मत्ती 14
14
योहान बपतीस्मा केरनारान खुन
(मरकुस 6:14-29; 9:7-9)
1ता दिह्या माय गेलील देसान राजा हेरोदेस यीशुन बाराम होमल्यो, 2एने तान पावराह केयो, “ज्यो खेरीच बपतीस्मा केरनार योहान हे, तो मुरेल माय रेन जीव उठेल हे, तानकेरता ताकेत ने काम तान द्वारे एतेह।”
3 #
लुका 3:19,20 काहाकाय हेरोदेस राजा तान बाहख फिलीपुस ने बायकु हेरोदियास ने वोजेसे, योहानाह बांदिन जेली माय कोंडाड़ दियेल ईतो। 4काहाकाय योहान ताह कियेल ईतो, “ज्यीह राखणे तार केरता हाजो नाह सोतो!”#लेव्यवस्था 18:16; 20:21 5तानकेरता हेरोदेस राजा ताह मारनेन होदतालो, पुण यहुदि माणहाह बितालो, काहाकाय ता माणहे योहानाह जाणकार मानताला।
6पुण जेवी हेरोदेस राजान जेल्मो दिह आवो, तेवी हेरोदियास ने सोरी माय नाच देखाड़ीन हेरोदेसाह खुस केरी। 7तेवी राजा सुगोण खाईन तीह केयो, “जो काय तु माहु फाय मांगहे मी तो तुवाह आपु!”
8तीन आहख तीह कियेल केरीन ती केयी, “योहान बपतीस्मा केरनारान मुंड काटाड़ीन एक पाराती माय मेलीन मार केरता मांगाड़ दे!”
9राजा ज्य होमलीन जुलूम नाराज एय गीयो, पुण ता हेऱ्या बोह रियेल पावणान ओंगाण सुगोण खायेल ईतो, तानकेरता तीन वात मान लिदो। 10एने राजा सिपायड़ाह उकुम आप्यो काय योहानान मुंड काटीन तीह लावीन आप दिवो। 11एने योहानान मुंड काटीन पाराती माय मेलीन लावो, एने सोरीह आप दिनो, एने सोरी तीन आईख आप देनी। 12तेवी योहानान चेला आवीन देड़ाह ली जाईन बुज देना, एने ता यीशु फाय जाईन खुबेर आप्या।
पाच एजार माणहाह खावड़ावणे
(मरकुस 6:30-44; लुका 9:10-17; योहान 6:1-14)
13जेवी यीशु योहानान मोतीन बाराम होमल्यो, ते डोंडह्या माय बोहीन एखालोच हुनाला जागाम जात रिनो, एने माणहे ज्य होमलीन हेयरा हेयरा रेन पायेच ता फाय गीया। 14जेवी यीशु डोंडह्या माय रेन उतरीन दिड़े आवो, ते ता माणहे जुलूम टुलो एय रियेल दिख्यो, एने यीशु ता पोर किव किऱ्यो एने तान बेमारीह हुदार दिनो।
15जेवी हांज एनी ते चेला यीशुन आहने आवीन केया, “ज्यो हुनालो जागो हे, एने दिह जुलूम डेल जायेल हे। न्या माणहाह मुकेल दे, काय ता गावा माय जाईन तान केरता खाणो वेचातो लेती।”
16पुण यीशु ताह जापाप आप्यो, “न्याह जाणेन जोरवुत नाह सोती, तुमूच न्याह खाणेन आपो।”
17चेला ताह केया, “न्या आमु फाय पाच रोटा एने दुय मासाह सोड़ीन दिहरो कायच नाह सोतो।”
18यीशु ताह केयो, “ताह मार फाय लावो।” 19तेवी यीशु माणहाह खेड़ा पोर बोहणेन उकुम आप्यो; एने ता पाच रोटाह एने दुय मासाह लिदो एने हेरगान उगे देखीन बोगवानान दन्यवाद किऱ्यो। एने रोटा मुड़ मुड़ीन चेलाह आप्यो, एने चेला माणहाह आप्या। 20जेवी आखा माणहे खाईन आफरी गीया। तेवी चेला वोचेल रोटान टुकड़ा बारा टोपला बोरीन विशा। 21एने रोटा खाणारे बायकु एने सोराह सोड़ीन पाच एजार एदमीच एता।
यीशु पाण्या पोर चालने
(मरकुस 6:45-52; योहान 6:15-21)
22तेवी यीशु चालोस तान चेलाह डोंडह्या माय चेड़नेन केरता विन्ता किऱ्यो काय ताह रेन पेल ता ती पार जात रेती, जाह वोर काय तो माणहाह मोकली। 23यीशु माणहाह मोकली देन बोयड़ा पोर विन्ता केरनेन केरता आंगेच जात रिनो, एने हांज पोर तो एखालोच ईतो। 24ती टेम डोंडह्यो देरीयान विचीम लाटा माय डोलाणे बाजरियेल एतो, काहाकाय वारो सोमोर रेन एतो।
25एने यीशु राती तीन ते सोव वाचतान टेम माय पाण्या पोर चालतेन तान आहने आवो। 26चेला ताह पाण्या पोर चालतालो देखीन गाबराय गीया, एने केणे बाज गीया, “ज्यो बुत हे!” एने ता आयेड़ने बाज गीया।
27तेवी यीशु ता हिऱ्यो चालोस वातु किऱ्यो एने केयो, “ईमोत मिलो! मी हे, बिवो मा!”
28पतरस ताह जापाप आप्यो, “एय मालीक केदी तुस हे, ते माहु तार फाय पाण्या पोर चालीन आवणेन उकुम आप।”
29तो केयो, “आव!” तेवी पतरस डोंडह्या पोर रेन उतरीन यीशु फाय जाणेन केरता पाण्या पोर चालने बाज गीयो। 30पुण वाराह देखीन बिय गीयो, एने जेवी पतरस बुड़ने बाज गीयो ते आयड़ीन केयो, “एय मालीक, माहु वोचाड़।”
31यीशु चालोस तान आथ देर लिदो एने ताह केयो, “एय अविश्वासी तु काहा सेंका किऱ्यो?”
32जेवी ता दुयू डोंडह्या पोर चेड़ गीया, तेवी वादोण वारो थोब गीयो। 33ज्य देखीन ता जा डोंडह्याम एता, ताह वोंदिन केया, “खेरीच तु बोगवानान सोरो हे।”
यीशु गन्नेसरत गावा माय दुखाऱ्या माणहाह हुदारने
(मरकुस 6:53-56)
34ओवता ता देरीयाह पार केरीन गन्नेसरत गावा माय पोचना, 35तावाला माणहे ताह चालोस ओलखी लेदा। एने आहने पाहने आखा देसा माय खोबेर लेन मोकल्या, एने आखा दुखाऱ्या माणहाह ता फाय लावा। 36एने ताह विन्ता केरने बाज गीया काय दुखाऱ्याह तान फाड़काह सापेलने देय; एने जोला बी माणहे तान फाड़काह सापेलताला, ता आखा हुदेर गीया।
Aktuálne označené:
मत्ती 14: NTNii2020
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
The New Testament in Nahali Language © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2020
