Àpɔ́sɔ̀lɔ̀ 16
16
Témɔ́tè e tó Pɔ́ɔ̀ wà Sálɛ̀ o píé
1Pɔ́ɔ̀ nì o ló zeĩ́ Dábè wà Lísà. Tò-Zízɛ̀-píé-mì yé ò si Témɔ́tèa, e kɛ à lɛ̀ mɔ̀. À lòóò e kɛ Zúù mi lɛ́ à zò dɔɔ̀ e kɛá Zízɛ̀ mɔ̀ɔ ká. Kɛɛ à dàa e kɛ Gílíì mi ká. 2Wálà-mìà séĩ́ lɛ́ o kɛ Lísà wà Àkónìàa, o Témɔ́tè tɔ́ yiè gèe. 3Pɔ́ɔ̀ a naa wà Témɔ́tè ó ló. À mɔ́ɔ̀ wɔ̃̀ mɔ̀ɔ, Pɔ́ɔ̀ a mɔ́ɔ̀ Témɔ́tè bɔ̃̀ɔ̃̀ zɛ. A kɛ kíli, ɓii Zúù-mìà séĩ́ lɛ́ o kɛ lɛ̀ nì e kília mɔ̀ɔ, o à yí dɔ kélɛ̀ Témɔ́tè dàa e kɛ Gílíì mi ká. 4Lɛ̀ o kɛ lópìà o líé, wáà lò dìèá sí sɛ́lɛ́ yí píéa, o wɔ̃́ kɛ-zì lɛ́ àpɔ́sɔ̀lɔ̀ vɔ̀ wà mia dìè-dìè vɔ̀ lɛ́ o kɛ Zùlúsàlɛ̀ɛ, waà yà o gé ó wɔ̃́ kɛáa, o kɛ à zɔ̃̀ɔ̃̀pìà píé, kɛ ó à kɛ. 5À mɔ́ɔ̀ wɔ̃̀ mɔ̀ɔ, Wálà-mìà lɛ́ o kɛ lɛ̀ doò do mɔ̀ɔ, o o mɛ́ kɛ gágà zò-dɔ̀à-mɔ̀ wɔ̃̀ yí. Ɛ́ɛ̃́ o là e kɛ kpɔ́pìà lúó séĩ́ ká.
Pɔ́ɔ̀ e pɛ lɛ́ e kélɛ̀ mɛ̀ĩ̀ lɛ́ ɓea zɛ
6O bɛ̀i, o die lɛ̀ lɛ́ ò si Fílízìà wà Gɛ̀lésìàa là, ɓii Gɛ̀ɛ̀ Púlú lɛ̀ɛ́ gbaa wéé à mɔ̀ kɛ ó wɔ̃́ làṹ yièa gèe Ésìà. 7Lɛ̀ lɛ́ o ɓɔ nàà yí lɛ́ e kɛ Másìàa mɔ̀ɔ, o à kɛ-zì naa kɛ ó ló Bàtínìà, kɛɛ Zízɛ̀ zì Gɛ̀ɛ̀ɛ lɛ̀ɛ́ gbaa wéé à mɔ̀. 8À mɔ́ɔ̀ wɔ̃̀ mɔ̀ɔ, wa mɔ́ɔ̀ die ɓo Másìà, wáà lò Tólóyà. 9Bĩ́míà e kília káa, Pɔ́ɔ̀ e pɛ lɛ́ e kélɛ̀ mɛ̀ĩ̀ lɛ́ ɓea zɛ. Pɛ́ e kília zɛɛ̀ yía, e gɔ̃ lɛ́ è go Masèdónàa gɛ̃̀ dɔ̀á. Gɔ̃́ e kília e kɛ kpé kã́pìà à lɛ̀ɛ weeá kélɛ̀, “Ì yíía kã́, í nu Masèdónà zèe, kɛ í gbũ ko mɔ̀.” 10Yé Pɔ́ɔ̀ e pɛ lɛ́ e kélɛ̀ mɛ̀ĩ̀ lɛ́ ɓea zɛ nɔ́ɔ, ko ko dìè kɛ-zì naa kɛ kó ló Masèdónà, ɓii kɔa yà gbaa ko gé kélɛ̀ Wálà aà ko súo kɛ, kɛ kó wɔ̃́ làṹ yièa gèe mia lɛ́ o yía lɛ̀ɛ.
Lédìèà e e zò dɔ Zízɛ̀ mɔ̀
11Ko yà gɔɔ yí Tólóyà, ko die gbaa yíía zèí kpeĩ-kpeĩ, kɔ́áà lò Samòtélésì. Lɛ̀ lɛ̀ e kpɛ̀ia, ko ló gbaa Nìápólè. 12Lɛ̀ ko gó yia, ko ló zeĩ́ Félépà, lɛ́ e kɛ Masèdónà-sɛ̀lɛ̀ yé e kília yía zì pɛ́lɛ gbùò káa yí. Pɛ́lɛ e kília, lɛ pɛ́lɛ lɛ́ Wólómà-mìà o à yí gbùòa ká. Ko kɛ pɛ́lɛ e kília yí lúó zààle píé. 13Lɛ̀ fĩ́ĩ́-dɔ-lùò e ɓɔɔ, ko gó pɛ́lɛ e kília yí, ko ló yíí sɔ́nɔ́. Kɔa gɛ̃̀ ɓɔ̀ɔ kélɛ̀ Zúù-mìà wà sɛ̀nɛ ɓopìà lɛ́ɛ̀ lo kɛɛ̀ yi. Ko yà tã́ã̀ à lɛ̀ mɔ̀, kɔ́áà wɔ̃́ gèè loà o kɛ yía lɛ̀ɛ. 14Loà o kíli, lɛ́ o ko wéè maa, o doó-mì e kɛ gópìà Táyàtélà. À tɔ́ e kɛ Lédìèà. Léé e kília e kɛ sɔ zóló lɔ̀ɔ̀-dɔ-mì ká, ɛ̃́ɛ̃́ e kɛ lee lɛ́ è gbìnì Wálà lɛ̀ɛ ká. Ko Dàa-mì e à zò píé lé ɓo kɛ é e tóó dɔ e yiè ká wɔ̃́ lɛ́ Pɔ́ɔ̀ e kɛ à gèepìàa mɔ̀. 15Léé e kília, é dàá e píé-kɛ́ì-mìà séĩ́ bàa, o o séĩ́ o bàtáì kɛ. Lɛ̀ e kɛ kília, a gèe kélɛ̀, “É kɛ̀á lɛ ka gé kpó-kpó ɓo kélɛ̀ maà m zò dɔ ko Dàa-mì mɔ̀ wánà káa, kà nu ká yìì m píé kɛ́ì.” Lɛ̀ e kɛɛ, ko tó gbaa à wúú píé, ko ló yi.
O Pɔ́ɔ̀ wà Sálɛ̀ dùò bĩ́-kɛ̀ì
16Lúó doó káa, lɛ̀ ko kɛ lópìà lɛ̀ lɛ́ ò sɛ̀nɛ ɓo yía mɔ̀ɔ, kò lùò lee-nɛ̀fú doó nì ko ko kíe gɛ̃̀. Pɛ yɔɔ e kɛ lee-nɛ̀fú e kília píé. Pɛ́ e kília e ɓɔ lèe-nɛ̀fúa lɛ̀ɛ dɛ̀-vɔ-pɛ̀ ká. E kɛ wɔ̃́ lɛ́ è lo kɛɛ̀ mia mɔ̀ líéa gèepìà. À gèeè yí zàáa, e pɛlèe sɔ̀lɔ̀ ɓo gbùò e dàa-mìà lɛ̀ɛ. 17E tó kò Pɔ́ɔ̀ nì ko píé, áà gbɛ̀ɛ̀ kélɛ̀, “Gɔ̃à o kéa o Wálà lɛ́ lɛ pɛ séĩ́ làa, là yɛɓo-kɛ-mìà ká. Óò zi lɛ́ mi ì bɛ̀i à mɔ̀ í la-ɓo sɔ̀lɔ̀ ɓoáa, wɔ̃̀ gèe i lɛ̀ɛ.” 18Lee-nɛ̀fú e kília e wɔ̃́ e kília kɛ lúó búnùzɛ̀ píé. E à kɛ gbaa wɔ̃́ e pá Pɔ́ɔ̀ mɔ̀, e nìɛ̀, áà gèè pɛ yɔɔ e kília lɛ̀ɛ, “Zízɛ̀ Kɛ́lɛ̀ì tɔ́ yí zàáa, ḿm̀ gèe i lɛ̀ɛ, ì gó lee-nɛ̀fúa píé.” Nɔ́ zá lea, pɛ́ɛ e gó lee-nɛ̀fúa píé. 19Kɛɛ lɛ̀ lɛ́ lee-nɛ̀fúa dàa-mìà nì wa yí dɔ kélɛ̀ pɛ́ o zò e kɛ à mɔ̀ kɛ ó pɛlèe gɛ̃̀ à yía, waà kɔ̃́ gbaa à káa, o wí Pɔ́ɔ̀ wà Sálɛ̀ o mɔ̀, wáà o gã̀ã̀ tã́ã̀, wáà lò o ká pɛlɛí dɔ-mìà píé pɛ́lɛ e kília zèí. 20O ló o ká mɛ̀ĩ́-sà ɓo-mìà píé, wáà gèè o lɛ̀ɛ, “Gɔ̃à o kéa o Zúù-mìà ká. Ɛ́ɛ̃́ o wéé kã́pìà zèe. 21O mia zì wɔ̃́ kɛ-kɔ̀ lɛ́ wà kò lɔ́ɔ̀ɔ òó wéé o kíe nì wéè mɔ̀ɔ, zɔ̃̀ɔ̃̀pìà mia lɛ̀ɛ zèe. Ko Wólómà-mìà ká. Kòó bɛ̀i wéè wɔ̃́ kɛ-kɔ̀ nì e kília kɛ-wɔ̃̀ mɔ̀, ɛ̃́ɛ̃́ kɛ bɛ̃̀ɛ̃ kó kɛ.” 22Mia kù lɛ́ e kɛ yía, o gbini gbaa o mɔ̀. Mɛ̀ĩ́-sà ɓo-mìàa o Pɔ́ɔ̀ wà Sálɛ̀ wà sɔ́ɔ pɛ́ɛ́ o mɔ̀, wáà gèè ó o mɛ̀ yílí fèfé ká. 23Lɛ̀ o nyɛ o mɛ̀ɛɛ̀ mɔ̀ wɛlɛ yɔɔ zɛ̀ɛ, o o dùò bĩ́-kɛ̀ì. Wa gèe mi lɛ́ è e nyìɛ kɛ̀ bĩ́-kàa mɔ̀ɔ lɛ̀ɛ é e nyìɛ kpó-kpó kɛ o mɔ̀. 24Lɛ̀ wa gèe à lɛ̀ɛ kília, a mɔ́ɔ̀ o dùò ɓo ká e kília yí-kà yé e kɛ à zèía wì. E gbònó dà o gã̀ mɔ̀.
25Lɛ̀ bĩ́míà zèí e kɛɛ, Pɔ́ɔ̀ wà Sálɛ̀ o kɛ sɛ̀nɛ ɓopìà, wáà tã́ ɓò Wálà lɛ̀ɛ. Ɛ́ɛ̃́ mia yé o kɛ bĩ́-kà e kília wìa, o kɛ o tóó dɔpìà o mɔ̀. 26Nɔ́ zá lea, tã́ã̀ e vĩ́ ɓo zùkú-zùkú le. A kɛ tó bĩ́-kà e kília kpɔ́ɔ́ áà tàlè. Lɛ̀ e kɛ nɔ́ kília, káa lé séĩ́ e ɓo. Mia séĩ́ lɛ́ o kɛ yía, pɛ-kúlú ɓɛ̀lɛ̀ lɛ́ e kɛ o mɔ̀ píéa, e fóló gbaa o mɔ̀. 27Yé e kɛ kília, nyìɛ-kɛ̀-bĩ́-kà-mɔ̀-mìa e vùò. Lɛ̀ e bĩ́-kà e kília gɛ̃̀ e lé ɓoòo zɛ̀ káa, a gɛ̃̀ ɓɔ̀ɔ mia lɛ́ o kɛ ká e kília wìa waà wàà. Yé e kɛ kília, e là gèlè-gɔ̃-lààa ɓo e kéĩ́, áà nàà é e dìè zɛ. 28Kɛɛ Pɔ́ɔ̀ e e wè wɛ̀lɛ̀ lɛ̀í, áà gbɛ̀ɛ̀ weeá kélɛ̀, “Yékɛ̀ í wɔ̃́ dò fé kɛ i dìè ká. Ko séĩ́ ko zèe.”
29Nyìɛ-kɛ̀-mia-mɔ̀-mì e kília, a gèe ó nu tíé ká à lɛ̀ɛ. E ló kɛ́ì bàlá, e pèlè Pɔ́ɔ̀ wà Sálɛ̀ o gã̀ dṹɔ̃̀ mɛ́ tàle kpó-kpó ká. 30E nu gbaa o ká pɛ́lɛ̀ zèí, áà gèè o lɛ̀ɛ kélɛ̀, “M dàa-mìà, mɛ́ e m mɔ̀ ḿ kɛ, kɛɛ ḿ la-ɓo sɔ̀lɔ̀ ɓo?”
31Wa gèe à lɛ̀ɛ kélɛ̀, “Ì i zò dɔ ko Dàa-mì Zízɛ̀ mɔ̀. Yé ɓaà kɛ kília, íì lo la-ɓo sɔ̀lɔ̀ ɓoò. Ɛ́ɛ̃́ i píé-kɛ́ì-mìà bɛ̃̀ɛ̃ óò lo la-ɓo sɔ̀lɔ̀ ɓoò nɔ́ kíli.” 32Yé e kɛ kília, o ko Dàa-mì là wééa gèe wà e kɛ̀ì-mìà séĩ́ o lɛ̀ɛ. 33Yé o gó nɔ́ à kɛpìà kília, nyìɛ-kɛ̀-mia-mɔ̀-mì e kília, e o sí, e ló o ká, e wà ɓá e kɛ o mɔ̀ɔ pɛ́lɛ́. Nɔ́ zá lea, wà e píé-kɛ́ì-mìà séĩ́ o o bàtáì kɛ. 34E ló Pɔ́ɔ̀ wà Sálɛ̀ o ká e píé kɛ́ì. E léɓèlè dò nɔ o lɛ̀ɛ. Wà e píé-kɛ́ì-mìà séĩ́ o kɛ géli zɛ̀, ɓii aà e zò dɔ gbaa Wálà mɔ̀.
35Lɛ̀ à lɛ̀ e kpɛ̀ia, mɛ̀ĩ́-sà ɓo-mìàa o o kɔ̀-wì-mìà vɔ wéé e kéa ká. Wa gèe kélɛ̀, “Kà gó gɔ̃à o yía mɔ̀ ó ló.”
36Yé e kɛ kília, nyìɛ-kɛ̀-mia-mɔ̀-mì e kília, a gèe Pɔ́ɔ̀ lɛ̀ɛ. A gèe à lɛ̀ɛ kélɛ̀, “Mɛ̀ĩ́-sà ɓo-mìàa o wè-vɔ dɔ zèe weeá kélɛ̀, kà kà ló ɓo. À mɔ́ɔ̀ wɔ̃̀ mɔ̀ɔ, kà kà gó ɓo lɛ̀ɛ mɔ̀, ká ló zò-yà-gé ká.”
37Kɛɛ Pɔ́ɔ̀ a gèe mia kɔ̀-wì-mìà o kília lɛ̀ɛ, “Wɔ̃́ gbɛɛ lɛ̀ɛ́ gbaa káá ko wĩĩ́. Yé bɛ̃̀ɛ̃, o ko mɛ̀ mia séĩ́ nyìɛ mɔ̀ɔ ká. Ɛ́ɛ̃́ ko zeĩ́ Wólóũ̀-mìà ká mɔṹ. O vɔ à zì, o ko dùò bĩ́-kɛ̀ì, tó wáà nàà ó kã́ ko mɔ̀ nɔ́ ɓɔ̀ɔ bĩ̀ĩ̀ ká? Gbàaò. Lɛ̀ɛ́ bɛ̀i kɛɛ̀ kíli. Mɛ̀ĩ́-sà ɓo-mìà o kília, o dìè ò nu zèe ó ko ɓo bĩ́-kàa wì.”
38Wɔ̃́ lɛ́ Pɔ́ɔ̀ a gèe kília, mia kɔ̀-wì-mìàa o ló, wa gèe mɛ̀ĩ́-sà ɓo-mìàa lɛ̀ɛ. Lɛ̀ wa ma gbaa kélɛ̀ Pɔ́ɔ̀ wà Sálɛ̀ o Wólóũ̀-mìà káa, o kɛ túópìà. 39Lɛ̀ e kɛ kília, o ló, o o zò-yà-wè gèe o lɛ̀ɛ. Lɛ̀ e kɛ kília, o o ɓo bĩ́-kɛ̀ì, wa gèe o lɛ̀ɛ ɓɛ̀lɛyà ká kélɛ̀ ó gó gbaa pɛ́lɛ e kília yí. 40Pɔ́ɔ̀ wà Sálɛ̀ o gó gbaa bĩ́-kàa wì. O ló Lédìèà píé kɛ́ì. À lɛ̀ mɔ̀ lɛ́ o ɓɔ o ɓɛ́ĩ̀ Wálà-mìà là yia. O mia fã̀ã́-wàà-wè gèe o lɛ̀ɛ. Yé e kɛ kília, o ló gbaa.
Aktuálne označené:
Àpɔ́sɔ̀lɔ̀ 16: MNT
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Mann New Testament © Bible Society in Liberia, 1978.