ATHƐSALONIANAƐ MƆƐKƐ TIŊDƐ 1
1
1Pɔl, Silvanɔs, ni Timothi,
Ko kil sɛli anya Thɛsalonikakoɛ ni Hɔbatokɛay Baahi ni Bɛɛ Jisɔs Krayst:
2Wɔŋɔ konɔko ni mbɔs hiŋg Hɔbatokɛ Baaɛ ni Bɛɛ Jisɔs Krayst.
Hɔɛ thoŋgaɛ yɛ Krayst bi ŋa hundɛ
3Hi ŋa bi chɔŋsɛkɛ ko Hɔbatokɛ mɛŋkɛ hɔn gbi ha ŋan, anyami, sɔŋkɔma hɔ la ha cheɛ, haliwɔ laanɛ nɔɛ koŋ bɛrɛni bom ni nchɔŋmalendɛ ma ŋa bi ha athɛma nɔɛ ma bɛrɛni. 4Labiɛ hin bɛ hi koloni ha han kil thi sɛli Hɔbatokɛay ha yɛthi nɔ kathɛ ni laanɛ ŋgbathil ma nɔay gbi ni thenɛkiyɛ kɔ ŋa muyuɛ.
5Ki laɛ thambasey ha thoŋga tiŋtiŋ Hɔbatokɛ, chelɛ ŋa bɔ che yegbe ha bɛɛli Hɔbatokɛ, la ŋa theɛ nɛkiɛ 6yɛ Hɔbatokɛ koŋla ke likɛlɛŋ ha paka ka theynɛki ko ŋanɛ ŋa nɔ theynɛkiyɛ 7ni chi hini gbɔl ha hin ko ŋan ha thenɛkiɛ, yɛ pɔ toŋgi Bɛɛ Jisɔs hiŋg arijana ka malkaa wɔ adumɔɛ jɛmdi jothɔɛ 8wɔe muŋgɔ ka thenɛki ko ŋanɛ ŋa sini Hɔbatokɛ ni ko ŋanɛ ŋa lɔŋɔni nui ko Womdi Yegbe Bɛɛ hiɛ Jisɔs. 9Ŋa bi ha thenɛki ŋgbathil ma chɔŋgbaɛ ni pɔ ŋaye thapa ha ke Bɛɛ ni hiŋg gbɛŋ wɔ fɔsaɛ 10yɛ bi ŋa hun hɔɛ yɛ vɛɛ ha pɔn ka wɔ gbɛŋ anya wɔ charaŋdɛ, ni ha pɔn kabani ha wɔn gbi ni ŋanɛ ŋa laanɛ, haliwɔ ŋa laanɛ thambasey hiɛ konɔko.
11Mɛkindɛni gbi hi nɔ sɛliɛ mɛŋk gbi, chelɛ Hɔbatokɛ hiɛ wɔ nɔ ha yegbe ha vel wɔɛ, ni wɔye koŋ haa itɛnin nɔ yegbeɛ ni mpanth ma laanɛɛ ka fɔsa wɔɛ, 12chelɛ ilel Bɛɛ hiɛ Jisɔs hɔ bi gbɛŋ ŋanay, ni ŋan wɔnay, kendɛ wɔŋɔ Hɔbatokɛ hiɛ ni Bɛɛ Jisɔs Krayst.
Aktuálne označené:
ATHƐSALONIANAƐ MƆƐKƐ TIŊDƐ 1: SNT
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Sherbro New Testament Portions © Bible Society in Sierra Leone, 2020.