwolekerezi, musomesya.. 8Nawe imwe mutayetwa Barabi, kuba omwolekerezi wanu n’omo, kai imwe mwena muli b’end’emo. 9Kandi mutayeta omuntu mu nsi muti: tata, kuba Iso wanu n’omo ali mw’igulu. 10Hona batabayeta bati: mwolekerezi, kuba Omwolekerezi wanu n’omo, ni Kristu. 11Omukuru mul’imwe abe mukozi wanu. 12Mbe alyekuza, aligaywa; kai alyekehya, alikuzibwa#23, 12 Yezu akwenda abahemba be bayekehye, nawe tiyabazibire kukuza abakuru..
13Muligabona, Bandiki na Bafarizayo, bazig’imwe, kuba mukukinga obukama bwo mw’igulu mu meso g’abantu; imwe timukutahamo, kai timukuleka kutahamo abakwenda#23, 13 Abantu abo baliga baherwe omulimo gwo kuhabura abantu mu muhanda gwo kuchunguka, nawe baliga nibabahabisya n’emitungirwe zabo.. 14Muligabona, Bandiki na Bafarizayo, bazig’imwe, kuba mukuly’enzu z’abakifwerw’iba nimwesomesya esala zilehire muno#23, 14 “Kuly’enzu … ” nikwo kugamba oti: kunyaga. Ni kubi muno kunyaga abahabi ebintu byabo, munomuno mu nsonga zo kwesomera esala ningi mu meso g’abantu; nicho mulilamulirwa elamu mpango. 15Muligabona, Bandiki na Bafarizayo, bazig’imwe, mukuzonga enanza n’omulambo, muhiche kugira omuhemba omo, kai k’akumara kuba atyo, nimumugira mwana w’omuliro ogutahwaho kukiraho imwe kabili. 16Muligabona, imwe bahabuzi bahume, abakugira muti: Buli muntu akulahirira eklezia, ti kintu, nawe akulahirira ezahabu y’eklezia, alargirwe. 17Basiru mwe, bahume, hatyo ekikizire ekindi ni kiha? ezahabu nangu eklezia ekutakatifuza ezahabu? 18Kai muti: Buli muntu akulahirira olutare, ti kintu, nawe buli akulahirira omuherezo oguliho, alagirwe. 19Bahume mwe, ekikukiraho ni kiha? omuherezo nangu olutare olutakatifuza omuherezo? 20Mbe akulahirira olutare, akulahirira lwonene na byona ebili hali lwonene. 21Kai akulahirira eklezia, akulahirira yonene n’akuba atwire muli yonene. 22Kandi akulahirira igulu, akulahirira ekitega cha Mungu n’akwikara hali chonene#23, 22 Yezu akukunganisya abazigi banu, kuba basimaga ezahabu n’emiherezo kukira enzu ya Mungu na kukiraho Mungu wenene, owe bahererezaga.. 23Muligabona, Bandiki na Bafarizayo, bazig’imwe, obwo mukuhereza ekihinzu ch’ekumi cha nana na habataluwa na bizari, nimuleka ebili bikuru mu bilagiro: oburonge, ekisa no kwikiriza. Mwaliga muli no kukola ebyo, kai no kubura kuleka biliya. 24Imwe bahabuzi bahume, mukusweza omubu, kai nimumira entungabulende!#23, 24 Nikwo kugamba oti: batinaga entambala noro, nawe entambala mpango muno, bagikolaga chonka bucha bucha. — “Nana” n’ebindi bityo nigo manansi agakununka kuzima. Abayahudi baherezaga ekihinzu ch’ekumi cha buli birabo by’ensi. 25Muligabona, Bandiki na Bafarizayo, bazig’imwe, obwo mukweza ebya ha bweru by’ekikompe n’olunanga, nawe mu nda mwizwire obusaku n’obulofu. 26Mufarizayo ahumire we, tandika kweza ebili mu nda y’ekikompe n’olunanga, niho n’ebili ha luguru bibe bimwera. 27Muligabona, Bandiki na Bafarizayo, bazig’imwe, kuba mukususana n’ebituro ebisombize olusombyo lumwera, ha luguru abantu bakubibona kuti bili bizima, nawe mu nda bizwire amagufwa g’abafu n’obuzunde bwona. 28Nikwo mutyo n’emwe: ha bweru abantu bakubabona kuti muli bazima, nawe mu nda mwizwire obuzigi n’obuzunde. 29Muligabona, Bandiki na Bafarizayo, bazig’imwe, abakwombekera abalagi ebituro, kai nimusugulika amazu g’abaronge, 30-31nimugira muti: Tukiba tuliho mu naku z’abatatenkuru, titwakukobere nabo ha nsagama y’abalagi. 32Mbe imwe nimwizuze olulengo lwa baso banu#23, 32 Bayombekeraga abalagi ebituro, basimwe abantu kuber’obuzima bwabo..
33Nzoka mwe, bana b’enzoka, muliruka muta elamu y’omuliro ogutahwaho? 34Mbe nicho nkubatumiraho abalagi n’ab’obwenge n’abandiki; muli bonene abo abandi kai mulibeta nimubalega ha musalaba, abandi mulibatez’amasanzu mu masomero ganu, mulibanaliza mu charo kinu na kiliya, 35niho ensagama yona ntakatifu ebezeho, eyasesekire ha nsi, kuruga ensagama y’Abeli omuzima kuhika ha nsagama ya Zakariya mwende Barakiya, owe baitire hagati y’eklezia n’olutare. 36Koto nkubagambira nti: Ebyo byona bilizira oluzaro lunu. 37Yeruzalemu, Yeruzalemu, iwe ekwita abalagi, nelasy’amabale abakutumwa hal’iwe! Nkayenda kangaha kukukumirira abana bawe nk’okwo embuguma y’enkoko ekukumirira obwanakoko mu mababa gayo, iwe noyanga! 38Mbe mulisigirwa amazu ganu gali busa. 39Kuba nkubagambira nti: Timukimbona, kuhika mugire muti: Abarikirwe akwiza mw’izina ly’Omukama#23, 39 Yezu akulaga hanu kwiza kwe kwa kabili olw’alaiza kulamula abantu..
Aktuálne označené:
Matayo 23: KED1946
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
First published in 1946 by the White Fathers. Published online with the permission of the White Fathers.
