CHISƆSI 'A SƆ MƆƐ NU 19
19
Pɔɔ‑a bai sa Ɛfisɔsi duu ɔ, a si Chisɔsi ma
1Apɔdɔsi ni kɛn Kɔyindi duu ɔ, Pɔɔ bɔ‑a wan chɛnyɛ kun ma chia a, mbɛ a che‑a Ɛfisɔsi duu ɔ, a‑a Chisɔsi fɛ mɔɛ dɔ n tan kaina min. 2Mbɛ a‑a an dɔ tisa, a ɔ, “Yataa Nyina na‑a bea wan wo fɛ, wo na‑a wo kai fa kɛn Chisɔsi a?”
Mbɛ an dɔ te, “A an. Nn gbu ma chɛ a min nin bɛ, mbɛ nyina ɛ wan nɔ, min tɔɛ ɛ ka.”
3Mbɛ Pɔɔ ɔ te, “Mbɛ yii minan sima chɛ‑a gbɛ wo kunɛ ɔ?”
Mbɛ an dɔ te, “Chɔn‑na yii chɛ buɛ min dɔ mɔɛ n kunɛ ɔ, Yataa chia a.”
4Mbɛ Pɔɔ ɔ, “Chɔn ni yii min chɛ mɔɛ n kunɛ ɔ, Yataa chia a, a sien ni mɔɛ n kan kɔ sɔɛ koe an na, an 'na ko yama n na. A ni a fɔ wan to mɔɛ n ye, mbɛ an ni an kai fa mɔɛ chɛ a, min mbe na tena a gbaa chia a. A wan Chɔn chɛ sin, a ni ka bai sa‑a a si Chisɔsi an ma.”
5Mɔɛ chɛ n‑na Pɔɔ da a bai chɛ a min kɛn, an‑na a ma wan, Pɔɔ‑a yii chɛ an kunɛ ɔ, Mansa Chisɔsi tɔɛ ɔ. 6A sin, Pɔɔ‑a a boo bun an ma, mbɛ Yataa Nyina bea‑a an fɛ. An‑na kamaya bai n fɔ wan, mɔɛ n mbe ee miin dɔ gbɛ ka dechee.#19:6 An‑na kamaya bai n fɔ wan, mɔɛ n mbe ee miin dɔ gbɛ ka dechee. - A fɔ buɛ dɔ mende an nɛ: An koɔ‑a wan chɛnyɛ koɛ dɔ mende ɔ. Mbɛ an yɛ‑a, an‑na Yataa bai ɔ yian. 7An gbɛɛ, an taen fan ni mɔ kaima tan kun ma fea nyɔn sima ɔ.
8Kau sawa ko a, Pɔɔ ni ta wan Chu n 'na samun chɛ chen chɛ a, a sin ni koɔ wan nɔ faagbɛa a. A ni koe n tɛnsɛ wan, an bɛ an na, a sin ni an disa wan, a si Yataa 'a mansaya wakoe ma. 9Chɛɛ dɔ n too ɔ ni gbɛ wan, min‑na a ma, an nii ma dɔn ni dan koe a Pɔɔ a. A sin, mɔɛ n gbɛɛ ya kɔɔ ni, an ni bai yama n sa, a si chia ma, Mansa Chisɔsi‑a min yian mɔ gbu a, a sɔ koe a a fɛ. Mbɛ Pɔɔ sɛmbɛ‑a koɔ koe a an tena, a ka‑a an fɛ. Mbɛ a‑a Chisɔsi fɛ mɔɛ chɛ n bɔ an ya a, an ta‑a a a. A sin ni koe n tɛnsɛ wan, tee ɔ tee a, an bɛ an na, chen ba dɔ mende a, min ni Tayanɔsi ta a, kanɛ ni chɛ kaina min. 10Chɛ a tun‑da wan a ma san fea ko a, min‑na a ma, mɔɛ miin gbɛɛ ni Esia chɛnyɛ chɛ ɔ, an‑na sakana bai a min fan, a si Mansa Chisɔsi ma. Chu mɔɛ n‑na a a min fan, an bɛ mɔɛ chɛ n na, miin nii ma Chu mɔ a.
Nyina yama‑a Sifa 'a den kaima n pɛndɛn
11Yataa‑a gbasaya be wan Pɔɔ ma, kamaya ko wa n ma koe a. 12Ni a 'a yenkisa wɛɛ, chɛ ma, a kana doma gbu wɛɛ, ni an ta‑a a a, tu koe a gbandi mɔ kan kɔ kan na, a ni chɛndɛya ma sɔn fan. Gbandi ni bɔ wan an mɔɛ chɛ gboo ɔ, chɛ ma, nyina yama wɛɛ ni ka wan a fɛ. 13Chu mɔɛ n ni wan nɔ, miin ni ben ben, nyina yama gbain‑da mɔɛ n fɛ. An bɛɛ ni tima ya wan, wai chɛ koe a Mansa Chisɔsi tɔɛ ɔ. An ni a fɔ wan, an dɔ te, “N mbe a fɔ tena i ye, mbɛ i ni ka a fɛ, Chisɔsi tɔɛ an dɔ, Pɔɔ ɛ bai sa ka a si min ma.” 14Den kaien wɔnfea nu, miin fa ni Sifa a, an fan ni chɛ ma. Sifa chɛ ni Chu mɔɛ n 'na tɛ mɔ wa an na, Yataa tena.
15Chɛɛ tee dɔndɔ a, an ni wan nyina yama chɛ gbain‑da kamin dɔndɔ fɛ. Nyina yama chɛ ni a fɔ wan an ye, a ɔ, “N‑na Chisɔsi sɔn fan, n‑na Pɔɔ wɛɛ sɔn. Chɛɛ wo tana, nyɔn mu wo a?”
16Mbɛ kamin chɛ, nyina yama chɛ ɛ ka min fɛ, a chɛ‑a an ma gbasi a. A kun‑da wan an ma, mbɛ a‑a an gbɛɛ pɛndɛn chɛndɛ chɛ. Mbɛ an bɔ‑a bui a an chenɛ chɛ a, an ma senɛ ɛ, a yɛ to, wii ɛ bɔ‑a an ma. 17Mbɛ Chu mɔɛ nu, an bɛ chɛ n na, miin nii ma Chu mɔ a, an‑na koe chɛ a min fan Ɛfisɔsi. Chiandia dɛ‑a wan an gbɛɛ ɔ, mbɛ an‑na basɔmaya wa be wan gbɛ Mansa Chisɔsi tɔɛ ma. 18Mɔ sɛsɛ nu, miin bɛɛ na‑a an kai fa Chisɔsi a, an na‑a wan fanka ɔ, mbɛ an dɔn‑da an chɛ chɛ wai yama n ma, an sin‑na an dɔ yian fan. 19An sɛsɛ nu, miin boo ni nkofo koe n dɔ, an na‑a wan an 'na nkofo gboo n na kaina dɔndɔ, mbɛ an‑na an minda fanka ɔ. A tima chɛ a, an gboo chɛ n gbɛɛ sɔnkɔɛ, a ni wai chɛ mɔ chɛmɛ dɔndɔ, mɔ bi wɔdɔ pawa wan, san dɔndɔ ko a.#19:19 Bai miin nyɛnden mu Kiisi gboo ɔ, an fasai an nɛ: “kain gbɛnsɛn wu bi duu.” A tima chɛ a, kain gbɛnsɛn chɛ nɛnɛ, a dɔndɔɛ ni debea pawa ya wan tee dɔndɔ ko a. A wu bi duu ni wai chɛ mɔ chɛmɛ dɔndɔ, mɔ bi wɔdɔ pawa wan, san dɔndɔ ko a. An ni an kɔpɔɛ chɛ chee, an dɔ, denayɔsi. 20Chia chɛ a ni, sakana bai chɛ, a si Mansa Chisɔsi ma, a fasan‑da a ɔ gbɛɛ. A sin, an sakana chɛ ni koe miin ma mɔɛ n 'na fɔɛ ɔ, a nii ma dɔɔ.
Gbunɛ bea‑a, Ɛfisɔsi duu ɔ
21Koe chɛ n gbɛɛ gbakɔ, Pɔɔ‑a a yiima ɔ bɛn fan, Yataa Nyina 'a gbasaya ɔ, ben koe a Masidonia chɛnyɛ ɔ, a basan Akaya a, ta koe a Chuusaɛn duu ɔ. A‑a a fɔ wan, a ɔ, “Ni n ta‑a Chuusaɛn, n mbe che‑a wan Domi bɛɛ.” 22Mbɛ a‑a Timoti a ta Masidonia, an fea Ɛyasitɔsi a, mɔ fea miin ni basan a ma. Mbɛ a sin to‑a tima ɛnden ko a, Esia chɛnyɛ chɛ ɔ.
23A tima chɛ a, gbunɛ min‑na a kuu sɔ Ɛfisɔsi, a nii ma dɔ, a si mɔɛ n ma, Chisɔsi fɛ chia a. 24A kuu sɔ‑a kamin dɔndɔ an ma, min tɔ ni Demetiɔsi. Demetiɔsi chɛ ni tonkan ti an na, min na‑a mɔ sɛsɛ ya, wai chɛ koe a a kɔɔ. Ɛfisɔsi duu chɛ ɔ, chen chenama sɔen fan ni nɔ, Kiisi mɔɛ n 'na musu yataa chɛ, min tɔ ni Atɛmisi, a fai koe a. Demetiɔsi, an bɛ a 'a wai chɛ mɔɛ chɛ n na, an ni chen mɛsɛ mɛsɛ n nyan fan, kain gbɛ ɔ, miin ni yɔ chen chenama chɛ. An ni kɔpɔ sɛmbɛndenɛ sɔn fan, an wai chɛ ɔ. 25Mbɛ tee dɔndɔ a, a‑a a 'a wai chɛ mɔɛ n chee kaina dɔndɔ, an bɛ mɔ dɔ mende n na, miin bɛɛ ni an wai dɔndɔ gbe chɛ. Mbɛ a‑a a fɔ an ye, a ɔ, “N bɔ nu, wo gbɛɛ wo‑a a ɔ sɔn fan, mbɛ mmɔ 'a nyanɛ gbɛɛ, ɛ bɔ wai chɛ an dɔ, mmɔ ɛ ka min na. 26Sanche gbɛ, wo wandi, wo e a ɔ yen tena wan, koe min mbe chɛ tena a ɔ. A yɛ to, wo e a a min tena wan. Ɛfisɔsi dechee ma, chɛɛ a maen fan mu gbɛ yɔ Esia chɛnyɛ gbɛɛ ɔ, Pɔɔ chɛ ɛ mɔɛ n yiima mun tena buɛ min dɔ, a si mmɔ 'a wai ma. A ɛ a fɔ tena wan mɔɛ n ye, mbɛ mmɔ ɛ yataa miin nyan ka mmɔ boo a, yataa kan kɔ kan ma an na. 27N mbe ee bai sa tena dechee a si mmɔ 'a kɔpɔ sɔn koe an ma, ni mmɔ ɛ fo‑a buɛ min dɔ kɔpɔɛ a. Chɛɛ tima ɛ che‑a wan, mɔɛ n mbe ee na‑a baa be‑a chen chɛ ma to, mmɔ 'a musu yataa wa chɛ, a 'a chen chɛ. An gbu sin mbe na‑a wan a bɔ‑a a 'a basɔmaya chɛ ɔ, min mbe a boo ɔ. A wɛn mu ka, mɔɛ gbɛɛ Esia chɛnyɛ chɛ gbɛɛ ɔ, a basan dunya chɛ gbɛɛ a, an mbe a fai.”
28Fanka chɛ‑a bai chɛ a min kɛn, an faa tɛ‑a wan gbeden. Mbɛ an bun‑da yee te‑a, an dɔ te, “Atɛmisi min mbe Ɛfisɔsi, yataa an nɛ, min gbasayaen mu.” 29Mbɛ mɔɛ n sɔnkɔ sɔnkɔ chɛ kuiɛ‑a duu wa gbu ɔ bɔ, a si an koe chɛ ma. Mbɛ an gbɛɛ‑a bui sa a a, mɔɛ n gbɛɛ bɛn tena chɛ duu chɛ ɔ. An‑na Kayɔsi bia wan, an ta‑a a a an boo ɔ, an fea Ayisitakɔsi a. Kayɔsi chɛ, an fea Ayisitakɔsi a, Masidonia chɛnyɛ mɔɛ n ni an na, miin bɛ na‑a na Pɔɔ a. 30Pɔɔ wandi gbu toen fan ni don koe a, an kaina chɛ, fanka chɛ ni ka kaina min. Chɛɛ Chisɔsi fɛ mɔɛ chɛ nu, an nii ma dɔn ni, a ni don nɔ. 31Mɔɛ dɔ n bɛɛ gbu, miin ni mɔ chenama n na nɔ, an Esia chɛnyɛ ɔ, an‑na sakana a ta wan disa ɔ, Pɔɔ ma na don nɔ. A dia nyɔɛ ni an mɔɛ chɛ n na. 32Mɔɛ chɛ nu an bɛn chɛ ɔ, mɔ ɔ mɔ too nii a bɔɛ da a kuiɛ ma. Mɔɛ dɔ n ni wan bai fɔ‑a ka, dɔ n sin mbe ta‑a bai dɔ gbɛɛ fɔ‑a. An gbu nii ma a ɔ sɔn, fen na‑a a ma, an mbe an bɛn chɛ ɔ. 33Chu mɔɛ n‑na Adɛsanda yian fan, koɔ koe a mɔɛ n tena. A tima chɛ a, mɔɛ dɔ n ni wan bai don‑da a da a, a fɔ koe a. Mbɛ Adɛsanda‑a a boo kai mɔɛ chɛ n ma, min mbe a ma, a ni koɔ an tena, Chu mɔɛ n ko a. 34Chɛɛ an‑na a ɔ sɔn kɛn, mbɛ Chu mɔɛ ni a a, an‑na yee tɛ wan to dɔndɔ a, an dɔ te, “Atɛmisi min mbe Ɛfisɔsi, yataa an nɛ, min gbasayaen mu.” An‑na chɛ ma wan, awa fea ko a.
35Mbɛ a danka a, gboo nyɛn mɔɛ min ni an duu chɛ ɔ, a kun‑da wan mɔɛ chɛ n ma, an ma maun koe a. Mbɛ a‑a a fɔ an ye, a ɔ, “N bɔ Ɛfisɔsi mɔɛ nu, mɔ ɔ mɔ‑a a ɔ sɔn fan, mbɛ mmɔ 'a duu wa chɛ, an mbe chenɛ kun ma fɛn Atɛmisi ye, mmɔ 'a yataa tɔ bɔen ba chɛ. A yɛ to, an mbe sen chɛ wɛɛ kun ma fɛn, sen ma chianden ba chɛ, min bea‑a a ka banda bu ɔ. 36Mɔ ɔ mɔ ee che mmɔ kɔɔsa bia‑a, a si ko bonda chɛ ma. Chɛ an fɛ mu gbɛ, a nyin wo ni wo faa chima, wo ma na ko kan kɔ kan ma, yiimatɛ ee min dɔ. 37Wo na‑a ka nɛ mɔɛ miin na, an ma fen kanka ni mmɔ 'a yataa chɛ 'a chenɛ chɛ a nɛ, n mbe ee baa, an ni bai yama kan kɔ kan sa, a si mmɔ 'a musu yataa chɛ ma. 38Ni mɔɛ an‑na ko yama ma Demetiɔsi a, an bɛ a 'a wai chɛ mɔɛ n na, mmɔ 'a gbakoo n mbe wan nɔ, miin mbe kuti si. An ni ta a mɔɛ chɛ n na nɔ, an ni an ma sii bia. 39Chɛɛ ni ko dɔ mende kan kɔ kan mbe wan nɔ, wo toen mu min ma koe a, a bai chɛ ɛ sa bɛn chɛ an dɔ, chɛnyɛ ti n mbe min chee. 40Ni mmɔ ma mmɔ kun ma fɛn ni koe chɛ a, min ma‑a ka bi, Domi gbakoo n mbe kunɛ si‑a wan mmɔ kun ma, gbunɛ a bea koe a. Mmɔ dɔndɔ wɛɛ ee che‑a a fɔ‑a, mbɛ tea ɛ wan mmɔ 'a faatɛ chɛ gbɛɛ ɔ bi.” 41A ban‑da kɛn bai chɛ fɔ‑a, mbɛ a‑a mɔɛ chɛ n na ta an baa nu.
Aktuálne označené:
CHISƆSI 'A SƆ MƆƐ NU 19: KONONT
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
New Testament in Kono © The Bible Society of Sierra Leone, 2006.