मरकुस 8
8
नालुं वेय्कुना मंदिक येसु गाटो दोसंतोर
(मत्तयाल 15:32-39)
1अव रोजकुने मरुंदि मल्का येसुनगा वेल्लेन लोकुल्क जमा आतुर. ओरगा तिनालय बतले मनाहिल्ले. अदुनहाटीं येसु ओना सिस्युल्कुन दग्गेर्क केय्सि, 2“ईर लोकुल्क नहगा मूड रोजकुनाल मंतुर, ईरगा तिनालय बतल हिल्ले. अदुनहाटीं नाक ई लोकुल्कुन हूळसि पापम अनपिच्चंता. 3इच्चुर लोकुल्क वेल्ले लक्कुटाल वातोर मंतुर. ननागिंटा ईर्कुन कर्वुने लोन लोहानय्ते, नड्डुम हर्दे बगानना कूलाबडनुर,” इंचि इत्तोर. 4अस्के, “ई उस्के बूमिते इच्चो वेल्ले लोकुल्कुंक हालानाल तिंडि बगाटाल तरा परकोम?” इंचि सिस्युल्क येसुंक जवाब हीतुर. 5अस्के, “मिहगा बच्चुं हारिं मंतां?” इंचि येसु ओर्कुन पूसकीतस्के, ओर, “एडुं हारिं मंतां” इंचि इत्तुर.
6पजा येसु मंदितुन हिळु बूमिपोर्रो उद्दा वेहतोर. आ एडुं हारिं पीसि पेनदुक दन्यवाद कीतोर. हारिन तुकडां कीसि, “ओर्क तूसि हीम्टु” इंचि सिस्युल्कुंक हीतोर. अस्के सिस्युल्कु मंदिकु तूसि हीतुर. 7ओरगा इच्चुं सिन्ना जिम्मांगुडा मत्तां. येसु अवुनहाटींगुडा पेनदुक दन्यवाद कीसि “लोकुल्कुंक तूसि हीम्टु” इंचि सिस्युल्कुंक आदेस हीतोर. 8अगा मत्तोर अंटोरगुडा पीरनिंडा तित्तुर. पजा मिगुल्ता हारि तुकडन जमा कीते, अव एडुं तट्टां निंडतां. 9-10अगा तित्तोरव्टे दग्गेरा-दग्गेरा नालुं वेय्कुना लोकुल्क मत्तुर. ओर अंटोर्कुन सार्ला कीसि, येसु बिराना ओना सिस्युल्कुनतोनि उंदि डोंगाते उद्दिसि दलमनुता एरियाक होत्तोर.
परिसिल्क येसुना पट्टु हूळंतुर
(मत्तयाल 16:1-4; लूकाल 11:16,29)
11पजा येसुना पट्टु हूळना इंचि, “निमे पेनदा अदिकारम पीसि वातिन इंचि नम्मालय, स्वर्गमताल माकु उंदि चिन्ह हुप्सा,” इंचि परिसिल्क ओन पूसकियालय दल्गतुर. 12अस्के येसु आत्माते जोरते नेस्किसि, “इद पीळितोर चिन्ह हुप्सा इंचि बारि इंतुर? नना मीक निजम वेहंतन, इद पीळितोर्क बदे चिन्ह हुपिच्मळ जर्गो,” इंचि इत्तोर. 13पजा ओर्कुन अग्गेन होळसि, डोंगाते उद्दिसि समुद्रमता हब्बेटा ओड्डुंक होत्तोर.
यहुदिल्कुनाल जेगर्ता मंटु
(मत्तयाल 16:5-12)
14सिस्युल्कु हारिं ओयालय मरुंगतुर. आनि ओरगा डोंगाते उंदे हारि मत्ता. 15अस्के येसु ओर्कुन इल्हा जेगर्ता कीतोर. “परिसिल्क आनि हेरोदना पुल्लटा पिंडिता बारेमते जेगर्ता मंटु,” इत्तोर. 16अद केंजसि, “मनागा अय्ते हारिं हिल्लें,” इल्हा इंचेके सिस्युल्कु ओर-ओरे वळ्ककुत्तुर. 17येसु अदुन एरपाट कीसि, “हारिं हिल्लें इल्हा विचारम मिमेट बारि कीसेक मंतिट? इदवेरदाकागुडा मीकु तेळिया हिल्लेना? एरपाट कीसेक हिल्लिरा? मीवा मनसु बंडा आताना? 18मीक कळ्कु मंचिगुडा हूळा परसेक हिल्लिरा? केव्क मंचिगुडा केंजा परसेक हिल्लिरा? मिमेट मति मर्गतिरा? 19नना हेय्युं वेय्कुना मंदिहाटीं हेय्युं हारिं उराहचि दोसतन, अस्के बच्चुं तट्टाना हारिं मिमेट जमा कीसि निहतिर?” इंचि पूसकीतोर. अस्के, “पन्नेंड तट्टां” इंचि ओर जवाब हीतुर. 20आनि “अल्हेने, एडुं हारिनतोनि नालुं वेय्कुना मंदि तित्तस्के, बच्चुं तट्टाना हारि तुकडां जमा कीतिर?” इंचि येसु पूसकीतोर. अस्के, “एडुं तट्टां” इंचि ओर वेहतुर. 21“अय्ते मीकु इंकागुडा तेळियसेक हिल्लेना?” इंचि येसु इत्तोर.
येसु बेतसेदा नाटेना गुड्डि मनकन बेस कींतोर
22ओर बेतसेदा इनना नाटे एव्ता पजा इच्चुर लोकुल्क वरोर गुड्डिन येसुनगा पीसि वासि, “निमे ईन इट्टा,” इंचि विनंति कीतुर. 23येसु आ गुड्डिना कय पीसि नाटेना पलाते ओतोर. ओसि गुड्डिना कळ्कुने उस्कतोर. पजा ओनपोर्रो कय इर्सि, “इंदके नीकु बतलन्ना दिस्सेक मंतना?” इंचि पूसकीतोर. 24अस्के आ गुड्डि पोर्रो हूळसि, “मनकालोर दिस्सेक मंतुर गानि ओर मराकु ताकताप मागुर-मागुर दिस्सेक मंतुर,” इंचि इत्तोर. 25अस्के येसु मर्रा उंदि मल्का ओना कय्क, आ गुड्डिना कळ्कुना पोर्रो इरतोर. ओर उंदेतीर हूळता पजा नदर वाता. ओन्क अन्नि साप-साप दिसालय दल्गतां. 26अस्के, “निमे नाटे होळियाकोंटा, सवरगा नीवा लोन होन,” इंचि येसु ओन लोहचीतोर.
येसुन “किरिस्तु” इंचि पत्रु ओप्कुंतोर
(मत्तयाल 16:13-20; लूकाल 9:18-21)
27येसु, ओना सिस्युल्क कैसरिया पिलिपि सहरता पकापीसि मत्ता नाह्कुने होत्तुर. होननेंके, “नना बोन आंदुन इंचि लोकुल्क इंतुर?” इंचि येसु सिस्युल्कुन पूसकीतोर. 28अस्के सिस्युल्क इल्हा वेहतुर. “इच्चुर इंतुर निमे बापतिस्मा हियना योहानुन आंदिन, इंका इच्चुर इंतुर निमे एलियाल आंदिन, इंका बोरो इंतुर निमे पेनदा कबुरतोरा लोप्पोटाल बोनो वरोन आंदिन,” इत्तुर. 29“अय्ते, नना बोन आंदुन इंचि मिमेट इंचेके मंतिट?” इंचि येसु ओर्कुन पूसकीतस्के, “निमे किरिस्तुन आंदिन,” इंचि पत्रु इत्तोर. 30अस्के, “नावा बारेमते बोर्के वेहमट,” इंचि येसु ओर्क गट्टिगा वेहतोर.
येसु ओना हामुरता बारेमते वेहंतोर
(मत्तयाल 16:21-28; लूकाल 9:22-27)
31पजा ओना सिस्युल्कुंक इल्हा कराहलय दल्गतोर. “यहुदि पेद्दाल्क, पेद्दा पेर्मालोर आनि दर्मसास्त्रम कराहना गुरुल्कुनाहेंदाल मनकना रूपमते पुटतोन नाकु तिप्पल्क अर्रापींता. ओर हय्साकोंटा आसि नाकुन हव्कानुर. गानि नना हासि मूड रोजकुंक मर्रा जीवाते तेदंतन,” इत्तोर. 32-33येसु इद पोल्लेतुन कुल्ला-कुल्ला वेहतोर. अय्ते पत्रु येसुन अलग ओसि रांगतोर. गानि येसु सिस्युल्कुनहेके तिरियसि हूळसि पत्रुन, “अरे देय्यम, नावा मुन्नेटाल पेय्सि होन. निमे मनकालोरा तेल्विते वळ्कसंतिन, पेनदा विचारमते वळ्कसेक हिल्लिन,” इंचि ओन रांगतोर.
34पजा येसु ओना सिस्युल्कुन आनि लोकुल्कुन ओनहेके केय्सि इल्हा वेहालय दल्गतोर, “ओक्कला बोरन्ना मनकल नावा पज्जो वायना इत्ते, ओर ओना पूरा इस्टाल्क होळसिसि सतता क्रुस तेह्कुंचि नावा पज्जो वायिर. 35बारित्ते, बोर अय्ते ओना जीवातुन पिसागोटालय हूळंतोर, ओर ओना जीवातुन पोगोटकुंतोर. गानि बोर अय्ते नाहाटीं आनि बेसता कबुरताहाटीं जीवा हींतोर, ओर ओना जीवातुन कापाळकुंतोर. 36ओक्कला मनकल पूरा दुनियातुन संपलिच्चि, ओना जीवातुन पोगोटकुत्ते ओन्क बता पायदा आंता? 37हिलाकोंटे मनकल ओना जीवाहाटीं बदला बतल हियानुर? 38बोगमतनमते, पापमते निंडिस मत्ता इद पीळितोर नड्डुम बोर अय्ते नाकुन, नावा पोल्लेन वेहालय सिग्गु अर्रंतोर, मनकना रूपमते पुटतोन नना बस्के अय्ते पवित्र दूतनतोनि, नावा बाबाना महिमाते वाकन, अस्के असोंटा मनकन नावोर इनालय ननागुडा सिग्गु अर्रंतन,” इंचि वेहतोर.
Aktuálne označené:
मरकुस 8: ESG
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© Wycliffe Bible Translators, Inc. All rights reserved.
