GENESIS 45
45
Yosep mansuman arepe akan paharie
1 #
Gaw. Ras. 7:13
Yosep dia olih tinai manyarenan ateie intu taharep kare oloh ayue. Tagal te inyohoe ewen malihi kamar te mangat ie tau mansuman akan kare paharie eweh ie je katotoe. 2Limbah uras oloh ayue malihi kamar, Yosep manangis hai auhe, sampai oloh Misir intu luar kamare mahining auhe. Kabar te sampai akan istana raja. 3Yosep hakotak dengan kare paharie, “Aku toh Yosep, en bapa magon belom?” Manampayah taloh te kare paharie mikeh toto sampai ewen dia tau tombah. 4Balalu koan Yosep dengan ewen, “Hetoh”. Ewen manokep palus ie hamauh tinai, “Aku Yosep je jari injual keton akan Misir. 5Ela mikeh atawa manyasal tagal keton manjual aku. Sapunae Hatalla kabuat je mimbit aku akan hetoh mananselo keton uka manyalamat are oloh. 6Toh harun nyelo ije kaduee bara lau. Katahin lime nyelo hindai oloh dia tau malan atawa manggetem. 7Hatalla jari mimbit aku mananselo keton uka manyalamat keton hapan cara je mampahengan toh, tuntang mangat manyalamat pambelom keton tuntang turonan keton. 8Jadi je sapunae dia keton je mawi aku aton intu hetoh, tapi Hatalla. Ie jari manjadian aku pagawai raja pangkagantonge intu Misir.
9 #
Gaw. Ras. 7:14
Toh, golong keton haluli talih bapa tuntang sanan akae je Yosep anake, hamauh kalotoh, ‘Hatalla jari manjadian aku marentah hapus tanah Misir. Dumah bajeleng. 10Bapa tau melai intu tanah Gosen, tokep dengangku – bapa dengan kare anak esoe, tabiri, kambing, sapi tuntang kare taloh handiai je ayun bapa. 11Amon bapa aton intu Gosen, aku tau mahaga bapa. Wayah lau magon aton lime nyelo hindai kareh mawi mangat bapa, keluargae tuntang meto pahagan bapa dia bara katapas.’ ”
12Koan Yosep tinai, “Toh keton mite kabuat, ikau kea Benyamin, je aku toto-toto Yosep. 13Suman akan bapa itah kalote kahain kuasangku hetoh, intu Misir. Suman kea akae kakare taloh je gitan keton. Palus golo-golong imbit ie akan hetoh.”
14Limbah te ie mamalok Benyamin, andie te, palus manangis. Benyamin kea manangis, sambil mamalok Yosep kea. 15Limbah te, Yosep marak tangise mamalok tuntang manyium uras kare ewen. Limbah te ewen manampara bapander dengae.
16Metoh intu istana raja tarahining kabar je kare paharin Yosep dumah, raja tuntang kare oloh ayue omba sanang. 17Raja hamauh dengan Yosep, “Soho kare paharim te mamuat kalidai ewen dengan gandom tuntang buli akan Kanaan 18uka manduan bapa dengan keluarga ewen palus mindah akan hetoh. Aku handak manenga akan ewen petak je paling bahalap intu Misir. Ewen kareh tau belom huang kasukop bara hasil petak te. 19Soho ewen kea mimbit bara hetoh pire-pire kereta akan sawan tuntang kare anak ewen je magon korik, tuntang manduan bapa ewen. 20Ewen dia usah manirok kare ramo je tarapaksa lihi ewen. Awi je pangkahalape intu Misir kareh jadi ayun ewen.”
21Kare anak Yakob malalus parentah raja te. Yosep manenga akan ewen pire-pire kereta, tumon parentah raja, tinai bahata intu benteng jalan. 22Inengae kea akan genep bitin ewen ije pakaian taheta. Tapi akan Benyamin inengae telo ratus kabawak duit perak tuntang lime pakaian taheta. 23Ie mangirim akan bapae sapuluh kongan kalidai je imuat hayak kare ramo je pangkahalape bara Misir. Ie mamuat sapuluh kalidai tinai dengan gandom, rote tuntang panginan beken akan bahata benteng jalan akan pangguete kareh manintu Misir. 24Limbah te ie manolak kare paharie, hayak hamauh dengan ewen, “Ela mawi karidu sama arep keton hong benteng jalan.”
25Ewen malihi Misir tuntang buli akan Kanaan, talih Yakob bapa ewen. 26“Yosep magon belom!” koan ewen dengae. “Ie marentah hapus Misir!” Mahining barita te, Yakob jungon, ie dia percaya dengan auh ewen.
27Tapi limbah ewen manyarita uras taloh je insanan Yosep akan ewen, tuntang metoh ie mite kereta je ingirim Yosep hapan manduan ie tuntang mimbite akan Misir, te ie harikas bara kajungoe. 28“Anakku Yosep magon belom!” koae. “Baya jete ih kanahuangku! Aku musti haguet tuntang mitee helo bara aku matei.”
Aktuálne označené:
GENESIS 45: NIJ
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás