मरकुस 4
4
विज्जां वीताना कास्तकरि मनकना वेसुडि
(मत्तयाल 13:1-9; लूकाल 8:4-8)
1येसु मरुंदि मल्का गालिल समुद्रम ओड्डुनगा होंचि पेनदा पोल्लें कराहलय दल्गतोर. अस्के ओनगा वेल्लेटुर लोकुल्क जमा आताहेंका ओर उंदि डोंगा एक्किस उदतोर. लोकुल्क बारे बूमिपोर्रो नित्तिसि मत्तुर. 2अस्के ओर वेल्लेन पोल्लें लोकुल्कुंक वेसुडिं वेहासेक कराहतोर. उंदि वेसुडि इल्हा मत्ता.
3“केंजट, वरोर कास्तकरि मनकल विज्जां वीतालय पेय्स्तोर. 4ओर वीतनेंके इच्चुं विज्जां हरदगा अरतां, अस्के अवुन पिट्टें वासि पेर्सि तित्तां. 5इच्चुं विज्जां बंडाना गेर्सेपोर्रो अरतां. अगा तोळि एक्को हिलुवादानकु आ विज्जां बिराने मोलियतां. गानि हिह्कु लोप्पोळ्क होनवाहेंका पोळ्द पेय्स्तस्के अव वत्सि हासोत्तां. 6गानि हिह्कु लोप्पोळ्क होनवाहाटीं पोळ्द पेय्सि वेल्ले एद्दि आतस्के अव वतसि कर्विसि होत्तां. 7इंका इच्चुं विज्जां हाह्कुना पोदाने अरतां. हाह्कुना पोदां इरगा बेर्सि, अव विज्जन बेर्सा हिया हिल्लें, अदुनहाटीं पंटा पेय्सा हिल्ले. 8इच्चुं विज्जां बेसता जेगाते अरतां. अव बेस मोलियसि, बेर्सि बेस पंटा पेय्स्ता. बगा मुप्पै अंताल्क, बगा अरवै अंताल्क, बगा नूर अंताल्कुना पंटा पेय्स्ता,” इंचि वेसुडि महतोर. 9पजा मर्रा ओर्कुन, “बोर्कु केंजालय केव्क मंतां ओर केंजट,” इंचि येसु इत्तोर.
वेसुडिं वेह्चि वळ्काना कारनम येसु वेहंतोर
(मत्तयाल 13:10-17; लूकाल 8:9-10)
10येसु वरोरे मत्तद हूळसि अगा मत्तोरा लोप्पोटाल इच्चुर लोकुल्क आनि ओना पन्नेंड सिस्युल्कु ओनगा होंचि “ई वेसुडिता अर्तम वेहा,” इंचि येसुन इत्तुर. 11येसु ओर्कुन, “मीक अय्ते पेनदा राज्येमता बारेमता मर्ममतुन एरपाट कीकुनालय बुद्दि मंता, गानि पलातोर्कुंक बारे इद मर्मम तेळियालय वेसुडिने वेहा पींता.” 12बारित्ते,
“ओर हूळुळ अय्ते हूळंतुर,
गानि अदुन एरपाट किय्युर.
केंजुड अय्ते केंजांतुर,
गानि अद ओर्क तेळियो.
ओक्कला ओर एरपाट कीकुंचि मत्ते,
तेळियागोटकुंचि मत्ते
पेनदागा मल्सि वायेर,
पेन ओर्कुन मापि कियवळ,”
इंचि इत्तोर.
कास्तकरि मनकना वेसुडिता अर्तम
(मत्तयाल 13:18-23; लूकाल 8:11-15)
13मर्रा येसु ओर्कुन इल्हा इत्तोर. “मीक इद वेसुडिता अर्तम तेळिया हिल्लेना? इदे मीक तेळियाकोंटे इंका वेरे वेसुडिं मीक बल्हा तेळियानुं? 14इगे वीतानोर इत्ते पेनदा पोल्लेतुन वेरेतोर्क वेहानोर आंदुर. 15इच्चुर लोकुल्क विज्जां अरता हर्दा जेगातसंटोर आंदुर. ओर पेनदा पोल्लेतुन केंजांतुर, केंजतारित्ते देय्यम बिराना वासि ओर केंजतवुन तेंडसि पोहंता. 16विज्जां अरता बंडाना गेर्से जेगातसंटोर बोर इत्ते, बोर अय्ते पेनदा पोल्लेतुन केंजसि कुसिते बिराने ओप्कुंतुर. 17गानि ओरा मनसुने पेनदा पोल्लेता हिह्कु गट्टि पळुवाहाटीं कोन्नि रोजके विस्वासमते मनांतुर. पेनदा पोल्लेताहाटीं तिप्पल्क, कस्टाल्क वाते विस्वासमताल ओर बिराना लक्कु आंतुर. 18विज्जां अरता हाह्कुना पोदाना जेगातसंटोर बोर इत्ते, बोर अय्ते पेनदा पोल्ले केंजांतुर, 19गानि सम्सारमता रंदि, दनमता आस्ति, दिसतवंता गावाले इत्ता मनसु, इवन्नि मत्ताहाटीं पेनदा पोल्लेतुन ओनालोप्पो बेर्सा हिय्यों. पजा अद पोल्लेहेंदाल ओन्क बतल पायदा आयो. 20बोर अय्ते पेनदा पोल्लेतुन केंजसि, ओप्कुंचि बेस पायदा तरांतोर, ओर इत्ते, विज्जां अरता बेसता जेगातसंटोर आंदुर ओर मुप्पै अंताल्क, अरवै अंताल्क आनि नूर अंताल्क इल्हा पलांचंतोर,” इंचि इत्तोर.
वेडसिता वेसुडि
(लूकाल 8:16-18)
21येसु मरुंदि वेसुडि वेहतोर. “बोरे आयिर वेडसि निरिच्चि गंजुना हिळु मुच्चोर, कटुल हिळुगुडा इर्रोर. गानि वेल्गु दिसगोम इंचि दान उंदि दीसोडिपोर्रो इर्रंतोर. 22मक्किस मत्तव अन्नि दिस्सि अर्राकोंटा मन्नों, आनि मर्ममते मत्तव बवे पलाते अर्राकोंटा मन्नों. 23बोर्कु केंजालय केव्क मंतां ओर केंजट,” इंचि येसु इत्तोर.
24मर्रा येसु ओर्कुन इल्हा इत्तोर. “मिमेट बेस उसारते केंजट, बद कोल्ताते मिमेट हींतिरो, अदे कोल्ताते मीकु हियमळ जर्गंता, इंका दानकन्ना एक्कोगुडा हियमळ जर्गंता. 25बारित्ते, बोनगा अय्ते मंता, ओन्क पेन इंका हींता. गानि बोनगा अय्ते हिल्ले, ओनगा मत्तदुनगुडा पेन वापस एतकुन्नार,” इंचि इत्तोर.
विज्जां बेर्समळ
26मर्रा येसु इल्हा वेहतोर. “पेनदा राज्येम इल्हा मंता, वरोर मनकल ओना नेलिते विज्जां वीतंतोर. 27ओर नर्कळ्क मींडंतोर, पोद्दला तेल्विते मनंतोर. अद विज्जा मोलियसि बेर्स्सेकेन दांता. अद विज्जा बल्हा मोलियता, बल्हा बेर्सता इत्तद ओनकु तेळियो. 28बूमि दानद अदे पंटातुन पंडागोटंता. अद बल्हा इत्ते मोदाला मोल्का मोलियंता, कर्रे बेर्संता, पोट्टक वांता, हेन्नु पेय्सि पेडेक निंडंतां. 29गानि बस्के अय्ते पेडेक मुदरंतां अस्के नेलिता मालक पंटा कोतक वाता इंचि हेटेळ पीसि कोय्यंतोर.”
पेनदा राज्येम आवाल्कुना पेडेतसोंटद
(मत्तयाल 13:31-32,34-35; लूकाल 13:18-19)
30मर्रा येसु ओर्कु इल्हा वेहतोर, “पेनदा राज्येम बल्हा मनंता इंचि वेहकन? बद वेसुडि वेह्चि तेल्पिच्कन? 31पेनदा राज्येम आवाल्कुना उंदि पेडेतसोंटद आंद. अद बूमिपोर्रो वीततस्के, अन्नि पेडेकुंकन्ना सिन्ना पेडे मनंता. 32गानि अद बेर्सतस्के अगा मनना अन्नि कुसिर कायाना मराकुंकन्ना पेद्दा मरा आंता. दाना पंगां पोळ्गुंक-पोळ्गु बेर्सि, पिट्टें इंका नीडाते गूडां किया परांतां,” इंचि इत्तोर.
33येसु इसोंटव बच्चुंगो वेसुडिं वेह्चि, ओर्क पेनदा पोल्लें तेळियानाल वेहुंदुर. 34वेसुडि वेहाका येसु ओर्कु बतले वेहाकोंदुर. गानि सिराप ओना सिस्युल्क मत्तस्के अव वेसुडिना अर्तम ओर्क तेळियागोट्सि वेहुंदुर.
येसु वळि दुमारमतुन आपंतोर
(मत्तयाल 8:23-27; लूकाल 8:22-25)
35अद रोज पोळ्द होनना वेलाते, “मनम हब्बेटा बाजुंक दाकोम दट,” इंचि येसु ओना सिस्युल्कुन इत्तोर. 36ओना सिस्युल्क अगाटा मंदितुन अग्गेन होळसि, येसु उद्दिस मत्ता डोंगाते उद्दिस होनालय पेय्सतुर. ओरा पज्जो इंकिच्चुं डोंगांगुडा पेय्सतां. 37अस्के उंदि पेद्दा वळि-दुमारम वाता. पेद्दा-पेद्दा तळां डोंगाक दल्गिसि एर निंडालय दल्गता. 38गानि येसु डोंगाता पज्जोटा बाजुंक होंचि मेत्तापोर्रो मींडसेक मत्तोर. अस्के सिस्युल्कु येसुन तेहचि, “गुरु! मनम नासडेम आसि होनिनागानि नीकु बतल पिकिर हिल्लेना?” इंचि इत्तुर. 39अस्के ओर तेदसि, वळि-दुमारमतुन आनि समुद्रमतुन, “आगा, चुपचाप मन” इंचि गद्दरिच्तोर, अस्के वळि-दुमारम मग्गिसि, अगा पूरा सांत आता. 40अस्के येसु सिस्युल्कुन, “मिमेट बारि वेरियंतिर? मीकु गिच्चचोगुडा विस्वासम हिल्लेना?” इंचि इत्तोर. 41ओर इरगा वेरियसि, “ईर बोर आंदुर? वळि, समुद्रमगुडा ईना पोल्ले केंजंता,” इंचेके ओर-ओरे वळ्ककुत्तुर.
Aktuálne označené:
मरकुस 4: ESG
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© Wycliffe Bible Translators, Inc. All rights reserved.
