Yohane 1

Mazu gha umoyo

1Mu mtendeku mwenga Mazu, ndipo Mazu yo wenga kwaku Chiuta, ndi Mazu yo wenga Chiuta. 2Mweniyo wenga mu mtendeku kwaku Chiuta. 3Vyose vingulengeke mwaku iyo; ndipo kwambura iyo kuti kangulengeka cha chingana nkhanthu kamoza ko kaŵapo. 4Mwaku iyo mwenga umoyo, ndipo umoyo wo wenga kungweruka kwa ŵanthu. 5Kungweruka ko kuŵala mu mdima; ndipo mdima wo wengavi nthazi kujara kungweruka ko. 6Kunguŵa munthu, wakutumika ndi Chiuta, zina lake Yohane. 7Iyo wanguziya ku simikizga, alinga wasimikizge Kungweruka ko, kuti wose ŵavwaniyenge mwaku iyo. 8Kuti iyo wenga kungweruka ko cha, kweni wanguzachisimikizga Kungweruka ko.

9Kungweruka kwenecho, kwakungweruska munthu yose kwazanga mu charu. 10Wenga mu charu, charu chingwatika ndi iyo, kweni charu chengavi kumziŵa. 11Wanguza ku ŵake, ndipo wo ŵake kuti ŵangumronde cha. 12Kweni wose wo ŵangumronde ŵakuvwaniya mu zina lake wanguŵapaska mtufu wakwachiŵiya ŵana ŵaku Chiuta; 13wo ŵangupapika, ku kaŵiro ka kunthu cha pamwenga ko khumbo la munthu, kweni kwaku Chiuta.

14Ndipo Mazu yo wanguŵa munthu, ndipo wajanga mwaku ifwe wakuzala wezi ndi uneneska; ndipo tinguthoŵa unkhankhu wake, unkhankhu nge ngwa wakuwayija ku Dada. 15(Yohane wasimikizga vya paku iyo, ndipo wabongo, kuti, “Ndiyo ndingukamba, ‘Mweniyo watuza kulivi kwangu waŵa paurongo pangu: pakuti wenga wakudanga ndi ine.’ ”) 16Pakuti wapaska wezi kwaku ifwe tose rutaruta kutuwa ku uzari wake. 17Pakuti langulu lo lingupaskikiya mwaku Mosese, wezi ndi uneneska vinguziya mwaku Yesu Kristu. 18Palive yumoza yo kali kose wamuwona Chiuta, Mwana yo wakuwayija, yo ngwamu chipakatu cha Dada, ndiyo wamvumbuwa.

Uthenga waku Yohane Mbatizi

(Mateyu 3.1-12; Marko 1.1-8; Luka 3.1-18)

19Ndipo chenichi nchisimisimi chaku Yohane, penipo ŵaYuda ku Yerusalemu ŵangutuma ŵazukuru ndi ŵaLevi kuti ŵakamfumbe, “Iwe ndiwe yani?” 20Wanguzomera, kuti wangukana cha; wanguzomera, kuti, “Ine kuti ndine Kristu cha.” 21Ŵangumfumba, “Na uli? Kumbi ndiwe Eliya?” Ndipo wali, “Kuti ndine iyo cha.” “Kumbi ndiwe mchimi?” Ndipo wangwamuka, “Awa!” 22Viyo wangumfumba, “Ndiwe yani? Alinga tipaske kwamuka ku ŵakutituma. Utitinji ndi wamweni?” 23Wanguti, “Ndine mazu gha wakukambura mu bozwa, ‘Nyoroskani nthowa ya Ambuya, uli ndimo wangunene Yeseya mchimi yo.’ ”

24Ndipo ŵakutumika wo ŵenga ŵamu ŵaFarisi. 25Ndipo wangumfumba, “Na ubatiziyanji asani iwe kuti ndiwe Kristu cha, chingana ndi Eliya chingana ndi mchimi yo?” 26Yohane wanguŵamuka, wakuti, “Ine ndibatiza ndi maji: kweni mukati mwinu watuma yo mulive imwe kumziŵa, 27yo ngwakuza pavuli pangu, nthambo za chiyatu chaku mweniyo nde wambura kwene ine kufwatuwa.” 28Ivi vinguŵapo mu Betaniya kusirgha ku Yordane, kweniko Yohane wabatizanga.

Mwana-mberere waku Chiuta

29Ndi mlenji wawona Yesu wachiza kwaku iyo, ndipo watiti, “Awonani, Mwana-mbere waku Chiuta, yo watuzgapo ulakwi wa charu! 30Mweniyo ndi yo ine ndakambanga kuti, ‘Kuvuli kwangu watuza munthu, mweniyo waŵa paurongo pangu, pakuti wenga wakudanga ndi ine.’ 31Ine kuti ndingumziŵa cha; kweni alinga kuti warongoleke kwaku Yisraele, chifukwa chenichi ndikuziya ine wakubatiza ndi maji.” 32Ndipo wangusimikizga Yohane, wakuti, “Ndinguwona Mzimu wakusoromoka kuchanya nge ndi nkhunda, unguja paku iyo. 33Ine nane kuti ndingumziŵa cha: kweni yo wangudituma kwachibatiza ndi maji, ndiyo wangundinene, ‘Paku mweniyo ungawona Mzimu kusoromoka ndi kuja pake, mweniyo ndiyo wabatiza ndi Mzimu Wakupaturika.’ 34Ndawona ine, ndipo ndasimikizga kuti Mwenuyu ndi Mwana waku Chiuta.”

Ŵasambizi ŵakudanga ŵaku Yesu

35Ndi mlenji wapavuli wanguma so Yohane, ndi ŵaŵi ŵa ŵasambizi ŵake, 36ndipo wachilereska dodoli paku Yesu wachenda, watiti, “Awonani, MwanaMberere waku Chiuta!” 37Ndipo wasambizi wo ŵaŵi ŵanguti ŵamuvwa wachirongoro, ŵangumrondo Yesu. 38Ndipo Yesu, wati wang'anamuka, ndi kuŵawona ŵakumrondo, watiti kwaku wo, “Mulembenji?” Iwo ŵangumnene, “Rabi” (cho chititi pakung'anamuka, Msambizgi), “muja pani?” 39Watiti kwaku wo, “Zani muwone.” Viyo ŵanguza, ndipo ŵanguwona po wajanga, ndipo ŵanguja pamoza nayo zuŵa lenilo; kwenga nge mpha ora lachichumi. 40Yumoza waku wo ŵaŵi wakuvwa kwaku Yohane ndi wakumrondo Yesu, wenga Andreya, mhurwa waku Simoni Petro. 41Mweniyo po wanguti wasaniya danga mkuwake Simoni, wangumnene, “Tamsaniya Mesiya” (cho cing'anamuwa Kristu). 42Wangumtole kwaku Yesu, wati wamthoŵa Yesu wanguti, “Ndiwe Simoni, mwana waku Yohane: iwe udanikenge Kefa” (cho ching'anamuwa Petro).

Yesu wadana Filipu ndi Natanaele

43Ndi mlenji wangukhumba Yesu kuruta ku Galile, ndipo wangusaniya Filipu: wangumnene, “Rondo ine!” 44Kweni Filipu yo wenga waku Betesaida, ku muzi waku Andreya ndi Petro. 45Filipu wangusaniya Natanaele, wangumnene, “Tamsaniya yo Mosese wangulemba pake mu langulu ndi so ŵamchimi, Yesu waku Nazarete, mwana waku Yosefe.” 46Natanaele wangumnene, “Ku Nazarete kungatuwa kanthu kamampha nthu?” Filipu wamunene, “Zanga uziwone.” 47Yesu wangumuwona Natanele wachiza kwake, wanguti kwaku iyo, “Awonani, muYisraele nadi, mwaku mweniyo mulive urghargha!” 48Natanaele watiti kwaku iyo, “Mundiziŵiya pani?” Wangwamuka Yesu, ndi wangumnene, “Wenga wandakudane Filipu, weche msina mu mkuyu, ndingukuwona.” 49Natanaele wangumwamuka, “Rabi imwe ndimwe Mwana waku Chiuta; imwe ndimwe Karonga waku Yisraele!” 50Yesu wangwamuka, “Kumbi uvwana chifukwa ndakunene, ‘Kuti ndingukuwona msina mu mkuyu?’ Ukawonanga vikuruku kwaku vyenivi.” 51Ndipo wangumnene, “Nadidi, ndikuneneskiyani, muwonenge kuchanyakujurika, ndi ŵangelo ŵaku Chiuta ŵakwera ndi kusikiya pa Mwana wa munthu.”

Aktuálne označené:

Yohane 1: TongaMw

Zvýraznenie

Zdieľať

Kopírovať