Luka 21

Sadaka a Mukhema në Muhimbë

(Mrk 12:41-44)

1Yesu agararava na agavaona aghware vëufunya dahwa yao untoto. 2Na mweeso agamwona muhimbë umwedu mutuki ugufunya senti ivëë. 3Na agahanya, “Tutë, nene ngumukhanëa nyenye, muhimbë uyi në mutuki wafunya nyingë ukëa voong'e. 4Gusoko avai voong'e vafunyiye nëyanankie, ëgweeso uyi gwa utuki wakwe wafunya oong'e nëuyakweti gwa uduvi wakwe.”

Yesu Uguhanya Ihekalu Rejie Ukhonontwa

(Mat 24:1-2; Mrk 13:1-2)

5Na antu vëkëtunga arë vëurëghëëtya sayu a hekalu, mwino rëdonie na magwe në maja na sadaka, mweeso agahanya, 6“Mantu ayai mwino chu muyakengee, matiku ajie nërëtiusagha igwe hafai unto a igwe rëuya nëtiukhonontwa rëgwe fangë.” 7Na veeso vëgamuwëëya, “Musëyi, mantu ayai ëutendeka nanae, na ndolyo yayo ntuni në mantu ayai ëfifë udwëëra?” 8Na Yesu agahanya, “Ravi nyenye mutaje muuje uyaghaywa; gusoko vaingë vajie gwa rina rane, vëuhanya, ‘Nene unë mweeso!’ Na kangë ikhondo rahumbëa! Mutavahonge unyuma. 9Na itungo në nyee mwategheya fëta na uasi, mutaoghofe. Gusoko asaa anoneye adwëëre tanju, ëgweeso mpeo ëtijie gënyahafo.” 10Kangë mweeso agavakhanëa, “Ndughu ëuuka na ugikhua na ndughu, ingëja na utëmi ugikhua na utemi wuuya. 11Gutendeka muhingiheko üküü ino wa fang'ë na njaa ng'andë nyingë na marue agirekëya. Na gutendeka gwina mantu aughofya na ndolyo nküü ufuma girunde. 12Ëgweeso nëakëë ainandwëëra asaa oong'e veeso vëumutuunga na umukhasya nyenye, vëumutoa nyenye umasungogi na umageresa, na nyenye mutowa usongë a atemi na kunë aküü va ng'e gusoko a rina rane. 13Ërëi rëutendeka ikhondo kunë nyenye ra ufunya usudanga. 14Mutendeke na jenjëëre unkhoo yanyu, mutagheme mwino chu mwinjë usucha usonge ao, 15gusoko nene ninjë umufa nyenye momo na mahaa, në anyaumukhasya vanyu vatiudaha uhita nampa ukhana. 16Nyenye muhongewa nanë afafi vanyu na aruuna vanyu na antu va khanyu vambuya vanyu, na vangëja mukhatë anyu vëjie guraghwa. 17Nyee muhurwa na antu voong'e gusoko a rina rane. 18Ëgweeso utiuyaghaa ujëë nanë umwedu wa umëtwe anyu. 19Nanyee soko aughimëyë wanyu mufonia uduvi.”

Yesu Uguhanya Urungwëëywa Muji na uYerusalemu

(Mat 24:15-21; Mrk 13:14-19)

20“Gweeso nëmwaona muji wa uYerusalemu ufimëywe na majesi, hafo mumanye mwino ukhombeko wayo wahumbea. 21Na vasaa nevë gu Yahudi vadurëe guitanto, nanë vëmukhatëkhatë a muji vafume unji na vasaa në vëunji a muji vatayanjiywe ukëa umuji. 22Gusoko matiku ayai në andëfi aufichëya oong'e në andëkiwe. 23Hëhë ao vasaa nëvëurito na vasaa në vëuonchaa matiku asaa! Gusoko gujie utendeka makhasëko makuu mung'ëë na ikuo gwa antu avai. 24Vajie uugwa gwa wëghë wa itemeo, na vëutowa ugitungo undughu yoong'e ya murëmi, na Yerusalemu ijie ufanangëwa fang'ë na antu nëti Ayahudi, faka matungo a antu në ti Ayahudi ëkhondeke.

Uja Kunë Mwa Muntu

(Mat 24:29-31; Mrk 13:24-27)

25“Na gutendeka na ndolyo uyuva na umweri na unjota, na mungë makhasëko andughu yutaka gusoko a choghofi ga irambo në iküü na mafefe, ayo. 26Antu vajie umuntëka nkhoo na wova nëvarava mantu në ajie uhanga urëmi. Gusoko nguu ya girunde ijie uhingiswa. 27Na vajie umwona Mwana wa muntu në ujie na irunde itambëëmwedu na nguu na üküü në ukuu. 28Na mantu asaa nëandya ugighea, muyanje na muhumbue mëtwe anyu, gusoko umukhomoi wanyu wahumbea.”

Isëyo ra Mutë

(Mat 24:32-35; Mrk 13:28-31)

29Na mweeso agavakhanëa wikhori: “Uravi mutini na mëtë ëngëja oong'e. 30Gënyahafo nëandya utegheta, muuone nyenye aghonjo na umanya mwino chwë gahumbera fifë. 31Na uvii noo në nyenye mwaona mantu ayai andya udwëëra, nyenye mumanye mwino utëmi wa Muungu wahumbea. 32Tutë, nene ngumukhanëa nyenye, ufafo urui utiukëa faka ayai oong'e akhondeke. 33Irunde na ng'ë iukëa, ëgweeso nkhani yane itiukëa kamwe.

Inoneye Ngutarae

34“Ëgweeso iravi nyenye aghonjo nkho yanyu itaje ukhataywa na uramatwë na ughari na makhasëko a uduvi urui, na itiku rasëë rëjie umusama mwino mutegho. 35Gusoko gujie uvahanga antu voong'e nëvëgikhaa guusyu wa ng'ë oong'e. 36Ëgweeso muriiye ikhondo roong'e ëse muromba muhange nguu ya uginegha na mantu aya oong'e nëajie udwëëra, na uëmëka usonge a Mwana wa muntu.” 37Na muitiku arë ugusëya mukhatë ahekalu, ëgweeso utiku arë ugufuma uenda uraa ugitanto nëgiitamwa Mëseituni. 38Na diuchili antu voong'e vëuenda kunë mukhatë ahekalu umutegheeya.

Aktuálne označené:

Luka 21: RNT

Zvýraznenie

Zdieľať

Kopírovať