Mt 8
8
Kuhanyisiwa ka wa nhlokonho
(Mrk 1:40-45; Lk 5:12-16)
1Kuti loko Yesu afulameli hansi ka nhava, a ntrhungu lowu wukulu wumulandra. 2Vonani, a mhunu wa nhlokonho ata ku yene, amukhisamela aku: HOSI, loko uswirandra unganibasisa. 3Kutani Yesu analavuta voko amukhumba aku: Naswirandra; basisiwa! Hi nomu-lo, a nhlokonho yake yidahiwa. 4Yesu amubyela aku: Lavisa, ungabyeli mhunu; kambe famba uyatikombisa ku muprista, uhumexa a nyiko leyi yileletiwiki ha Moxe, yiva xikombiso ku vone.
Yesu ahanyisa a nandra wa ndruna ya dzana#8:5 Ndruna ya dzana kuhlayiwa a murangeli wa ntlawa wa dzana (100) dra masotxha.
(Lk 7:1-10)
5Atiki anhingena Kapernawume, a ndruna ya dzana yita ku yene, yiku: 6HOSI, a nandra wanga a le ndlwini avabyaka, awonyaniki swiro, mfuri axaniseka ngopfu. 7Yesu amuyangula aku: Nitaya niyamuhanyisa. 8Kambe lweyi wa ndruna ya dzana ayangula aku: HOSI, anifanekelanga akuva unhingena andlwini yanga; ntsena hlaya hi ritu, kutani a nandra wanga atahanyisiwa. 9Hikusa na mine ninga mhunu lweyi afumiwaka, nini masotxha lawa manga hansi kwanga, loko niku ku mun'we wavu: Famba; awafamba; loko niku ku mun'wana: Tana; awata; ni loko niruma a nandra wanga leswaku ayentxa xa kukari, awaxiyentxa. 10Yesu atiki ayingela leswo, ahlamala; kutani aku ku lava afaka vamulandra: Nihlayelamfuri nili ku n'wine: aningekuma kupfumela ka kufana ni loku a Israyeleni. 11Nan'wibyela leswaku: Vanyingi vatapfa a Vuxeni ni le Vupeladambu, vatatatrhamisa vada kun'we na Abrahamu, na Yisaki na Yakobe a Mfun'wini wa Matilo; 12kambe loko vali vana va Mfumu, vatatxukumetiwa a handle, amunyameni, lomu kutakava ni swidrilo ni kuketrela ka menyo. 13Kutani, Yesu aku ku lweyi wa ndruna: Muka, aswiyentxeki hi laha upfumeliki ha kone. Hi nkama wolowo a nandra wakwe ahanyisiwa.
Yesu ahanyisa mamana wa nkata Petrosi
(Mrk 1:29-34; Lk 4:38-41)
14Yesu ati aya a kaya ka Petrosi, ayakuma a mamana wa nkata Petrosi na ayetlelile, ani kuhisa ka miri; 15amukhumba, kutani a kuhisa ka miri kumutrika; ahangapfuka, asungula kumutirela.
16Akupeleni ka dambu, kutisiwa ku Yesu a vhanu vanyingi lava vangani mademoni, ahlongola mimoya hi ritu, ava ahanyisa hinkwavu lava va kuvabya. 17#Lavisa Ezy 53:4. Leswi swihumeleli akuva kuhetiseka leswi swingativisiwa hi muprofeta Ezaya loko aku: Yene atitekeli a mahlomulo yeru, atirwexi a mavabyi yeru.
Kulandra Yesu
(Lk 9:57-62)
18Yesu loko avoni xitrhungu lexi kulu ximutrandreliki, aleleta leswaku vawelela halahaya. 19Mun'we wa mutrali wa Nawu aku ku yene: Mudondrisi, nitakulandra hinkwaku lomu uta kaya kone. 20Yesu amuyangula aku: A mabuwana mani mimpala, ni tinyanyana ta tilo tini vusaka, kambe a N'wana wa Mhunu angana lomu angadamaka nhloko yake kone.
21Mun'wana ku vadondrisiwa vakwe, aku: HOSI, nipfumeleli niranga niyalahla a tatana wanga. 22Kambe amuyangula aku: Nilandre, trika vafi valahla a vafi vavu.
Yesu amiyeta xidzedze
(Mrk 4:35-41; Lk 8:22-25)
23Kuti loko Yene anhingeni byatrhwini, a vadondrisiwa vakwe vamulandra. 24Vonani, a xidzedze xikulu xihumelela, lakakuva a mavimbi madjula kufukumeta a byatrhu. Kambe yene afa ayetlelile. 25A vadondrisiwa vatrhindrekela ku yene, vamupfuxa, va bandlukana vaku: HOSI, hihuluxe! Hasuva. 26Yene avayangula aku: Ha yini n'wivani vutoya? Swipfumelinyana! Ahangasekeleka, akhwavela mheho ni mavimbi, kuva ni kurula loku kukulu. 27Vone vahlamala, vavutisana vaku: Lweyi hi lweyi wa kuyini kasi, leswi na tone a timheho ni mavimbi swimuyingisetaka?
Kuhanyisiwa ka va-Gadara vabiri va mademoni
(Mrk 5:1-20; Lk 8:26-39)
28Loko Yene atlhasi atlhelweni drin'wana dra tiva, atikweni dra va-Gadara#8:28 A tikwana driyamukela a vito dra Gadara, muti lowu wunga hi mpfhuka wa khume dra makilometro (10 Km) a nyingitimu ya mpeladambu wa tiva dra Tiberiasi., a vhanu vabiri vahumi maxireni na vani mademoni, vamutlhangaveta. Afa vani kulebya loku kukulu, lakakuva kungena mhunu lweyi atiyaka kuhundra hi ndlela leyo; 29kutani vasungula kubandlukana vaku: Udjula yini ku hine, N'wana wa Xikwembu Nkulukumba! Uti halenu kuta hixanisa na nkama wungasitlhasa, xana?
30Kambe afa kuni ntlhambi wukulu wa tinguluve, leti afaka tida kule na vone. 31A mademoni afa mamukhongota maku: Loko uhihlongola, hirumele hiyanhingena ku ntlhambi lowuya wa tinguluve 32Yene aku ku wone: Fambani! A mademoni mahuma ku vhanu lavo mayanhingena atinguluveni; kutani a ntlhambi hinkwawu wa tinguluve wutrutruma, wufulamela ativeni, tiyafa matini.
33A vabyisi vatrutruma, vaya mutini, vayabikela vhanu hinkwaswu ni timhaka ta lava afaka vani mademoni. 34A va muti hinkwavu vahuma, vayatlhangaveta Yesu; loko vamuvona, vamukombela leswaku asuka atikweni dravu.
Aktuálne označené:
Mt 8: NTX2007
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Xironga New Testament with Psalms © Bible Society in Mozambique, 2007.
