GENESIS 31
31
Yakob malihi Laban
1Yakob mahining kare anak Laban hakotak kilau toh: “Yakob jari manduan kare panatau ayun bapa itah. Uras panataue bara panatau bapa itah.” 2Yakob nampayah kea je Laban te jari jaton kataue dengae kilau bihin. 3Palus Tuhan hamauh dengan Yakob, “Lius buli lewun bapam tuntang tundah paharim. Aku kareh mangalindong ikau.”
4Limbah te Yakob manyoho oloh mansanan akan Rahel tuntang Lea mangat hasondau dengae hong janah, intu eka kare kawan tabirie. 5Koan Yakob dengan ewen, “Aku mite je bapam jari jaton kajentae tinai dengangku; tapi Hatalla je inyembah bapaku mangalindong aku. 6Keton due katawan je aku jari bagawi omba bapa keton salepah kaabasku. 7Aloh kalote aku jari inipue tuntang iobahe upahku sampai sapuluh tingkat. Tapi Hatalla dia manalua ie mawi kapapa dengangku. 8Metoh bapam hamauh, ‘Kambing je harintik indu upahm,’ te hapus kawan meto manak anak je harintik. Metoh ie hamauh, “Kambing je habelang indu upahm,” te hapus kawan meto te manak anak je habelang. 9Kalote Hatalla jari manduan kawan meto ayun bapam palus manenga jete akangku.
10Metoh wayah meto te kawin, aku nupi mite hapus kambing hatue je kanjerae kawin te hasuring, harintik tuntang habelang. 11Palus Hatalla je manyarowa ampin malekat hamauh dengangku hong nupi te, Ie hamauh, ‘Yakob!’ Te aku tombah, ‘Toh aku.’ 12Malekat te hamauh tinai, ‘Item, hapus kambing je kanjerae kawin te hasuring, harintik tuntang habelang. Tantai iawiku te akam awi aku mite kakare taloh je iawi Laban dengam. 13#Gen. 28:18-22 Aku Hatalla je jari mamparahan arep-Ku akam hong Betel. Hete ikau jari maluput parapah ije batu pampingat hayak manusoh undus hunjue. Hete kea ikau sumpah dengangku. Toh lius buli lewu ekam inakan.’ ”
14Palus Lea tuntang Rahel tombah, “Jaton bagi tinai bara panatau bapa ikei je handak iwaris awi ikei. 15Ie jari mitong ikei kilau oloh. Ie jari manjual ikei tuntang taloh je jari inarimae te, jari impalepahe kea. 16Hapus panatau je jari induan Hatalla bara bapa ikei sapunae ayun ikei tuntang ayun kare anak ikei. Lalus taloh je inyoho Hatalla akam.”
17-18Yakob balalu batatap handak buli manalih bapae intu tanah Kanaan. Ie manggatang kare sawae tuntang kare anake lompat akan hunjun onta. Imbite kea hapus kawan tabiri tuntang taloh je jari dinoe hong Mesopotamia. 19Metoh te Laban aton hong janah kanjerae manggunting bulun kare tabirie. Awi te Rahel sampet manakau hampatong pangalindong keluarga#31:19: hampatong pangalindong keluarga: huang basa Ibrani “Terapim” iete hampatong dewa je tampae kilau olon tuntang inyembah kilau pangalindong keluarga. bapae. 20Yakob mamikir Laban hapan gawie je dia mansuman pangguete. 21Ie manduan kakare ramoe palus haguet kaje-kajeng. Ie dimpah sungei Euprat balalu manintu tanah bukit Gilead.
Laban manggoang Yakob
22Harue telo andau limbah te oloh mansanan akan Laban tahiu Yakob je jari hadari. 23Palus Laban mamumpong kare oloh ayue tuntang haya-hayak manggoang Yakob, uju andau katahie harue olih jake intu tanah bukit Gilead. 24Hong hamalem Hatalla manalih Laban intu nupie, hayak hamauh, “Awas ela samasinde ikau mawi Yakob hapan auh, aloh ije kabawak kotak.” 25Metoh te Yakob jari mampendeng kemahe hong ije bukit. Limbah te hong ije bukit je beken intu eka te kea Laban dengan kare oloh ayue mampendeng kemahe.
26Limbah te Laban hamauh dengan Yakob, “Mbuhen ikau mamikir aku tuntang manamput kare anakku kilau tawanan parang? 27Mbuhen ikau mamikir aku awim haguet suni-suni, dia mansuman? Amon ikau mansuman arepm, batantu aku manalua ikau haguet dengan kasanang atei, impahayak nyanyin musik tarabang tuntang kacapi! 28Ikau mahin dia manenga katika akangku manyium anak esongku je akan hapisah. Humong toto gawim te! 29Aku tau mawi kapapa dengam, tapi alem endau Hatalla je inyembah bapam mampingat aku mangat ela samasinde mampikeh ikau. 30Katawangku je ikau haguet awim handak toto buli. Tapi mbuhen ikau manakau hampatong pangalindong keluargaku?”
31Palus tombah Yakob, “Aku haguet suni-suni awi mikeh mama kareh mangahana kare anak mama. 32Tahiu hampatong te, amon mama sondau oloh hetoh je manakaue, ie kareh ihukum matei. Riksa, en aton ramo ayun mama hetoh. Amon aton, keleh duan. Oloh ain itah tau manyaksie.” Yakob dia katawan je Rahel manakau hampatong te.
33Palus Laban haguet akan kemah Yakob mariksae. Limbah te ie manalih kemah Lea tuntang kemah due-due rewar bawi te, tapi ie dia sondau hampatong te. Kajariae ie tame kemah Rahel. 34Tapi Rahel jari manduan hampatong te palus majoke huang kantong lapik onta, palus ie mondok hunjun lapik te. 35Palus Rahel hamauh dengan bapae, “Ela bapa sangit, aku dia olih mendeng manambang bapa, awi aku kanjeran pali.” Laban manggau titi-titip tapi dia sondau hampatong te.
36Te Yakob sangit, “Narai je papa je jari iawiku?” Kasangit paiseke, “Narai kasalangku sampai mama manggoang aku? 37Toh, limbah mariksa hapus ramongku, en mama sondau ramo ain mama? Palua ramo te tuntang andak hetoh, mangat oloh ayungku tuntang oloh ayun mama tau mitee tuntang mamutus eweh bara itah je bujur. 38Due puluh nyelo aku melai omba mama. Kare kawan kambing tuntang tabirin mama jari olih manak-manaka. Hindai puji aku kuman kambing hatue ayun mama aloh ije kongan bara meto ain mama. 39Je matei kinan meto basiak dia puji imbitku akan mama, tapi inggantiku kabuat. Je inakau aloh handau atawa hamalem harajur ilaku mama mangat aku manggantie. 40Kinjap aku imapui lasut andau tuntang awi kasadingen alem. Kinjap aku dia tau batiroh kea. 41Kalote ampingku metoh aku bagawi omba mama katahin duepuluh nyelo genep. Epat walas nyelo katahie aku bagawi mangat mandino due-due anak mama te. Tinai jahawen nyelo mangat dinon kawan tabiri te. Palus katahin te mama mobah upahku sampai sapuluh tingkat. 42Jaka ih aku dia ingalindong awi Hatallan tato hiangku, iete Hatalla je inyembah Abraham tuntang Isaak, te mama batantu jari manyoho aku haguet baya mimbit tunjuk sapuluh. Tapi Hatalla nantuani kasusahku tuntang gawingku je jari ilalusku. Alem ndau ie jari manenga katukase.”
Janjin Yakob dengan Laban
43Balalu Laban tombah auh Yakob, “Due-due bawi te anakku; anak ewen te ayungku; kawan tabiri te ayungku kea. Toto, kare je gitangku hetoh ayungku. Tapi aku dia tau mawi taloh en-en mangat mangahana anak esongku. 44Tagal te keleh itah mampendeng janji tuntang manyusun kare batu akan tanda te.”
45Limbah te Yakob manduan ije batu tuntang mampendenge jadi batu pampingat. 46Palus ie manyoho oloh ayue mamumpong batu akan ije toyok. Limbah te ewen kuman haya-hayak tokep toyok batu te. 47Laban manenga aran toyok batu te Yegar-Sahaduta,#31:47: Yegar-Sahaduta: Riman aran toh huang basa Aram iete “tuyok batu kilau akan pamapingat”. tapi Yakob manggaree Galed.#31:47: Galed: Riman aran toh huang basa Aram iete “tuyok batu kilau akan pampingat”. 48Koan Laban dengan Yakob, “Toyok batu toh kareh jadi pampingat akan kue.” Jete sababe eka te arae Galed. 49Laban hamauh kea, “Keleh Tuhan manantuani itah, kahum itah belom hakangkejau.” Awi te eka te inggare kea Mispa.#31:49: Mispa: Aran toh auh sewute sama kilau auh kotak Ibrani je rimae “eka itah ingalati”. 50Laban hamauh tinai, “Amon ikau mawi kapapa dengan kare anakku, atawa kawin dengan oloh bawi beken, aloh jaton je mangatawa, ingat, Hatalla manantuani itah. 51Toh batu je jari inoyok awiku, jetoh batu pampingat. 52Aloh toyok jetoh, atawa batu pampingat te mampingat itah je aku dia tau manangkalau toyok toh uka mantakan ikau. Ikau kea dia tau manangkalau toyok toh tuntang batu pampingat toh uka mantakan aku. 53Hatalla je inyembah Abraham tuntang bapaku Nahor#31:53: Abraham … Nahor: Abraham te bue Yakob, tuntang Nahor te bapa Laban. kareh indu hakim akan kue.” Palus Yakob sumpah tagal Hatalla je inyembah Isaak, bapae, hapan manggenep janjie. 54Ie manyambalih ije kongan meto hayak malupute akan parapah intu hunjun bukit te. Palus iraweie kare oloh ayue akan pesta. Limbah kuman, ewen baramalem intu bukit te. 55Hanjewu jewue, Laban manenga sium selamat jalan akan anak esoe. Ie mamberkat ewen, palus buli akan ekae melai.
Aktuálne označené:
GENESIS 31: NIJ
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás