Àpɔ́sɔ̀lɔ̀ 14
14
O ló Àkónìà
1Pɛ nɔ́ doóa kɛɛ̀ e kɛá Àkónìà. Pɔ́ɔ̀ wà Bánábà o ló Zúù-mìà zì Wálà-kàa wì. O mɛ́ĩ́ ɓo zi dò ká yi, tó áà kɛ̀ Zúù-mìà wà sɛ́lɛ́ gbɛɛ yí-mìà búnùzɛ̀ wáà o zò dɔ̀ Zízɛ̀ mɔ̀. 2Kɛɛ Zúù-mìà yé òó gbaa o zò dɔ Zízɛ̀ mɔ̀ɔ, o sɛ́lɛ́ gbɛɛ yí-mìà zò dɔ e gã̀ mɔ̀, wáà o wũ-kèlè yí sìè Wálà-mìàa gbĩ mɔ̀. 3Àpɔ́sɔ̀lɔ̀ vɔ̀ɔ o kɛ dóo yí lúó gbèĩ píé. O ko Dàa-mì wɔ̃̀ gèe nyìɛ gágà là ká. Ko Dàa-mì a zɔ̃̀ɔ̃̀ kélɛ̀ wɔ̃́ lɛ́ àpɔ́sɔ̀lɔ̀ vɔ̀ɔ wa gèe é gbɛ̃̀á à zì zò-kɛ̀-sɛ̀ mɔ̀ɔ, lɛ wánà ká, yíkɛ̀ gáàa nɔ́ a ɓo o lɛ̀ɛ, kɛ ó wɔ̃́ kpàlézɛ̀ wà à lé-pa zɛ̀ kɛáa kolo là zàá. 4Sɛ́lɛ́ e kília yí-mìà yí gìniì e kɛá. À kɔ̀-pɔ̃́ũ̀ doó e kɛ Zúù-mìà píé. À yé e tóa bɛ̃̀ɛ̃ e kɛ àpɔ́sɔ̀lɔ̀ vɔ̀ɔ píé.
5Yé e kɛ kília, sɛ́lɛ́ gbɛɛ yí-mìà ɛ̃́ɛ̃́ Zúù-mìà, ó dàá o líé-sí-mìà bàa, wa yà o gé kɛ ó kɛ-wɔ̃̀ yɔɔ kɛ àpɔ́sɔ̀lɔ̀ vɔ̀ɔ ká, ɛ̃́ɛ̃́ kɛ ó o pá gɛ̀lɛ̀ ká. 6Lɛ̀ àpɔ́sɔ̀lɔ̀ vɔ̀ɔ o wɔ̃́ e kília bìà kṹa, o wàà, o ló Lísà ɛ̃́ɛ̃́ Dábè, lɛ́ o kɛ pɛ́lɛ ká sɛ́lɛ́ lɛ́ ò si Làkónìàa yí, é dàá sɛ́lɛ́ lɛ́ e kɛ à sɔ́nɔ́ píéa bàa, o ló à yí. 7À lɛ̀ mɔ̀ lɛ́ o wɔ̃́ làṹ yièa gèe yía.
O ló Lísà wà Dábè
8Gɔ̃ doó e kɛ Lísà. À gã̀ zùaà e kɛá. E bɛ̀i, à kpɔ́lɔ̀ e kɛá lɛ̀ wa yea ká. Ɛ́ɛ̃́ lɛ̀ɛ́ táá do. 9E kɛ yàá yi e tóó dɔɔ̀ɔ zɛ̀ ká, áà wɔ̃́ lɛ́ Pɔ́ɔ̀ à gèea ma. Pɔ́ɔ̀ a gɛ̃̀ gbaa kélɛ̀ zò-dɔ̀à-mɔ̀ lɛ gɔ̃́ɔ yí kɛ é la e mɔ̀ yáá bà. Lɛ̀ e kɛɛ, e à gɛ̃̀ sĩ́ĩ́ le, 10e e wè wɛ̀lɛ̀ lɛ̀í, áà gèè à lɛ̀ɛ, “Ì dɔ i gã̀ mɔ̀ kpeĩ-kpeĩ.” Gɔ̃́ɛɛ e bìnì lɛ̀í, e gbɛ̃̀ gbaa áà tàà píé. 11Lɛ̀ mia gbũa o wɔ̃́ lɛ́ Pɔ́ɔ̀ aà kɛɛ gɛ̃̀ɛ, o gbɛ̃̀ gbaa, wáà gbɛ̀ɛ̀ o pà Làkónìà-wè yí weeá kélɛ̀, “Wálà pèèlɛ aà nìɛ̀ mi yí, aà nu gbaa tã́ã̀ zèe ko píé.” 12O Bánábà tɔ́ kpɔ́, wáà sì Zúì. O Hɔ́mì-tɔ̀ kpɔ́ Pɔ́ɔ̀ bɛ̃̀ɛ̃ mɔ̀, ɓii à ye lɛ́ e kɛ wɔ̃́ɔ lɛ̀ gbùò zɛ̀ gèe-mì káa. 13Wálà yé ò si Zúì, lɛ́ à zì ká e kɛ dɔ̀á pɛ́lɛ e kília mɛ́ɛ́ doó mɔ̀ɔ, à zì sálà-ɓòà-mɔ̀-mìa e nu dìì gɔ̃ wà fáláɓà ká gàlà lɛ́ à ɓoò e kɛá pɛ́lɛ e kília mɔ̀ɔ lé mɔ̀. Wà mia lɛ́ o kɛ yía, wa naa kɛ ó sálà ɓo àpɔ́sɔ̀lɔ̀ vɔ̀ɔ lɛ̀ɛ.
14Lɛ̀ Bánábà wà Pɔ́ɔ̀ o wɔ̃́ lɛ́ míáa o kɛ nupìà à kɛɛ̀ɛ maa, o o mɔ̀-sɔ̀ pɛ́ɛ́, o ló bàlà ká míáa kù yí, wáà gbɛ̀ɛ̀ weeá kélɛ̀, 15“Míá ka ké ɓɛ. Mɛ́ e kɛ lɛ́ kà wɔ̃́ sùua kɛ̀? Ko zi nɔ́ ka à káa ká. Ko nɔ́ mia ɓɔ̀ɔ ká. Ko zèe kɛ kó wɔ̃́ làṹ yièa gèe ka lɛ̀ɛ, kɛ ká ka ko gbɛ̃̀ wɔ̃́ fèle-fèle e kéa kɛɛ̀ mɔ̀, kɛ ká nìɛ̀ Wálà ɓéèe ɓɛ píé. À ye lɛ́ e lɛ̀í wà tã́ã̀, ɛ̃́ɛ̃́ mɛ̀ĩ́, wà pɛ nɔ́ɔ fé lɛ́ e o yía kɛɛ. 16Lúó lɛ́ aà diea píéa, e à tó kɛ sɛ́lɛ́ séĩ́ yí-mìà ó ló o zò-dà-wɔ̃̀ kɛ̀á sí. 17Kɛɛ aà kélá-wè ɓo e dìè là nɔ́ teele wɔ̃́ yiè yiè lɛ́ à kɛ̀ɛ ká. Lɛ́ɛ̀ lɛ̀ɛ nɔ, áà gò lɛ̀í, tó áà kɛ̀ tó kà taa-pɔ̀ɔ̀ áà ɓà e ɓa-lùò ká. Lɛ́ɛ̀ lébèlè nɔ ka lɛ̀ɛ, tó áà ka zò píé pà géli ká.” 18Yé bɛ̃̀ɛ̃ àpɔ́sɔ̀lɔ̀ vɔ̀ɔ o wɔ̃́ e kéa gèea, e kɛ nɔ́ tĩã́ o mɔ̀ gágà kɛ ó míáa wũ là kṹ, yékɛ̀ ó sálà ɓo o mɔ̀.
19Kɛɛ Zúù-mìà gbṹũ̀ o gó Ã́téɔ̀ ɛ̃́ɛ̃́ Àkónìà. O nu yí. Zúù-mìà o kília, o míá o kɛ yía kɛ o nu o píé zàá. Yé e kɛ kília, o Pɔ́ɔ̀ pá gɛ̀lɛ̀ ká, wa gã́ã́ tã́ã̀, o gó à ká pɛ́lɛɛ yí. Wa gɛ̃̀ kélɛ̀ aà ga. 20Kɛɛ lɛ̀ tò-Zízɛ̀-píé-mìàa o nìɛ̀ à mɔ̀ɔ, e wɛ̀lɛ̀ gbaa, e ló e mɛ̀ĩ́ pɛlɛí. Lɛ̀ lɛ̀ e kpɛ̀ia, wà Bánábà o ló gbaa Dábè.
O ló o mɛ̀ĩ́ Ã́téɔ̀ lɛ́ e Sílìà-sɛ̀lɛ̀ yía yí
21Pɔ́ɔ̀ wà Bánábà o wɔ̃́ làṹ yièa gèe Dábè, wáà mia búnùzɛ̀ kɛ̀, tó wáà kɛ̀ Zízɛ̀ là tòà-píé-mìà ká. Yé e kɛ kília, o ló o mɛ̀ĩ́ Lísà, o gó zeĩ́ yi, o ló Àkónìà, ɛ̃́ɛ̃́ o ló zeĩ́ Ã́téɔ̀. 22O tò-Zízɛ̀-píé-mìà lɛ́ o kɛ sɛ́lɛ́ e píé kília yía mɛ́ kɛ e kɛ gágà. O o fã̀ã́-wàà-wè gèe, kɛ ó kùnù zò-dɔ̀à-mɔ̀ ɓɛ mɔ̀ wáà lòá líé. O wɔ̃́ lɛ́ e kéa zɔ̃̀ɔ̃̀ o lɛ̀ɛ. Ye lɛ́ e kélɛ̀, lɛ à mɔ̀ wɔ̃́ nyɔ́ɔ̀ɔ nyɔ́ɔ̀ɔ é kɛ ko ká, kɛ kó tĩã́ ɓɔɔ̀ lɛ̀ lɛ́ Wálà tóò lɛ mia là yia mɔ̀. 23O mia dìè-dìè vɔ̀ sí kɛ ó kɛ Wálà-mìàa bà sɛ́lɛ́ doò doa yí déĩ́ le. O ló o sṹũ yí, wáà sɛ̀nɛ ɓò. Lɛ̀ e kɛ kília, o o nɔ gbaa ko Dàa-mì lɛ́ o zò dɔɔ̀ lɛ à mɔ̀ɔ lɛ̀ɛ.
24Lɛ̀ e kɛ kília, o die gbaa Pìsílìà, o nu gbaa Pã̀fílíyà. 25O Wálà lé-wè gèe Pɔ́gà. Lɛ̀ e kɛ gbaa kília, o ló gbaa Àtálìà. 26Lɛ̀ o gó yia, o yà gbaa gɔɔ yí, o ló o mɛ̀ĩ́ Ã́téɔ̀. Ã́téɔ̀ e kília lɛ́ o o nɔ yí Wálà lɛ̀ɛ, kɛ ó yɛɓo lɛ́ waà nyɛ gbaa à kɛɛ̀ mɔ̀ e kéa, kɛɛ Wálà zì zò-kɛ̀-sɛ̀ɛ é kɛá o píé à kɛɛ̀ yía.
27Lɛ̀ o ɓɔ Ã́téɔ̀ɔ, o Wálà-mìà o kɛ yía pá o kíe mɔ̀. O wɔ̃́ séĩ́ lɛ́ wà Wálà nì waà kɛ, ɛ̃́ɛ̃́ zi lɛ́ Wálà aà zi lé ɓo à ká kɛ sɛ́lɛ́ gbɛɛ yí-mìà ó tó à píé, kɛ ó o zò dɔ Zízɛ̀ mɔ̀ɔ, wɔ̃̀ gèe o lɛ̀ɛ. 28Pɔ́ɔ̀ wà Bánábà o kɛ gbaa tò-Zízɛ̀-píé-mìà lɛ́ o kɛ Ã́téɔ̀ɔ píé yi ɓéĩ́ ɓo gbèkèni.
Aktuálne označené:
Àpɔ́sɔ̀lɔ̀ 14: MNT
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Mann New Testament © Bible Society in Liberia, 1978.