JON 2

A Njɛ Towo nụ Ụshɛpwụ Uko Ɛɛ Hiɛŋ Kena

1Tɛ ɛ hiɛŋ jitaala, ibɛ aa njɛ towo nụ ụshɛpwụ uko na ɛɛ hiɛŋ Kena na namɛ na cɛnjɛ tu Galili, bino Jisus namba apata. 2A suyanɛ du Jisus ne eseshi-iyi ubwa no towo ta ata. 3Aka na te meni mụ tụ'walụ ta afwafwa mu hwuwonowuŋ aŋ. Bino Jisus hiɛŋ bụ, A zasa ya meni mụ tụ'walụ ta afwafwa o.

4Ge Jisus jishijɛ bụ, bɛɛ hiɛŋ, Omu, to mo mbiso iyi nɛ Ngaa shɛ ma nda o, aka mi te ci shi o.

5Ibɛ po bino Jisus hiɛŋ miaụŋ-mu-ugondu ata, Iyi elele bɛɛ hi hiɛŋ, ga shɛ ibɛ ahiɛ njɛ.

6Shikwokwo shɛ na aa njɛ na atayɛ shi sheji apata shi cihiŋ, shɛ na aa nyashanjɛ shɛshɛshɛ nu gana na tu undwa we Eju wa nda. Okwokwo okwokwo a ya nhilwo mi yebi kwo kaa mu tatụ.

7Ge Jisus hiɛŋ aŋ, Shidongo ma meni no shikwokwo sha ata. Ee shidenji shu ga.

8Nazhɛ bɛɛ hiɛŋ aŋ, Sarɛ mu ma hwuwayɛ go maa hi peni iyɛri tụlagwụ.

Ee seleni bu ga. 9Aka na ti iyɛri ɛtɛ tụlagwụ hunganɛ meni ma ata mu jɛshɛrugwa ya meni mụ tụ'walụ ta afwafwa, mu na kaa bee mepi shi olugwo na maa banɛ, (ama miaụŋ-mu-ugondu na mu salajɛ meni ma ata tuba mi mepi). Nazhɛ iyɛri tụlagwụ suyanɛ bwolo-be-eyikwo, 10bɛɛ hiɛŋ bụ, Bụtụ bụtụ ba shana bɛɛ vwɛ meni mụ tụ'walụ ta afwafwa mi biye hiiŋ, aka na te e swe mee gembenji aŋ, nazhɛ ɛ vwɛ ya mu naa na mi ci shi mu na ata ụzhɛ. Ama bu sweci meni mụ tụ'walụ ta afwafwa mi biye tutu i ci aka ga.

11Ụrụhwajɛ#2:11 Ụrụhwajɛ: Kwo kaa, Useyida. uhiiŋ na ge Jisus njɛ nụ ụshɛpwụ ata ɛɛ hiɛŋ Kena na namɛ na cɛnjɛ tu Galili, bee mbiseni ụjɛrụma ubwa caakwụ ta, ibɛ po du eseshi-iyi ubwa tɛtanɛ bụ rishe.

12Na aba inɛ ɛtɛ, ge Jisus zwe nu Kapanaum, ubwa, no bino bwa, no ohongwu ubwa, keeni eseshi-iyi ubwa, aa jɛjɛ apata maa ijitɛ imbɛnɛ.#Mat 4:13

Ge Jisus Teni nu Umwono wa Agwatana

(Mat 21:12,13; Mak 11:15-17; Luk 19:45,46)

13Aka na ti Isene Tɛkashɛka ye Eju gwumwonu, nazhɛ ge Jisus munji bee zhe Jɛrusalɛm.#Ụban 12:1-27 14Baa kwụbɛ atwa na a sanga inɛ, na agwụdụ, nu nkwucimo na amɛ Umwono wa Agwatana, ta atwa na a nda usheyinji ukwuribi, ta a gɛgajɛ apata. 15Aka na tu baa njɛ udugwu ni ihwehwe, bee unzhi aŋ nu Umwono ata, ta agwụdụ aba, ti inɛ ya aba kpaaŋ, nazhɛ baa 'waŋtatanjɛ eteburu atwa na ga nda usheyinji ukwuribi keeni ukwuribi wa aba. 16Bɛɛ hiɛŋ atwa na a sanga nkwucimo, Sugo ma ijɛ epe. Ta nda ma Umwono Bishi mi umwono iyi tusanga o.

17Nazhɛ eseshi-iyi ubwa teyinje maa i 'nywotwo la ni Iwɛ ya Agwatana, yɛɛ hiɛŋ, Tɛzhɛgɛdana ti iwɛ Umwono bu ti zhɛ tu ma n ya.#Shɛzu 69:9

18Eju heŋteni Jisus, ɛɛ hiɛŋ, Ụrụhwajɛ imbe ɛbi zhɛ bu mo tu mbisono ta aba ndangana ijɛɛ?

19Ge Jisus jishijɛ aŋ, bɛɛ hiɛŋ, Hwuŋzo ma Umwono ga wa Agwatana, N zhɛ ma maanana uŋ na amɛ ijitɛ itɛtu.#Mat 26:61; 27:40; Mak 14:58; 15:29

20Eju jishijɛ bụ, ɛɛ hiɛŋ, Shiywa buhanda-na-shɛba-shi-cihiŋ, oo mo Umwono ga nazhɛ ee hwuwi uŋ tuma, ubwa hŋ ɛbi hiɛŋ, bi eri ba maanana na amɛ ijitɛ itɛtu gba?

21Ama iwɛ umwono na shɛ tu'waba tu bwa baa jɛmɛ. 22Ibɛ po aka na ti ge Jisus hiɛ baa banɛ no olugwo atwa na 'wi, nazhɛ eseshi-iyi ubwa teyinje maa bu mbiswo aŋ la iwɛ ɛtɛ, nazhɛ aa tɛtanɛ iwɛ nɛ Utakada Iwɛ ya Agwatana jɛmɛ keeni iwɛ nɛ ge Jisus jɛmɛ rishe.

Ge Jisus Mepi Shihaŋsa sha Atwa Kpaaŋ

23Aka na ti ge Jisus namɛ nu Jɛrusalɛm ni Isene ɛtɛ Tɛkashɛka, atwa ofwugwo tɛtanɛ bu rishe iwɛnɛ aa kwụbɛ arụhwajɛ na baa nda. 24Ama ge Jisus ni ikɛnyi ibwɛ tɛtanɛ shɛ aŋ rishe na ahaŋsa ubwa maa mama gangana aŋ o, iwɛnɛ ti bee mepi iyi nɛ namɛ na shɛmɛ sha atwa kpaaŋ. 25Ukekeshi te shi bu maa bụtụ be elele leshigeni bu tiseyida ta bụtụ o, iwɛnɛ ti bee mepi amɛ butugwumwa.

Aktuálne označené:

JON 2: RBT

Zvýraznenie

Zdieľať

Kopírovať