Dalaana 3
3
Lígí ɓëeꞌ a ɓeleɓi meeya Eden
1Bín fë, ɗeef goŋ daa húmú lukki lah nuf di raɓɓa luufa sak Koo-Yahwee ra ɓéeɓ ; ɗi acce won ɓelaa tih : « Koope wonte ron kah-kah biti ɗon ɓanuy naa ñam koy kilikka meeya ɓéeɓ ë ? » 2Ɓelaa tahte won goŋ fa tih : « Fun mínú nëe ñam koyyi kilikka meeya ɓéeɓ, 3ndaa koyyi tal kilka hom leelii meeya ra, Koope won fun na tih : “Ngënë ñëmí në te ngënë léɓí në sah, toñeh húl ay ron naa ɗeefe.” » 4Tígí daaha, goŋ fa tahte won ɓelaa tih : « Ëe-ëeꞌ, ɗaa neh, ɗon ii húl ! 5Koope yúh yúhë biti kut ɗon ñam na raa, ɗon ay yeele ndín, ɗon madaꞌ a ri di yúhsëꞌ yin wun a yin ɓos. »
6Tígí daaha, ɓelaa otte biti koy kilka neɓpe yeel, te waɗtee ɗok, te ɓekaꞌ ow biti fu ñam na raa, afu ay kúnsëh, fu yúh ɓéeɓ nen. Ɓelaa sakke na koy kilka, ñampe. Bi ɓani ƴaala daa húmú, ɗi yeɗte ri na, ƴaala ñampe ɓal. 7Ñamuu wa na, affi wa yíppée kúnsëh, wa olute biti wa homu faan holoŋ. Tígí daaha, wa ɓeyute i saaf fíigë#3.7 fíigë : tal kilki madaꞌ a tal een., tapalsuute ndíimú, haamuute.
8Gílíyëꞌ Koo sos-naꞌin, wa keluu yodadi Yahwee na tílëesëh meeya, wa múkëyúté, ɗapuute filiɓ kilikka. 9Ndaa Koo-Yahwee dëekíɗté ɓëyí ƴaala, meelte ri won tih : « Fu di ɗeh ? » 10Ɓëeꞌ tahte won tih : « Mi keloh yodadu meeya, te biti mi hom faan holoŋ, mantee neeh, mi ɗapohte. » 11Koope won ɗi tih : « Fu yúhëꞌ biti fu hom faan holoŋ ɗíh ? Fu ñampe na koy kilka kaddaꞌ mi ro ra woo ? » 12Ɓëeꞌ tahte won tih : « Ɓelaa kom fu soꞌ ra daa on soꞌ na koy kilka, mi ñampe. »
13Koo-Yahwee won ɓelaa tih : « Haalaꞌ yi níi fu na paŋ yii bah ? » Ɓelaa tahte won tih : « Goŋ fa daa nofaꞌ soꞌ níi mi ñampe na. »
14Tígí daaha, Koo-Yahwee won goŋ fa tih :
« Fu alkohte filiɓ raɓɓa luufa a ƴee faamma ɓéeɓ
af yee paŋ fu baa ra.
Fu ƴahti tíl rëe, fay fasee fasoo,
te pesu ɓéeɓ fay ŋaare feey.
15May yah hanndal ki ɗoni ɓelaa,
a hanndal ki talu a tali.
Tali ay poo afu,
te fay rii ɗoɓ púgúlúɓ. »
16Koope antee yíssëh ɓelaa na won ɗi tih :
« May paŋ níi fu mok lool biti fu hen loo,
te fu ƴahti lah koy raa, ay misik níi misik.
Fay fahee leɓohi ƴaalu, te ri nay roo ílífé. »
17Ɗi míllëꞌ ɓëyí ƴaala na, won ɗi tih : « Fu ñeete woni ɓeleɓu níi fu ñampe na koy kilka kaddaꞌ mi ro ra neh a ?
Dalaꞌte woteh, feey fa lecce
af yee paŋ fu ra.
Yee tas fíi rë, fay mok
balaa fu ɗúhíɗ në yii nay fuu ñame.
18Feey fa ay roo paaliɗ tal yëlúp a ñobitaan,
te fay pesee iña na línú meeyya ra.
19Fay pesee opaꞌu
níi bín nimilaa fu feey fa yugusuu fu ra,
ndée fu yugusuu a feey,
te fay wëegís fu henaat feey. »
20Ɓëeꞌ hínú Aadama. Ɗi yeɗte ɓeleɓi tii Aawa (daa ri : pes), biti daa ri ciffi ɓëyí në pes ɓéeɓ.
21Koo-Yahwee yugusiɗte Aadama a ɓeleɓi búuɓ hun, ɓekke wa, 22antee won nufi tih : « Ole ! Ow madaꞌte a yen leegi, di yúhsëꞌ yin wun a yin ɓos. Kon ɗi ɓanay yeril yaꞌi níi ri sake na koy kilka na onaꞌ pes ra ; ɗi ɓanay naa ñam, toñeh ɗi ay pese faraah. »
23Tígí daaha, Koo-Yahwee antee ɗúhíɗ ɓëeꞌ a ɓeleɓi meeya Eden, wa saañ líné feey fa húmú yugusuu wa ra.
24Filoon fi bee líkëꞌ rí wë meeya ra, Koo-Yahwee ɓeɓpe i sérúbím#3.24 sérúbím : Wa i yin ti malaaka mbée raɓɓi lahuu kanam ow a paɓ, te homuu fíi Koo. Saame Esekiyel 10.1-22., tíkké wë ílí meeya Eden, di púlëen naꞌ. Wa habu jépíllí na ñah kíi, na fililoh hatinna ɓéeɓ. Daa wa na wohu waala saañ kilka na onaꞌ pes ra.
Aktuálne označené:
Dalaana 3: NDV
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© Wycliffe Bible Translators, Inc. All rights reserved.