Mt 5
5
Dondriso ya le nhaveni
(Lk 6:20-23)
1Yesu atiki avona a xitrhungu, antlhantukela anhaveni kutani atrhamisa. A vadondrisiwa vakwe vatrhindrekela ku yene, 2aku apfula a nomu asungula a kuvadondrisa, aku:
3Vakatekile lava vanga swisiwana amoyeni,
hikusa a Mfumu wa Matilo i wavu!
4Vakatekile lava vadrilaka,
hikusa vatamiyetiwa!
5Vakatekile lava varuliki,
hikusa vatava ni pfindla dra misava!
6Vakatekile lava vangani ndlala ni tora dra leswi swakululama, hikusa vataxurisiwa!
7Vakatekile lava vangani lirere,
hikusa vatavayentxeliwa lirere na vone!
8Vakatekile lava vabasiki timbilu,
hikusa vatavona Xikwembu Nkulukumba!
9Vakatekile a valulami, hikusa vatatxhuliwa vana va Xikwembu Nkulukumba!
10Vakatekile lava vaxaniseliwaka kululama,
hikusa a Mfumu wa Matilo i wavu!
11N'witakateka loko van'wiruka,
van'wixanisa, vahlaya maritu hinkwawu ya kubiha ha n'wine hi kuhemba,
nkonta yanga.
12 # Fananisa na Mnt 7:52. Trhavani, n'witrhavisisa hikusa a hakelo drenu i drikulu a Matilweni. Hikusa vaxanisisi xiswoswo na vo vaprofeta lava van'wirangeliki.
A munyu ni livaningo
(Mrk 9:50; Lk 14:34-35)
13N'wine n'wi munyu wa misava; kambe loko a munyu wupswhama, wunga ha nandrikisiwa hayini? Awa ha pfuni ntxhumu, loko kunge kutxukumetiwa a handle wukandreteliwa hi vhanu.
14N'wine n'wi livaningo dra misava. A muti lowu wuyakiwiki a henhla ka nhava awufihleki; 15na swone a motre awulumekiwi wubekiwa a hansi ka xihundru, kambe vawubeka a henhla, lomu wuvaningaka hinkwavu lava vanga ndlwini.#5:15 A tiyindlu afa tiyakiwa tingena swiyavanyiso swa swilawu. 16A kuvaninga kwenu akuvaningisi xiswoswo amahlweni ka vhanu, akuva vatakota kuvona a mintiro yenu leminene, vatatwalisa Tatana wenu lweyi anga Matilweni.
A Nawu ni Mfumu wa Matilo
17N'wingapimiseni leswaku niteli kutatahelisa Nawu kumbe vaprofeta. Anitelanga kutatahelisa, kambe niteli kutatahetisa. 18Nihlayelamfuri nili ku n'wine: Loko a tilo ni misava swingasinahundra, kungatisusiwa a Nawini letela kumbe xintrhatana xin'we, na hinkwaswu swingasinahetiseka. 19Hileswo-ke lweyi atakatlula, nambi wa kuva mun'we ntsena wa milawu leyi mitrongo ni kudondrisa vambeni a kuyentxa swoswo, atahlayiwa lweyi ntrongo a Mfun'wini wa Matilo. Kambe lweyi atakan'wibekisa ni kun'widondrisa, atahlayiwa lwenkulu a Mfun'wini wa Matilo. 20Hikusa nan'wibyela, nili: Loko n'wine n'wingatluli a vandondrisi va Nawu ni vafarisi hi kululama, n'wingaka n'winganhingeni a Mfun'wini wa Matilo.
Kurulisana ni wa-le-kwenu
21 # Lavisa Khm 20:13; 21:12; (Deut) 5:17. N'wiswiyingelile leswi swingahlayiwa ku vakhale leswaku: Ungavidlaya. Lweyi atakadlaya mhunu atafanela kuyavanyisiwa. 22Kambe mine nili ku n'wine: Mun'wana-ni-mun'wana lweyi ahlundrukelaka wa-le-kwavu, atafanela kuyavanyisiwa; ni lweyi arukaka a wa-le-kwavu amutxhula singe atayavanyisiwa hi huvu; ni lweyi atakamutxhula xihunguki afanekeliwa hi kutxukumetiwa a Geheneni (andrilweni lowu wungatimekikiki). 23Ke, loko uhumexa a mhamba yaku uyiyisa agandrelweni, uva udrimuka kone leswaku a wa-le-kwenu anani mhaka na wene, 24trika a mhamba yaku kolanu amahlweni ka gandrelo, ufamba uyaranga urulisana ni wa-le-kwenu. Ntrhaku utatlhela utatahumexa a mhamba yaku.
25Hatla urulisana ni lweyi atengisanaka na wene, wehe andleleni kun'we na yene, a mutengisi waku angatitxhuka akunyiketa ku mutremi; a mutremi akunyiketela ku mulaveleli wa bohelo, kutani akunhingenisa abohelweni. 26Nihlayelamfuri nili ku wene: Ungatihuma kone, loko ungasinadriha a malinyana ya vugamu!
Yesu adondrisa hita vuwoswi
27 # Lavisa Khm (Eks) 20:14; Mlw (Deut) 5:18. N'wiswiyingelile leswi swingahlayiwa ku vakhale leswaku: Ungatxhuki uyentxa vumbuye. 28Kambe mine nan'wibyela leswaku: Lweyi alavisaka a wansati hi kumunavela ayentxi vumbuye na yene ambilwini yake. 29Hikolahu-ke, loko a tihlu draku dra xinene drikuyisa kudoheni, drisusi udritxukumeta kule na wene. Swayapswa loko ulahlekeliwa hi xiro xin'we xa miri, kutlula loko a miri waku hinkwawu wutxukumetiwa akheleni dra ndrilo. 30Ni loko a voko draku dra xinene drikuyisa kudoheni, dritreme udritxukumeta kule na wene. Swayapswa loko ulahlekeliwa hi xiro xin'we xa miri, kutlula loko a miri yaku hinkwayu mitxukumetiwa akheleni dra ndrilo.
Kudlaya vukati
(Mt 19:9; Mrk 10:11-12; Lk 16:18)
31 # Lavisa Mlw (Deut) 24:1. Nakone kahlayiwi leswaku: A wanuna lweyi atrikaka a nsati wakwe afanekela kumunyika a papela dra kudlaya a vukati. 32Mine kambe nili ku n'wine: A wanuna lweyi atrikaka a nsati wakwe, na kungena mhaka ya vumbuye, amuyentxa akuva ahamba vumbuye. Kutani na yene lweyi atekanaka ni lweyi atrikiwiki ayentxa vumbuye na yene.
Kutivonela kufunga
33 # Lavisa Lv 19:12; Tnh (Num) 30:3; Mlw (Deut) 23:22-24. N'wiswiyingelile kambe leswi swingahlayiwa ku lava vakhale leswaku: Ungatxhuki undruluka akufungeni kwaku, kambe tlhelisela ku HOSI leswi ungayifungela swone. 34Mine kambe nan'wibyela leswaku: N'wingatxhuki n'wifunga ni kutrongo; n'wingafungi hi tilo, hikusa i xitrhamu xa vuhosi xa Xikwembu Nkulukumba; 35nambi kuli hi misava, hikusa i vunalavutelo bya minkondro yake; nambi kuli ha Yerusalema, hikusa i muti wa HOSI leyi yikulu. 36Ungafungi hi nhloko yaku na yone, hikusa awuna kuswikota a kundruluta ntsena a nsisi wun'we wuva wa ntlhohe kumbe wuva wa ntima. 37Swadringana kuhlaya Im'na, loko kuli im'na, ni Im'hi, loko kuli im'hi. Hinkwaswu leswi switlulaka leswo, i ntiro wa kupfa ku lweyi mfani.
Ta kutiyisela ni vunene
(Lk 6:29-30)
38 # Lavisa Khm (Eks) 21:24; Lv 24:20; Mlw (Deut) 19:21. N'wiswiyingelile leswi swingahlayiwa vaku: A tihlu hi tihlu, ni tinyo hi tinyo. 39Kambe mine nili ku n'wine: N'wingayaleleni lweyi mfani. Loko mhunu akuhodlota lirama dra xinene, munyiki ni drin'wana. 40Loko mhunu akurambela adjula kukutekela a xiyambalu xaku, munyike na drone djansi. 41Loko mhunu akusindrisa leswaku ufamba na yene mpfhuka wa kilometro drin'we, muheketi hi mpfhuka wa makilometro mabiri. 42Nyika lweyi akukombelaka; ungafulareli lweyi adjulaka kuvoleka ku wene.
Kurandra a valala
(Lk 6:27-28,32-36)
43 # Lavisa Lv 19:18. N'wiswiyingelile leswi swingahlayiwa vaku: Utarandra a wa-le-kwenu, uvenga a nala waku. 44Kambe mine nili ku n'wine: Randrani a valala venu, n'wikombelela ku Xikwembu Nkulukumba, lava van'wixanisaka 45akuva n'witava vana va Tatana wenu lweyi anga Matilweni, hikusa atlhavisa a dambu drakwe a henhla ka lava vanene ni ku lava vamfani, anisa a mpfula ku lava vanene nambi ku lava vamfani.
46Hikuva loko n'wirandra ntsena lava van'wirandraka, n'wini hakelo drini xana? Na vone a vahlengisi#5:46 Vahlengisi: Kuhlayiwa a vahakelisi va tinemba, lava hikola ka matirela yavu ya vuwutli, afaka vangarandriwi hi vhanu. avayentxisi xiswoswo xana? 47Ni loko n'wilosa a va-le-kwenu ntsena, n'witlula van'wana ha yini? Na vone va-Matiko avayentxisi xiswoleswo xana? 48Kolahu-ke, vanani lava vahetisekiki, swanga hi Tatana wenu lweyi anga Matilweni ahetisekiki.
Aktuálne označené:
Mt 5: NTX2007
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Xironga New Testament with Psalms © Bible Society in Mozambique, 2007.
