Luka 18

Wikhori wa Muhimbë na Muramui

1Na mweeso agavakhanëa wikhori mwino inoneye uromba tëkëtëkë na mutaurye nkumbu. 2Agahanya, “Umuji umwedu arë urëfo muramui umwedu në atimwoghofete Muungu na atiusëgha muntu. 3Na arë urëfo muhimbë umuji wasuu, arë ugumwendeaendea muramui gutufu na uhanya, ‘Nguguromba unamue mukhatë ane na muurughu wane.’ 4Gwa itungo ririfu arë uguhitaa. Ëgweeso mpeo ayo agagighemanëya mweeso mughonjo, ‘Nambesa ntiumwoghofa Muungu na tiusëgha antu, 5ëgweeso gusoko muhimbë uyi ugukhasya nene, ngumuramweeya mweeso, ataje unkhataya ung'anga gutufu.’” 6Na Müküü agahanya, “Tegheeyi mwino uguhanya hakimu wasuu, munya mahutye. 7Na Muungu atiuvatendea tutë ahwanwi vakwe uvaarëya veeso? 8Nene Ngumukhanëa nyenye mweeso, uguangufa uvaramwëya veeso urë. Nambesa uyii Mwamuntu nëwaja ujie uhanga uhuvëi murëmina?”

9Agavakhanëano wikhori urui antu vangëja nëvihuvëe veeso aghonjo mwino chu anya tutë na uvahorya vangëja. 10“Antu vavëë vëgaenda uhekalu uromba, umwedu a Afarisayo na muuya arë mukhua kooti. 11Mufarisayo wasuu agaëmëka na uromba vii mweeso mughonjo, ‘Vee Muungu, ngugurumba vee gusoko nene ntimwë antu vangëja, ahëmbi, aramatwë na ntikhwëte na mukhua kooti uyui. 12Nene ngufunga gavëë gwa ijuma rëmwedu, nangufunyaa ifungu ra ikumi ra mari yane yoong'e nënëkweti.’ 13Ëgweeso mukhua kooti, agëmëkëa kuurengi, ainasoya uhumbua miho akwe urava girunde, ëgweeso agagituanga gëkua#18:13 Gituanga gëkua: Ndolyo a gënyumpeo, gwa uhonga na ntende a Gëyahudi. gakwe uguhanya, ‘Muungu, unyonee uvai nene në munya mahutye!’ 14Nene ngumukhanëa nyenye, muntu uyi wendie ukhaya wavarëywe tutë ukëa muuya. Gusoko mugëkaku muntu nëugihumbua mughonjo utugutuntiwa, ëgweeso wasuu nëwinyumpya mweeso mughonjo uguhumbuwa.”

Yesu Uguforya Vana në Adëru

(Mat 19:13-15; Mrk 10:13-16)

15Vëgamwetea mweeso ana në adëru gusoko adahe uvatenya, na asëywi naarë vavaona, vëgavakenea afafi awe. 16Ëgweeso Yesu agavaëtana vende kunë mweeso, uguhanya, “Vareki ang'ënya vaje kunë nene, na mutavaghëëye. Gusoko antu mwino vasaa utëmi wa Muungu wao. 17Tutë nene ngumukhanëa nyenye, wasuu nëwadëa usëngëya utëmi wa Muungu mwino mwana në mudëru atiuingëa kamwe.”

Mughwarë Umwe

(Mat 19:16-30; Mrk 10:17-31)

18Na mutongeri umwedu agamuwëëya mweeso “Musëyi muja, nëtende urë nene në usae utëmi wa khae na khae?” 19Na Yesu agamusucha, “Asikë në ugunjiitana nene në muuja?” Gutie në muuja ëgweeso Muungu iyenedu. 20Veve umanyie maraghëëyo: “Utalëhadee, Utauraghee, Utaivee, Utaeghegheyee, Vakurye va hoo ina yiu wako.” 21Na mweeso agasucha, “Ayai oong'e nayakwatëre ufuma ungënya wane.” 22Na Yesu naarë wategheeya uyii, agamukhanëa mweeso, këë gëntu gëmwedu veve ukefewe. Ghuurya oong'e niuyakwatë na uvaaghania atuki, na veve uguhanga mpamba girunde, na uje ung'onge nee.

23Ëgweeso naarë wategheya vii agahura, gusoko arë mughwarë. 24Yesu naarë wamwona agahanya mwino chu gukanku gwa atukii uëngëa guutemi wa Muungu. 25Gusoko në guuro njou uhefea unjëa amusinkanii ukëa mughwarë uhefea mu utëmi wa Muungu. 26Vasaa naarë vategheya uyii vëgahanya, “Anyu nëudahite utyoeka?” 27Ëgweeso mweeso agahanya, “Nëatiudahëka gwa antu ëudahëka kunë Muungu,” 28Na Fetero agahanya, “Kengea, sese gwarekie makhaya itu na uguhonga vee.” 29Na agavakhanëa “Tutë ngumukhanëa nyenye gutie muntu nëwarekie nyumba nampa mukhema nampa aruuna vakwe nambesa afafi na vana, gusoko autemi wa Muungu, 30wasuu nëatijie uhanga mëhënjo miingë mu urëmi urui nanë ujie uhanga ufanga wa khae na khae.”

Yesu Uguhanya Kangë Ihanyo ra Ikuya Rakwe

(Mat 20:17-19; Mrk 10:32-34)

31Na agavahoa ikumi na vavëë agavakhanëa, “Kengei gwinjë uYerusalemu, na gëkaku gëntu nëwaandëkiwe Mwamuntu na anyagëdaghu ginjë ukhondeka. 32Gusoko winjë ufunywa gwa Anyagiluungu, na winjë ginëhëywa na uirwa mënyaa na winjë utendewa ghuyëda na utiewa mate. 33Vinjë umuhoma na mikoha na umwuuragha, na itiku ra gatatu ugufëtya.” 34Ëgweeso vinamanyaa ntuni nëurighëëtiye, nkhani iyii arë ifihiywe kunë veeso, na vinamanyaa urighëëtiye ntuni.

Yesu Wamuforya Mufoku

35Naarë wahumbea uYeriko, muntu umwedu mufoku arë wikhee umpeo anjëa uguromba. 36Naarë wategheya iburi ra antu rëkëëre njëa asëë, agaweeya gwina ntuni? 37Vëgamukhanëa “Yesu wa uNazareti ukëëre hafai.” 38Na agakurya mukindo, “Yesu Mwana wa Mwa Daudi unyonee uvai nene!” 39Na vasaa naarë vëusonge vëgamukenëa mweeso, vëgamukhanëa kia, ëgweeso mweeso agakurya mukindo ino, Mwana wamwa Daudi, nyonea uvai nene. 40Na Yesu agaëmëka, na agaraghëëya aetwe kunë mweeso: naarë wahumbea, agamuwëëya, 41“Ungufenja nene nëgutendee ntuni veve?” Mweeso agasucha “Müküü ngufenja nione.” 42Na Yesu agamukhanëa, “Ona! uhuvëi wako wanguforya vee.” 43Na gënya hafo agaona na umuhonga mweeso, ugumukurya Muungu, na antu voong'e naarë vaona asaa vëgamukurya Muungu.

Aktuálne označené:

Luka 18: RNT

Zvýraznenie

Zdieľať

Kopírovať