Matius 11
11
Si Yesus kumua in andumoro' i Yohanes Mabaptis
(Luk. 7:18-35)
1Kumawusai si Yesus masusui a sé sangapulu' rua murit-Na, wo itela'u-Na en tampa itu e maangé sumusui wo kumua in Abar Kaaruien ang kota-kota sé an sangkum ing Galilea.
2An tutuw itu, si Yohanes Mabaptis an untep im bui. Wo kali- ngaanna waya andumoro' sé niéma' i Yesus Kristus, 3wo iru'du'na sé muritna mangé mamuéi a si Yesus, “Amang, si Amang réén si tou aijanjio i Amang Kasuruan si maai itu? Kuma'pa tou walina e musti entoon ami maai?”
4Wo isowat i Yesus ai séra, “Maréngo mangé kamu a si Yohanes Mabaptis wo icuao mio' ai sia sapa sé liningao wo sé sinéréo miow: 5#Yes. 35:5-6, 61:1 Si tou wola maséréo, si tou késo' mawaya'o, si tou sumakit kusta masama'o, si tou wengel malingao, si tou imatéo tinou sumawel, wo en Abar Kaaruien i Amang Kasuruan ipakua-kuao a sé tou lengéi. 6Wo pakakamangen sé tou sé ra'ica icumélong Yaku.”
7An tutuw é murit i Yohanes mangém, tumo'tolo sisil i Yesus a sé tou keli in andumoro' i Yohanes, “Sapa réén en torona kamu maangé a si Yohanes an tana' kapayasan? Mangé réén suméré in saraw si pengéro-ngéro' in deges? 8Sapa en torona miow maangé? Mangé réén suméré si tou mekarai in loor? Si tou mekarai in loor itu, em paento'anna am balé i colano. 9Anaé, sapa en torona miow maangé? Mangé réén sumére si nabi? En itu wutul, taan icua-Ku mangé ai camu, sa si Yohanes itu lumébémai wo si nabi. 10#Mal. 3:1 Ampa'paan andumoro' isia awéan en aipatic:
‘Séréno! Airu'du'-Ku mai si utusan-Ku rumiorai ai Co,
sia oka en tumu'tul in lalan wayaan-Mu.’
11En ulitna icua-Ku mangé ai camu, an uner é tou si aitou é wéwéné ra'ica wana en lumébémai eng kawangko' wo si Yohanes Mabaptis. Taan sé tou ipawawa-wawa' ang Kakolanoan in Sorga, lumébémai eng kawangko' wo si Yohanes Mabaptis. 12#Luk. 16:16 Tumo'tol i Yohanes Mabaptis imai akar intarépé', keli en tou wutu-wutul rumaméji kumua in andumoro' ing Kakolanoan in Sorga wo sé tou wutu-wutul rumaméji muntep ang Kakolanoan in Sorga. 13Ampa'paan pakasa nabi wo ing kitap-kitap i Musa icumuao i nunuwu' i Amang Kasuruan andumoro' sé mamuali akar si Yohanes maai. 14#Mal. 4:5; Mat. 17:10-13; Mrk. 9:11-13 Aicuao é nabi indior sa si Elia maai oka sumawel ang kayo'baan anio'. Wo sa icasalé' iow mercaya en aicua é nabi itu, si Yohanes ituo si Elia si maai oka. 15Si séi si makalunteng, aweso taré sia luminga sumama-sama'!
16Ang karapi in sapa yandé-Ku sé tou menonou intarépé'? Séra ayandé tanu sé toyaang makalukut am pasar wo maangko' a sé kara-karapi éra,
17‘Pasengon ami em peloit torona miow,
taan ra'ica kiim iow maéngké.
Pakantar ami eng kakantaren mala'lu,
taan ra'ica kiim iow maamé'.’
18An tutuw i Yohanes imai, sia ra'ica mengakan wo ra'ica mengaelep, wo ipakua éra, ‘Sia rinasuk i sétang!’ 19Wo mai si Toyaang i Tou, Sia makan wo maelep, wo pakua é tou, ‘Séréno, Sia tampenganen wo tampengelepen. Sia ka'i mekarapi wo sé matagi im pajak wo sé tou iméma' ing kamesé-meséaan.’ Taan eng kapinteran asi Amang Kasuruan owo kaséréan oka a sé tou sé mengaéma' in sususuien wutul itu.”
Si Yesus tumegor in depet sé tou ang kota-kota sé ra'ica mape'dis
(Luk. 10:13-15)
20Wo tumo'tolo si Yesus tumegor in depet sé tou ang kota-kota sé ra'ica mape'dis, mandé ka'i am bitu Sia makakeli-keli maéma' ing kakaya'kaan. 21#Yes. 23:1-18; Yeh. 26:1–28:6; Yl. 3:4-8; Am. 1:9-10; Za. 9:2-4 “Icawangkuro mio' kamu sé tou ang kota Khorazim! Wo icawangkuro ka'i kamu sé tou ang kota Betsaida! Ampa'paan niéma'-Kuo eng kakaya'kaan an uner iow taan ra'ica pinercaya miow wo ra'ica mape'dis. Sa sé kakaya'kaan itu niéma'-Ku an Tirus wo an Sidon indior, tantu séra imape'diso wo kumarai ing karai tanu tuus mala'lu wo mu'bur in awu an do'kos éra tanu tuus séra manesel mengéma-ngéma' ing kamesé-meséaan. 22Taan icua-Ku mangé ai camu, a si endo kaka'puan ing kayo'baan, en ukuman iow lébé uter wo in ukuman é tou ang kota Tirus wo en Sidon. 23#Kej. 19:24-28; Yes. 14:13-15 Wo kamu sé tou ang Kapernaum, weroten iow réén sapaoka kamu angkaien oka akar an sorga? Ra'ica! Taan taré, itiya'-Na oka kamu a naraka! Sa eng kakaya'kaan si imamualio an uner iow itu niéma'-Ku an Sodom, tantu eng kota itu awéané' akar intarépé'. 24#Mat. 10:15; Luk. 10:12 Taan icua-Ku mangé ai camu: Asi endo kaka'puan ing kayo'baan, en ukuman iow lébé uterai wo in ukuman é tou an Sodom itu.”
Mayoo a Yaku
(Luk. 10:21-22)
25An tutuw itu si Yesus sumombayang, “O Amang Kasuruan si makakawasa in langit wo ing kayo'baan! Yaku kumua i makapulu'sama' ampa'paan ra'ica aituru' i Amang pakasa sé andumoro' in itu a sé tou sé mengapaké ing kapinteran wo a sé tou pandéi, taan aituru' i Amang a sé tou en aténa tanu toyaangé' teké'. 26O Amang, siituo e iméma' in até i Amang arui.”
27 #
Yoh. 1:18, 3:35, 10:15 Wo icua i Yesus, “Pakasa aisarakano i Amang-Ku a Yaku. Ra'ica wana mandé esake' tou e makatuus si Toyaang, aluar si Amang in esa. Wo ka'i ra'ica wana mandé esake' tou e makatuus si Amang, aluar si Toyaang wo sé tou si papatuus-Ku oka a si Amang.
28Mayoo a Yaku, kamu im baya sé mala'léo wo kepé wo sé uter em pamuléngen, wéan-Ku oka kamu kaaruian. 29#Yer. 6:16 Wuléngeno em pamuléngen si aiwuléng-Ku am palukamu wo mekisusuio mai a Yaku, ampa'paan Aku sama' wo ko'kos en até. Wo in taniitu kamu mendam oka ing kaeluran. 30Ampa'paan em pamuléngen si aiwuléng-Ku itu ra'ica uter wo em pamuléngen-Ku ka'i porak.”
Aktuálne označené:
Matius 11: TNT
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
En Taar Weru a nunuwu' é Tontemboan @ LAI 2018
