ATHƐSALONIANAƐ MƆƐKƐ TIŊDƐ 3
3
Ŋa sɛli ha hin
1Mɛkindɛ ni gbi, anyami, ŋa sɛli ha hin, chelɛ hɔk Bɛɛ kɔ gbam kɛkɛ kɛkɛ ni pɔ kɔye yɛthi ka limani sɔŋkɔma hɔ kɔ han thiyeŋdɛ, 2ni pɔ hiye loli hiŋg anya kafaɛ ni anya wɔy yɛ; haliwɔ chen ŋan gbi ŋa bi laanɛ.
3Kɛ Bɛɛ wɔ tiŋtiŋ; bi ha ka nɔ gbɔl kathil ni paa nɔ hiŋg iwɔy. 4Ni hi bi kithgbɔl Bɛɛay ha ŋan, lɛ ŋa haa ni ŋa bi ha haa lanɔ la hi gbɔndaɛ.
5Ha Bɛɛ bɛ gbɔl thi nɔɛ ko chɔŋmalen ma Hɔbatokɛ ni ko yɛthi kath Kraystɛ.
Ŋhɔlagboɛ gbi mpanth ma ha hani
6Yɛlayo hi nɔ gbɔnda, anyami, ilel Bɛɛ hiɛ Jisɔs Kraystay, lɛ ŋa kɛŋgiɛni nɔɛ gbi wɔ yemani ha mpanthɛ ni wɔ yemani lem mbɛnɛɛ ma ŋa sɔthɔ hiŋg hindɛ. 7Haliwɔ hanayɛn ŋa si hɔ ŋa ha che hi nɛmɛniɛ; hi ka cheni iyema ha len yɛ hi ka che ni ŋandɛ, 8hi ka joni njema nɔ gbi ha ipakala, kɛ ka mpanth ni jali haa hi haa mpanth ichɔl ni ipal, chelɛ hi manɔ bɛ bɔŋ hiɛ. 9Lachendɛlɛ hi ka biɛni isɔn dɛvɛ, kɛ ha hin kanɔ thambasey nche yegbe ha han nɛmɛni. 10Haliwɔ yɛ hi ka che ni ŋandɛ hi kanɔ gbɔndaɛ ki: nɔɛ gbi wɔ hani gbo mpanthɛ ma jo.
11Haliwɔ hi theyɛ lɛ apum han thiyeŋ ŋa gbo chɛŋg iyemahalen, anya ja lemɛ thanthɛn, ŋa chen ha mpanth gbi. 12Yɛlayo hi gbɔnda ni hi thɛlɛni ka ilel Bɛɛ Jisɔs Kraystɛ lɛ anya chevɛ ŋa haa mpanth ma haɛ pempem ni ŋa lɛliɛ njema ŋa joo.
13Anyami, ŋama ker ha haa ikɛlɛŋ 14yɛ nɔ gbi kɛyɛ gbo ha haa lanɔ la hi wɔ rayowayyɛ, ŋa lomani nɔɛ vɛ, ni ŋama bi len gbi ha hama wɔ, chelɛ wɔ lap. 15Ŋama wɔ lɛli mɔɛ nɔnɔ limith kɛ ŋa mɛy wɔ sɔŋgɔma pɛnte.
Ŋhɔk ma mɛkin
16Yɛlayo ŋa Bɛɛ mbɔsɛ kanɔ mbɔs mɛŋkɛ hɔn gbi naythinday gbi. Bɛɛ chema nɔ han gbi
17Yaŋ, Pɔl, ya gbala lɛiŋ yo ka piamdɛ. Lomandɛ kɔki raythimday gbi; vɛ ya gbalɛ.
18Ha wɔŋɔ Bɛɛ hiɛ Jisɔs Krayst chema han gbi.
Aktuálne označené:
ATHƐSALONIANAƐ MƆƐKƐ TIŊDƐ 3: SNT
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Sherbro New Testament Portions © Bible Society in Sierra Leone, 2020.