Mariko 12

Wikhori wa muunda wa mësabibu na anya urëma

(Mat 21:33-46; Luk 20:9-19)

1Yesu agaandya urëghëtya inaawe gwa nyinkhori, “Muntu umwe agarëma muunda wa Mësabibu. Agaufimiya na ikita, na mukhatëkhatë ayo agahëmba rujë wa ukhamëa divai, na agajenga ikumbu ro ughojea. Agaufangisya muunda wasuu kunë anya urëma, agatunga muhënjo ageenda ung'ë a kure. 2Itungo ra utënanga, agamutuma mutumami wakwe kune anya urëma vasaa, amweetëe makeevuu asaa nënaa atënangwaa mu muunda wakwe. 3Anya urëma vasaa vëgamukwata, vëgamukhuva, vëgamusucha mëkhono mëtufu. 4Agamutuma kangë mutumami ungëja, uyuu noo vëgamuvaarya itwe na umutenda vivë. 5Munya muunda wasuu agatuma mutumami ungëja kangë, usuu anya urëma vasaa vëgamuuragha. Vangëja vingë nëvëgatumwa, mukhatë awe vëgakhuwa, na vangëja vëgauraghwa. 6Na ëkëë usaghie muntu umwedu, wasuu mwanakwe muyanjwi. Mpeoayo agamutuma wasuu uguhanya, ‘Vëumukeera mwananë.’ 7Ëgweeso anya urëma vasaa vëgiëra, ‘Uyuu unë musai, uvii nëgumuuraghe, usai wakwe utende witu!’ 8Uvii vëgamukwata vëgamuuragha na umujughuta gunjë a muunda wasuu wa mësabibu.

9“Uvii, munya muunda ugutenda ntuni? Ujie uvamarëya voong'e anya urëma vasaa na uwufangisya muunda wasuu wa mësabibu gwa antu vangëja. 10Wurë, ëkëë mwinasomaana Maandëko ayaana?

‘Igwe nëvarëhitiee ajengi

itungwee ratendaa igwe

iküü ra umpeo.

11Müküü unë warëtendie intu ërëë,

ryeso noo ra utako ino kunë see.’”

12Akumbëki akuu, aseyi va Seria na anyampaa vëgamanya mwino wikhori wasuu naa wavëëra veeso. Uvii vëgasoya umukwata vëmutunge, ëgweeso vëgooghofa mwirundo wa antu. Uvii vëgamureka vëgenda kunë vinjë.

Urëfa kodi kunë Kaisari

(Mat 22:15-22; Luk 20:20-26)

13Uvii, mukhatë a Afarisayo na avoo va ikako ramwa Herode vëgatumwa vëmukwatye Yesu gwa nkhani yakwe. 14Vëgamwendea, vëgamwëëra, “Musëyi, gumanyie mwino veve uu wë muntu wa tutë nëugurëghëtyaa tutë ntufu, na utiuraraavaa ikeru ra muntu mba nduvë. Ukuu wa muntu ti intu kunë veve, ëgweeso gwayo uguvasëyaa tutë a njëa a Muungu. Wurë, inoneyena urëfa kodi kunë Kaisari namba ti uwuu? Gurëfe namba gutarëfee?” 15Ëgweeso Yesu agamëmanya lakuno awe agavëëra, “Asikë në muungema? Ndaghëëri irufëa.” 16Vëgamuraghëëra. Mweeso noo agavawiya, “Ekeru na riore ërëëra mwaanyu?” Vëgamusucha, “Ramwa Kaisari.” 17Uvii, Yesu agavëëra, “Mufi Kaisari në amwa Kaisari na Muungu nëakwe Muungu.” Vëgatachwa ino na mweeso.

Ihanyo ra ufëtyo

(Mat 22:23-33; Luk 20:27-40)

18Asadukayo nëvëuhanyaa mwino gutie ufëtyo vëgamwendea Yesu, vëgamuwiya, 19“Musëyi, Musa agaguraghëëya: ‘Muntu nëwakuya na ureka mukhema atina mwana, muunaakwe inoneye amusae mukhema wasuu nëwakueywe mughohi amufafëe vana muunaakwe nëwaye munyagugwa.’ 20Uvii, naa guna vauna vëmufungatë. Wamwandyo agaroghoa, agakuya ainarekaa mwana. 21Muuna wa gavëë agamuroghoa mukhema wasuu nënaa wakuëywe mughohi, mweeso noo agakuya ainarekaa mwana, na muuna wa gatatu uvii uvii. 22Voong'e vëëmufungatë vëgakuya vënarekaa mwana. Mpeoayo mukhema wasuu nënaa wakueywe mughohi mweeso noo agakuya. 23Uvii, itiku nëantu ëikwëë vëjie ufëtya, mukhema wasuu ugutenda mukhema wamwa anyu? Voong'e vëëmufungatë vamuroghoe.”

24Yesu agavëëra, “Nyee mwahutyaa ino gusoko mutiyamanyie Maandëko Meru nanë nguu ya Muungu. 25Gusoko akuyi nëikwëë vafëtya vëtëuroghoa mbesa uroghowa, vëutendëka mwino vamalaëka va girunde. 26Ëgweeso gwa ufëtiwa gwa akuyi, wurë, ëkëë mwinasomaa gëtaabu gamwa Musana afoo nëguhanyiye sayu a gahaka nënaa gëgwaka moto? Muungu agamwëëra Musa, ‘Nene në Muungu amwa Aburahamu, Isaka na Yakobo.’ 27Uvii, mweeso ti Muungu wa akuyi ëgweeso uu Muungu wa avoo në afanga. Nyenye mwahutyaa ino.”

Iraghëyo në ikuu

(Mat 22:34-40; Luk 10:25-28)

28Umwe wa asëyi va Seria agafika, agategheeya wikungumi wawe. Nënaa woona mwino Yesu waasucha vija, agidwëëya agamuwiya, “Mukhatë a maraghëyo oong'e rëëfe në ra mwandyo?” 29Yesu agamusucha, “Ra mwandyo u tëërë: ‘Tegheeya Isiraeli! Müküü Muungu witu, mweeso uwimwene Müküü. 30Muyanje Müküü wako gwa mooyo wako woong'e, gwa nkhoo ako oong'e, gwa ihaa rako roong'e na gwa nguu yako yoong'e.’ 31Na ragavëë uu tëërë: ‘Muyanje munyafife wako mwino veve wianjëte mughonjo.’ Gutie iraghëyo rëngëja në iküü ukëra ayaa.” 32Uvii, musëyi wa Seria wasuu agamwëëra, “Vija Museyi! Wahanya tutë ëtë Muungu uu umwedu gutufu, na gutie ungëja ëgweeso mweeso. 33Na inoneye muntu umuyanja Muungu gwa nkhoo oong'e, gwa ihaa roong'e, na gwa nguu yoong'e, na umuyanja munyafifë wako mwino wianjëte mughonjo. Ihanyo ërëë uu në intu nanguu ukëra dahwa na makumbëko oong'e oofembea.” 34Yesu nënaa woona mwino muntu uyuu wamusuchaa gwa tutë në itina wova agamwëëra, “Veve utikure na Utemi wa Muungu.” Nënaa asaa akëra, gutie muntu nëagasoya kangë umuurya intu.

Ihanyo ra Masiha

(Mat 22:41-46; Luk 20:41-44)

35Itungo nënaa Yesu ugusëya mu Hekalu, agawiya, “Asikë asëyi va Seria vëuhanya mwino Masiha uu mwana amwa Daudi? 36Daudi mughonjo nënaa utongeerwe na Mwahu Mweru agahanya:

‘Müküü agamwëëra Müküü wanë:

Ëkhaa guuvaru wanë wa gëlëlo,

faka fana ikwë nguvavëka

arughu vako

fang'i a mëghuu ako.’

37“Daudi mughonjo ugumutaana Masiha Müküü. Uvii, Masiha ugutenda wurë mwanakwe?” Mwirundo wa antu naa umutegheeye gwa uyanjo.

Yesu uguvëëra antu vëighoje na asëyi va Seria

(Mat 23:1-36; Luk 20:45-47)

38Mumasëyo akwe Yesu agahanya, “Ighoji na asëyi va Seria nëvëanjëte gwendeenda vërie nkhaanju ndifu na uramuchiwa na antu gwa ukuriwa mumasoko, vëyanjëte gëkhaa fana gwa ikuryo mumasunagogi, 39na uhora mayoma a ikuryo fana antu vëreekiwe mu malëwa. 40Vëuvonkaa ahimbë kunu vëgikwatëëya ukuta gwa marombi në marifu! Itiku ra uramuiywa vëuhanga itënëywa në ikuu.”

Sadaka a mukhema në muhimbë

(Mat 21:1-4)

41Yesu naa wëkhee fifë na isanduku ra mpamba. Agaa gëhenga mwino antu vingë naa vëuduya hela na uyitendea mu mpamba a Hekalu. Aghwarë vingë vëgaduya hela nyingë. 42Faafo agaja mukhema umwe muhimbë mutuki, agaduya marufëa avëë në manyughu a hela wining'anëyo wa hela itaano. 43Faafo Yesu agavataana asëywi vakwe agavëëra, “Tutë namwëëra, mukhema muhimbë mutuki uyuu waduyaa nanguu ukëra vangëja voong'e nëvatendea hela mu isanduku ra mpamba. 44Gusoko voong'e vaduyaa ufuma masayo a ughwari wawe, ëgweeso mukhema uyuu, mwino chuu mutuki, waduyaa oong'e nëukweti, waduyaa mu intu nëugurëfenja gwa uduvë.”

Aktuálne označené:

Mariko 12: RNT

Zvýraznenie

Zdieľať

Kopírovať