Lik 20
20
Jésus i atin b'ɔ lɛ i'n
(An `nian Mat 21:23-27; Mar 11:27-33)
1Le kun kɛ Jésus ´kle sran'm be like Nyanmiɛn i sua'n nun, b'ɔ ´bo jasin fɛ'n kle be'n, Nyanmiɛn nyrun jranfuɛ dandan mun nin mmla klefuɛ mun, ɔ nin kpɛnngbɛn mun be wa usɛli i kɛ: 2«?Wan dunman nun yɛ a yo sa nga mun-ɔn? ?Yɛ wan yɛ ɔ tuli wɔ kɛ a yo-ɔ? Kle ye sran sɔ'n.» 3-4Yɛ ɔ seli be kɛ: «N kusu m ma usa amun sa kun, ?Zan i batɛm b'ɔ yoli'n, Nyanmiɛn yɛ ɔ mɛnnin i atin annzɛ sran yɛ ɔ mɛnnin i atin yɛ ɔ yoli-ɔ? An `kle min sran sɔ'n.» 5Be bu i akunndan be seli kɛ: «Sɛ e se kɛ Nyanmiɛn yɛ ɔ mɛnnin i atin'n, ɔ ´usa e kɛ: ‹?Yɛ nguɛ ti yɛ amu'an lafi-mɛn i su-ɔ?› 6Sɛ kusu sɛ e se kɛ sran yɛ ɔ mɛnnin i atin'n, sran'm be ´fin ye yɛbuɛ, afin be kwlaa be lafi su kpa kɛ Zan ti Nyanmiɛn nuan ijɔfuɛ.» 7Yɛ be seli kɛ be si-man sran ng'ɔ mɛnnin i atin sɔ'n. 8Yɛ Jésus seli be kɛ: «N kusu n su kle-man amun sran ng'ɔ mannin min atin bɔ n yo sa sɔ'n.»
Vinyi fie sunianfuɛ'm bé wun nyanndra
(An `nian Mat 21:33-46; Mar 12:1-12)
9I sin ɔ buli nyanndra kun kleli sran mun. Ɔ seli kɛ: «Bian kun dili vinyi fie, ɔ kunndɛli sran ɔ fa fie'n wlali bé sa nun nan ɔ'a ɔ nvle wie nun. Ɔ ko cɛli lɔ lɔuun kpa . 10Kɛ ɔ juli vinyi mma i tilɛ'n, ɔ sunmɛnnin i sran kun fie'n i sunianfuɛ'm bé sin kɛ ɔ ko fɛ i liɛ blɛ i. Fie'n i sunianfuɛ'm be boli i, be kɛnnin i bo nan ɔ'a toto i sa a sɛ i sin. 11Ɔ sunmɛnnin i sran kun ekun, be boli i, be yoli i tɛ kpa, be kɛnnin i bo nan ɔ'a toto i sa a sɛ i sin ekun. 12Be nsan su liɛ'n b'ɔ sunmɛnnin i'n, be boli i fɛ nan ba fuɛn i. 13Fie i fuɛ'n seli kɛ: ‹?N ´yo i sɛ? M ma sunman min wa yasua'n b'ɔ ti min anwlɛn su ba'n, wienun-ɔn i liɛ'n be ´bu i sran.› 14Sanngɛ kɛ fie'n i sunianfuɛ'm be wunnin i'n, be cicili nan b'a se kɛ: ‹I aja difuɛ'n yɛ, man e kun i nan e fɛ i ninnge mun.› 15Yɛ be trɛ fa ɔli fie'n sin lɔ nan b'a kun i. ?An bu i kɛ fie i fuɛ'n ɔ wa yo sran sɔ'm be sɛ? 16Ɔ ´ba, ɔ wa kun fie'n i sunianfuɛ sɔ mun, yɛ ɔ ´fa fie'n man sran uflɛ mun.»
Kɛ be tili ndɛ sɔ'n, be seli kɛ: «Nán man ɔ yo sɔ!» 17Sanngɛ Jésus niannin be nan ɔ'a se kɛ:
«?Ndɛ nga be klɛli i kɛ:
‹Yɛbuɛ nga sua kplanfuɛ'm
be yili i blo'n, i yɛ ɔ'a kaci
yɛbuɛ kpa b'ɔ tra sua'n
i cɔnjɔ'n i ase'n,›
i bo kle sɛ ?»
18Sran kwlaa ng'ɔ tɔ yɛbuɛ sɔ su'n, ɔ titi i nun tritri yɛ sran nga yɛbuɛ sɔ'n tɔ i su'n, ɔ ´kpɔtɔ i .
19Kɛ Nyanmiɛn nyrun jranfuɛ dandan mun nin mmla klefuɛ mun be wunnin kɛ be ti yɛ ɔ buli nyanndra sɔ'n, be waan be ´trɛ i lɛ, sanngɛ srɛ kunnin be sran'm bé wun.
Sezar i lapo'n
(An `nian Mat 22:15-22; Mar 12:13-17)
20Ɔ man be sɛsɛ i, be sunmannin sran wie'm be kɛ be ko kplɛ i nian, sran sɔ'm be yoli bé wun kɛ sran nanwlɛfuɛ mun sa, be waan be ´tie i nuan bo ndɛ, nan be ´fɛ i man jɔlɛ difuɛ mun nin kpɛnngbɛn'n. 21Sran sɔ'm be wa seli Jésus kɛ: «Nja, e si kɛ ndɛ nga a kan'n nin like nga a kle'n ɔ ti nanwlɛ, a nian-man sran nyrun yɛ a yo sa-a, yɛ a kpa-man sran nun, sanngɛ a kle sran mun Nyanmiɛn atin'n weiin. 22?E su lapo man Sezar annzɛ nán man e su mɛn i?» 23Sanngɛ Jésus wunnin be gblɛ'n, yɛ ɔ seli be kɛ: 24«An `fa denie kun bla n nian, yɛ be fa blɛli i-ɔ.» Ɔ usali be kɛ: «?Wan yɛlɛ ng'ɔ o su yɛ'n? ?Yɛ wan sanuan yɛlɛ ng'ɔ klɛ su lɛ'n?» Yɛ be waan: «Sezar yɛ ɔ o su-ɔ, yɛ i sanuan yɛ ɔ o su-ɔ.» 25Yɛ ɔ seli be kɛ: «Sɛ ɔ ti sɔ'n, an `fa ng'ɔ ti Sezar liɛ'n mɛn i, yɛ ng'ɔ ti Nyanmiɛn liɛ'n, an `fa mɛn i.» 26B'a kwla nyan-man ndɛ fi bɔ be ´jran su trɛ i nzra nun lɛ-ɔ, sanngɛ kɛ ndɛ ng'ɔ kan kleli be'n boli bé nuan'n ti'n, be guali bliin.
Sran'm be cɛnlɛ i su sa usalɛ
(An `nian Mat 22:23-33; Mar 12:18-27)
27Sadisefuɛ'm bɔ be waan sɛ sran wu-ɔ ɔ cɛn-man'n , be nun wie'm be bali Jésus wun lɛ nan b'a se i kɛ: 28«Nja, nian ndɛ bɔ Moiz klɛ mannin ye-ɔ, i waan: ‹Yasua kun b'ɔ nin i yi b'a wu-man ba'n, sɛ ɔ wu'n, man i niaan'n jɛ i angboti'n ɔ nin i be wu ba nan i niaan'n i osu'n ɔ'a nunnun-man .› 29Laa yasua nso be o lɛ, be ti niaan. Be nyrun kpɛn'n jali bla, ɔ nin i b'a wu-man ba, kpɛkuun be niaan sɔ'n wa wuli. 30Be nnyɔn su'n 31nin be nsan su'n, be jali angboti'n, be wa wuli, i sin nga jɛ i, ɔ wu, nga jɛ i, ɔ wu, lele fa juli be nso su'n su, sanngɛ ɔ nin be wie fi b'a wu-man ba. 32I sin bla'n kusu wa wuli. 33?Kɛ sran'm be ´cɛn'n, bla sɔ'n ɔ ´yo be nun onin liɛ, afin be ngba be jɛli i?» 34Yɛ Jésus seli be kɛ: «Ajulisufuɛ nga'm be ja bla nin bian, 35sanngɛ be nga be bu be kɛ be nin cɛnlɛ nin mɛn uflɛ ng'ɔ ´ba lɔ'n i nun tranlɛ fata'n, be su ja-man bla nin bian. 36Yɛ be su wu-man kun, yɛlɛ kɛ be ´kaci kɛ anz'm be sa, cɛnlɛ bɔ Nyanmiɛn cɛn be'n ti, be ´yo i mma mun. 37Kɛ Moiz jin susrɛ'n i wun lɛ b'ɔ flɛli e Min Nyanmiɛn'n kɛ: ‹Abraam Nyanmiɛn, Izaak Nyanmiɛn, Zakɔb Nyanmiɛn'n,› i bɔbɔ kan kleli ye kɛ sran'm be ´cɛn . 38Afin Nyanmiɛn ti-man be nga be wuli'm be Nyanmiɛn, sanngɛ ɔ ti be nga be o lɛ'm be liɛ yɛlɛ kɛ Nyanmiɛn nyrun sran fi wu-man.» 39Mmla klefuɛ'm be wie seli i kɛ: «Nja, a di nanwlɛ.» 40Ɔ man b'a kwla tra-man be anwlɛn b'a usɛ-mɛn i sa fi kun.
?Krist ti David Anunman?
(An `nian Mat 22:41-46; Mar 12:35-37)
41Yɛ Jésus usali be kɛ: «?Ɔ yo sɛ yɛ be se kɛ Krist ti David i Anunman nin-ɔn? 42David bɔbɔ kɛnnin Nyanmiɛn Jue fluwa'n nun kɛ:
‹E Min Nyanmiɛn'n seli min Min liɛ'n kɛ:
Tran ase min fama su,
43lele man n yi ɔ kpɔfuɛ'm be ase
ɔ bo nan n ´fa be yo ɔ ja siesiewlɛ .›
44Ɔ man David bɔbɔ flɛ i Nannan. ?Ɔ yo sɛ yɛ man ɔ ko yo i Anunman-an?»
Jésus kannin mmla klefuɛ'm bé wun ndɛ
(An `nian Mat 23:1-36; Mar 12:38-40; Lik 11:37-54)
45Kɛ sran'm be kwlaa be su wo i ndɛ'n su'n, ɔ seli i sɔnnzɔnfuɛ'm be kɛ: 46«An `sasa amún wun mmla klefuɛ'm be lika, be klo tralɛ tɛnndɛn wla wlan sinlɛ, be klo kɛ be `yo be like nzra nun, be klo Nyanmiɛn ndɛ suanlɛ nin i srɛlɛ sua nun bia kpakpa su tranlɛ, yɛ kɛ be ´di like nzra nun'n, be klo sran dandan'm be tranwlɛ'n nun tranlɛ. 47Be de angboti mmla'm be awlo mun, yɛ be kan ndɛ tɛnndɛn kle Nyanmiɛn lelele kɛ sran'm be `bu be sran kpa. Be fɔ tulɛ liɛ'n, ɔ wa yo tɛ kpa.»
Aktuálne označené:
Lik 20: BB98
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Baoulé Bible © Alliance Biblique de Côte d'Ivoire, 1998.
