Matayo 18
18
EKILAGIRO CHO KWEKEHYA. — ENSI EKUSITAZA ELIGABONA.
1Mu katungu ako abahemba nibagenda hali Yezu nibamugambira bati: Iwe okuchwa ota? ni ga aliba mukuru mu bukama bwo mw’igulu?#18, 1 Entumwa zalenganisyaga obukama bwa Masiha nk’obukama bundi bwo mu nsi. Yezu nabahabura nagira ati: Alyekehya muno kukir’abandi niwe aliba mukuru. 2Yezu nayeta namuto, namwimereza hagati yabo, 3nagira ati: Koto nkubagambira nti: Ka muliba mutahindukire mukaba nka banamuto, timulitaha mu bukama bwo mw’igulu#18, 3 Namuto ni kimanyisyo kizima ch’obwekehya. Kwesusanisya nka namuto mu mitungirwe na mu bwekehya nigw’omuhanda gwo kuhika mw’igulu.. 4Mbe alyekehya nka namuto onu, alikira abandi mu bukama bwo mw’igulu. 5Kai alyanankura namuto omo nk’onu mw’izina lyange, alyanankura ine. 6Nawe alisitaza omo wo mu bana banu abakunikiriza, ahikire kukomwa mu bicha bye olumengo oluhiringisibwa ensikiri#18, 6 Mu Bayahudi olumengo luhango lwahiringisibwaga ensikiri. no kutubizibwa mu nanza obuziba#18, 6 Omuntu akusitaza owezabo, akaita omwoyo gwe, taingene kusasirwa; hakili wenene aihwemo wenka, abandi bahiche kukira.. 7Ensi eligabona ha bwo kusitaza! Kuba obusitaza bulibaho; nawe omuntu ogwo aligabona, owe obusitaza bulirugiriraho. 8Nawe omukono gwawe hamo okuguru kwawe kukakuhenesya, nokusindure, okunage hara; ni kuzima kwawe kugenda mu bulame olemere hamo nosuntira, kukira kugira emikono ibili hamo maguru abili, kai kunagwa mu muliro ogutahwaho. 9Kandi eliso lyawe likakuhenesya, nolinonkoremo, olinage hara; ni kuzima kwawe kugenda mu bulame n’eliso limo, kukira kunagwa mu muliro ogutahwaho, oli n’ameso abili#18, 9 Omukono n’okuguru n’eliso bikumanyisya buli kintu ekikuhicha kuhenesya. Tulagirwe kuchanga no kutagana nacho, omwoyo guhiche kuchunguka.. 10Mutagayaho omo mu bana banu; kuba nkubagambira okwo bamalaika babo mw’igulu bakubona buchabucha obusyo bwa Tata ali mw’igulu#18, 10 Ebigambo ebyo bikutumanyisya okwo buli muntu ali na malaika mulinzi..
ENABALEGA EYABUZIRE.— KUGOROZANYA N’OWEZANU. — KUKIZANYA N’AKUKUHENERA.
11Kuba Omwana w’omuntu akeza kukiza ebyaliga bibuzire. 12Imwe mukuchwa muta? Omuntu akaba ali n’enabalega igana, muli zonene hakaburaho emo, si takusiga makumi mwenda na mwenda mu mabanga, akagenda kuhiga ekuba ebuzire? 13Mbe akechura yagibwene, koto nkubagambira nti: Ekumusemereza muno kukira makumi mwenda na mwenda ezo sanga zitabuzire. 14Nikwo na So wo mw’igulu takwenda omo mu bana banu abureho#18, 14 Omulisya muzima niwe Yezu: takwenda enabalega n’emo, omuntu n’omo, abureho, kuba abantu bona ni bana be, akabachungula bona n’ensagama ye..
15Owezanu akakuhenera, roko omuhane, muli wenka nage. K’alikuhulira, mbe owezanu wamubanda. 16Nawe akabura kukuhulira, suba kutwara omo hamo babili, niho buli kigambo kihwere mu kanwa k’embona ibili hamo isatu. 17Hona k’akubura kubahulira, ogambire Eklezia; nawe k’akubura no kuhulira Eklezia, omulore nk’omusenzi n’omusoroza. 18Koto nkubagambira nti: Byona ebyo mulisumika mu nsi, bilisumikwa na mw’igulu, na byona ebyo mulisurumura mu nsi, bilisurumurwa na mw’igulu. 19Nkusuba kubagambira nti: Babili mul’imwe bakahulirana mu nsi, buli kintu echo balisaba, Tata ali mw’igulu alikibaha. 20Kuba aho balisumbira babili hamo basatu mw’izina lyange, n’ene nkuba ndiho hagati yabo#18, 20 Omuntu k’akwanga kuhulira abakuru b’Eklezia, akurugamo mw’ Eklezia, akususana nk’omusenzi, kuba elamu ekuruga ha bakuru abo ni lamu ya Mungu. — Hanu Yezu akusima ilembereza ly’abantu bengi hamo: esala ezo zili n’amani..
21Aho Petro namuzaho nagira ati: Mukama wange, owezasu akumpenera kangaha ine nimmukiza chonka? si kuhika ngendo musanzu? 22Yezu namugambira ati: Tinkukugambira ngendo musanzu, nawe makumi musanzu ngendo musanzu.
OLUGANI LW’OMWIRU MUHENI.
23Nich’obukama bwo mw’igulu bukususana nk’omukama ayaliga nayenda kutonga abantu be amabanza. 24Ka yatandikire kutonga atyo, nibamuletera omuntu ali n’ibanza lye lya talenta kisira kimo#18, 24 Ibanza elyo n’ihango muno, tilikubarwa; Yezu akwenda kusuba kugamba okwo tuli no kukiza omuntu buli lugendo olwo atuhenera, engendo musanzu chonka pai, nk’okwo yagambire Petro.. 25Nawe obwo yaliga atali n’ebyo kuliha, omukama namulagira kutundwa wenene n’omukazi we n’abana be, n’ebyo yaliga ali nabyo byona, alihe. 26Mbe omwiru ogwo namugwa mu maguru, namulembereza ati: Chulera, ndikulihira byona. 27Mbe omukama nasasira omwiru ogwo namuleka, namukiza ibanza lye. 28Nawe omwiru ogwo, ka yahurukire, nabugangana n’omwiru wezabo, ali n’ibanza lya denari igana#18, 28 Denari igana ni kuti shilingi igana. Ibanza elyo ti kintu kulilenganisya n’elya talenta bihumbi ikumi. Mbe nikwo n’ebyo abezasu batuhenera ti kintu kubilengenisya n’ebyo tukuhenera Mungu buli bucha., namukwata, namuniga nagira ati: Ndihira ibanza lyange. 29Aho owezabo namugwa mu maguru, namulembereza ati: Chulera, ndikulihira byona. 30Nawe wenene nayanga, nagenda kumuta mu muguha kuhika alihe ibanza lye. 31Mbe aberu bezabo ka babwene ebyagwire, nibabihirirwa muno, nibaza kugambira omukama wabo ebyagizirwe byona. 32Aho omukama we namweta namugambira ati: Iwe mwiru mubi, ine nakukiza ibanza lyawe lyona obwo wandembereza; 33kai n’ewe wena tiwakuhikize kusasira owezanu nk’okwo ine nakusasira? 34Mbe omukama we nasaya, namusindika kunazibwa kuhika kuliha ibanza lyona. 35Mbe nikwo na Tata wo mw’igulu wena alibagirira atyo n’emwe, ka muliba mutakirize abezanu mu mitima zanu#18, 35 Olugani lunu ensonga zalwo zili ha bweru. Aberu b’omukama ogwo si nibo baha, batali abantu bona? Omukama niwe Mungu Omuhicha wa byona, n’amabanza getu niby’ebiheno byetu. Mbe tukayenda kusasirwa Mungu, tuli no kutandika kusasira abezasu mu bubi obwo batukolera. Mungu akuhich’ata kutukiz’entambala zetu mpango, tukabura kugorozanya n’abutubihirizebo kake kati chonka? Kuta! ni bakristu bangaha abakuhicha kuzima ebigambo ebyo basoma bucha bucha mu sala “Tata wetu”, bati: Otukize ebiheno byetu nk’okwo tukiza abatuhenera?.
Aktuálne označené:
Matayo 18: KED1946
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
First published in 1946 by the White Fathers. Published online with the permission of the White Fathers.
