Àpɔ́sɔ̀lɔ̀ 12
12
O Wálà-mìà sã̀ dɔ zeĩ́
1Lúó e kéa káa, Hɛ́lɔ̀ lɛ́ e kɛ sɛ́lɛ́ líé-sí-mì káa, e gbɛ̃̀ gbaa áà Wálà-mìà dò sã̀ dɔ̀. 2E Zĩ́ĩ̀ lɛ́ e kɛ Zɔ̃̀ɔ̃́ lèe-gé káa, zɛ gèlè-gɔ̃-làà ká. 3Lɛ̀ a gɛ̃̀ gbaa kélɛ̀ wɔ̃́ a kɛɛ e kɛ Zúù-mìà zò-kṹ-wɔ̃̀ káa, e ló zeĩ́, e Pílɛ̀ kṹ nɔ́ kíli. Wɔ̃́ e kéa e kɛ belè lɛ́ belè-fɔ̀ɔ-pɛ̀ wá à bàa, zì Kpílì lúó ká. 4Lɛ̀ e Pílɛ̀ kṹa, e à dùò gbaa bĩ́-kɛ̀ì. E à nɔ sóyà vɔ̀ yììsɛ kpolà yììsɛ zɛ̀ lɛ̀ɛ, kɛ ó o nyìɛ kɛ à mɔ̀. Hɛ́lɔ̀ a yà e gé kɛ é nu Pílɛ̀ ká mia nyìɛ mɔ̀, kɛ ó mɛ̀ĩ́-sà dɔ à mɔ̀ lɛ̀ lɛ́ Dìè-mia-là Kpílì lúóa e diea ká. 5À mɔ́ɔ̀ wɔ̃̀ mɔ̀ɔ, Pílɛ̀ yàlà ɓoò e kɛá bĩ́-kɛ̀ì. Kɛɛ Wálà-mìà o kɛ sɛ̀nɛ ɓopìà Wálà lɛ̀ɛ dóo kpó-kpó ɓo à mɔ́ɔ̀ wɔ̃̀ mɔ̀.
Pílɛ̀ ɓò bĩ́-kɛ̀ì pìè
6Bĩ́míà lɛ́ o Pílɛ̀ ɓoá bĩ́-kɛ̀ìa zì lɛ̀-kpɛ̀iì ká, kɛ ó nu à ká míáa wɛlɛ mɔ̀ɔ, Pílɛ̀ e kɛ yi zɛpìà sóyà vɔ̀ pèèlɛ fĩ̀ã̀. À yèleè e kɛá pɛ-kúlú ɓɛ̀lɛ̀ pèèlɛ ká. Ɛ́ɛ̃́ sóyà vɔ̀ o kɛ o nyìɛ kɛpìà bĩ́-kà e kília lé mɔ̀. 7Nɔ́ zá lea, ko Dàa-mì là vɔ-mì doó e ɓɔ e dɔ. Yé e kɛ kília, lɛ̀ e fɔ̀nɔ lɛ̀ lɛ́ o Pílɛ̀ yà yia mɔ̀. Vɔ-mì e kília e e kɔ̀ dà Pílɛ̀ gbã zì a vùò, áà gèè Pílɛ̀ lɛ̀ɛ, “Wɛ̀lɛ̀ zá le.” Yé e kɛ nɔ́ kília, pɛ-kúlú ɓɛ̀lɛ̀ɛ e gó gbaa Pílɛ̀ kɔ̀ mɔ̀. 8Vɔ-mìa a gèe à lɛ̀ɛ kélɛ̀, “Ì ɓà sɔ-là-ɓɛ̀lɛ̀ɛ kpo kùnù, í ɓà sàkpàa yà i gã̀ mɔ̀.” Pílɛ̀ a kɛ kíli. Vɔ-mìa a gèe zeĩ́ kélɛ̀, “Ì ɓà sɔ-là-sɔ̀ɔ kpɛ́nɛ́ i ká í tó m píé.” 9Pílɛ̀ e tó à píé, wáà gò bĩ́-kàa wì. Kɛɛ Pílɛ̀ lɛ̀ɛ́ gbaa wɔ̃́ lɛ́ Wálà là vɔ-mìa e kɛ à kɛpìàa yí dɔ, é kɛ̀á e kɛ wɔ̃́ wánà zɛ̀ káa ká. A gɛ̃̀ ɓɔ̀ɔ lɛ pɛ lɛ́ e kélɛ̀ mɛ̀ĩ̀ lɛ́ ɓea zɛpìà. 10O die gbaa lɛ̀ lɛ́ sóyà vɔ̀ lɛ́ ò o nyìɛ kɛ̀ bĩ́-kàa mɔ̀ɔ, o bèĩzɛ̀ o yàá yia mɔ̀. O die à tò-ko-mɔ̀ zɛ̀ɛ là. O nu gbaa, o ɓɔ gàlà-lé lɛ́ ò wàà à ká, wáà lò pɛ́lɛɛ yía mɔ̀. Gàlà e kília lékèlè kɛɛ̀ lɛ pɛ-kúlú ká. Gàlà e kília lé e ɓo e dìè lɛ̀ɛ o lɛ̀ɛ. Yé e kɛ kília, o gbɛ̃̀ pɛlɛí, wáà lò zi ɓɛ̀lɛ̀ĩ̀-fĩ̀ã̀ doó e kɛ yía píé. Nɔ́ zá lea, vɔ-mìa e gó gbaa à píé.
11Lɛ̀ e kɛ kília, Pílɛ̀ nìíì e nu gbaa à là, áà gèè kélɛ̀, “Ḿm̀ à yí dɔ gbaa kélɛ̀ lɛ wánà ká. Ko Dàa-mì e là vɔ-mì vɔ, ɛ̃́ɛ̃́ e m la Hɛ́lɔ̀ wà wɔ̃́ séĩ́ lɛ́ Zúù-mìà o kɛ à naapìà ó à kɛ m káa kɛ̀lɛ̀.”
12Lɛ̀ lɛ́ e wɔ̃́ lɛ́ e kɛ kɛpìàa yí dɔɔ, e ló gbaa Melé lɛ́ e kɛ Zɔ̃̀ɔ̃́ Máà lòóò káa, píé kɛ́ì. Mia búnùzɛ̀ páà e kɛá o kíe mɔ̀ yi. O kɛ sɛ̀nɛ ɓopìà. 13Pílɛ̀ e mia wàà-kpáá lɛ́ e kɛ ká e kília mɔ̀ɔ, mɔ́ɔ̀ kpóũ mɛ̀. Yɛɓo-kɛ lee-nɛ̀fú doó lɛ́ ò si Wólódàa, e nu à lɛ̀ mɔ̀. 14E Pílɛ̀ wéè dɔ. Lɛ̀ɛ kɛɛ, à gé e li gbùò. A kɛ e yɛ́ e zí bàlà ká, tó lɛ̀ɛ́ gbaa káa lé ɓo. A gèe míáa lɛ̀ɛ, “Pílɛ̀ lɛ dɔ̀á pɛ́lɛ̀ zèí.” 15Wa gèe à lɛ̀ɛ, “I bè zɛ̀.” Kɛɛ e kɛ nɔ́ tĩã́ à gèepìà, “Wánà lɛ.” Yé e kɛ kília, wa gèe kélɛ̀, “Lɛ́ɛ̀ bɛ̀i kɛɛ̀ lèĩ Pílɛ̀ zì Wálà là vɔ-mì ká.”
16Pílɛ̀ e kɛ nɔ́ tĩã́ káa lé mɛ̀pìà. Yé e kɛ gbaa kília, o káa lé ɓo gbaa. Lɛ̀ wa gɛ̃̀ɛ, o lé kpó-kpó paà e kɛá. 17E e kɔ̀ là zɛ o lɛ̀ɛ ó o lɛ̀à ga. E zi lɛ́ ko Dàa-mì aà à ɓoá bĩ́-kɛ̀ìa wɔ̃̀ yí ɓo o lɛ̀ɛ. A gèe, “Wɔ̃́ e kéa, kà gèe Zĩ́ĩ̀ wà m ɓɛ́ĩ̀ Wálà-mìà yé o tóa o lɛ̀ɛ.” Lɛ̀ e kɛɛ, e gó gbaa yí, e ló lɛ̀ gbɛɛ mɔ̀.
18Lɛ̀ lɛ̀ e kpɛ̀ia, sóyà vɔ̀ɔ o séĩ́ o zò e dɔ e gã̀ mɔ̀ kpó-kpó ɓo wɔ̃́ lɛ́ à kɛɛ̀ e kɛá Pílɛ̀ mɔ́ɔ̀ wɔ̃̀ yía, mɔ́ɔ̀ wɔ̃̀ mɔ̀. 19Hɛ́lɔ̀ e mia gbɛ̃̀ wáà Pílɛ̀ nàà, kɛɛ òó gbaa à gɛ̃̀. Yé e kɛ kília, e nyìɛ-kɛ̀-bĩ́-kà-lé-mɔ̀-mìàa wɛ̃́ĩ́-lɔ̀ɔ kɛ. A gèe gbaa mia lɛ̀ɛ ó o zɛ.
Lɛ̀ e kɛ kília, Hɛ́lɔ̀ e gó gbaa Zùdíà, e ló Sízàlíà. E kɛ yí lúó dò píé.
Hɛ́lɔ̀ ga-zì
20Wɔ̃́ e Hɛ́lɔ̀ wàa mia lɛ́ o kɛ Táyà wà Sádã̀a píé kpó-kpó ɓo. O ló gbaa o kù ká Hɛ́lɔ̀ píé. Bèĩzɛ̀ɛ, o gɔ̃ lɛ́ ò si Bálásà, lɛ́ e kɛ nyìɛ-kɛ̀ Hɛ́lɔ̀ píé-kɛ́ì-mìà séĩ́ mɔ̀ mì káa, wa kɛ e kɛ nɛ́ o píé zàá. Yé e kɛ kília, o ló Hɛ́lɔ̀ píé, wáà zò-yà-gé pɛ̃̀ à mɔ̀. Ƃii o pà-mìà zì ɓèlè-pɛ̀ɛ lɛ́ɛ̀ go Hɛ́lɔ̀ là sɛ́lɛ́ɛ yí zàá.
21Lúó lɛ́ wa kpɔ́ɔ, lɛ̀ e ɓɔɔ, Hɛ́lɔ̀ e là mia líé-sí-sɔ̀ɔ dà e mɔ̀. E yàá là dɔ-táŋánáa là, áà mɛ́ĩ́ ɓò míáa lɛ̀ɛ. 22Míáa wáà gbɛ̀ɛ̀ weeá kélɛ̀, “Mí è wèèa, ye wá mi ká. Wálàa doó-mì lɛ́ è wèè ɓɛ.” 23Nɔ́ zá lea, ko Dàa-mì zì vɔ-mì doó e Hɛ́lɔ̀ mɛ̀ tã́ã̀, ɓii lɛ̀ɛ́ gbaa ɓɛ̀lɛyà nɔ Wálà lɛ̀ɛ mɔ́ɔ̀ wɔ̃̀ mɔ̀. Wɛ́nɛ́ vɔ̀ wa ɓèlè, e ga.
24Kɛɛ Wálà zì lé-wèa e kɛ tĩã́ lópìà líé, ɛ̃́ɛ̃́ e kɛ wɛ̃̀ĩpìà píé.
25Bánábà wà Sɔ́ɔ̀ o nyɛ gbaa wɔ̃́ lɛ́ wa mɔ́ɔ̀ ló ɓo Zùlúsàlɛ̀ɛ, kɛɛ̀ mɔ̀. O yɛ́ gbaa o zí. Wà Zɔ̃̀ɔ̃́ Máà nì lɛ́ o nu o mɛ̀ĩ́a.
Aktuálne označené:
Àpɔ́sɔ̀lɔ̀ 12: MNT
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Mann New Testament © Bible Society in Liberia, 1978.